Ndo bebwa nga 1983. Ndo vha ndi na mutakalo wavhuḓi musi ndi kha ḓi vha muṱuku, fhedzi musi ndi na miṅwaha ya 10, ndo mbo ḓi thoma u pfa muvhili wanga woṱhe u tshi khou vhavha. Nga murahu ha miṅwaha mivhili, ḽiṅwe ḓuvha ndo ri ndi tshi vuwa nga matsheloni nda pfa ndi si tsha kona u tsukunyea. Nda lingedza nga nḓila dzoṱhe u takusa milenzhe, fhedzi zwa sokou sea zwi tshi ṱanama. A tho ngo tsha dovha nda tshimbila u bva nga ḽeneḽo ḓuvha. Vhulwadze hanga ho dovha ha ita uri muvhili wanga u si tsha aluwa. Ndi kha ḓi vha na muvhili wa ṅwana na ṋamusi.

Ndo vha ndi na miṅwedzi yo vhalahonyana ndi sa bvi nḓuni musi ndi tshi dalelwa nga Ṱhanzi dza Yehova. Kanzhi ndo vha ndi tshi dzumbama musi hu tshi ḓa vhaeni, fhedzi nga ḽeneḽo ḓuvha ndo tendela vhenevho vhafumakadzi vhavhili vha tshi amba na nṋe. Musi vha tshi amba nga ha Pharadiso, ndo mbo ḓi humbula zwe nda vhuya nda zwi pfa musi ndi na miṅwaha miṱanu. Nga tshenetsho tshifhinga, ho vha hu na muṅwe murumiwa ane a pfi Jethro, we a vha a tshi dzula Suriname. O vha a tshi ḓa kha kusi kune ra dzula khakwo luthihi nga ṅwedzi, nahone o vha a tshi gudisa khotsi anga Bivhili. O vha a tshi mpfara zwavhuḓi, nahone ndo vha ndi tshi mu takalela. Zwiṅwe hafhu, makhulu wanga vho vha vha tshi ita vha tshi ya na nṋe miṱanganoni ya Ṱhanzi dza Yehova ye ya vha i tshi farwa kusini kwashu. Nga zwenezwo, Florence ane a vha muṅwe wa vhenevho vhafumakadzi vhavhili vhe vha vha vho ḓa u ndalela, o mbudzisa arali ndi tshi nga takalela u guda zwo engedzeaho, nda mu vhudza uri ndi nga zwi takalela.

Florence o mbo ḓi vhuya na munna wawe Justus, vha thoma u guda na nṋe Bivhili. Musi vha tshi vhona uri a thi koni u vhala, vho mbo ḓi ngudisa u vhala. Nga u ya ha tshifhinga ndo vha ndi tshi vho kona u vhala. Ḽiṅwe ḓuvha vhenevho vhavhingani vho mbo ḓi mbudza uri vho humbelwa uri vha yo shuma Suriname. Ho vha hu si tsheena muthu we a vha a tshi nga bvela phanḓa a tshi guda na nṋe henefha Orealla. Fhedzi Yehova ho ngo vhuya a nkhangwa.

Hu sa athu fhela tshifhinga, ho mbo ḓi ḓa muṅwe muvulanḓila a no pfi Floyd. O ngwana a tshi khou huwelela henefho hune nda dzula hone. Ndo mbo ḓi ṅwethuwa musi a tshi amba na nṋe nga ha u guda Bivhili. A ri: “Ndi ngani ni tshi khou ṅwethuwa?” Nda mu vhudza uri ndo no fhedza u guda bugwana Ndi Mini Zwine Mudzimu A Zwi Ṱoḓa Kha Riṋe? nahone ndo no thoma u guda bugu Nḓivho Ine Ya Isa Vhutshiloni Vhu Sa Fheli. * Nda mu vhudza uri ndi  ngani zwino ndi si tsha guda. Floyd o mbo ḓi fhedzisa u vhala na nṋe bugu Nḓivho, fhedzi na ene o mbo ḓi humbeliwa uri a ye u shuma huṅwe. Ndo dovha nda sala ndi si na muthu ane a nga guda na nṋe Bivhili.

Nga 2004, ho mbo ḓi rumelwa vhavulanḓila vho khetheaho vhane vha vha Granville na Joshua. Vho ngwana musi vha tshi khou huwelela hune nda dzula hone. Nda ṅwethuwa musi vha tshi mbudzisa arali ndi tshi ṱoḓa u guda. Ndo vha humbela uri vha gude na nṋe bugu Nḓivho u bva mathomoni. Ndo vha ndi tshi ṱoḓou vhona arali vha tshi ḓo ngudisa zwithu zwi fanaho na zwe nda vha ndo no gudisiwa. Granville a mbudza uri hu a farwa miṱangano henefho Orealla hune nda dzula hone. Ndo vha ndi tshi ṱoḓa u ya miṱanganoni naho ndo vha no fhedza miṅwaha i fhiraho 10 ndi sa bvi muḓini. Granville o ḓa ha hashu a mbea kha wheelchair nahone a ntshimbidza ra ya Holoni.

Nga u ya ha tshifhinga, Granville o nṱuṱuwedza uri ndi dzhene kha Tshikolo Tsha Vhuḓinḓa Ha Lwa Ṱaḓulu. O ri: “Ndi zwone ni muholefhali, fhedzi ni a kona u amba. Ḽiṅwe ḓuvha ni ḓo vhea nyambo ya khagala. Ni ḓo vhona, zwi ḓo itea.” Zwenezwo zwa nṱuṱuwedza vhukuma.

Ndo mbo ḓi thoma u huwelela na Granville. Fhedzi vhunzhi ha bada dza hune nda dzula hone dzi vha dzi sa tshimbilei zwavhuḓi nga wheelchair. Nda humbela Granville uri a tou ntshimbidza nga bara. Zwenezwo zwo ita uri ndi kone u huwelela zwavhuḓi. Ndo lovhedzwa nga April 2005. Nga u ya ha tshifhinga, vhahashu vho ngudisa u ṱhogomela dzibugu na u shumisa tshishumiswa tsha muzika tsha Holoni.

Zwi ṱungufhadzaho ndi uri khotsi anga vho lovha nga 2007 nga khombo ya tshikepe. Muṱa wahashu wo vha wo ṱungufhala vhukuma. Granville o rabela na riṋe nahone a ri vhalela maṅwalo a khuthadzaho. Nga murahu ha miṅwaha mivhili, Granville o mbo ḓi fa nga khombo ya tshikepe. Zwenezwo zwo ri vhaisa vhukuma.

Tshivhidzo tshashu tshiṱuku tsho vha tsho ṱungufhala vhukuma, nahone ro vha ri si tshee na muhulwane, ri na mushumeli muthihi fhedzi. Ndo vha ndo ṱungufhala zwihulu ngauri nṋe na Granville ro vha ri madele mapfani. O vha a tshi dzulela u nthusa uri ndi vhe na vhushaka havhuḓi na Yehova na uri ndi wane zwithu zwine nda zwi ṱoḓa. Nga vhege i tevhelaho, o vha e nṋe we a vha a tshi khou vhala dziphara kha Pfunzo ya Tshiingamo. Ndo tou kona u vhala phara mbili fhedzi, nda mbo ḓi ṱhukhula tshililo, ndi si tsha kona u fhumula. Ndo mbo ḓi bva tshiṱeidzhini.

Ndo thoma u vha khwine musi vhahashu vha tshiṅwe tshivhidzo vha tshi ḓa u ri thusa. Zwiṅwe hafhu, ofisi ya davhi yo rumela muvulanḓila o khetheaho a no pfi Kojo. Mme anga na murathu wanga vho mbo ḓi thoma u guda nahone vha lovhedzwa. Zwenezwo zwo ita uri ndi takale vhukuma. Ndo mbo ḓi vhewa sa mushumeli nga March 2015. Nga murahu ha tshifhinganyana ndo mbo ḓi vhea nyambo yanga ya khagala ya u thoma. Nga ḽeneḽo ḓuvha ndo tsengisa miṱodzi musi ndi tshi humbula zwe Granville a mbudza miṅwahani yo fhiraho musi a tshi ri: “Ḽiṅwe ḓuvha ni ḓo vhea nyambo ya khagala. Ni ḓo vhona, zwi ḓo itea.”

Kha JW Broadcasting^®, ndo guda nga ha vhaṅwe vhahashu vha re na thaidzo dzi fanaho na dzanga. Naho vha tshi khou lwala, vha kona u ita zwithu zwinzhi nahone vho takala. Na nṋe hu na zwiṅwe zwithu zwine nda nga kona u zwi ita. Ndo vha ndi tshi ṱoḓa u shumela Yehova nga hune nda nga kona ngaho. Ndi ngazwo ndo dzhia vhuvulanḓila ha tshifhinga tshoṱhe. Nga September 2019, ndo mbo ḓi vhudzwa mafhungo a takadzaho vhukuma! Ndo vhudzwa uri ndo vhewa sa muhulwane kha tshivhidzo tshashu tshi re na vhahuweleli vha 40.

Ndi khou livhuwa vhahashu vhoṱhe vhe vha guda na nṋe, na u nthusa uri ndi bvele phanḓa ndi tshi shumela Yehova. Zwihuluhulu ndi livhuwa Yehova we a si vhuye a nkhangwa.