Vho Paul vha ri: Nga November 1985 ro vha ro takala vhukuma musi ri tshi khou ya ngei Liberia hune ha vha vhukovhela ha Afurika kha mushumo washu wa u thoma wa vhurumiwa. Bufho ḽe ra vha ro ḽi ṋamela ḽo mbo ḓi ima ngei Senegal. Anne o mbo ḓi ri: “Ho tou sala awara nthihi fhedzi uri ri swike Liberia.” Nga murahu ro mbo ḓi pfa nḓivhadzo ine ya ri: “Vhathu vhoṱhe vhane vha khou ya Liberia kha vha tse. Hu na vhaṅwe vhathu vhane vha khou vutshela muvhuso henengei, nga zwenezwo a ri nga ḓo ya Liberia.” Lwa maḓuvha a fumi oṱhe ro vha ri tshi khou dzula na vharumiwa ngei Senegal. Mafhungoni ho vha hu tshi khou ambiwa nga ha vhathu vhanzhi-vhanzhi vhe vha vhulawa na uri muvhuso a u khou tendela vhathu vha tshi bva mahayani avho ngauri muthu ane a ḓo bva muḓini wawe vha ḓo mu thuntsha vha mu vhulaya.

Vho Anne vha ri: Riṋe ri vhathu vhane vha vha na vhulondi. U bva ndi tshi kha ḓi vha muṱuku ndo vha ndi ṅwana ane a vha na vhusedzi nahone vhathu vho nrina dzina ngauri ndo vha ndi tshi dzula ndi tshi khou ofha. Ndo vha ndi tshi ofha na u tou pfuka bada. Fhedzi ro vha ro ḓiimisela u ya kha mushumo we ra ṋewa wone ngei Liberia naho zwi tshi nga vhea vhutshilo hashu khomboni.

Vho Paul vha ri: Nṋe na Anne ro alutshela fhethu huthihi ngei vhukovhela ha England. Vhabebi vhashu vho vha vha tshi ri ṱuṱuwedza uri ri vhe vhavulanḓila, nga zwenezwo ro mbo ḓi thoma u vula nḓila musi ri tshi tou fhedza sekondari. Vho vha vho takala musi vha tshi vhona uri ro ḓivhetshela tshipikwa tsha u vha tshumeloni ya tshifhinga tshoṱhe. Nṋe ndo mbo ḓi ya Bethele musi ndi na miṅwaha ya 19 nahone Anne a ḓa musi ri tshi tou fhedza u vhingana nga 1982.

Vho Anne vha ri: Ro vha ri tshi zwi funa u shuma Bethele, fhedzi u bva kale ro vha ri tshi ṱoḓa u shuma fhethu hu re na ṱhoḓea. Musi ri Bethele, ro vha ri tshi shuma na vhaṅwe vhahashu vhe vha vha vhe vharumiwa tshifhingani tsho fhiraho nahone musi ri tshi pfa tshenzhelo dzavho, zwo vha zwi tshi ita uri na riṋe ri ṱoḓe u vha vharumiwa. Lwa miṅwaha miraru, ro vha ri tshi rabela nga hazwo vhusiku vhuṅwe na vhuṅwe ri tshi vhudza Yehova uri ri khou ṱoḓa u vha vharumiwa. Nahone ro vha ro takala nga maanḓa musi ri tshi rambiwa nga 1985 uri ri ḓe kha kilasi ya vhu 79 ya tshikolo tsha Gilead. Musi ri tshi ṱhaphudza tshikolo, ro mbo ḓi humbelwa uri ri ye u shuma Liberia hune ha vha vhukovhela ha Afurika.

Vho Paul vha ri: Musi mabufho a tshi vho tendelwa u ya Liberia, ro mbo ḓi ṋamela bufho ḽa u thoma ḽe ḽa vha ḽi  tshi khou bva Senegal ḽi tshi khou ya Liberia. Vhathu vho vha vho tshuwa nahone vho vha vha sa athu u tendelwa uri vha nga bva miḓini yavho nga madekwana. Vhathu vho vha vho tshuwa lwe musi vha tshi pfa goloi ye ya vha i tshi khou bvumisa zwiṅwe-vho, vha mbo ḓi shavha vha tshi khou ṱavha mikosi. Ro vha ri tshi vhala bugu ya Phisalema vhusiku vhuṅwe na vhuṅwe u itela uri ri dzike. Naho ro vha ri tshi khou ṱangana na dzenedzo thaidzo, ro vha ri tshi funa mushumo we ra ṋewa wone. Anne o vha a tshi vha a tshi khou huwelela ḓuvha ḽiṅwe na ḽiṅwe ngeno nṋe ndi tshi khou shuma ngei Bethele na Vho John Charuk. a Ndo guda zwithu zwinzhi kha Vho Charuk ngauri vho vha vho no fhedza tshifhinga tshilapfu vha tshi khou dzula Liberia nahone vho vha vha tshi ḓivha thaidzo dzine vhahashu vha ṱangana nadzo henefho.

Vho Anne vha ri: Zwithu zwe zwa ita uri ri fune Liberia ndi uri vhahashu vha henefho vho vha vha tshi ri funa nahone vha tshi fhulufhedzea. Ro vha ro no tou vha madele mapfani na vhahashu nahone ro vha ri tshi vha dzhia sa muṱa washu. Nyeletshedzo dze vha vha vha tshi ri ṋea dzone dzo ri ṱuṱuwedza. Zwo vha zwi tshi takadza u huwelela kha ḽeneḽo shango. Vhathu vho vha vha tshi dinalea arali ra sa dzula tshifhinga tshilapfu musi ri tshi khou huwelela khavho. Huṅwe na huṅwe he vhathu vha vha vha tshi vha vhe hone vho vha vha tshi vha vha tshi khou amba nga ha mafhungo a re Bivhilini. No vha ni tshi nga sokou ya na amba navho nga mafhungo a re Bivhilini. Ro vha ri na vhathu vhanzhi vhane ra guda navho Bivhili nahone zwo vha zwi tshi konḓa uri ri gude navho vhoṱhe. Ro ḓiphiṋa musi ri tshi khou huwelela henefho.

Vho Paul vha ri: Lwa miṅwaha miṋa ho vha hu na mulalo Liberia, fhedzi nga 1989 ho mbo ḓi thoma nndwa. Nga dzi 2 dza July 1990, vhathu vhe vha vha vha tshi khou ṱoḓa u dzhavhula muvhuso vho vha vha tshi vho langa fhethu he Bethele ya vha i hone. Ro fhedza miṅwedzi miraru ri sa koni u amba na vhathu vha re kha maṅwe mashango u katela na miṱa yashu, na vhahashu vha ofisini khulwane. Ho vha hu na dzikhakhathi, hu si na zwiḽiwa nahone vhunzhi ha vhafumakadzi vha tshi khou tambudzwa nga lwa vhudzekani. Zwenezwo zwo bvela phanḓa lwa miṅwaha ya 14 nahone zwo kwama shango ḽoṱhe ḽa Liberia.

Vho Anne vha ri: Vha luṅwe lushaka vho vha vha tshi lwa na vha luṅwe lushaka vha tshi vhulayana. Kha zwiṱaraṱa zwa henefho ho vha hu tshi dzula hu na maswole. Vho vha vha tshi dzula vhe na zwigidi, vha tshi ambara nga nḓila i songo ḓoweleaho nahone vha tshi ya muḓini muṅwe na muṅwe vha tshi dzhia tshithu tshine vha tshi ṱoḓa. Kha vhaṅwe vhathu, u vhulaya vhathu zwo vha zwi tshi tou nga u shidzha khuhu. Ho vha hu tshi vha hu na zwitumbu zwinzhi tsini na he Bethele ya vha i hone. Hu na Ṱhanzi dze dza vhulawa, u katela na vharumiwa vhavhili.

Maswole o vha a tshi vhulaya vhathu vha luṅwe lushaka lwe vha vha vha tshi khou lwa nalwo. Vhahashu vho vhea vhutshilo havho khomboni nga u dzumba vhahashu vha lushaka lwe lwa vha lu tshi khou ṱoḓa u vhulawa nga maswole. Na vharumiwa na vhaṅwe vhe vha vha vha tshi shuma Bethele  vho ita zwi fanaho. Vhaṅwe vhahashu vho ita na u shavhela Bethele. Nahone ro vha ri tshi dzula navho henefho Bethele. Kamarani yashu ro vha ri na vhathu vha sumbe.

Vho Paul vha ri: Maswole o vha a tshi ḓa Bethele ḓuvha ḽiṅwe na ḽiṅwe a tshi khou ṱoḓa u vhona arali hu na vhathu vhe ra vha dzumba. Ro vha ri tshi vha ri na vhathu vhaṋa vhane vha vha vha tshi khou linda henefho Bethele, vhavhili vho vha vha tshi vha vha tshi khou ṱolela nga fasiṱere, ngeno vhavhili vha tshi vha vhe getheni. Arali vhavhili vha re getheni vha vhea zwanḓa zwavho nga phanḓa havho, ro vha ri tshi zwi ḓivha uri zwoṱhe zwi ngonani. Fhedzi arali vha zwi isa nga murahu ro vha ri tshi zwi ḓivha uri eneo maswole o sinyuwa nahone vhahashu vhane vha khou ṱolela nga fasiṱere vho vha vha tshi mbo ḓi ṱavhanya vha dzumba vhahashu.

Vho Anne vha ri: Nga murahu ha vhege dzo vhalaho, ho ḓa tshigwada tsha maswole vho sinyuwa. Ndo mbo ḓi ḓivalela bathroom na muṅwe wahashu nahone ho vha hu tshi tou vha na fhethu huṱukuṱuku he a vha a tshi nga dzumbama hone khabodoni. Onoyo wahashu o mbo ḓi sokotela henefho. Maswole vho ntevhela vho fara zwigidi. Vho khokhonya muṋangoni vho sinyuwa. Mukalaha wanga o mbo ḓi ri: “Hai nandi, mufumakadzi wanga u tshee bathroom.” Musi ndi tshi vala vothi ḽa fhethu he onoyo wahashu a vha o dzumbama hone ho mbo ḓi pfala phosho. Nga murahu nda vha ndi tshi khou lingedza u dzudzanya zwithu nga nḓila ye zwa vha zwi ngayo. Ndo vha ndi tshi tou vha na vhuṱanzi ha uri maswole vha ḓo ḓivhudzisa uri ndo vha ndi tshi khou ita mini, zwenezwo zwo ita uri ndi ṋaṋe u tshuwa na u tetemela. Ndo vha ndi tshi tea u dzika musi ndi sa athu vula vothi, nda rabela kha Yehova uri a nthuse. Nga murahu nda vula vothi nahone ndo vha ndo dzika musi ndi tshi ḽi vula. Muṅwe wavho o mbo ḓi nthudzela kule a ṱuwa o livha khabodoni nahone a i vula a posekanya zwithu zwe zwa vha zwi nga ngomu kule. O vha a sa kholwi uri ho ngo wana tshithu. Maṅwe maswole vhe a vha e navho na vhone vho ya vha sedza na kha dziṅwe kamara. Fhedzi vha si wane tshithu.

Vho Paul vha ri: Ho fhela miṅwedzi minzhi ri tshi tou vha na zwiḽiwa zwiṱukuṱuku. Fhedzi ro vha ri na zwinzhi zwine zwa khwaṱhisa lutendo lwashu. Kanzhi ro vha ri si na zwiḽiwa zwa u ḽa nga matsheloni, fhedzi vhurabeli ha Bethele ha nga matsheloni ho vha vhu tshi tou nga zwiḽiwa kha riṋe. Ro vha ri tshi zwi ḓivha uri u vhala Bivhili zwi ḓo ri ṋea nungo dza u konḓelela ḓuvha ḽiṅwe na ḽiṅwe.

Arali zwiḽiwa na maḓi zwo fhela tshoṱhe nahone ra kombetshedzea u ṱuwa henefho davhini, vhahashu vhe vha vha vho dzumbama henefho vho vha vha tshi ḓo vha vho vhulawa. Kanzhi Yehova o vha a tshi ri ṋea zwine ra zwi ṱoḓa nga tshifhinga tsho teaho na nga nḓila dzi mangadzaho. Yehova o bvela phanḓa na u ri ṱhogomela na u ri thusa uri ri dzike.

Naho vhuimo ha shango ho vha vhu tshi khou ṋaṋa u vhifha, fhulufhelo ḽashu ḽo bvela phanḓa ḽi tshi khwaṱha. Vhunzhi ha vhahashu vho tea u shavha lwo vhalaho u itela u ḓitsireledza, fhedzi vha bvela phanḓa vhe na lutendo lwo khwaṱhaho nahone vho dzika naho vho vha vha tshi khou sedzana na dzithaidzo. Vhaṅwe vho amba uri u konḓelela zwenezwi zwithu zwo vha zwi tshi khou vha “lugiselela maṱungu mahulu.” Vhahulwane vha tshivhidzo na vhahashu vhe vha vha vha tshi kha ḓi vha vhaswa vho sumbedza u vha na tshivhindi nga u ita zwoṱhe zwine vha nga kona u itela u tsireledza vhahavho. Musi vhahashu vha tshi pfuluswa, vho vha vha tshi bvela phanḓa na u vha na vhuthihi nahone vha huwelela na kha vhaṅwe henefho he vha pfuluselwa hone. Vho shumisa zwe vha vha vhe nazwo u itela u ita Holo na u fara miṱangano. Nga zwenezwo zwifhinga, u ya miṱanganoni na u huwelela zwo ṋea vhahashu fhulufhelo na u vha ṱuṱuwedza.  Musi ri tshi khou isela vhahashu zwiḽiwa na zwiambaro na zwiṅwe zwithu, vhunzhi havho vho vha vha tshi humbela uri ri vha ṋee bege dza u hwala khandiso dza u huwelela nṱhani ha zwiambaro. Zwenezwo zwo nṱuṱuwedza vhukuma. Vhathu vhanzhi vho vha vha tshi khou ṱoḓa u pfa mafhungo maḓifha ngauri vho vha vho tshenzhela zwithu zwi si zwavhuḓi. Vho mangadzwa ngauri Ṱhanzi dza Yehova vho vha vha tshi vhonala vho takala, vha tshi tou nga tshedza swiswini. (Mat. 5:14-16) Ngauri vhahashu vho vha vha tshi khou fhisea, zwo thusa na maṅwe maswole uri a vhe Dziṱhanzi.

Vho Paul vha ri: Nga zwiṅwe zwifhinga ro tea u pfuluwa Liberia. Ro ṱuwa luraru lwa tshifhinga tshipfufhi nahone ra ṱuwa luvhili lwa ṅwaha woṱhe. Musi muṅwe wahashu wa murumiwa a tshi khou ṱalutshedza nḓila ye ra ḓipfa ngayo o amba uri: “Musi ri Gilead ro gudiswa uri ri fune vhahashu na mushumo washu nga mbilu yashu yoṱhe nahone ndi zwe riṋe ra ita.” U sia vhahashu vhe kha vhuimo he vha vha vhe khaho, zwo ri ṱungufhadza vhukuma. Zwi takadzaho ndi uri, ro vha ri tshi kona u thusa vhahashu vha Liberia ri kha mashango a tsini.

Vho Anne vha ri: Nga May 1996 ro vha ri na vhaṅwe vhahashu vhavhili ri tshi khou pfuluwa Bethele ro hwala mabammbiri a ndeme a tshimbidzanaho na mushumo we wa vha u tshi khou itwa ngei Liberia. Ro vha ri tshi khou ṱoḓa u reila lwa khilomithara dza 16 uri ri kone u swika fhethu ho tsireledzeaho nnḓa ha ḓorobo. Musi ri tshi khou ṱoḓa u ṱuwa, fhethu he ra vha ri hone ha mbo ḓi thoma u ṱhaselwa. Maswole e a vha o sinyuwa o mbo ḓi thoma u thuntsha muyani, vha ri imisa, vha tsitsa vhuraru hashu kha goloi nahone vha dzhia goloi vha ṱuwa nayo Paul a nga ngomu. Ro vha ro ima henefho ro ḓaḓa. Zwi tshe zwo ralo, ra vhona Paul a tshi khou ḓa kha riṋe a tshi khou bva malofha kha ṱhoho. Ro vha ri tshi khou humbula uri vho mu thuntsha, fhedzi ro mbo ḓi zwi ṱhogomela uri arali vho mu thuntsha o vha a tshi ḓo vha a sa khou kona u tshimbila. Ḽiṅwe swole ḽo vha ḽo mu rwa kha ṱhoho musi ḽi tshi khou mu sukumedza uri a tse kha goloi. Zwo ri rudza mbilu u vhona uri o vha a songo huvhalesa.

Ho vha hu na goloi ya maswole a muvhuso e a vha a tshi khou tsireledza vhathu ye ya vha yo paka nga henefho tsini yo hwala vhathu vhe vha vha vho tshuwa. Ro mbo ḓi swika ra nambatela yeneyo goloi nahone mureili a mbo ḓi i takusa nga luvhilo luhulu lwe ra vhuya ra ṱoḓa na u wa. Ro vha ri tshi khou vhidzelela uri a imise yeneyo goloi, fhedzi o vha o tshuwa lwe a si vhuye a ri thetshelesa. Ro kona u farelela u vhuya u swika i tshi swika he ya vha i tshi khou ya hone, fhedzi ro vha ro neta nga u farelela nahone ro tshuwa.

Vho Paul vha ri: Musi ri tshi swika, ro sedzana, ra ṱhogomela uri ri tou vha na zwiambaro zwashu zwi re na tshika na zwo kherukanaho fhedzi nahone ro vha ri sa kholwi uri ro ponya. Ro eḓela tsini na bufho henefho nnḓa ḽe ḽa vha ḽi na mabuli a gulu dza zwigidi nahone ḽi tshi tou nga ḽi nga ṱhukhukana. Nga ḓuvha ḽi tevhelaho, ḽeneḽo bufho ḽo mbo ḓi ri isa Sierra Leone. Musi ri tshi swika Sierra Leone ro vha ro takala vhukuma uri ro ponya, fhedzi ro vha ri tshi khou vhilaela nga ha vhahashu vhe vha sala ngei Liberia.

Vho Anne vha ri: Ro swika Bethele ya Freetown ya ngei Sierra Leone ro tsireledzea nahone vhahashu vho mbo ḓi thoma u ri ṱhogomela. Fhedzi ndo mbo ḓi thoma u humbula zwithu zwi si zwavhuḓi zwe zwa itea musi ndi Liberia. Nga masiari ndo vha ndi tshi dzula ndo tshuwa nahone ndi si tsha kona u vhona zwavhuḓi, ndi tshi vhona u nga hu nga itea zwithu zwi si zwavhuḓi kha nṋe. Ndo vha ndi tshi tou nga ndi khou ḽora. Ndo vha ndi tshi anzela u vuwa vhusiku ndi tshi khou tetemela nahone ndi tshi khou ofha uri hu nga itea zwithu zwi si zwavhuḓi. Ndo vha ndi tshi balelwa na nga u fema. Mukalaha wanga o nkuvhatedza a rabela na nṋe. Ro vha ri tshi imba na nyimbo dzine ra dzi imba miṱanganoni u swika ndi tshi dzika. Ndo vhona u nga ndi khou thoma u pandamedza zwisusu na uri ndi nga si tsha kona u bvela phanḓa na u shuma sa murumiwa.

A thi nga vhuyi nda vuwa ndo hangwa zwe zwa itea nga murahu. Nge yeneyo vhege ro wana magazini mivhili. Ro wana magazini wa Awake! ya 8 June 1996. Wo vha u na thero i re na tshiṱoho tshine tsha ri “Coping With Panic Attacks.” Yeneyo thero yo nthusa u pfesesa zwe zwa vha zwi tshi khou itea kha nṋe. Muṅwe magazini we ra u wana ndi Tshiingamo tsha 15 May 1996 tshe tsha vha tshi na thero ine ya ri “Vha Wana Ngafhi Nungo Dzavho?” Tshenetsho Tshiingamo tsho vha tshi na tshifanyiso tsha tshisusu tsho huvhalaho. Yeneyo thero yo amba uri tshenetsho tshisusu tsho huvhalaho tshi nga kona u bvela phanḓa tshi tshi khou fhufha na u wana zwiḽiwa naho maphapha atsho o huvhala. Yo amba uri na riṋe Yehova a nga ri thusa uri ri bvele phanḓa ri tshi khou mu shumela na u thusa vhaṅwe naho ri tshi khou ṱangana na dzithaidzo. Dzenedzo thero dzo vha dzo tou ḓa nga tshifhinga tshone-tshone. (Mat. 24:45) Ndo mbo ḓi thoma u ita ṱhoḓisiso nahone nda wana thero dzi fanaho na dzenedzo, nda mbo ḓi dzi vhulunga fhethu huthihi. Dzo nthusa nga maanḓa. Nga murahu ha tshifhinga, zwenezwi zwithu zwo mbo ḓi thoma u ṱuwa nga zwiṱuku nga zwiṱuku.

Vho Paul vha ri: Tshifhinga tshoṱhe musi ri tshi vhuyelela hayani hashu ngei Liberia, ro vha ri tshi takala. Ri tshi vho swika mafheleloni a 2004, ro vha ro no fhedza miṅwaha i ṱoḓaho u vha 20 ri tshi khou shuma ngei Liberia. Nndwa yo vha  yo no fhela, nga zwenezwo, ho vha hu tshi khou dzudzanywa uri hu itwe mushumo wa u fhaṱa ofisini ya davhi ngei Liberia. Fhedzi ro mbo ḓi humbelwa uri ri ye u shuma huṅwe.

Zwo vha zwi songo leluwa u ṱanganedza mushumo muswa ngauri vhahashu vha Liberia ro vha ri tshi vha funa nahone ro no vha khonani dzavho. Musi ri tshi ya Gilead nahone ra ṱutshela miṱa yashu, ro zwi vhona uri Yehova o ri thusa. Nga zwenezwo, ro mbo ḓi ṱanganedza wonoyo mushumo muswa wa u ya u shuma huṅwe. Ro humbelwa uri ri ye u shuma Ghana hune ha vha tsini na Liberia.

Vho Anne vha ri: Ro lila nga maanḓa musi ri tshi bva Liberia. Fhedzi ro mangadzwa nga zwe zwa ambiwa nga muṅwe wahashu o no vhaho mulala ane a pfi Frank. O ri: “Vhoiwe ni khou tea u hangwa nga ha riṋe.” Nga murahu a ri: “Ri a zwi ḓivha uri ni nga si vhuye na vuwa no ri hangwa, fhedzi ni khou tea u funa vhahashu vha Ghana nga mbilu dzaṋu dzoṱhe. Yehova ndi ene we a ni ṋea wonoyu mushumo, nga zwenezwo, ni ṱhogomele vhahaṋu henengei.” Zwe onoyo wahashu a zwi amba zwo ri thusa uri ri ḓiimisele u vha na khonani ntswa musi ri tshi ya Ghana naho ro vha ri sa ḓivhi vhathu vhanzhi henengei nahone ri tshi khou ya u thoma zwithu zwiswa.

Vho Paul vha ri: A zwo ngo vhuya zwa dzhia tshifhinga uri ri vhe khonani dza tsini na vhahashu vha Ghana. Ho vha hu na Ṱhanzi nnzhi henefho. Ro guda zwinzhi kha vhenevho vhahashu vha fhulufhedzeaho na vha re na lutendo lwo khwaṱhaho. Musi ro no shuma Ghana lwa miṅwaha ya 13, ro mbo ḓi ṋewa muṅwe mushumo muswa. Ro humbelwa uri ri ye u shuma kha ofisi ya davhi ya ngei Kenya hune ha vha vhubvaḓuvha ha Afurika. Ndi ngoho uri ro vha ro ṱuvha vhahashu vhane vha vha ngei Ghana na Liberia. Fhedzi musi ri tshi swika Kenya, ro mbo ḓi vha na khonani ntswa. Zwa zwino ri khou shuma fhano Kenya nahone hu na mushumo munzhi vhukuma une wa kha ḓi tea u itiwa.

Vho Anne vha ri: Ndo ṱangana na zwithu zwinzhi zwi tshuwisaho na zwi ofhisaho vhutshiloni hanga. Musi ni tshi ṱangana na zwithu zwi ofhisaho, zwi nga ita uri ni lwale na u ofha. A ri lavheleli uri Yehova a ri tsireledze kha zwenezwi zwithu zwoṱhe nga lwa vhuṱolo. Na zwino musi ndi tshi pfa hu tshi lila tshigidi, zwi ita uri thumbu yanga i vhavhe na zwanḓa zwanga zwi a oma. Fhedzi ndo guda uri ndi tea u dzula ndi tshi ḓitika nga Yehova na u tenda a tshi nthusa nga nḓila dzo fhambanaho, u katela na musi a tshi shumisa vhahashu. Ndo zwi ṱhogomela uri arali ra dzula ri tshi guda, ri tshi rabela, u ya miṱangano na tsimuni, Yehova u ḓo ri thusa uri ri bvele phanḓa na u ita mushumo we a ri ṋea wone.

Vho Paul vha ri: Vhaṅwe vhathu vha a ri vhudzisa vha ri: “Naa vha a funa mushumo wavho?” Ndi ngoho uri mashango ane ra ya khao a vha e mashango o nakaho vhukuma. Fhedzi nga zwiṅwe zwifhinga a nga kha ḓi vha na khombo. Naho zwo ralo, ri funa vhahashu vha henefho u fhira nḓila ine ra funa ngayo mashango ane ra ya khao. Naho ri tshi bva kha mvelele dzi sa fani, ri humbula na u ita zwithu nga nḓila ya Yehova. Ro vha ri tshi humbula uri musi ri tshi humbelwa uri ri ye u shuma kha eneo mashango, ri vha ri tshi khou ya u ṱuṱuwedza vhahashu. Fhedzi ngoho ndi ya uri ndi vhone vhe vha ri ṱuṱuwedza na u ri khwaṱhisa.

Vhushaka vhune vhahashu vha vha naho shangoni ḽoṱhe vhu a mangadza. Ri muṱa muthihi. Musi ri tshipiḓa tsha tshivhidzo, ri vha ri tshipiḓa tsha wonoyo muṱa nahone ri ḓipfa ro tsireledzea henefho. Ri na vhungoho ha uri arali ra dzula ri tshi ḓitika nga Yehova, u ḓo ri ṋea nungo musi ri tshi dzi ṱoḓa.—Vhafil. 4:13.