1. Ri zwi ḓivha hani uri Yehova u ṱoḓa u vha tsini na riṋe?

 YEHOVA u a ri ramba uri ri sendele tsini nae. (Yak. 4:8) U ṱoḓa u vha Mudzimu washu, Khotsi ashu na Khonani yashu. U fhindula thabelo dzashu nahone a ri thusa nga zwifhinga zwi konḓaho. U shumisa na ndangulo yawe u ri funza na u ri tsireledza. Fhedzi ri tea u ita mini uri ri sendele tsini na Yehova?

2. Ri nga sendela hani tsini na Yehova?

² Ri nga sendela tsini na Yehova nga u rabela, nga u guda Ipfi ḽawe na u elekanya nga haḽo. Musi ri tshi zwi ita, ri ḓo mu funa na u mu dzhiela nṱha. Zwi ḓo ri ṱuṱuwedza uri ri mu thetshelese na u mu renda. (Nzumb. 4:11) Musi ri tshi ḓivha Yehova nga ho engedzeaho, ndi hone ri tshi ḓo mu fhulufhela na u fhulufhela ndangulo yawe ine a ri thusa ngayo nga ho engedzeaho.

3. Diabolo u lingedza hani u ita uri ri si tsha shumela Yehova, fhedzi ri nga thuswa nga mini uri ri si ṱutshele Mudzimu washu na ndangulo yawe? (Phisalema 31:13, 14)

³ Diabolo u lingedza u ita uri ri si tsha shumela Yehova, zwihuluhulu musi ro sedzana na milingo. U zwi itisa hani? U lingedza u ita uri ri litshe u fhulufhela ndangulo ya Yehova nga zwiṱuku nga zwiṱuku. Fhedzi ri nga ḓitsireledza musi a tshi ri ṱhasela. Arali lutendo lwashu kha Yehova lwo khwaṱha nahone ri tshi dzula ri tshi mu fhulufhela, a ri nga ṱutsheli Mudzimu washu na ndangulo yawe.—Vhalani Phisalema 31:13, 14.

4. Ri ḓo amba nga ha mini kha ino thero?

⁴ Kha ino thero, ri ḓo amba nga ha zwithu zwiraru zwine zwa nga bva nga nnḓa ha tshivhidzo, zwine tshiṅwe na tshiṅwe tshazwo tsha nga ita uri ri si tsha fhulufhela Yehova na ndangulo  yawe. Zwenezwi zwithu zwi nga ri fhambanya hani na Yehova? Nahone ri nga ita mini uri Saṱhane a si ri litshise u shumela Yehova?

5. Dzithaidzo dzi nga ita hani uri ri litshe u fhulufhela Yehova na ndangulo yawe?

⁵ Nga zwiṅwe zwifhinga ri sedzana na dzithaidzo dzine dza nga vha u pikiswa nga mashaka kana u fhelelwa nga mushumo. Thaidzo dzo raloho dzi nga ita hani uri ri si tsha fhulufhela Yehova na ndangulo yawe na u ita uri ri si tsha mu shumela? Musi ro no fhedza tshifhinga tshilapfu ri tshi khou konḓelela thaidzo, ri nga fhulufhuwa kana ra tsikeledzea. Saṱhane u shumisa zwenezwo zwibuli u ita uri ri timatime uri Yehova u a ri funa. Diabolo u ṱoḓa ri tshi humbula uri ri shengela nga nṱhani ha Yehova na ndangulo yawe. Zwenezwo ndi zwe zwa itea kha vhaṅwe Vhaisiraele kha ḽa Egipita. Mathomoni vho vha vha tshi tenda uri ndi Yehova we a vhea Mushe na Aroni uri vha vha vhofholole vhupulini. (Ek. 4:29-31) Nga murahu, musi Farao a tshi ita uri vha si ḽe lu ḓifhaho, vho pomoka Mushe na Aroni vha ri ndi vhone vhane vha khou vha vhangela dzithaidzo, vha ri: “No ita uri Farao na vhashumeli vhawe vha ri vhenge, no vha ṋea banga ḽa uri vha ri vhulaye.” (Ek. 5:19-21) Vho pomoka vhashumeli vha Yehova vha fhulufhedzeaho. Zwi a pfisa vhuṱungu! Arali no no fhedza tshifhinga tshilapfu ni tshi khou konḓelela dzithaidzo, ni nga ita hani uri ni dzule ni tshi fhulufhela Yehova na ndangulo yawe?

6. Ri guda mini kha muporofita Habakuku nga ha nḓila ya u konḓelela dzithaidzo? (Habakuku 3:17-19)

⁶ Vhudzani Yehova zwi re mbiluni yaṋu nga thabelo nahone ni mu fhulufhele uri u ḓo ni tikedza. Muporofita Habakuku o vha o sedzana na thaidzo nnzhi. Zwi tou nga nga tshiṅwe tshifhinga o vhuya a timatima uri Yehova u na ndavha nae. Ngauralo, a vhudza Yehova zwi re mbiluni yawe nga thabelo. O ri: “Yehova, ndi ḓo lila ndi tshi ṱoḓa thuso u swika lini, u sa mpfi? . . . Ndi ngani u tshi tendela vhaṅwe vha tshi tsikeledzwa?” (Hab. 1:2, 3) Yehova o fhindula yeneyo thabelo ya mushumeli wawe a fhulufhedzeaho i bvaho mbiluni. (Hab. 2:2, 3) Musi Habakuku o no humbulisisa nga ha nḓila ye Yehova a tshidza ngayo vhathu vhawe, o dovha a takala. O vha na vhungoho ha uri Yehova u na ndavha nae na uri u ḓo mu thusa u konḓelela mulingo naho u ufhio. (Vhalani Habakuku 3:17-19.) Ri guda mini? Musi no sedzana na dzithaidzo, ambani na Yehova nga thabelo ni mu vhudze nḓila ine na ḓipfa ngayo. Ni fhulufhele uri u ḓo ni tikedza. Arali na ita nga u ralo, ni ḓo vha na fhulufhelo ḽa uri Yehova u ḓo ni fha nungo dzine na dzi ṱoḓa uri ni konḓelele. Musi ni tshi vhona a tshi ni tikedza, lutendo lwaṋu khae lu ḓo ṋaṋa u khwaṱha.

7. Mashaka a Shirley vho lingedza u ita uri a humbule mini nahone ndi mini zwe zwa ita uri a dzule e na lutendo kha Yehova?

⁷ Dzulani ni tshi ita zwithu zwine zwa ni thusa uri ni dzule ni tsini na Yehova. Ndi zwone zwe zwa thusa muṅwe wahashu wa tshifumakadzini ane a pfi Shirley wa Papua New Guinea, musi e na dzithaidzo. b Muṱa wa ha Shirley wo vha u tshi shaya nahone nga zwiṅwe zwifhinga u tshi konḓelwa u wana zwiḽiwa zwo eḓanaho. Muṅwe wa shaka ḽawe o lingedza u ita uri Shirley a si tsha fhulufhela Yehova. O ri: “Ni dzula ni tshi amba uri ni thuswa nga muya wa Mudzimu. Thuso ya hone i ngafhi? Muṱa u khou ḓi bvela phanḓa u tshi shaya. Ni khou ḓifhedzela tshifhinga nga u funza fhungo ḽa Mudzimu.” Shirley u ri: “Ngoho ndo ḓivhudzisa nda ri: ‘Naa Mudzimu u na  ndavha na riṋe kana o ri laṱedza?’ Nda ṱavhanya nda amba na Yehova nga thabelo nda mu vhudza zwoṱhe zwe nda vha ndi tshi khou zwi humbula. Nda si litshe u vhala Bivhili na khandiso dzashu nahone nda bvela phanḓa u huwelela na u ya miṱanganoni.” Shirley a thoma u zwi vhona uri Yehova u khou ṱhogomela muṱa wahawe. Muṱa wahawe a wo ngo vhuya wa lala na nḓala nahone wo vha wo takala. Shirley u ri: “Ndo zwi vhona uri Yehova u khou fhindula thabelo dzanga.” (1 Tim. 6:6-8) Arali na inwi na sa litsha u ita zwithu zwine zwa ni sendedza tsini na Yehova, a ni nga tendeli dzithaidzo kana u timatima zwi tshi ni litshisa u shumela Yehova.

8. Hu nga itea mini kha vhahashu vhane vha ranga phanḓa ndanguloni ya Yehova?

⁸ Maswina ashu vha phaḓaladza mazwifhi nga ha riṋe kana vha ita uri ri timatime vhahashu vhane vha ranga phanḓa ndanguloni. Zwenezwo vha nga zwi ita nga zwirathisi zwa mafhungo kana nga vhudavhidzano ha nnyi na nnyi (social networks). (Ps. 31:13) Vhaṅwe vhahashu vho ita na u fariwa vha gwevhiwa uri vho pfuka mulayo. Vhakriste vha u thoma na vhone vho vha kha vhuimo vhu fanaho na honoho musi muapostola Paulo a tshi pomokwa na u fariwa. Vho ita mini?

9. Vhaṅwe Vhakriste vho ita mini musi muapostola Paulo e dzhele?

⁹ Hu na vhaṅwe Vhakriste vha u thoma vhe vha litsha u tikedza muapostola Paulo musi e dzhele kha ḽa Roma. (2 Tim. 1:8, 15) Ndi ngani? Naa vho vha vha tshi khou shona u tikedza Paulo nga nṱhani ha uri vhathu vho vha vha tshi mu dzhia sa ḽivemu? (2 Tim. 2:8, 9) Kana vho vha vha tshi khou ofha uri na vhone vha ḓo tovholwa? A ri ḓivhi zwe zwa vha itisa. Fhedzi humbulani uri Paulo o ḓipfa hani. O vha o no konḓelela thaidzo nnzhi nahone a ita na u vhea vhutshilo hawe khomboni a tshi itela vhone. (Mish. 20:18-21; 2 Vhakor. 1:8) Ri songo vhuya ra fana na vhe vha laṱedza Paulo musi a tshi ṱoḓa thuso yavho. Ndi zwifhio zwine ra tea u zwi humbula musi vhahashu vhane vha ranga phanḓa vha tshi tovholwa?

10. Ndi zwifhio zwine ra tea u zwi humbula musi vhahashu vhane vha ranga phanḓa vha tshi tovholwa nahone ndi ngani?

 ¹⁰ Ni songo hangwa uri ndi ngani ri tshi khou tovholwa na uri ndi nnyi ane a ita uri ri tovholwe. Luṅwalo lwa 2 Timotheo 3:12 lu ri: “Vhoṱhe vha re na vhuthihi na Kristo Yesu, vho ḓikumedzelaho kha Mudzimu na vhone vha ḓo tovholwa.” Ngauralo, ri songo mangala musi Saṱhane a tshi ṱhasela nga ho livhaho vhahashu vhane vha ranga phanḓa. U ṱoḓa uri vhenevho vhahashu vha si tsha fhulufhedzea kha Yehova nahone u ṱoḓa uri na riṋe ri ofhe.—1 Pet. 5:8.

11. Ri guda mini kha Onesiforo? (2 Timotheo 1:16-18)

¹¹ Bvelani phanḓa ni tshi tikedza vhahaṋu nahone ni songo vha laṱedza. (Vhalani 2 Timotheo 1:16-18.) Muṅwe Mukriste wa tshifhingani tsha Paulo ane a pfi Onesiforo o ita zwo fhambanaho na zwe vhaṅwe vha zwi ita musi Paulo e dzhele. Bivhili i ri: “Ho ngo shona naho [Paulo o] vhofhiwa nga ngeḓane.” Nṱhani hazwo, Onesiforo o ṱoḓa Paulo nahone musi a tshi mu wana, a ṱoḓa nḓila dza u mu thusa. Onesiforo o vhea vhutshilo hawe khomboni nga u ita zwenezwo. Ri guda mini kha zwenezwi? Ri songo tenda u ofha vhathu zwi tshi ri shushedza kana zwi tshi ri thivhela u tikedza vhahashu vhane vha khou tovholwa. Nṱhani hazwo, kha ri vha imelele nahone ri vha thuse. (Mir. 17:17) Vha ṱoḓa ri tshi vha funa na u vha tikedza.

12. Ri guda mini kha vhahashu vha Russia?

¹² Kha ri vhone nḓila ye vhahashu vha ngei Russia vha thusa ngayo vhatendi ngavho vha re dzhele. Musi vhaṅwe vhavho vha tshi ya tsengoni, vhahashu vha a ḓa khothe u vha tikedza. Ri guda mini khazwo? Ri songo ofha musi vhahashu vha rangaho phanḓa vha tshi pomokwa, vha tshi fariwa kana vha tshi tovholwa. Ri vha rabelise, ri ṱhogomele miṱa yavho na u ṱoḓa nḓila dza u vha thusa.—Mish. 12:5; 2 Vhakor. 1:10, 11.

13. U sasaladziwa zwi nga ita hani uri ri si tsha fhulufhela Yehova na ndangulo yawe?

¹³ Mashaka ashu vhane vha si vhe Dziṱhanzi, vhane ra shuma navho kana vhane ra dzhena navho tshikolo, vha nga kha ḓi ri sasaladza nga nṱhani ha mushumo washu wa u huwelela kana ngauri ri tshila nga nḓila ine Yehova a i takalela. (1 Pet. 4:4) Vha nga kha ḓi ri: “A thi na thaidzo na inwi, thaidzo ndi vhurereli haṋu ho ḓalaho zwidayo-dayo ha dovha ha vha ha tshikale.” Vhaṅwe vha nga sasaladza nḓila ine ra fara ngayo vhathu vho bviswaho tshivhidzoni, vha ri: “A ni na lufuno.” Maipfi o raloho a nga ita uri ri timatime uri milayo ya Yehova yo luga. Ri nga thoma u ḓivhudzisa uri: ‘Naa zwine Yehova a khou ri ndi zwi ite zwo kalula? Naa ndangulo yawe i na milayo minzhisa?’ Arali no sedzana na vhuimo ho raloho, ni nga dzula hani ni tsini na Yehova na ndangulo yawe?

14. Ri fanela u ita mini musi vhaṅwe vha tshi ri sasaladza ngauri ri tshila nga nḓila ine Yehova a i takalela? (Phisalema 119:50-52)

¹⁴ Ḓiimiseleni u tshila nga nḓila ine Yehova a i takalela. Yobo o vha e muthu we a tshila nga nḓila ine ya takadza Yehova naho vhaṅwe vho mu sasaladza nge a ita nga u ralo. Muṅwe wa vhe vha ḓiita khonani dza Yobo o lingedza u mu ita uri a tende uri Mudzimu ha na ndavha uri Yobo u a tevhedza milayo yawe kana hai. (Yobo 4:17, 18; 22:3) Fhedzi Yobo ho ngo tenda eneo mazwifhi. O vha a tshi zwi ḓivha uri milayo ya Yehova ya zwo lugaho na zwi songo lugaho yo tea nahone o vha o ḓiimisela u i tikedza. Ho ngo tenda vhaṅwe vha tshi ita uri a si tsha fhulufhedzea. (Yobo 27:5, 6) Ri guda mini khazwo? Ni songo tenda u sasaladzwa nga vhaṅwe zwi tshi ita uri ni timatime  milayo ya Yehova. Humbulani zwe zwa itea vhutshiloni haṋu. Khamusi no zwi vhona lunzhi uri musi ni tshi ita zwine Yehova a ri zwo luga, vhutshilo haṋu vhu vha khwine nahone zwi a ni vhuyedza. Ḓiimiseleni u dzula ni tshipiḓa tsha ndangulo ine ya tikedza yeneyo milayo. Nga yeneyo nḓila, naho vhathu vha tshi nga ri sasaladza hani, a ri nga litshi u shumela Yehova.—Vhalani Phisalema 119:50-52.

15. Ndi ngani Brizit o sasaladzwa?

¹⁵ Kha ri ambe nga ha muṅwe wahashu wa tshifumakadzini wa ngei India ane a pfi Brizit. Muṱa wahawe wo mu sasaladza nga nṱhani ha lutendo lwawe. Musi a tshi kha ḓi bva u lovhedzwa nga 1997, munna wawe we a vha e si Ṱhanzi o mbo ḓi fhelelwa nga mushumo. Munna wawe a humbula uri ene, Brizit na vhana vhavho vha vhasidzana vha tea u pfuluwa vha ya u dzula na vhabebi vhawe vhe vha vha vha tshi dzula kha iṅwe ḓorobo. Fhedzi Brizit o vha a tshi ḓo sedzana na dziṅwe thaidzo khulwane. Sa izwi munna wawe o vha a si tsha shuma, Brizit o vha a tshi ḓo tea u shuma tshifhinga tshoṱhe uri a ṱunḓele muṱa wawe. Zwiṅwe hafhu, tshivhidzo tshe tsha vha tshi tsini nae tsho vha tshi vhukule ha khiḽomithara dzine dza nga vha 350. Zwi ṱungufhadzaho ndi uri mashaka a munna wawe vho mu pikisa nga nṱhani ha lutendo lwawe. Vhuimo ho ṋaṋa u vhifha lwe muṱa wa Brizit wa tea u dovha wa pfuluwa. Munna wawe a mbo ḓi lovha zwi songo lavhelelwa. Nga murahu, muṅwe wa vhana vhawe vha vhasidzana a mbo ḓi lovha nga khentsara e na miṅwaha ya 12. Zwa tou ṋaṋa musi mashaka a Brizit vha tshi mu vhea mulandu wa uri ndi ene o bveledzaho zwenezwi zwiimo. Vha amba uri arali o vha e si Ṱhanzi ya Yehova, eneo makhaulambilu oṱhe o vha a tshi ḓo vha a songo itea. Naho zwo ralo, o bvela phanḓa a tshi fhulufhela Yehova na u dzula e tsini na ndangulo yawe.

16. Brizit o fhaṱutshedzwa hani nge a dzula e tsini na Yehova na ndangulo yawe?

¹⁶ Samusi Brizit o vha a tshi dzula kule na tshivhidzo, mulavhelesi wa ḽiisela o mu ṱuṱuwedza uri a huwelele henefho he a vha a tshi  dzula hone na uri a fare miṱangano ya tshivhidzo henefho hayani hawe. Mathomoni o pfa zwi tshi mu konḓela. Fhedzi a tevhela honoho vhulivhisi. A huwelela mafhungo maḓifha, a fara miṱangano hayani hawe nahone a ḓifha tshifhinga tsha u fara vhurabeli ha muṱa na vhana vhawe. Ha bvelela mini? Brizit a thoma pfunzo nnzhi dza Bivhili nahone vhunzhi ha vhagudiswa vhawe vha lovhedzwa. Nga 2005 a thoma u vha muvulanḓila wa tshifhinga tshoṱhe. U fhulufhela hawe Yehova na ndangulo yawe zwo lambedzwa. Vhana vhawe vha khou shumela Yehova nga u fhulufhedzea nahone ho no vha na zwivhidzo zwivhili hune a dzula hone! Brizit u na vhungoho ha uri ndi Yehova we a mu ṋea nungo dza u konḓelela thaidzo dzawe na u konḓelela u sasaladzwa nga muṱa wahawe.

17. Ri tea u ḓiimisela u ita mini?

¹⁷ Saṱhane u ṱoḓa ri tshi tenda uri musi ro sedzana na milingo, Yehova ha nga ri thusi na uri u dzula ri ndanguloni ya Yehova zwi ḓo ri konḓisela vhutshilo. Saṱhane u ṱoḓa uri ri tshuwe musi ri tshi vhona vhahashu vhane vha khou ranga phanḓa vha tshi pomokiwa, vha tshi tovholiwa na u fariwa. U shumisa vhathu uri vha ri sasaladze uri ri si tsha fhulufhela milayo ya Yehova na ndangulo yawe. Fhedzi nḓila dzawe ri a dzi ḓivha nahone a ri nga tendi a tshi ri fhura. (2 Vhakor. 2:11) Ḓiimiseleni u sa tenda mazwifhi a Saṱhane na uri ni dzule ni tshi fhulufhedzea kha Yehova na ndangulo yawe. Ni songo hangwa uri Yehova ha nga ḓo vhuya a ni laṱa. (Ps. 28:7) Nga zwenezwo, ni songo tenda tshithu na tshithihi tshi tshi ni litshisa u shumela Yehova!—Vharoma 8:35-39.

18. Ri ḓo amba nga ha mini kha thero i tevhelaho?

¹⁸ Kha heyi thero, ro amba nga ha thaidzo dzine ra nga ṱangana nadzo dzine dzi si bve nga ngomu tshivhidzoni. Fhedzi ri nga kha ḓi ṱangana na thaidzo dzi bvaho nga ngomu tshivhidzoni dzine dza nga ita uri ri litshe u fhulufhela Yehova na ndangulo yawe. Ri nga kunda hani dzenedzo thaidzo? Ri ḓo amba nga hazwo kha thero i tevhelaho.