1-2. (a) Ndi mini zwine zwa ri thusa u konḓelela? Ṱalutshedzani. (b) Ri ḓo haseledza mini kha ino thero?

“THAIDZO ye nda vhuya nda ṱangana nayo, ndo vha ndi nga si kone u i kunda nga ndoṱhe.” No no vhuya na ḓipfa nga yeneyo nḓila? Vhunzhi hashu ro no ḓipfa nga u ralo. Khamusi ni nga amba enea maipfi musi ni tshi humbula nga ha nḓila ye na vha ni tshi khou lwala ngayo na ye na konḓelela ngayo musi no felwa. Musi ni tshi tou sedza, ni a kona u vhona uri no vha ni tshi ḓo vha ni songo zwi kona arali Yehova a vhe a songo ni thusa nga muya wawe mukhethwa une wa ni ṋea “maanḓa a fhiraho o ḓoweleaho.”—2 Vhakor. 4:7-9.

² Muya mukhethwa u nga dovha wa ri thusa uri ri si ṱuṱuwedzwe nga muya wa shango. (1 Yoh. 5:19) Zwiṅwe hafhu, ri tea u lwisana na “mimuya mivhi.” (Vhaef. 6:12) Kha ri haseledze nḓila mbili dzine muya mukhethwa wa ri thusa ngadzo kha thaidzo iṅwe na iṅwe. Nga murahu, ri ḓo haseledza uri ndi mini zwine riṋe ra tea u zwi ita uri muya mukhethwa u kone u ri vhuyedza nga vhuḓalo.

3. Yehova u ri thusa hani u konḓelela milingo?

³ Muya mukhethwa wa Yehova u ri ṋea maanḓa a u ita zwine ra fanela u ita, hu sa londwi milingo ine ra ṱangana nayo. Muapostola Paulo o vha a tshi zwi ḓivha uri o kona u bvela phanḓa a tshi shumela Yehova ngauri o vha a tshi ḓitika nga “maanḓa a Kristo.” (2 Vhakor. 12:9) Kha lwendo lwawe lwa vhuvhili lwa vhurumiwa, o shuma vhukuma musi a tshi huwelela nahone o dovha a ita mushumo une wa ḓo mu thusa nga zwa masheleni. Musi e Korinta, o vha a tshi dzula ha Akwila na Prisila vhe vha vha vha tshi runga madennde. Paulo o vha a tshi ita a tshi shuma navho ngauri na ene o vha e murungi wa madennde. (Mish. 18:1-4) Muya mukhethwa  wo mu ṋea maanḓa a u ita wonoyo mushumo na a u huwelela.

4. U ya nga 2 Vhakorinta 12:7b-9, Paulo o ṱangana na thaidzo ifhio?

⁴ Vhalani 2 Vhakorinta 12:7b-9. Kha idzi ndimana, Paulo o vha a tshi khou amba mini musi a tshi ri u khou lwisana na “mupfa ṋamani”? Arali mupfa wa ni ṱhavha, wa ndondomela ṋamani, ni nga pfa vhuṱungu vhuhulu vhukuma. Nga zwenezwo, Paulo o vha a tshi khou amba uri u na thaidzo. O vhidza yeneyo thaidzo uri ndi “muruṅwa wa Sathane” ane a dzula a tshi khou mu ‘rwa.’ Sathane na madimoni awe vha nga vha vhe si vhone vho bveledzaho thaidzo ye Paulo a vha a tshi khou ṱangana nayo ine ya vha mupfa ṋamani. Fhedzi musi vha tshi ṱhogomela uri u na mupfa ṋamani, vho ṱoḓa u u ndondomedza uri vha engedze vhuṱungu he a vha a tshi khou vhu pfa. Paulo o ita mini?

5. Yehova o fhindula hani thabelo dza Paulo?

⁵ U thomani Paulo o vha a tshi ṱoḓa uri Yehova a mu bvise “mupfa” u re ṋamani yawe. O ri: “Ndo humbela Murena [Yehova] luraru . . . uri a u vangule.” Fhedzi mupfa wo ḓi dzula u hone. Naa zwenezwi zwi amba uri Yehova ho ngo fhindula thabelo dza Paulo? Hai. O dzi fhindula. Yehova ho ngo fhelisa thaidzo ye Paulo a vha e nayo, fhedzi o mu ṋea maanḓa a u i konḓelela. Yehova o ri: “Maanḓa anga a vhonala tshoṱhe kha a shayaho nungo.” (2 Vhakor. 12:8, 9) Paulo o bvela phanḓa o takala nahone e na mulalo a tshi thuswa nga Yehova.—Vhafil. 4:4-7.

6. (a) Yehova a nga fhindula hani thabelo dzashu? (b) Maṅwalo a re kha phara a ni khwaṱhisa hani?

⁶ No no vhuya na humbela Yehova uri a fhelise thaidzo ine na vha nayo u fana na Paulo? Naa no no vhuya na rabela Yehova lunzhi nga ha thaidzo ine na vha nayo, nahone musi ni tshi vhona i sa fheli kana i tshi khou engedzea na vhona u nga Yehova ha ni funi? Arali zwo ralo, humbulani nga ha tsumbo ya Paulo. Yehova o fhindula thabelo dza Paulo, ḓivhani uri na dzaṋu u ḓo dzi fhindula. Yehova a nga kha ḓi sa fhelisa thaidzo ine na vha nayo, fhedzi u ḓo shumisa muya mukhethwa u ni ṋea maanḓa a u i konḓelela. (Ps. 61:3, 4) Ni nga “poselwa fhasi,” fhedzi Yehova ha nga ni laṱi!—2 Vhakor. 4:8, 9; Vhafil. 4:13.

7-8. (a) Muya mukhethwa u fana hani na muya u vhudzulaho zwavhuḓi? (b) Petro o ṱalusa hani nḓila ine muya mukhethwa wa shuma ngayo?

⁷ Ndi ifhio iṅwe nḓila ine muya mukhethwa wa ri thusa ngayo? Ri nga fanyisa muya mukhethwa na muya u vhudzulaho zwavhuḓi. Tshikepe tshi nga swika hune tsha khou ya hone arali tsha livhiswa nga muya wavhuḓi naho hu na ḓumbu lwanzheni. Nga hu fanaho, muya mukhethwa u ri thusa u bvela phanḓa ri tshi shumela Yehova hu sa londwi thaidzo dzine ra ṱangana nadzo u swikela ri tshi ḓo swika shangoni ḽiswa.

⁸ Muapostola Petro o vha o ḓowelana na zwikepe ngauri o vha e murei wa khovhe. Khamusi ndi ngazwo o ṱalusa nḓila ine muya mukhethwa wa shuma ngayo a tshi shumisa maipfi ane a tshimbidzana na zwikepe. O ṅwala uri: “Vhuporofita a ho ngo vha hone nga u funa ha muthu, hone vhathu vho amba zwi tshi bva ha Mudzimu musi vha tshi livhiswa nga muya mukhethwa.” Ipfi ḽa Lugerika ḽo ṱalutshedzelwaho nga uri “livhiswa” ḽi amba u tshimbidzwa.—2 Pet. 1:21.

9. Musi Petro a tshi shumisa ipfi “livhiswa” ḽine ḽa amba tshimbidzwa, o vha a tshi khou ṱoḓa uri hu ḓe mini muhumbuloni washu?

⁹ Musi Petro a tshi shumisa ipfi “livhiswa” ḽine ḽa amba u tshimbidzwa, o vha a tshi khou ṱoḓa uri hu ḓe mini muhumbuloni washu? Luka muṅwali wa bugu ya Mishumo, o shumisa maipfi a fanaho musi a tshi ṱalusa tshikepe tshe tsha vha tshi tshi khou “vhudzulwa” nga muya. (Mish. 27:15) Muṅwe muṱoḓisisi o amba uri musi Petro a tshi ṅwala nga ha nḓila ye muya mukhethwa wa livhisa ngayo vhaṅwali vha Bivhili, o shumisa “ḽimethafore ḽi kungaho ḽine ḽa tshimbidzana na  zwithu zwa maḓini,” zwi ngaho zwikepe. Zwe Petro a vha a tshi khou amba ndi uri vhaṅwali vha Bivhili vho livhiswa nga muya mukhethwa u fana na tshikepe tshi tshi livhiswa nga muya u vhudzulaho. Onoyo muṱoḓisisi o ri: “Zwo vha zwi tshi tou nga vhaporofita vho ṱharamudza seila ḽa tshikepe.” Yehova o ita zwe a vha a tshi tea u zwi ita. O vha ṋea muya mukhethwa. Samusi kholomo hu tshi vuswa i ḓivusaho, vhaṅwali vha Bivhili vho ita zwe vha tea u ita. Vho tenda muya mukhethwa u tshi vha livhisa.

10-11. Ndi zwifhio zwithu zwivhili zwine ra tea u zwi ita uri ri livhiswe nga muya mukhethwa? Fanyisani.

¹⁰ Ri a zwi ḓivha uri tshifhinga tsha u ṅwala Bivhili tsho fhira. Naho zwo ralo, muya mukhethwa u kha ḓi ṋea vhathu vha Mudzimu maanḓa. Yehova u kha ḓi thusa vhathu vhawe. U itela uri muya mukhethwa u ri thuse hu na zwine ra tea u zwi ita. Ri tea u ita mini?

¹¹ Kha ri zwi fanyise nga heyi nḓila. Hu na zwithu zwivhili zwine mutshimbidzi wa tshikepe a tea u zwi ita uri tshikepe tshawe tshi livhiswe nga muya u vhudzulaho. Tsha u thoma, u tea u vhea tshikepe tshawe hune muya wa khou rwela hone. Zwi tou vha khagala uri tshikepe tshawe a tshi nga tshimbili arali tsho sokou dzula vhuimazwikepe hune ha vha kule na hune muya wa khou rwela hone. Tsha vhuvhili, u tea u ṱharamudza tshoṱhe maseila a tshikepe tshawe. Zwi tou pfala uri tshikepe tshawe tshi ḓo tshimbila arali maseila atsho a tshi khou vhudzulwa nga muya. Nga hu fanaho, ri nga kona fhedzi u bvela phanḓa ri tshi shumela Yehova arali ri tshi tenda u livhiswa nga muya wawe mukhethwa. Uri muya mukhethwa u kone u ri thusa, hu na zwithu zwivhili zwine ra tea u zwi ita. Tsha u thoma, ri tea u vha hune muya mukhethwa wa vha hone nga u ita mishumo ine Mudzimu a ṱoḓa ri tshi i ita. Tsha vhuvhili, ri tea u ṱharamudza maseila tshoṱhe nga u ita yeneyi mishumo nga hune zwa nga konadzea ngaho. (Ps. 119:2) Musi ri tshi ita zwenezwo, muya mukhethwa u ḓo ri thusa u konḓelela milingo na u tovholwa, ra vhuya ra swika shangoni ḽiswa.

12. Ndi mini zwine ra ḓo zwi haseledza zwino?

 ¹² U swika zwino ri tshee ro haseledza nḓila mbili dzine muya mukhethwa wa ri thusa ngadzo. Ro guda uri muya mukhethwa u ri ṋea maanḓa nahone u ri thusa uri ri dzule ri tshi fhulufhedzea musi ri tshi khou ṱangana na milingo. U dovha wa ri livhisa nahone wa ri thusa uri ri dzule ri nḓilani i isaho vhutshiloni vhu sa fheli. Zwino ri ḓo haseledza nḓila nṋa dzine dza ri thusa uri ri vhuyelwe nga muya mukhethwa nga vhuḓalo.

13. U ya nga 2 Timotheo 3:16, 17, Maṅwalo a nga ri thusa hani, fhedzi ndi zwifhio zwine riṋe ra fanela u ita?

¹³ Nḓila ya u thoma, gudani Ipfi ḽa Mudzimu. (Vhalani 2 Timotheo 3:16, 17.) Ipfi ḽa Lugerika ḽo ṱalutshedzelwaho nga uri “hevhedzwa” ḽi amba uri “Mudzimu o vhudzulela.” Mudzimu o shumisa muya mukhethwa u “vhudzulela” mihumbulo yawe kha vhaṅwali vha Bivhili. Musi ri tshi vhala Bivhili na u elekanya nga hayo, vhulivhisi ha Mudzimu vhu dzula mihumbuloni yashu. Zwine ra zwi guda Bivhilini zwi ita uri ri tshile u tendelana na zwine Mudzimu a zwi funa. (Vhaheb. 4:12) Fhedzi u itela uri muya mukhethwa u kone u ri vhuyedza nga vhuḓalo, ri tea u vha na tshifhinga tshine ra tshi vhetshela thungo tsha u guda Bivhili na u humbulisisa nga zwe ra zwi guda. Musi ri tshi ita zwenezwo, zwine ra amba na u ita zwi ḓo vha zwi tshi ṱuṱuwedzwa nga zwe ra zwi guda Bivhilini.

14. (a) Ndi ngani ri tshi nga ri miṱanganoni ndi fhethu hune muya wa khou vhudzula hone? (b) Ri nga sumbedza hani uri ri ya miṱanganoni ro ṱharamudza maseila ashu?

¹⁴ Nḓila ya vhuvhili, gwadamelani Mudzimu no kuvhangana. (Ps. 22:22) Ri nga ri miṱanganoni ndi fhethu hune muya wa khou vhudzula hone. Muya mukhethwa u hone miṱanganoni. (Nzumb. 2:29) Ndi ngani ri tshi ralo? Ndi ngauri musi ro kuvhangana na vhahashu, ri a rabela u itela u humbela muya mukhethwa, ra imba nyimbo dzo thewaho Ipfini ḽa Mudzimu nahone ri thetshelesa vhulivhisi ho thewaho Bivhilini vhune ra vhu ṋewa nga vhahashu vho khethwaho nga muya mukhethwa. Muya mukhethwa u dovha wa thusa vhahashu vha tshifumakadzini uri vha kone u ita nyambo dze vha ṋewa. Naho zwo ralo, u itela uri muya mukhethwa u ri vhuyedze nga vhuḓalo, ri tea u ya miṱanganoni ro lugiselela zwavhuḓi nahone ri shele mulenzhe nga u fhindula. Musi ri tshi ita nga u ralo, ri ḓo vha ri tshi khou sumbedza uri ri khou ya miṱanganoni ro ṱharamudza maseila ashu.

15. Muya mukhethwa u ri thusa hani musi ri tshi huwelela?

¹⁵ Nḓila ya vhuraru, huwelelani. Musi ri tshi shumisa Bivhili ri tshi khou huwelela, ri vha ri tshi khou tendela muya mukhethwa u tshi ri thusa. (Vharoma 15:18, 19) Naho zwo ralo, u itela uri muya mukhethwa u ni vhuyedze nga vhuḓalo, ni tea u huwelela tshifhinga tshoṱhe na u shumisa Bivhili nga hune zwa nga konadzea ngaho. Zwiṅwe zwine zwa nga ri thusa u ambedzana zwavhuḓi na vhathu tsimuni ndi u shumisa tsumbo dza u thoma nyambedzano dzine dza vha kha Tshibugwana Tsha Muṱangano Wa Vhutshilo Na Vhuḓinḓa Hashu.

16. Ri nga wana hani muya mukhethwa nga ho livhaho?

¹⁶ Nḓila ya vhuṋa, rabelani. (Mat. 7:7-11; Luka 11:13) Uri ni wane muya mukhethwa, ni nga u humbela nga ho livhaho kha Yehova. A hu na tshithu tshine tsha nga thivhela Yehova uri a pfe thabelo dzashu kana u thivhela uri muya mukhethwa u swike kha riṋe. Ri nga wana muya mukhethwa naho ri dzhele nahone a hu na zwine Sathane a nga ita u thivhela muya mukhethwa uri u swike kha riṋe. (Yak. 1:17) Ri tea u rabela hani uri ri kone u vhuyelwa nga muya mukhethwa? U itela u fhindula yeneyi mbudziso, kha ri sedze tshifanyiso tshi wanalaho fhedzi kha Evangeli ya Luka u itela u guda zwo engedzeaho nga ha thabelo. *

17. Tshifanyiso tshe Yesu a tshi shumisa tshi re kha Luka 11:5-9, 13 tshi ri gudisa mini nga ha thabelo?

¹⁷ Vhalani Luka 11:5-9, 13. Tshifanyiso tsha Yesu tshi re kha Luka tshi sumbedza nḓila ine ra tea u humbela ngayo muya mukhethwa. Muthu we ha ambiwa nga hae kha tshifanyiso, o wana zwe a vha a tshi khou ṱoḓa “nga nṱhani ha u futelela hawe nga tshivhindi.” Ho ngo ofha u humbela khonani yawe uri a mu thuse naho ho vha hu vhusiku. (Sedzani study note tsha “u futelela . . . nga tshivhindi” kha ndaedzi ya Tshibugwana Tsha Muṱangano tsha July 2018.) Yesu o amba nḓila ine tshenetsho tshifanyiso tsha tshimbidzana ngayo na u rabela. O ri: “Dzulani ni tshi humbela, ni ḓo ṋewa; dzulani ni tshi ṱoḓa, nahone ni ḓo wana; dzulani ni tshi khokhonya, nahone ni ḓo vulelwa.” Riṋe ri guda mini? Ri guda uri ri tea u rabela ri sa neti uri ri kone u wana muya mukhethwa.

18. U ya nga tshifanyiso tsha Yesu, ndi ngani ri tshi nga vha na vhuṱanzi ha uri Yehova u ḓo fhindula thabelo dzashu?

¹⁸ Tshifanyiso tsha Yesu tshi dovha tsha ri thusa uri ri vhone uri ndi ngani Yehova a tshi ḓo ri ṋea muya mukhethwa. Muthu we ha ambiwa nga hae kha tshifanyiso o vha a tshi khou ṱoḓa u ṱanganedza vhaeni vhawe zwavhuḓi. O vhona zwi zwa ndeme uri vhaeni vhawe vha ḽe naho vho swika vhusiku, fhedzi ho vha hu tshi pala khwali. Yesu o amba uri khonani yawe yo mu ṋea zwiḽiwa nga nṱhani ha uri ho ngo litsha u humbela. Yesu o vha a tshi khou ṱoḓa uri ri pfesese mini? Arali muthu a re na tshivhi a tshi kona u thusa khonani yawe nge a humbela a sa neti, hu pfi mini nga Yehova ane a vha Khotsi ashu wa lufuno? Vhane vha humbela muya mukhethwa kha Yehova vha sa neti, u ḓo vha ṋea. Nga zwenezwo, ri nga rabela ri na vhuṱanzi ha uri Yehova u ḓo fhindula thabelo dzashu.—Ps. 10:17; 66:19.

19. Ndi mini zwine zwa ita uri ri vhe na vhuṱanzi ha uri ri ḓo kunda?

¹⁹ Ri nga vha na vhuṱanzi ha uri Sathane a nga si kone u ri kunda naho a lingedza nga nḓila dzoṱhe. Ndi ngani ri tshi ralo? Ndi ngauri hu na nḓila mbili dzine muya mukhethwa wa ri thusa ngadzo. Ya u thoma, u ri ṋea maanḓa ane a ri thusa u kunda milingo. Ya vhuvhili, ndi muya une wa vhudzula maseila a zwikepe zwashu, wa ri thusa u bvela phanḓa ri tshi shumela Yehova ro lavhelela u tshila tshoṱhe shangoni ḽiswa. Kha ri ḓiimisele u tenda muya mukhethwa u tshi ri thusa nga vhuḓalo.