THERO I GUDWAHO 41
Dzulani Ni Tshi Fhulufhedzea Nga “Maṱungu Mahulu”
“Funani Yehova, inwi vhavhuya vhawe vhoṱhe. Yehova u linda vha fulufhedzeaho.”—PS. 31:23.
LUIMBO 129 Ri Ḓo Dzula Ri Tshi Konḓelela
MANWELEDZO *
1-2. (a) Hu si kale vharangaphanḓa vha shango vha ḓo ita nḓivhadzo ifhio? (b) Ri ḓo haseledza mbudziso dzifhio?
ḒIVHONENI musi vharangaphanḓa vha shango vha tshi khou tou bva u ita nḓivhadzo ye ra i lindela u bva tsha ṅwaha wa mmbo na tsikidzi ya uri hu na “mulalo na u tsireledzea.” Vha nga amba uri ḽo lala u fhira naho hu lini. Vha ḓo ṱoḓa uri ri humbule uri vha ḓo tandulula thaidzo dzoṱhe dza shango. Fhedzi vha nga si kone u thivhela zwine zwa ḓo itea! Ndi ngani? Bivhili yo dzula yo amba uri “ndozwo i ḓo vha ḓela vha songo zwi lavhelela . . . nahone a vha nga ponyoki na khathihi.”—1 Vhathes. 5:3.
2 Ri ḓo haseledza mbudziso dza ndeme dzi ngaho: Hu ḓo itea mini nga “maṱungu mahulu”? Ndi mini zwine Yehova a ḓo ṱoḓa ri tshi zwi ita nga tshenetsho tshifhinga? Nahone ri nga ḓilugiselela hani zwino u dzula ri tshi fhulufhedzea nga maṱungu mahulu?—Mat. 24:21.
HU ḒO ITEA MINI NGA “MAṰUNGU MAHULU”?
3. U ya nga Nzumbululo 17:5, 15-18, Mudzimu u ḓo fhelisa hani “Babele Ḽihulu”?
3 Vhalani Nzumbululo 17:5, 15-18. Hu ḓo fheliswa “Babele Ḽihulu”! Zwo no ḓi ambiwa uri vharangaphanḓa vha shango vha nga si kone u thivhela zwine zwa ḓo itea nga tshenetsho tshifhinga. Ndi ngani? Ndi ngauri “Mudzimu [u ḓo] dzhenisa mbiluni dzavho zwine a zwi humbula.” Mudzimu u ḓo ita uri vha ite mini? U ḓo ita uri vha fhelise vhurabeli hoṱhe ha mazwifhi, u katela na vhane vha ḓiita u nga vha Vhakriste. * Mudzimu u ḓo dzhenisa zwine a zwi humbula mbiluni dza “ṋanga dza fumi” dza “ḽivhanda ḽitswuku-tswuku.” Ṋanga dza fumi dzi imela mivhuso yoṱhe ine ya tikedza “ḽivhanda” ḽine ḽa vha United Nations. (Nzumb. 17:3, 11-13; 18:8) Maṱungu mahulu a ḓo thoma musi yeneyo mivhuso i tshi vutshela vhurabeli ha mazwifhi. Zwi ḓo vha zwithu zwi ofhisaho vhukuma shangoni ḽoṱhe.
4. (a) Vharangaphanḓa vha shango vha nga ṋea zwiitisi zwifhio zwa u vutshela Babele Ḽihulu? (b) Vhathu vhe vha vha vhe tshipiḓa tsha vhurereli ha mazwifhi vha nga ita mini?
4 A ri ḓivhi uri vharangaphanḓa vha shango vha ḓo ri ndi ngani vha khou vutshela Babele Ḽihulu. Khamusi vha ḓo ri vhurereli vhu ita uri hu si vhe na mulalo nahone vhu dzulela u dzhenelela kha zwa politiki. Kana vha amba uri vhurereli vhu na tshelede na thundu nnzhi. (Nzumb. 18:3, 7) Zwi vhonala u nga musi vharangaphanḓa vha shango vha tshi ṱhasela vhurereli ha mazwifhi a vha nga fhelisi vhathu vhoṱhe vha re khaho. Nṱhani hazwo, vha ḓo fhelisa vhurereli hone huṋe. Musi vhurereli ho no fheliswa, vhathu vhe vha vha vhe tshipiḓa tshaho vha ḓo ṱhogomela uri vharangaphanḓa vhaho vho vha zwifhela nahone zwi nga itea vha si tsha ṱoḓa u pfa tshithu ngaho.
5. Yehova o fhulufhedzisa uri u ḓo ita mini nga maṱungu mahulu nahone ndi ngani?
5 Bivhili a i ambi uri zwi nga dzhia tshifhinga tshingafhani u fhelisa Babele Ḽihulu, fhedzi ri na vhungoho ha uri a zwi nga dzhii tshifhinga tshilapfu. (Nzumb. 18:10, 21) Yehova o fhulufhedzisa uri u ḓo “fhungudza maḓuvha” a maṱungu mahulu u itela u tshidza “vhe a vha nanga” na vhurereli ha ngoho. (Marko 13:19, 20) Ndi mini zwine Yehova a ḓo ṱoḓa ri tshi zwi ita u bva nga maṱungu mahulu u swika nga nndwa ya Haramagedo?
DZULANI NI KHA VHURABELI HA NGOHO
6. Ndi zwifhio zwiṅwe zwine ra tea u zwi ita u itela u sendela kule na vhurabeli ha mazwifhi?
6 Samusi zwo haseledzwa kha thero yo fhiraho, Yehova u ṱoḓa uri vhashumeli vhawe vha sendele kule na Babele Ḽihulu. Fhedzi a zwi gumi henefho. Ri tea u dovha ra ḓiimisela u shumela Yehova. Ṱhogomelani nḓila mbili dza u zwi ita.
Ri songo litsha u ya miṱanganoni naho ho vhifha (Sedzani phara 7) *
7. (a) Ri nga ḓifara hani nga nḓila ine ya takadza Yehova? (b) Vhaheberu 10:24, 25 i sumbedza hani nḓila ine zwa vha zwa ndeme ngayo u ya miṱanganoni, zwihuluhulu zwino?
7 Ya u thoma, ri tea u ḓifara nga nḓila ine ya takadza Yehova. A ri takaleli nḓila ine vhathu vha shango vha ḓifara ngayo. Sa tsumbo, a ri tikedzi nḓila ine vha ḓifara luvhi nga zwa vhudzekani ngayo, u katela na mbingano dza vhathu vha mbeu dzi fanaho na dziṅwe nḓila dzine vhathu vha mbeu dzi fanaho vhane vha funana vha ḓifara ngadzo. (Mat. 19:4, 5; Vharoma 1:26, 27) Ya vhuvhili, ri tea u bvela phanḓa ri tshi gwadamela Yehova ri na vhahashu. Ri zwi ita hoṱhe, Holoni, mahayani kana fhethu ha tshiphiri. A ri nga litshi u ya miṱanganoni kana mini kana mini. Ngoho ndi ya uri u ya miṱanganoni ndi zwa ndeme zwino “samusi [ri] tshi zwi vhona uri ḓuvha ḽi khou sendela.”—Vhalani Vhaheberu 10:24, 25.
8. Mulaedza une ra u huwelela u nga shanduka nga nḓila ḓe tshifhingani tshi ḓaho?
8 Mulaedza une ra ḓo u huwelela nga maṱungu mahulu u nga shanduka. Zwa zwino, ri huwelela mafhungo maḓifha a Muvhuso na u ita vhafunziwa. Fhedzi nga maṱungu mahulu ri nga huwelela mulaedza une wa vha banga kupalula nahone une Bivhili ya u fanyisa na tshifhango. (Nzumb. 16:21) Ri nga huwelela nga ha uri shango ḽa Sathane ḽo no vha tsini tsini na u fheliswa. Nga tshifhinga tsho teaho, ri ḓo vhudzwa zwine ra tea u huwelela na nḓila ine ra tea u huwelela ngayo. Naa ri ḓo huwelela nga nḓila ine ndi kale ri khou huwelela ngayo? Kana naa ri ḓo huwelela nga dziṅwe nḓila? Ri ḓo zwi vhona henengei. Hu sa londwi zwine zwa ḓo itea, zwi vhonala u nga ri ḓo vha na ndugelo ya u huwelela khaṱhulo ya Yehova nga tshivhindi!—Hesek. 2:3-5.
9. Mulaedza washu u ḓo ita uri vhavhusi vha ite mini nahone ri nga vha na vhungoho ha mini?
9 Zwi nga itea uri mulaedza une ra ḓo vha ri khou huwelela u ite uri vhavhusi vha lingedze u ri fhumudza. Samusi ri tshi ḓitika nga Yehova zwino, na tshifhingani tshi ḓaho ri tea u ḓitika ngae. Ri nga vha na vhungoho ha uri Mudzimu u ḓo ri ṋea maanḓa a u ita zwine a funa.—Mixa 3:8.
ḒILUGISELENI U ṰHASELWA
10. Samusi zwo porofitiwa kha Luka 21:25-28, vhunzhi ha vhathu vha ḓo ḓipfa hani nga maṱungu mahulu?
10 Vhalani Luka 21:25-28. Vhathu vha ḓo akhamala nga maṱungu mahulu musi vha tshi vhona zwoṱhe zwe vha zwi fhulufhela zwi tshi khou fheliswa. Vha ḓo pfa “vhuṱungu,” vha ofha u vhulawa nga tshenetsho tshifhinga tshi ofhisaho vhukuma. (Tsef. 1:14, 15, Bivhili Khethwa) Zwi vhonala u nga na vhathu vha Yehova a vha nga ḓo ḽa lu ḓifhaho. Zwi nga itea uri ri ḓiwane ro sedzana na thavha nga nṱhani ha uri a ri tshipiḓa tsha shango. Ri nga tea u ḽa nnda ra sevha nga gai.
11. (a) Musi vhurabeli ha mazwifhi ho no fheliswa, ndi ngani vharangaphanḓa vha shango vha tshi ḓo ṱhasela Ṱhanzi Dza Yehova? (b) Ndi ngani ri songo tea u ofha maṱungu mahulu?
11 Hu ḓo swika tshifhinga tshine vhathu vha ḓo sinyuwa ngauri Ṱhanzi Dza Yehova dzi ḓo vha dzi tshee na vhurereli, ngeno havho ho fheliswa. Edzani u humbula bonyongo ḽine vha nga ḽi vusa fhethu hoṱhe u katela na kha inthanethe. Vharangaphanḓa vha shango na Sathane muvhusi wavho vha ḓo ri vhenga ngauri hu ḓo vha ho sala vhurereli hashu fhedzi. Vha ḓo vha vha songo kona u swikelela tshipikwa tshavho tsha u fhelisa vhurereli hoṱhe. Hu ḓo vha ho sala riṋe ri roṱhe. Nga tshenetsho tshifhinga, vharangaphanḓa vha shango vha ḓo mbo ḓi vha Gogo kha ḽa Magogo. * Vha ḓo ita mutingati u itela u ṱhasela vhathu vha Yehova nga vhuhali. (Hesek. 38:2, 14-16) U sa ḓivha mafhungo nga vhuḓalo zwi nga ita uri ri vhilaele. Naho zwo ralo, tshine ra ḓivha ndi uri a ro ngo tea u ofha zwine zwa ḓo itea nga maṱungu mahulu. Yehova u ḓo ri vhudza zwine ra tea u ita uri ri ponye. (Ps. 34:19) Ri ḓo vha na “maanḓa na tshivhindi” ngauri ri ḓo vha ri khou zwi ḓivha uri u “vhofhololwa [hashu] hu tsini.” *
12. “Mulanda a fulufhedzeaho na wa vhuṱali” u ri thusa hani u ḓilugiselela zwine zwa ḓo itea tshifhingani tshi ḓaho?
12 Ndi kale “mulanda a fulufhedzeaho na wa vhuṱali” a tshi khou ri thusa u ḓilugiselela u dzula ri tshi fhulufhedzea nga maṱungu mahulu. (Mat. 24:45) O zwi ita nga nḓila nnzhi, fhedzi iṅwe tsumbo ndi mabuthano e ra vha nao u bva nga 2016 u swika nga 2018. Kha eneo mabuthano, ro guda nga ha nḓila ine ra nga fhulufhedzea, u konḓelela na u vha na tshivhindi nga ho engedzeaho samusi ḓuvha ḽa Yehova ḽo sendela. Kha ri zwi haseledze.
DZULANI NI TSHI FHULUFHEDZEA, U KONḒELELA NA U VHA NA TSHIVHINDI NGA HO ENGEDZEAHO
Ḓilugiseleni zwino u ponya “maṱungu mahulu” (Sedzani dziphara 13-16) *
13. Ri nga fhulufhedzea hani kha Yehova nga ho engedzeaho nahone ndi ngani ri tshi tea u zwi ita zwino?
13 U fhulufhedzea: Buthano ḽa 2016 ḽo vha ḽi na tshiṱoho: “Dzulani Ni Tshi Fulufhedzea Kha Yehova!” Kha ḽeneḽi buthano, ro guda uri u vha na vhushaka havhuḓi na Yehova zwi ḓo ri thusa u fhulufhedzea khae. Ro humbudzwa uri thabelo i bvaho mbiluni na u guda Bivhili zwi ḓo ita uri ri vhe na vhushaka ha tsini nae. Zwenezwo zwi ḓo ri ṋea nungo musi ro sedzana na thavha. Samusi vhufhelo vhu khou sendela, ri nga ṱangana na thaidzo nnzhi dzine dza nga ita uri zwi konḓe u fhulufhedzea kha Mudzimu na u tikedza Muvhuso wawe. Zwi nga itea uri vhathu vha bvele phanḓa vha tshi ri goḓa. (2 Pet. 3:3, 4) Vha nga zwi ita ngauri a ri tikedzi shango ḽa Sathane. Ri tea u fhulufhedzea nga ho engedzeaho zwino u itela uri na nga maṱungu mahulu ri dzule ri tshi fhulufhedzea.
14. (a) Hu ḓo vha na tshanduko ifhio kha vhahashu vhane vha ranga phanḓa kha ḽifhasi? (b) Ndi ngani zwi tshi ḓo vha zwa ndeme u fhulufhedzea?
14 Nga maṱungu mahulu, hu ḓo vha na tshanduko kha vhahashu vhane vha ranga phanḓa kha ḽifhasi. Hu ḓo swika tshifhinga tshine vhaḓodzwa vhoṱhe vhane vha kha ḓi vha kha ḽifhasi vha ḓo kuvhanganyelwa ṱaḓulu u itela uri vha lwe nga nndwa ya Haramagedo. (Mat. 24:31; Nzumb. 2:26, 27) Zwi amba uri Tshigwada Tshi Langaho tshi ḓo vha tshi si tsheeho kha ḽifhasi. Naho zwo ralo, vha gogo ḽihulu vha ḓo bvela phanḓa vho dzudzanyea. Vhahashu vha faneleaho vha re tshipiḓa tsha dziṅwe nngu vha ḓo ri ranga phanḓa. Ri ḓo sumbedza uri ri fhulufhedzea kha Yehova nga u vha tikedza na nga u tevhela vhulivhisi vhune a vha ṋea. Ndi zwone zwine zwa ḓo ri tshidza!
15. Ri nga konḓelela hani nga ho engedzeaho nahone ndi ngani zwi zwa ndeme u zwi ita zwino?
15 U konḓelela: Buthano ḽa 2017 ḽo vha ḽi na tshiṱoho: “Ni Songo Neta!” Heḽi buthano ḽo ri thusa u konḓelela milingo nga ho engedzeaho. Ro guda uri a ro ngo tea u konḓelela musi zwithu zwo ri nakela fhedzi. U ḓitika nga Yehova zwi ḓo ri thusa u konḓelela nga nḓila yo engedzeaho. (Vharoma 12:12) Ri songo hangwa zwe Yesu a fhulufhedzisa: “Ane a konḓelela u swika vhufheloni ndi ene ane a ḓo tshidzwa.” (Mat. 24:13) Zwi amba uri ri tea u fhulufhedzea hu sa londwi thaidzo dzine ra vha nadzo. U konḓelela milingo zwino, zwi ḓo ri thusa uri ri vhe na lutendo lwo khwaṱhaho hu sa athu thoma maṱungu mahulu.
16. Ndi mini tshi itaho uri ri vhe na tshivhindi nahone ndi ngani ri tshi tea u vha natsho nga ho engedzeaho zwino?
16 Tshivhindi: Buthano ḽa 2018 ḽo vha ḽi na tshiṱoho: “Ivhani Na Tshivhindi!” Ḽeneḽi buthano ḽo ri humbudza uri u vha na tshivhindi a zwi ḓitiki nga vhukoni hashu. U fana na u konḓelela, ri vha na tshivhindi musi ri tshi ḓitika nga Yehova. Ri nga guda hani u ḓitika nga Yehova nga nḓila yo engedzeaho? Nga u vhala Bivhili ḓuvha na ḓuvha na u elekanya nga ha nḓila ye Yehova a tshidza ngayo vhathu vhawe tshifhingani tsho fhiraho. (Ps. 68:20; 2 Pet. 2:9) Ri ḓo tea u vha na tshivhindi musi ri tshi ṱhaselwa nga dzitshaka nahone ri ḓo tea u fhulufhela Yehova u fhira naho hu lini. (Ps. 112:7, 8; Vhaheb. 13:6) Arali ra ḓitika nga Yehova zwino, ri ḓo kona u vha na tshivhindi tshine tsha ḓo ri thusa musi Gogo a tshi ri ṱhasela. *
U VHOFHOLOLWA HAṊU HU TSINI!
Hu si kale, Yesu na mmbi ya vharunwa vha do fhelisa maswina a Mudzimu nga nndwa ya Haramagedo! (Sedzani phara 17)
17. Ndi ngani ri songo tea u ofha Haramagedo? (Sedzani tshifanyiso tshi re kha gwati.)
17 Samusi zwo ambiwa kha thero yo fhiraho, vhunzhi hashu ro tshila vhutshilo hashu hoṱhe maḓuvhani a vhufhelo. Nahone ri na fhulufhelo ḽa ponya maṱungu mahulu. Nndwa ya Haramagedo i ḓo vha yone amba dzi fhele. Naho zwo ralo, a ro ngo tea u tetemela. Ndi ngani? Ndi ngauri Yehova ndi ene ane a ḓo lwa. (Mir. 1:33; Hesek. 38:18-20; Sak. 14:3) Yehova u ḓo vhudza Yesu Kristo tshifhinga tsha u thoma u lwa. Musi Kristo a tshi lwa, u ḓo vha e na vhaḓodzwa vho vuswaho na mavhuthu a vharuṅwa. Hu ḓo duba buse musi vha tshi lwa na Sathane na madimoni awe na mmbi yawe ya kha ḽifhasi.—Dan. 12:1; Nzumb. 6:2; 17:14.
18. (a) Yehova o fhulufhedzisa mini? (b) Nzumbululo 7:9, 13-17 i ita hani uri ni vhe na fhulufhelo ḽa vhumatshelo?
18 Yehova o fhulufhedzisa uri: “Mafumo oṱhe a fulelwaho u lwa na iwe ha nga koni tshithu.” (Yes. 54:17) Hu ḓo vha na “gogo ḽihulu” ḽa vhathu vha Yehova vha fhulufhedzeaho vhane vha ḓo ‘bva maṱunguni mahulu’ vha tshi khou tshila! Vha ḓo bvela phanḓa vha tshi mu shumela. (Vhalani Nzumbululo 7:9, 13-17.) Bivhili i ita uri ri vhe na fhulufhelo ḽa vhumatshelo. Ri a zwi ḓivha uri “Yehova u linda vha fulufhedzeaho.” (Ps. 31:23) Vhoṱhe vhane vha mu funa na u mu renda vha ḓo takala musi a tshi phumula dzina ḽawe matope.—Hesek. 38:23.
19. Ro lindela vhumatshelo ha hani?
19 Humbulani uri arali 2 Timotheo 3:2-5 i vhe i tshi amba nga ha vhathu vhane vha ḓo tshila shangoni ḽi sa ṱuṱuwedzwi nga Sathane yo vha i tshi nga vha ṱalusa hani. (Sedzani bogisi “ Nḓila Ine Vhathu Vha Ḓo Vha Ngayo.”) Wahashu Vho George Gangas * vhe vha shuma sa muṅwe wa Tshigwada Tshi Langaho vho zwi ṱalusa nga heyi nḓila: “Shango ḽi ḓo vha fhethu havhuḓi musi ri tshi khou tshila na Vhakriste fhedzi. Hu si kale ri ḓo tshila shangoni ḽiswa. Ni ḓo tshila ni sa fi, u fana na Yehova. Ri ḓo tshila tshoṱhe.” Ndi fhulufhelo ḽi takadzaho lungafhani!
LUIMBO 122 Khwaṱhani, Ni Songo Dzinginyea!
^ phar. 5 Ri a zwi ḓivha uri “maṱungu mahulu” a ḓo thoma hu si kale. Hu ḓo itea mini kha riṋe nga tshenetsho tshifhinga? Ndi mini zwine Yehova a ḓo ṱoḓa ri tshi zwi ita? Ndi mini zwine zwa ḓo ri thusa u dzula ri tshi fhulufhedzea? Ino thero i ḓo ṱalutshedza.
^ phar. 3 ṰHALUTSHEDZELO YA MAIPFI: Vhane vha ḓiita u nga vha Vhakriste ndi vhathu vhane vha amba uri vha vhatevheli vha Kristo ngeno vha sa gwadameli Yehova nga nḓila ine a ṱoḓa.
^ phar. 11 ṰHALUTSHEDZELO YA MAIPFI: Gogo kha ḽa Magogo (kana Gogo) zwi ambela kha dzitshaka dze dza kuvhangana u itela u ṱhasela vhathu vha Yehova nga maṱungu mahulu.
^ phar. 11 U itela u ḓivha zwo engedzeaho nga ha zwine zwa ḓo itea nga Haramagedo, vhalani ndima 21 kha bugu Muvhuso wa Mudzimu U A Vhusa! U itela u ḓivha zwo engedzeaho nga ha musi Gogo kha ḽa Magogo a tshi ṱhasela vhathu vha Yehova na nḓila ine Yehova a ḓo vha lamulela ngayo, vhalani Tshiingamo tsha ḽa 15 July 2015 masiaṱari 9-15 na ndima 17 na 18 kha bugu Pure Worship of Jehovah—Restored At Last! nga Luisimane.
^ phar. 16 Buthano ḽa 2019 ḽi na tshiṱoho: “Lufuno Lu Nga Si Fhele!” nahone ḽi ita uri ri vhe na vhungoho ha uri Yehova u ḓo dzula a tshi ri tsireledza ngauri u a ri funa.—1 Vhakor. 13:8.
^ phar. 19 Vhalani thero “Mishumo Yawe I A Mu Tevhela” kha Tshiingamo tsha ḽa 1 December 1994.
^ phar. 65 ṰHALUSO YA TSHIFANYISO: Nga maṱungu mahulu, tshigwada tshiṱuku tsha Ṱhanzi Dza Yehova tshi sumbedza u vha na tshivhindi nga u ita miṱangano ḓakani.
^ phar. 67 ṰHALUSO YA TSHIFANYISO: Gogo ḽihulu ḽa vhathu vha Yehova vha fhulufhedzeaho vha ḓo bva maṱunguni mahulu vha tshi khou tshila nahone vho takala.
