1. Ndi zwifhio zwine ra nga zwi lavhelela nahone ri nga vha na vhungoho ha mini?

 RI NGA lavhelela uri vhaṅwe vhathu vha nga ri pikisa musi ri tshi huwelela. Honoho u pikiswa hu nga tou ṋaṋa tshifhingani tshi ḓaho. (Dan. 11:44; 2 Tim. 3:12; Nzumb. 16:21) Naho zwo ralo, ri nga vha na vhungoho ha uri Yehova u ḓo ri ṋea thuso ine ra i ṱoḓa. Ndi ngani ri tshi ralo? Tshifhinga tshoṱhe Yehova o vha a tshi thusa vhashumeli vhawe u ita zwe a vha vhudza uri vha zwi ite naho zwi tshi konḓa. Sa tsumbo, kha ri ambe nga ha zwe zwa itea kha vhutshilo ha muporofita Hesekiele we a huwelela kha mathubwa a Vhayuda e a vha e Babele.

2. Yehova o ṱalusa hani vhathu vhe Hesekiele a vha a tshi tea u huwelela khavho nahone ri ḓo amba nga ha mini kha ino thero? (Hesekiele 2:3-6)

² Hesekiele o vha o tea u huwelela kha vhathu vha mufuda-ḓe? Yehova o vha ṱalusa sa vhathu “vha re na swili,” vha “mbilu dzo rindilaho” na “mashandukwa.” Vho vha vhe khombo u fana na mipfa na dziphame. Ndi ngazwo Yehova o vhudza Hesekiele lunzhi-lunzhi a ri: “U songo ofha”! (Vhalani Hesekiele 2:3-6.) Hesekiele o kona u ita mushumo we Yehova a mu laedza ngauri (1) o vha o ruṅwa nga Yehova, (2) muya wa Mudzimu wo mu ṋea maanḓa e a vha a tshi a ṱoḓa na uri (3) o khwaṱhiswa lutendo nga maipfi a Mudzimu. Hesekiele o khwaṱhiswa hani nga zwenezwi zwithu zwiraru? Riṋe zwi ri thusa hani ṋamusi?

3. Ndi maipfi afhio e a khwaṱhisa Hesekiele nahone Yehova o mu khwaṱhisedza hani uri u ḓo mu tikedza?

³ Yehova o vhudza Hesekiele a ri: “Ndi khou u ruma.” (Hesek. 2:3, 4) Eneo maipfi a tea u vha o khwaṱhisa Hesekiele. Ndi ngani?  Ndi ngauri Hesekiele a nga vha o humbula uri Yehova o vhuya a vhudza muporofita Mushe na muporofita Yesaya maipfi a fanaho na eneo musi a tshi vha nanga uri vha vhe vhaporofita vhawe. (Ek. 3:10; Yes. 6:8) Hesekiele o vha a tshi zwi ḓivha uri Yehova o thusa hani vhenevho vhaporofita uri vha kone u ita mishumo i konḓaho. Ngauralo, musi Yehova a tshi vhudza Hesekiele luvhili lwoṱhe a ri: “Ndi khou u ruma,” Hesekiele o vha e na tshiitisi tshavhuḓi tsha u fhulufhela uri Yehova u ḓo mu tikedza. Zwiṅwe hafhu, ndi lunzhi Hesekiele a tshi ṅwala uri “Yehova a amba na nṋe.” (Hesek. 3:16) Ndi lunzhi Hesekiele a tshi ṅwala maipfi ane a ri: “Yehova o dovha a amba na nṋe.” (Hesek. 6:1) Zwi tou pfala uri Hesekiele o vha e na vhuṱanzi ha uri o rumiwa nga Yehova. Khotsi a Hesekiele vho vha vhe tshifhe. Khamusi vho vha vha tshi funza Hesekiele uri Yehova o vha a tshi vhudza vhaporofita vhawe zwifhinga zwoṱhe uri u ḓo vha thusa. Sa tsumbo, Yehova o amba na Isaka, Yakobo na Yeremia uri: “Ndi na iwe.”—Gen. 26:24; 28:15; Yer. 1:8.

4. Ndi maipfi afhio a khuthadzaho ane a nga vha o khwaṱhisa Hesekiele?

⁴ Vhaisiraele vhanzhi vho vha vha tshi ḓo aravha hani musi Hesekiele a tshi huwelela khavho? Yehova o ri: “Vha nnḓu ya Isiraele a vha nga u thetshelesi, ngauri a vha ṱoḓi u nthetshelesa.” (Hesek. 3:7) Musi vhathu vha tshi landula Hesekiele, vho vha vha tshi khou landula Yehova. Eneo maipfi o khwaṱhisedza Hesekiele uri musi vhathu vha tshi hana mulaedza wawe, a zwi ambi uri o vha a tshi khou balelwa u ita mushumo wawe sa muporofita. Yehova o dovha a khwaṱhisedza Hesekiele uri musi khaṱhulo dze a dzi amba dzi tshi itea, vhathu vho vha vha tshi ḓo “ḓivha zwa uri muporofita o vha e vhukati havho.” (Hesek. 2:5; 33:33) Zwi tou pfala uri eneo maipfi a khuthadzaho o mu  ṋea nungo dza u huwelela dze a vha a tshi dzi ṱoḓa.

5. U ya nga Yesaya 44:8, ri khwaṱhiswa nga mini?

⁵ Na riṋe ri khwaṱhiswa nga u ḓivha uri ro ruṅwa nga Yehova. O ri hulisa nga u ri vhidza “ṱhanzi” dzawe. (Yes. 43:10) Ndi ndugelo khulwane ye ra ṋewa yone. Samusi Yehova o vhudza Hesekiele a ri: “U songo ofha,” na riṋe Yehova u ri vhudza uri: “Ni songo ofha.” Ndi ngani ri songo fanela u ofha vhane vha ri pikisa? Ndi ngauri na riṋe ro rumiwa nga Yehova u fana na Hesekiele nahone u a ri tikedza.—Vhalani Yesaya 44:8.

6. (a) Ndi maipfi afhio ane Yehova a ri khwaṱhisedza ngao uri u ḓo ri tikedza? (b) Ndi zwifhio zwine zwa ri khuthadza na u ri ṋea nungo?

⁶ Yehova u ri khwaṱhisedza uri u ḓo ri tikedza. Sa tsumbo, musi Yehova a sa athu u amba uri riṋe ri “ṱhanzi” dzawe, o ri: “Musi u tshi fhira vhukati ha maḓi, ndi ḓo vha ndi na iwe, na musi u tshi wela milambo, a i nga u kumbi. Musi u tshi fhira vhukati ha mulilo, a u nga swi, na khavhu a i nga u fhisi.” (Yes. 43:2) Musi ri tshi huwelela, ri ita ri tshi ṱangana na zwikhukhulisi zwine ra nga zwi vhambedza na mulambo wo ḓalaho na milingo i fhisaho sa mulilo. Fhedzi Yehova u ḓo dzula a tshi ri thusa uri ri dzule ri tshi huwelela. (Yes. 41:13) Vhathu vhanzhi ṋamusi, u fana na misini ya Hesekiele, a vha takaleli mulaedza washu. Fhedzi zwenezwo a zwi ambi uri ri khou balelwa u ita mushumo wa u huwelela. U ḓivha uri Yehova u a takala musi ri tshi bvela phanḓa u ḓivhadza mulaedza wawe nga u fhulufhedzea zwi a ri khuthadza na u ri khwaṱhisa. Muapostola Paulo o ri: “Vha ḓo wana malamba u ya nga zwe vha zwi shuma.” (1 Vhakor. 3:8; 4:1, 2) Muṅwe wahashu wa tshifumakadzini we a fhedza tshifhinga tshilapfu e muvulanḓila u ri: “Zwi a ntakadza u ḓivha uri Yehova u lambedza vhuḓidini hashu.”

7. Hesekiele a nga vha o ḓipfa hani musi a tshi humbula bono ḽe a ḽi vhona nahone zwo mu kwama hani? (Sedzani tshifanyiso tshi re kha gwati.)

⁷ Hesekiele o vhona nḓila ine muya wa Mudzimu wa vha na maanḓa ngayo. Zwe Hesekiele a zwi vhona kha bono zwo mu thusa uri a vhone nḓila ine muya wa Mudzimu wa shuma ngayo kha vharuṅwa na kha u tshimbidza malinga mahulwane a goloi ya Yehova. (Hesek. 1:20, 21) Hesekiele o ḓipfa hani? O ṅwala zwe zwa itea. O ri: “Musi ndi tshi tshi vhona, nda gwadama.” Hesekiele o vha o tshuwa lwe a wela fhasi. (Hesek. 1:28) Musi Hesekiele a tshi humbula ḽeneḽo bono ḽi akhamadzaho, zwi fanela u vha zwo mu khwaṱhisedza uri Yehova a nga mu thusa nga muya wawe mukhethwa uri a ite mushumo wawe wa u huwelela.

8-9. (a) Ho itea mini kha Hesekiele musi Yehova a tshi mu vhudza uri a ‘ime’? (b) Yehova o dovha a ita mini uri a khwaṱhise Hesekiele uri a kone u ita mushumo wawe u konḓaho?

⁸ Yehova o vhudza Hesekiele a ri: “Murwa muthu, ima nga milenzhe uri ndi kone u amba na iwe.” Musi Yehova a tshi vhudza Hesekiele uri a ime nga milenzhe, o mu ṋea muya wawe, zwa mu ṋea nungo dza u takuwa. Hesekiele o ṅwala uri: “Muya wo ḓa kha nṋe wa ita uri ndi ime nga milenzhe.” (Hesek. 2:1, 2) Nga murahu ha zwenezwo, na kha mushumo woṱhe wa Hesekiele wa u huwelela, o vha a tshi dededzwa nga “tshanḓa” tsha Yehova, tshine tsha vha muya mukhethwa wawe. (Hesek. 3:22; 8:1; 33:22; 37:1; 40:1) Muya wa Mudzimu wo khwaṱhisa Hesekiele uri a kone u ita mushumo we a fhiwa nga Yehova wa u huwelela kha vhathu vha re na ‘tshikhuna na vha mbilu dzo rindilaho.’ (Hesek. 3:7) Yehova o amba na Hesekiele a ri: “Ndo ita uri tshifhaṱuwo tshau tshi ome u fana na zwifhaṱuwo zwavho na u ita uri phanḓa yau i ome u fana na phanḓa dzavho. Ndo ita uri phanḓa yau i ome sa daimane na u oma u fhira  tombo. U songo vha ofha kana wa tshuwiswa nga zwifhaṱuwo zwavho.” (Hesek. 3:8, 9) Nga maṅwe maipfi, Yehova o vha a tshi khou vhudza Hesekiele uri: ‘U songo kulwa nungo nga tshikhuna tsha havha vhathu. Ndi ḓo u khwaṱhisa.’

⁹ Nga murahu, muya wa Mudzimu wo livhisa Hesekiele fhethu he a vha a tshi ḓo ita mushumo wawe wa u huwelela. Hesekiele o ri: “Maanḓa a Yehova o vha a tshi khou shuma kha nṋe nga nḓila khulwane.” Zwo dzhiela Hesekiele vhege yoṱhe u guda nga vhuḓalo na u pfesesa wonoyo mulaedza na u u ḓivhadza nga tshivhindi. (Hesek. 3:14, 15) Nga murahu, Yehova a mu vhudza uri a ye govhani he ‘muya wa dzhena khae.’ (Hesek. 3:23, 24) Zwino Hesekiele o vha o lugela u thoma u huwelela.

10. Ndi thuso ifhio ine ra i ṱoḓa uri ri kone u huwelela nahone ndi ngani?

¹⁰ Ndi thuso ifhio ine ra i ṱoḓa kha mushumo washu wa u huwelela? Kha ri humbule zwe zwa itea kha Hesekiele. Musi a sa athu u thoma u huwelela, muya wa Mudzimu wo mu ṋea nungo dze a vha a tshi dzi ṱoḓa. U fana na Hesekiele, na ṋamusi ri ita mushumo wa Mudzimu nge ra thuswa nga muya wa Mudzimu. Ndi ngani ri tshi ralo? Ndi ngauri Saṱhane u khou lwa na riṋe uri ri litshe mushumo washu wa u huwelela. (Nzumb. 12:17) Vhathu vhanzhi vha vhona u nga u lwa na Saṱhane ndi u ḓifhedzela tshifhinga, sa izwi a tshi ri fhira nga nungo. Fhedzi, musi ri tshi khou ṱanziela, ri vha ri tshi khou mu kunda! (Nzumb. 12:9-11) Nga nḓila-ḓe? Musi ri tshi huwelela, ri sumbedza uri a ri ofhi zwine Saṱhane a ri shushedza ngazwo. Musi ri tshi huwelela, ri vha ri tshi khou kunda Saṱhane. U kona hashu u huwelela naho ri tshi pikiswa nga maswina ashu, zwi ita uri ri pfesese mini? Zwi ita uri ri zwi vhone uri ri ṋewa maanḓa nga muya wa Mudzimu na uri Yehova u a ri takalela.—Mat. 5:10-12; 1 Pet. 4:14.

11. Muya wa Mudzimu u nga ri itela mini nahone ri nga ita mini uri ri dzule ri tshi u wana?

¹¹ Ndi zwifhio zwiṅwe zwine ra zwi guda musi ri tshi humbula nḓila ye Yehova a ita ngayo uri tshifhaṱuwo na phanḓa ya Hesekiele zwi ome  nga lwa pfanyisedzo? Muya wa Mudzimu u nga ita uri ri vhe na nungo dza u kunda thaidzo dzine ra nga ṱangana nadzo mushumoni washu wa u huwelela. (2 Vhakor. 4:7-9) Ri nga ita mini uri ri dzule ri tshi wana muya wa Mudzimu? Ri tea u dzula ri tshi u humbela nga thabelo, ri tshi fhulufhela uri Yehova u ḓo ri pfa. Yesu o funza vhafunziwa vhawe a ri: “Dzulani ni tshi humbela, . . . dzulani ni tshi ṱoḓa, . . . dzulani ni tshi khokhonya.” Yehova u ḓo fhindula nga u “ṋea muya mukhethwa vhane vha mu humbela.”—Luka 11:9, 13; Mish. 1:14; 2:4.

12. U ya nga Hesekiele 2:9–3:3, mupombo wo vha u tshi bva ngafhi nahone wo vha wo ṅwalwa mini?

¹² Hesekiele ho ngo khwaṱhiswa fhedzi nga muya wa Mudzimu, o dovha a ṋewa nungo nga maipfi a Mudzimu. Kha bono, Hesekiele o vhona tshanḓa tsho fara mupombo. (Vhalani Hesekiele 2:9–3:3.) Wonoyo mupombo wo vha u tshi bva ngafhi? Wo vha wo ṅwalwa mini? Wo khwaṱhisa hani Hesekiele? Kha ri vhone. Wonoyo mupombo wo vha u tshi bva kha khuluṋoni ya Yehova. Khamusi Yehova o shumisa muṅwe wa vharuṅwa vhaṋa vhe Hesekiele a vha vhona mathomoni uri a mu fhe wonoyo mupombo. (Hesek. 1:8; 10:7, 20) Wonoyo mupombo wo vha wo ṅwalwa maipfi a Mudzimu ane a vha mulaedza mulapfu we Hesekiele a vha o tea u u ḓivhadza mathubwa e a vha o shandukela Mudzimu. (Hesek. 2:7) Mulaedza wa hone wo vha wo ṅwalwa nga nnḓa na nga ngomu ha mupombo.

13. Yehova o vhudza Hesekiele uri a ite mini nga mupombo nahone ndi ngani wo vha u tshi ḓifha?

¹³ Yehova o vhudza muporofita wawe uri a ḽe wonoyo mupombo a “ḓadze thumbu [yawe] ngawo.” Hesekiele a ḽa wonoyo mupombo woṱhe. Tshipiḓa tsha iḽi bono tsho vha tshi tshi amba mini? Hesekiele o vha o tea u pfesesa nga vhuḓalo mulaedza we a vha a tshi ḓo u ḓivhadza vhathu. O vha o tea u vha na lutendo kha wonoyo mulaedza uri u mu ṱuṱuwedzele u huwelela. Ha mbo ḓi itea tshiṅwe tshithu tshi mangadzaho. Hesekiele a pfa wonoyo mupombo u tshi “ḓifha sa mutoli.” (Hesek. 3:3) Ndi ngani zwo tou ralo? Kha Hesekiele u imela Yehova zwo vha zwi tshi ḓifha kana zwi tshi takadza. (Ps. 19:8-11) O vha a tshi zwi dzhiela nṱha uri Yehova o mu nanga uri a shume sa muporofita wawe.

14. Hesekiele o thuswa nga mini uri a lugele u thoma mushumo we a ṋewa?

¹⁴ Nga murahu, Yehova o amba na Hesekiele a ri: “Zwoṱhe zwine nda u vhudza u zwi dzhiele nṱha na u zwi thetshelesa.” (Hesek. 3:10) Yehova o vhudza Hesekiele eneo maipfi uri a humbule zwo ṅwaliwaho kha wonoyo mupombo na u elekanya nga hazwo. Musi Hesekiele a tshi ita zwenezwo, lutendo lwawe lwo khwaṱha. Zwo dovha zwa ita uri a kone u ḓivha mulaedza u re na maanḓa we a vha o tea u u vhudza vhathu. (Hesek. 3:11) Musi Hesekiele o no pfesesa mulaedza wa Mudzimu nga vhuḓalo na u vha na lutendo khawo, o vha o lugela u thoma u huwelela na u bvela phanḓa u swikela a tshi fhedza mushumo we a ṋewa.—Vhambedzani Phisalema 19:14.

15. Ndi zwifhio zwine ra tea u ‘zwi dzhiela nṱha’ uri ri konḓelele kha mushumo wa u huwelela?

¹⁵ Na riṋe ri fanela u bvela phanḓa ri tshi khwaṱhiswa lutendo nga maipfi a Mudzimu uri ri kone u konḓelela kha mushumo washu wa u huwelela. Ri tea u ‘dzhiela nṱha’ zwoṱhe zwine Yehova a ri vhudza zwone. Ṋamusi Yehova u amba na riṋe nga Ipfi ḽawe, Bivhili. Ri nga ita mini uri Ipfi ḽa Mudzimu ḽi bvele phanḓa ḽi tshi kwama mihumbulo yashu, maḓipfele ashu na zwiṱuṱuwedzi zwashu?

16. Ri tea u ita mini nga Ipfi ḽa Mudzimu nahone ri nga ita mini uri ḽi nwelele mbiluni dzashu?

 ¹⁶ Musi ri tshi ḽa zwiḽiwa zwa fhedza zwa gayiwa, muvhili washu u a khwaṱha. Zwi fanaho na zwenezwo, musi ri tshi guda Ipfi ḽa Mudzimu ra elekanya nga haḽo, lutendo lwashu lu a khwaṱha. Ri dzula ri tshi humbula zwine ra zwi guda nga ha mupombo. Yehova u ṱoḓa uri ri ‘ḓadze thumbu dzashu’ nga Ipfi ḽawe, zwine zwa vha u pfesesa Ipfi ḽawe zwavhuḓi. Ri nga zwi ita nga thabelo, u vhala na u elekanya. Ri thoma nga u rabela uri ri lugiselele mbilu dzashu u ṱanganedza mihumbulo ya Mudzimu. Ra kona u vhala maipfi a re Bivhilini. Musi ro no fhedza, ri imenyana ri elekanye, ri humbulisise nga ha zwe ra zwi vhala. Hu ḓo itea mini arali ra ita nga u ralo? Musi ri tshi elekanya, ndi hone na Ipfi ḽa Mudzimu ḽi tshi ḓo kona u nwelela mbiluni dzashu.

17. Ndi ngani u elekanya nga ha zwine ra zwi vhala Bivhilini zwi zwa ndeme?

¹⁷ Ndi ngani u vhala Bivhili na u elekanya zwi zwa ndeme? Ndi ngauri musi ri tshi zwi ita, zwi ḓo ri fha nungo dzine ra dzi ṱoḓa dza u huwelela mulaedza wa Muvhuso zwino na u ḓivhadza mulaedza wa khaṱhulo u ngaho tshifhango une ra nga tea u u vhudza vhathu hu si kale. Zwiṅwe hafhu, musi ri tshi elekanya nga ha nḓila yavhuḓi ine Yehova a vha ngayo, ri ḓo sendela tsini-tsini nae. Nga zwenezwo, ri ḓo ḓiphiṋa nga mulalo na u fushea, zwine zwa vha zwithu zwi takadzaho.—Ps. 119:103.

18. Ndi zwifhio zwine vhathu vhane ra huwelela khavho vha ḓo zwi ḓivha nahone ndi ngani?

¹⁸ Hesekiele o vha e muporofita, fhedzi riṋe a ri vhaporofita. Naho zwo ralo, ro ḓiimisela u bvela phanḓa ri tshi ḓivhadza mulaedza we Yehova a ri ruma wo ṅwaliwaho Ipfini ḽawe, u swikela mushumo wa u huwelela u tshi itiwa nga nḓila ine ya mu fusha. Musi tshifhinga tsha khaṱhulo tshi tshi swika, vhathu vha re tsimuni yashu a vha nga ḓiimeleli nga u ri Mudzimu ho ngo vha tsivhudza. (Hesek. 3:19; 18:23) Vha ḓo zwi vhona uri mulaedza we ra vha vhudza wone wo vha u tshi bva kha Mudzimu.

19. Ndi mini zwine zwa ḓo ri ṋea nungo dza u ita mushumo washu wa u huwelela?

¹⁹ Ndi mini zwine zwa ḓo ri ṋea nungo dza u ita mushumo washu wa u huwelela? Ndi zwenezwiḽa zwithu zwiraru zwe zwa khwaṱhisa Hesekiele. Ri dzula ri tshi huwelela ngauri ri a zwi ḓivha uri ro rumiwa nga Yehova, ro ṋewa nungo nga muya mukhethwa wa Mudzimu na uri ri khwaṱhiswa lutendo nga Ipfi ḽa Mudzimu. Ri ṱuṱuwedzwa u bvela phanḓa u ita mushumo washu wa u huwelela na u konḓelela “u swika vhufheloni” ri tshi thuswa nga Yehova.—Mat. 24:13.