1. Yesu o vhudza vhafunziwa vhawe uri vha ite mini kha Mateo 28:18-20?

MUSI Yesu a tshi vuswa vhafuni o ḓivhonadza kha vhafunziwa vhawe vhe vha vha vho kuvhangana ngei Galilea. O vha a tshi ṱoḓa u vha vhudza zwithu zwa ndeme. Zwifhio? Zwe a vha vhudza zwi wanala kha Mateo 28:18-20.​—Vhalani.

2. Ri ḓo fhindula mbudziso dzifhio?

² Maipfi a Yesu a uri ri ite vhathu vhafunziwa a shuma kha mushumeli muṅwe na muṅwe wa Mudzimu ṋamusi. Nga zwenezwo, kha ri fhindule mbudziso tharu dzi tshimbidzanaho na mushumo we Yesu a ri fha wone. Ya u thoma, ri fanela u ita mini nṱhani ha u sokou funza vhafunziwa vhaswa? Ya vhuvhili, vhahuweleli vhoṱhe tshivhidzoni vha nga ita mini u thusa mugudiswa wa Bivhili uri a ite mvelaphanḓa? Ya vhuraru, ri nga thusa hani vhahashu vho fholaho uri vha dovhe vha ite vhathu vhafunziwa?

3. Ndi zwifhio zwithu zwa ndeme zwe Yesu a zwi amba musi a tshi ri laedza?

³ Zwe Yesu a amba zwi a pfala. Ri tea u funza vhathu zwithu zwe a ri vhudza. Fhedzi ri songo hangwa hetshi tshithu tsha ndeme: Yesu ho ngo ri: ‘Ni vha funze zwithu zwoṱhe zwe nda ni vhudza.’ Fhedzi o ri: “Ni vha funze u ita zwoṱhe zwe nda ni vhudza.” Uri ri ite zwe Yesu a ri vhudza zwone ri tea u funza mugudiswa wa Bivhili zwine a tea u ita ra dovha ra mu sumbedza uri a zwi ite hani. (Mish. 8:31) Ndi ngani ri tshi tea u ita nga u ralo?

4. Fanyisani uri ri nga thusa hani mugudiswa wa Bivhili u ita zwe Kristo a ri vhudza.

 ⁴ Ri nga thusa hani muthu “u ita” zwithu zwe Kristo a ri vhudza zwone? Tsumbo i tevhelaho i nga ri thusa u pfesesa zwine ra tea u zwi ita. Muthu ane a khou gudisa muṅwe u reila u mu funza hani u tevhedza milayo ya badani? A nga thoma nga u mu gudisa milayo ya badani. Naho zwo ralo, hu na zwiṅwe zwine a tea u ita uri a funze mugudiswa wawe uri a tevhedze hani yeneyo milayo. U tea u ṱuwa na onoyo mugudiswa badani. Musi onoyo mugudiswa a tshi khou reila na u lingedza u shumisa zwe a zwi guda, u tea u mu eletshedza. Ri guda mini kha yeneyi tsumbo?

5. (a) U ya nga Yohane 14:15 na 1 Yohane 2:3, ndi zwifhio zwine ra tea u gudisa vhagudiswa vhashu vha Bivhili uri vha ite? (b) Ṋeani tsumbo dza uri ri nga dededza hani vhagudiswa vhashu.

⁵ Musi ri tshi guda Bivhili na vhathu, ri vha ri tshi khou vha funza zwine Mudzimu a ṱoḓa ri tshi zwi ita. Fhedzi hu na zwiṅwe zwine ra tea u zwi ita. Ri tea u gudisa vhagudiswa vhashu vha Bivhili uri vha shumise zwine vha zwi guda kha vhutshilo havho ha ḓuvha na ḓuvha. (Vhalani Yohane 14:15; 1 Yohane 2:3.) Ri nga sumbedza vhagudiswa vhashu nga zwine riṋe ra ita uri vha nga shumisa hani zwine vha zwi guda Bivhilini musi vhe tshikoloni, vhe mushumoni na musi vha tshi khou ḓimvumvusa. Ri nga vha anetshela zwe zwa itea vhutshiloni hashu u itela u vha sumbedza uri u shumisa vhulivhisi ha Bivhili zwo ri tsireledza hani kha khombo kana uri zwo ri thusa hani u ita phetho ya vhuṱali. Ri nga rabela Yehova ri na mugudiswa washu ra mu humbela uri a mu dededze nga muya wawe mukhethwa.—Yoh. 16:13.

6. Ndi zwifhio zwiṅwe zwine ra tea u zwi ita u itela u funza vhaṅwe zwe Yesu a ri vhudza?

⁶ Ndi zwifhio zwiṅwe zwine zwa ṱoḓea musi ri tshi funza vhaṅwe u ita zwe Yesu a ri vhudza? Ri tea u thusa vhagudiswa vhashu vha Bivhili uri vha vhe na lutamo lwa u ita vhafunziwa. Vhaṅwe vhagudiswa vha nga ofha u huwelela. Zwi ṱoḓa uri ri si vha fhelele mbilu musi ri tshi vha thusa uri vha pfesese ngoho ya Bivhili khwine uri vha vhe na lutendo lwo khwaṱhaho. Zwenezwo zwi ḓo vha kwama mbilu, zwa vha ṱuṱuwedza uri vha huwelele. Ri nga thusa hani vhagudiswa vhashu uri vha vhe na lutamo lwa u huwelela mafhungo maḓifha?

7. Ni nga thusa hani mugudiswa uri a vhe na lutamo lwa u vhudza vhaṅwe mafhungo maḓifha?

⁷ Ri nga vhudzisa mugudiswa washu wa Bivhili mbudziso dzi ngaho sa hedzi: “U shumisa zwine Bivhili ya zwi funza zwo khwinisa hani vhutshilo haṋu? Ni vhona u nga na vhaṅwe vha tea u ḓivha aya mafhungo? Ni nga vha thusa hani?” (Mir. 3:27; Mat. 9:37, 38) Sumbedzani mugudiswa zwibammbiri zwi re kha Bogisi Ḽa Zwishumiswa Zwa U Funza ni ri a nange zwine a vhona u nga zwi nga takadza mashaka awe, khonani dzawe kana vhane a shuma navho. Ni mu fhe zwenezwo zwibammbiri zwo vhalanyana. Ni ite nḓowe-nḓowe nae ni mu sumbedze uri a nga tshimbidza hani zwenezwo zwibammbiri nga nḓila ya vhulenda. Musi mugudiswa washu a tshi vha muhuweleli a songo lovhedzwaho, ri ḓo tea u tshimbila nae tsimuni uri ri mu thuse.—Muh. 4:9, 10; Luka 6:40.

8. Ndi ngani zwi zwa ndeme uri vhagudiswa vhashu vha fune Mudzimu na muhura nga ho engedzeaho? (Vhalani na bogisi “ Ni Nga Ita Hani Uri Mugudiswa A Fune Mudzimu Nga Ho Engedzeaho?”)

⁸ Ni songo hangwa uri Yesu o ri vhudza uri ri funze vhathu “u ita zwoṱhe” zwe a ri vhudza. Zwenezwo zwi katela milayo mivhili mihulwane ine ya vha u funa Mudzimu na u funa muhura, ine vhuvhili hayo ya tshimbidzana  na mushumo wa u huwelela na u ita vhafunziwa. (Mat. 22:37-39) Zwi tshimbidzana hani? U funa Mudzimu na vhahura ndi zwone zwine zwa ita uri ri huwelele. Zwi tou pfala uri vhaṅwe vhagudiswa vhashu vha Bivhili vha nga ofha u huwelela. Ri nga khwaṱhisedza vhenevho vhagudiswa vha Bivhili uri Yehova a nga vha thusa na uri nga u ya ha tshifhinga, a vha tsha ḓo ofha vhathu. (Ps. 18:1-3; Mir. 29:25) Bogisi ḽi re kha yeneyi thero ḽi ṱalusa vhukando vhune ra nga vhu dzhia u itela u thusa mugudiswa washu uri a fune Mudzimu nga ho engedzeaho. Ndi zwifhio zwiṅwe zwine tshivhidzo tsha nga zwi ita u thusa vhagudiswa vha Bivhili uri lufuno lwavho lu engedzee?

9. Kha tshifanyiso tsha muthu ane a khou gudiswa u reila, mugudiswa u guda zwithu zwa ndeme nga nḓila-ḓe?

⁹ Kha ri dovhe ri humbule nga ha tshifanyiso tsha muthu ane khou gudiswa u reila. Onoyo mugudiswa u guda nga nḓila dzifhio musi a tshi khou reila badani e na mugudisi wawe? Nga u thetshelesa mugudisi wawe na nga u sedza vhaṅwe vhareili vha re na vhulondi. Sa tsumbo, mugudisi a nga mu sumbedza muṅwe mureili ane a tendela muṅwe mureili a tshi mu fhirela a ḓa phanḓa hawe. Kana a nga mu sumbedza muṅwe mureili ane a khou fhungudza tshedza tsha mavhone uri a si kombodze vhareili vhane vha khou ḓa nahone a mu vhudza uri na ene a ite zwenezwo. Tsumbo dzo raloho dzi gudisa mugudiswa zwine a nga zwi ita musi a tshi khou reila.

10. Mugudiswa wa Bivhili a nga thuswa nga mini uri a ite mvelaphanḓa?

¹⁰ Zwi fanaho na zwenezwo, mugudiswa a re badani ya vhutshilo ha gudi fhedzi kha mugudisi wawe, u guda na kha tsumbo dzavhuḓi dza vhaṅwe vhashumeli vha Yehova. Nga zwenezwo, mugudiswa wa Bivhili a nga thuswa nga mini? Nga u ya miṱanganoni yashu ya Vhukriste. Ndi ngani ri tshi ralo? Zwine vha zwi pfa miṱanganoni zwi nga vha thusa uri vha gude zwo engedzeaho, vha khwaṱhise lutendo lwavho na u vha thusa u funa Mudzimu nga ho engedzeaho. (Mish. 15:30-32) Zwiṅwe hafhu, henefho muṱanganoni, mugudisi wa Bivhili a nga ita uri mugudiswa a ḓivhane na vhahashu vha re na thaidzo dzi fanaho na dzawe. Mugudiswa a nga vhona na tsumbo dza vhahashu vha tshi sumbedza lufuno. Kha ri humbule tsumbo dzi tevhelaho.

11. Mugudiswa a nga vhona tsumbo dzifhio tshivhidzoni nahone dzi nga mu kwama hani?

¹¹ Mugudiswa wa mufumakadzi a re mubebi a re eṱhe u vhona wahashu wa tshifumakadzini a re kha vhuimo vhu fanaho na hawe. Zwi a mu kwama mbilu musi a tshi vhona onoyo wahashu wa tshifumakadzini a tshi lingedza nga hune a nga kona u ḓa na vhana vhawe Holoni vhane vha kha ḓi vha vhaṱuku. Mugudiswa wa munna ane a khou lingedza u litsha u daha, u mbo ḓi thoma u ḓowelana na wahashu wa tshinnani we a litsha u daha. Onoyo muhuweleli u vhudza mugudiswa uri u funa hawe Yehova zwo mu konisa u tevhedza zwine Mudzimu a zwi ṱoḓa. (2 Vhakor. 7:1; Vhafil. 4:13) Musi onoyo wahashu o no vhudza mugudiswa uri o litsha hani u daha, u mbo ḓi mu vhudza uri: “Na inwi ni nga kona u litsha u daha.” Mugudiswa u mbo ḓi pfa o ṱuṱuwedzea a tenda uri na ene a nga litsha. Mugudiswa wa musidzana u vhona wahashu wa tshifumakadzini ane a kha ḓi vha muswa a tshi khou ḓiphiṋa nga u vha Ṱhanzi. Musi mugudiswa a tshi vhona nḓila ine wahashu wa tshifumakadzini a dzula o takala ngayo, u mbo ḓi ṱoḓa u ḓivha zwi itaho uri onoyo wahashu a dzule o takala.

12. Ndi ngani ri tshi nga amba uri hu na zwine muṅwe na muṅwe tshivhidzoni a nga ita uri a thuse vhagudiswa vha Bivhili?

¹² Musi vhagudiswa vha Bivhili vha tshi vho ḓivha vhahuweleli vha fhulufhedzeaho vho  fhambafhambanaho, vha guda kha tsumbo dzavho uri zwi amba mini u ita zwe Kristo a ri vhudza zwa uri ri fune Mudzimu na muhura. (Yoh. 13:35; 1 Tim. 4:12) Samusi ro no zwi amba, mugudiswa wa Bivhili a nga guda kha vhahuweleli vhane vha khou ṱangana na thaidzo dzi fanaho na dzine ene a vha nadzo. Onoyo mugudiswa u guda kha dzenedzo tsumbo uri zwi a konadzea u ita tshanduko u itela u vha mufunziwa wa Kristo. (Dot. 30:11) Hu na zwine muṅwe na muṅwe tshivhidzoni a nga zwi ita uri a thuse vhagudiswa vha Bivhili. (Mat. 5:16) Inwi ni lingedza u ita mini uri ni ṱuṱuwedze vhagudiswa vhane vha ḓa miṱanganoni?

13-14. Yesu o fara hani vhaapostola vhawe vho kuleaho nungo?

¹³ Ri ṱoḓa u thusa vhahashu vho fholaho uri vha dovhe vha huwelele na u ita vhafunziwa. Nḓila ye Yesu a fara ngayo vhaapostola vhawe vho kuleaho nungo i nga ri sumbedza zwine ra tea u ita ṋamusi.

¹⁴ Musi Yesu e tsini na u vhulawa, vhaapostola vho “mu ṱutshela vha shavha.” (Marko 14:50; Yoh. 16:32) Yesu o fara hani vhaapostola vhawe musi vho kulea nungo lwa tshifhinganyana? Musi Yesu a tshi kha ḓi bva u vuswa vhafuni o amba na vhaṅwe vhafunziwa vhawe a ri: “Ni songo ofha! Iyani ni vhudze vhafunziwa vhanga [uri ndo vuswa].” (Mat. 28:10a) Yesu ho ngo laṱa vhaapostola vhawe. O vha vhidza “vhafunziwa vhanga” naho vho mu ṱutshela. U fana na Yehova, Yesu o vha khathutshela na u vha hangwela.—2 Dzikh. 13:23.

15. Ri ḓipfa hani nga vho fholaho?

¹⁵ Na riṋe ri na ndavha na vhahashu vho fholaho. Ndi vhahashu nahone ri a vha funa. Ri kha ḓi humbula mishumo yoṱhe ye vha itela Yehova. Vhaṅwe vha vhenevho vho fholaho vho shumela Yehova miṅwaha minzhi. (Vhahev. 6:10) Ro vha ṱuvha vhukuma. (Luka 15:4-7) Ri nga vha sumbedza nga nḓila dzifhio uri ri na ndavha navho ri tshi edzisa Yesu?

16. Ri nga sumbedza hani uri ri na ndavha na vhahashu vho fholaho?

¹⁶ Vha rambeleni miṱanganoni nga lufuno. Iṅwe nḓila ye Yesu a ṱuṱuwedza ngayo vhaapostola vhawe vho kuleaho nungo ndi nga u vha rambela muṱanganoni. (Mat. 28:10b; 1 Vhakor. 15:6) Na ṋamusi ri nga ṱuṱuwedza vhahashu vho fholaho uri vha ḓe miṱanganoni ya tshivhidzo. Ri a zwi ḓivha uri ri nga tea u vha ramba lwo vhalahonyana uri vha ḓe. Zwi tou pfala uri Yesu o takala nge vhafunziwa vhawe vha ḓa musi a tshi vha ramba.—Vhambedzani Mateo 28:16 na Luka 15:6.

17. Ri tea u ita mini musi wahashu o fholaho a tshi ḓa miṱanganoni?

¹⁷ Vha ṱanganedzeni nga zwanḓa zwivhili. Yesu o ita uri vhafunziwa vhawe vha pfe vho ṱanganedzea, musi a tshi vha vhona ndi ene we a thoma u amba navho. (Mat. 28:18) Ri ḓo ita mini musi o fholaho a tshi swika Holoni? Hu fanela u vha riṋe vha u thoma u vha ṱanganedza. Ri nga thoma nga u vhilaela uri ri ḓo amba mini navho. Ri nga amba uri ri takalela u vha vhona uri vha sa pfe vhe na ṱhoni.

18. Ri nga ṱuṱuwedza hani vhahuweleli vho fholaho?

¹⁸ Vha ṱuṱuwedzeni nga lufuno. Khamusi vhafunziwa vha Yesu vho vhona u nga vha nga si kone u huwelela ḽifhasini ḽoṱhe. Yesu o ṱuṱuwedza vhatevheli vhawe nga uri: “Ndi na inwi misi yoṱhe.” (Mat. 28:20) Naa zwo thusa vhafunziwa vhawe? Ee. Hu si kale vho mbo ḓi farakanea nga “u ḓivhadza mafhungo maḓifha.”  (Mish. 5:42) Na vhahuweleli vho fholaho vha ṱoḓa u ṱuṱuwedzwa. Vha nga ofha u dovha vha huwelela. Ri nga vha khwaṱhisedza uri vha nga si tshimbile vhe vhoṱhe musi vha tshi ya u huwelela. Ri nga tshimbila navho tsimuni musi vho no lugela. Zwi tou pfala uri vha ḓo takalela thuso yashu musi vha tshi dovha u huwelela mafhungo maḓifha. Musi ri tshi fara vho fholaho sa vhahashu, vha nga dovha vha fhisea zwa ita uri tshivhidzo tshoṱhe tshi takale.

19. Ri ṱoḓa u ita mini nahone ndi ngani?

¹⁹ Ri ḓo bvela phanḓa ri tshi huwelela na u ita vhafunziwa u swika lini? U swika vhufheloni ha shango. (Mat. 28:20; vhalani ṱhaluso ya “Vhufhelo ha shango” kha Mutevhe Wa Ṱhalutshedzo Ya Maipfi A Re Bivhilini.) Naa ri ḓo zwi kona u huwelela na u ita vhafunziwa u swika nga tshenetsho tshifhinga? Ro ḓiimisela u zwi ita. Ri shumisa tshifhinga tshashu, nungo dzashu na tshelede yashu ro takala u itela u wana “vho ḓiimiselaho u wana vhutshilo vhu sa fheli.” (Mish. 13:48) Musi ri tshi zwi ita, ri vha ri tshi khou edzisa tsumbo ya Yesu. O ri: “Zwiḽiwa zwanga ndi u ita zwi funwaho nga o nthumaho na u khunyeledza mushumo wawe.” (Yoh. 4:34; 17:4) Na riṋe ri ṱoḓa u ita zwi fanaho na zwenezwo. Ri ṱoḓa u fhedza mushumo we ra ṋewa wone. (Yoh. 20:21) Ri ṱoḓa uri na vhaṅwe vha futelele kha wonoyu mushumo, u katela na vho fholaho.—Mat. 24:13.

20. U ya nga Vhafilipi 4:13, ndi ngani ri tshi nga kona u khunyeledza mushumo we Yesu a ri ri u ite?

²⁰ A zwi leluwi u ita zwe Yesu a ri ri zwi ite. Fhedzi a ri khou ita wonoyu mushumo ri roṱhe. Yesu o fhulufhedzisa uri u ḓo vha na riṋe. Musi ri tshi ita vhafunziwa, ri vha ri “vhashumisani na Mudzimu.” (1 Vhakor. 3:9; 2 Vhakor. 2:17) Ngauralo, Yehova na Yesu vha nga ri thusa u ita wonoyu mushumo. Ndi ndugelo vhukuma zwa dovha zwa takadza u ita wonoyu mushumo ra thusa na vhaṅwe uri na vhone vha ite zwenezwo.—Vhalani Vhafilipi 4:13.