VHUNZHI ha vhahashu vhe tshifhingani tsho fhelaho vha pfulutshela kha maṅwe mashango u yo shumela tshelede, zwino vho vhuyelela mashangoni a havho. Vho pfulutshela fhethu hune ha vha na ṱhoḓea khulwane ya vhahuweleli vha Muvhuso ngauri vha funa Yehova na vhathu. (Mat. 22:37-39) Ndi zwifhio zwe vha ḓidzima zwone nahone Yehova o vha fhaṱutshedza hani? Kha ri ambe nga hazwo nga u sedza shango ḽa Cameroon ḽi re vhukovhela ha Afurika.

Nga 1998, muṅwe wahashu ane a pfi Onésime o pfuluwa shangoni ḽa hawe ḽa Cameroon, a ya a dzula kha ḽiṅwe shango lwa miṅwaha ya 14. Ḽiṅwe ḓuvha musi e muṱanganoni wa Vhukriste a pfa tshiṅwe tshifanyiso tshi ambaho nga mushumo wa u huwelela. Tshiambi tsho ri: “Arali khonani mbili dzi tshi khou rea khovhe fhethu huvhili hu sa fani nahone muṅwe a tshi khou fasha khovhe nnzhi u fhira muṅwe, naa khonani ine ya sa khou fasha khovhe nnzhi i nga si pfulutshele hune muṅwe a khou wana khovhe nnzhi?”

Tshenetsho tshifanyiso tsho ita uri Onésime a humbule u vhuyelela Cameroon he vhathu vhanzhi vha vha vha tshi ṱoḓa u guda Bivhili uri a thuse vhahuweleli vha henefho. Fhedzi o vha e na mbilaelo. Naa u ḓo dovha a ḓowela u dzula Cameroon samusi o vha o no ḓowela u dzula kha ḽiṅwe shango lwa miṅwaha minzhi? Uri Onésime a vhone arali a tshi ḓo zwi kona, o ya a dala Cameroon miṅwedzi ya rathi. Nga 2012 o mbo ḓi vhuyelela Cameroon lwa tshoṱhe.

Onésime u ri: “Zwo ṱoḓa uri ndi ḓowele mufhiso wa henefho na matshilele a hone. Zwo ṱoḓa uri ndi dovhe ndi ḓowele u dzula kha bannga Holoni.” A tshi zwi amba a tshi khou sea, u ri: “Fhedzi musi ndi tshi livhisa ṱhogomelo kha dzinyambo, ndo ya ndi tshi hangwa zwiḽa zwidulo zwa vhuphuvhephuvhe zwa Holo dze nda vha ndi tshi ya khadzo.”

Nga 2013, Onésime a vhinga Géraldine, we a vha o vhuya Cameroon o no fhedza miṅwaha ya ṱahe a tshi dzula kha ḽa Fura. Yehova o vha fhaṱutshedza hani nge vha vhea mushumo wawe phanḓa vhutshiloni havho? Onésime u ri: “Vhuvhili hashu ro mbo ḓi ya Tshikoloni tsha Vhahuweleli vha Muvhuso, ra ya ra shuma Bethele. Mahoḽa ho lovhedzwa vhagudiswa vha Bivhili vha 20 tshivhidzoni tshashu. Ndi pfa u nga ndo swika fhethu hune nda nga ‘rea’ khovhe nnzhi.” (Marko 1:17, 18) Géraldine u engedza nga uri: “Ndo fhaṱutshedzwa nga nḓila ye nda vha ndi songo i lavhelela.”

Judith o vha o pfulutshela Amerika, fhedzi a tshi funa u shumela Yehova nga ho engedzeaho. U ri: “Musi ndo ya hayani Cameroon u dala, ndo vha ndi tshi thoma pfunzo nnzhi dza Bivhili. Musi madalo a tshi fhela, ndo vha ndi tshi lila ngauri ndo vha ndi tshi tea u dzi sia.” Fhedzi Judith o vha a tshi teledza u vhuya Cameroon. Mushumo wawe wo vha u tshi mu holela vhukuma lwe a  vha a tshi kona u rengela khotsi awe mishonga ye vha vha vha tshi i ṱoḓa Cameroon. Fhedzi Judith a fhulufhela Yehova nahone a vhuyelela Cameroon. U ri o vha a tshi ṱuvha zwithu zwe a vha a tshi ḓiphiṋa ngazwo musi a tshi dzula Amerika. A rabela Yehova uri a mu thuse uri a ḓowele nahone a ṱuṱuwedzwa nga mulavhelesi wa ḽiisela na mufumakadzi wawe.

Musi Judith a tshi humbula nḓila ye zwithu zwa vha ngayo musi a tshi vhuyelela Cameroon u ri: “Nga miṅwaha miraru fhedzi, ndo takadzwa nga u thusa vhathu vhaṋa uri vha lovhedzwe.” Judith a vha muvulanḓila o khetheaho. Ṋamusi, ene na munna wawe Sam-Castel vha ita mushumo wa u dalela zwivhidzo. Fhedzi ho itea mini kha khotsi a Judith? Ene na muṱa wahawe vho kona u wana sibadela kha ḽiṅwe shango tshe tsha badelela muaro wa khotsi awe. Zwi takadzaho ndi uri wonoyo muaro wo tshimbila zwavhuḓi.

Muṅwe wahashu a no pfi Victor o pfulutshela Canada. Musi o no vhala Tshiingamo tshi ambaho nga pfunzo ya nṱha, a humbula nga ha u dzhena hawe tshikolo. O litsha pfunzo yawe ya yunivesithi, a ya a gudela zwiṅwe zwa tshifhinga tshipfufhi. U ri: “Zwo ita uri ndi ṱavhanye u wana mushumo, na u ita zwe nda vha ndi tshi khou zwi lila tshifhinga tshilapfu, zwine zwa vha u vula nḓila.” Nga murahu, Victor a vhinga Caroline nahone vhuvhili havho vha dala Cameroon. Musi vho dalela ofisi ya davhi, vhaṅwe vhahashu vha vha ṱuṱuwedza uri vha humbule nga ha u shuma henefho Cameroon. Victor u ri: “Samusi ro vha ri tshi vho ḓidzima zwiṅwe zwithu, ro vhona ri si na tshiitisi tsha u hana nahone ra tenda musi ri tshi rambiwa.” Naho Caroline o vha a tshi lwala, vho dzhia phetho ya u pfuluwa.

Victor na Caroline vha thoma u vha vhavulanḓila vha tshifhinga tshoṱhe uri vha thuse nga u ṱhogomela vhathu vhoṱhe vhe vha vha vha tshi takalela u guda Bivhili. Vha fhedza tshifhinganyana vha sa shumi vha tshi tshila nga masheleni e vha a vhulunga. Nga murahu vha ya vha shuma Canada miṅwedzinyana, vha kona u vhuyelela Cameroon, vha bvela phanḓa vhe vhavulanḓila. Yehova o vha fhaṱutshedza hani? Vho ḓo dzhena Tshikolo tsha Vhahuweleli vha Muvhuso vha shuma sa vhavulanḓila vho khetheaho nahone zwino vha khou fhaṱa zwifhaṱo zwa ndangulo. Victor u ri: “Nge ra bva kha vhutshilo ha u sa lila tshithu, ro kona u vhona Yehova a tshi ri tikedza.”

Nga 2002, Alain we a vha a tshi dzhena yunivesithi ngei Dzheremane, o vhala tshibammbiri tshi no ri Vhaswa—Ni Ḓo Shumisa Hani Vhutshilo Haṋu? Mafhungo a re khatsho o mu ṱuṱuwedza uri a ḓivhetshele zwipikwa zwiswa. Nga 2006, a dzhena Tshikolo tsha U Gudisela Vhuḓinḓa nahone ha pfi a ye u shuma Cameroon, he a bebelwa hone.

Alain a wana mushumo wa tshifhinganyana henefho Cameroon. Nga murahu a mbo ḓi wana mushumo u mu holelaho tshelede nnzhinyana, fhedzi a vho vhilaela uri u ḓo mu fhungudzela tshifhinga tsha u huwelela na u funza. Musi a tshi rambiwa uri a vhe muvulanḓila o khetheaho, ho ngo vhuya a lenga-lenga. Mutholi wawe a ri a nga mu engedzela muholo, fhedzi Alain a hana, a vha muvulanḓila o khetheaho. Nga murahu, Alain a vhinga Stéphanie we a vha o no vha na miṅwaha a tshi dzula Fura. Ndi thaidzo dzifhio dze Stéphanie a ṱangana nadzo musi a tshi pfulutshela Cameroon?

Stéphanie u ri: “Ndo mbo ḓi vha na thaidzo dza mutakalo, fhedzi nda wana mushonga we nda vha ndi tshi dzula ndi tshi u shumisa, nda vha khwine.”  Yehova o fhaṱutshedza vhenevha vhavhingani nge vha konḓelela. Alain u ri: “Musi ro ya u huwelela kha muvhundu wa kule u no pfi Katé, ro wana vhathu vho vhalahonyana vhe vha takalela u guda Bivhili. Nga murahu, ra fara pfunzo dza Bivhili navho nga founu. Kha vhenevho vhagudiswa ho mbo ḓi lovhedzwa vhavhili nahone ha thomiwa tshigwada.” Stéphanie o dovha a ri: “A hu na dakalo ḽi fhiraho u vhona u tshi thusa vhathu u swika vha tshi ḓiṋekedza kha Yehova. Ro vha na dakalo ḽo raloho lunzhi-lunzhi nge ra shuma henefha.” Ṋamusi, Alain na Stéphanie vha kha mushumo wa u dalela zwivhidzo.

Gisèle o lovhedzwa musi a tshi khou dzhena tshikolo tsha vhudokotela ngei Italy. O takadzwa nga vhutshilo ha u ḓidzima zwiṅwe zwithu ha vhaṅwe vhavhingani vha vhavulanḓila vhe vha mu gudisa Bivhili nahone o vha a tshi funa u ita zwo engedzeaho tshumeloni yawe. Gisèle a thoma u vha muvulanḓila wa tshifhinga tshoṱhe musi a tshi khou fhedzisa tshikolo.

Gisèle o vha a tshi ṱoḓa u vhuyelela Cameroon uri a shumele Yehova nga ho engedzeaho henengei, fhedzi o vha e na mbilaelo. U ri: “Ndo tea u ṱutshela u vha mudzulapo wa Italy nda fhambana na dzikhonani na muṱa vhe vha vha vha tshi dzula Italy.” Naho zwo ralo, Gisèle a vhuyelela Cameroon nga May 2016. Nga murahu a vhingwa nga Léonce nahone ofisi ya davhi ya Cameroon ya ri vha pfulutshele ḓoroboni ya Ayos, ye ya vha i na ṱhoḓea ya vhahuweleli vha Muvhuso.

Vhutshilo ho vha vhu hani henefho Ayos? Gisèle u ri: “Kanzhi ho vha hu tshi nga fhela dzivhege hu si na muḓagasi nahone founu dzashu dzi si na mulilo. Tshifhinga tshinzhi dzo vha dzi sa shumi. Ndo guda u bika nga mulilo wa khuni nahone ro vha ri tshi ya u ka maḓi tshisimani nga dzibara ri tshi shumisa dzithotshi. Ro vha ri tshi ya vhusiku musi vhathu vha songo tsha ḓala.” Ndi mini zwe zwa thusa vhenevha vhavhingani uri vha kone u konḓelela? Gisèle u ri: “Ro thuswa nga muya wa Yehova, nṋe na munna wanga ro vha ri tshi tikedzana nahone mashaka na dzikhonani vha tshi ri ṱuṱuwedza na u ita vha tshi ri tikedza nga masheleni.”

Naa Gisèle o takala nge a vhuyelela shangoni ḽa hawe? U ri: “Ndo takala vhukuma. Fhedzi u thomani ro vha ri na dzithaidzo ri tshi ḓipfa ro kulea nungo. Fhedzi musi nṋe na munna wanga ri tshi zwi kunda, ro pfa uri ndi zwe ra vha ro tea u zwi ita. Ri fhulufhela Yehova nahone ri pfa ri tsini nae.” Léonce na Gisèle vho ḓo dzhena Tshikolo tsha Vhahuweleli vha Muvhuso nahone zwino ndi vhavulanḓila vho khetheaho vha tshifhinganyana.

Vhane vha vhuyelela mashangoni a havho vha fana na vharei vha khovhe vhane vha vha na tshivhindi tsha u imedzana na dzithaidzo uri vha fashe khovhe nnzhi. Vhenevho vhahashu vha ḓidzima zwiṅwe zwithu uri vha thuse vhathu vhane vha takalela mulaedza wa Muvhuso. Zwi tou pfala uri Yehova ha nga hangwi vhenevha vhahuweleli vha shumaho vhukuma vhe vha sumbedza u funa dzina ḽawe. (Neh. 5:19; Vhahev. 6:10) Arali ni tshi dzula kha ḽiṅwe shango nahone na wana uri shangoni ḽa haṋu hu na ṱhoḓea ya vhahuweleli vha Muvhuso, naa ni nga vhuyelela khaḽo? Yehova u ḓo ni fhaṱutshedza arali na ita nga u ralo.—Mir. 10:22.