NAA zwi a ni konḓela u ita ngudo ya muthu nga eṱhe vhege iṅwe na iṅwe? Naa nga zwiṅwe zwifhinga ni wana yeneyi ngudo i tshi ni bora? Roṱhe ri a ita ri tshi ḓipfa nga yeneyo nḓila nga zwiṅwe zwifhinga. Fhedzi humbulani nga ha zwiṅwe zwithu zwine ra tea u dzula ri tshi zwi ita, u fana na u ṱamba. U ṱamba zwi ṱoḓa tshifhinga na vhuḓidini, fhedzi musi ro no ṱamba, ri ḓipfa ro homolowa. U guda Bivhili zwi nga ri homolosa, zwa tou nga ro ‘kunakiswa nga maḓi a ipfi ḽa Mudzimu.’ (Vhaef. 5:26) Kha ri ambe nga ha zwiṅwe zwa zwithu zwine zwa nga ni thusa:

• Ḓivhetsheleni tshifhinga tshine na ḓo guda ngatsho vhege iṅwe na iṅwe. Ngudo ya muthu nga eṱhe ndi tshiṅwe tsha zwithu “zwa ndeme vhukuma” zwine Mukriste a tea u zwi ita. (Vhafil. 1:10) U itela uri ni si hangwe ḓuvha na tshifhinga tshine na ḓo guda ngatsho, ni nga zwi ṅwala kha bammbiri nahone na ḽi vhea fhethu hune na ḓo dzula ni tshi ḽi vhona. Khamusi ni nga rea aḽamu kha founu yaṋu u itela uri i ni humbudze musi tshifhinga tsha u guda tshi tsini na u swika.

• Khethani tshifhinga na nḓila ya u guda zwo ni teaho. Ndi zwifhio zwine na wana zwi tshi ni shumela? Naa zwi a ni lelutshela u guda lwa awara yoṱhe? Kana naa ni takalela u guda lwa tshifhinga tshipfufhi fhedzi ni tshi zwi ita lunzhi? Inwi muṋe ni a ḓiḓivha. Ni humbule nga ha zwenezwi zwithu musi ni tshi dzudzanya nḓila ine na ḓo guda ngayo. Arali na pfa ni tshi khou bvafha u guda musi tshifhinga tsha u guda tshi tshi swika, ni nga lingedza u guda lwa mimunithi ya fumi fhedzi. Sa izwi nzie i sa fani na muroho, u guda lwa mimunithi ya fumi a zwi fani na u sa guda tshithu. Nga murahu ha u guda lwa mimunithi ya fumi, khamusi ni ḓo vha na mafulufulu a u bvela phanḓa ni tshi khou guda.—​Vhafil. 2:13.

• Dzulani no khetha zwine na ḓo guda nga hazwo. Arali ni tshi khetha zwine na ḓo guda nga hazwo musi tshifhinga tshaṋu tsha u guda tsho no swika, ni nga vha ni sa khou ‘shumisa tshifhinga tshaṋu nga vhuṱali.’ (Vhaef. 5:16) Khezwi ni sa ṅwali fhasi zwiṱoho zwine na nga takalela u guda nga hazwo? Musi hu tshi vha na tshithu tshine na si tshi pfesese, tshi ṅwaleni fhasi. Musi no no fhedza u guda, ni nga engedza zwine na nga takalela u guda nga hazwo.

• Ni ite tshanduko musi zwi tshi ṱoḓea. Arali zwi tshi ṱoḓea, ni nga shandula ḓuvha na tshifhinga tshine na guda ngatsho, tshifhinga tshine na tshi fhedza ni tshi khou guda kana zwine na guda nga hazwo. Zwa ndemesa ndi uri ni ite ngudo ya muthu nga eṱhe vhege iṅwe na iṅwe.

Ri ḓo vhuyelwa vhukuma nga u ita ngudo ya muthu nga eṱhe vhege iṅwe na iṅwe. Zwi ḓo ri sendedza tsini na Yehova, zwa ri thusa u ita phetho dza vhuṱali nahone zwa ri homolosa.—​Yosh. 1:8.