Naa ni nga takalela u vhuyelwa nga ho engedzeaho nga ngudo yaṋu ya muthu nga eṱhe? Mbuno dzi re afho fhasi dzi nga ni thusa uri ni tou fombe musi ni tshi khou guda:

• Wanani fhethu havhuḓi. Lingedzani u wana fhethu ho kunaho na hu re na tshedza tsho eḓanaho uri ni kone u vhala zwavhuḓi. Ni nga dzula ṱafulani kana huṅwe fhethu havhuḓi nnḓa.

• Wanani fhethu hune na sa ḓo thithisiwa. Yesu o rabela “nga maḓautsha” e “fhethu hu re kule na miḓi.” (Marko 1:35) Arali ni sa koni u wana fhethu hune na nga kona u vhala ni hone ni sa khou thithisiwa, ni nga vhudza vhane na dzula navho uri ni ḓo guda nga tshifhinga-ḓe, na vha humbela uri vha sa ni thithise.

• Iledzani zwithu zwine zwa nga ni thithisa musi ni tshi khou guda. Arali ni tshi shumisa founu kana tablet u itela u guda, i iseni kha silence kana kha airplane mode uri i sa ni thithise. Musi ni tshi khou guda, arali na humbula nga ha zwiṅwe zwithu zwine na tea u zwi ita, ni nga zwi ṅwala fhasi uri ni zwi ite musi no no fhedza u guda. Arali zwi tshi khou ni konḓela u tou fombe kha ngudo yaṋu, ni nga awelanyana na ya u onyolosa milenzhe.