1. Ndi ngani ri tshi tea u gwadamela Yehova fhedzi?

NDI Yehova fhedzi ane ra tea u mu gwadamela ngauri ndi Musiki washu nahone ndi Muṋei Wa Vhutshilo. (Nzumb. 4:11) Fhedzi hu nga vha na zwithithisi. Zwi nga itea uri zwiṅwe zwithu zwi thoma u vha zwa ndeme u fhira u gwadamela Yehova naho ri tshi mu funa na u mu ṱhonifha. U ḓivha uri zwenezwi zwi nga itea hani zwi nga ri thusa. Kha ri thome nga u haseledza uri zwi amba mini u gwadamela Yehova fhedzi.

2. U ya nga Mateo 4:10, ri ḓo sumbedza hani uri ri gwadamela Yehova e eṱhe?

² Bivhili i amba uri u funa Yehova zwi tshi bva mbiluni zwi ita uri ri gwadamele ene fhedzi. A ri nga tendi hu tshi vha na muthu kana tshithu tshine tsha vha tsha ndeme u mu fhira.—Vhalani Mateo 4:10.

3. Ri na zwiitisi zwifhio zwi pfalaho zwa u gwadamela Yehova e eṱhe?

³ Ri na zwiitisi zwi pfalaho zwa u gwadamela Yehova e eṱhe. Ndi ngani ri tshi ralo? Ndi nga nṱhani ha ngoho ye ra i guda nga hae. Ri funa zwine a vha zwone. Ri a ḓivha zwine a zwi funa na zwine a zwi vhenga nahone ri ḓipfa nga nḓila i fanaho. Ri a pfesesa uri Yehova o ri sika uri ri ite zwine a zwi funa na u mu shumela ro takala nga hu sa fheli nahone riṋe ri mu tikedza nga u tshila nga nḓila ine a i funa. Ri pfa ro huliswa vhukuma nge a ri ṋea tshibuli tsha u vha khonani dzawe. (Ps. 25:14) Zwoṱhe zwine ra zwi guda nga ha Musiki washu zwi ita uri ri vhe na vhushaka ha tsini nae.—Yak. 4:8.

4. (a) Ndi mini zwine Diabolo a zwi ita u itela uri ri si tsha gwadamela Yehova e eṱhe? (b) Ri ḓo haseledza mini kha ino thero?

 ⁴ Diabolo u khou vhusa ḽino shango nahone u ḽi shumisa u ita uri tsha ndeme kha riṋe hu vhe u takadza nyemulo dzashu na uri zwi konḓe u lwisana na nyemulo mmbi. (Vhaef. 2:1-3; 1 Yoh. 5:19) U ṱoḓa uri ri si tsha gwadamela Yehova e eṱhe. Ri ḓo haseledza nḓila mbili dzine Diabolo a dzi shumisa. Ya u thoma, u lingedza u ita uri ri fune tshelede nahone ya vhuvhili, u lingedza u ita uri ri khethe vhuḓimvumvusi vhu si havhuḓi.

5. Ndi ngani ri tshi tea u ṱhogomela uri ri si thome u funa tshelede?

⁵ Roṱhe ri ṱoḓa u ḽa, u ambara na u vha na vhudzulo. Naho zwo ralo, ri tea u ṱhogomela uri ri si thome u funa tshelede. Vhathu vhanzhi ṋamusi ndi “vhafuni vha tshelede” nahone vha funa na zwine vha renga ngayo. (2 Tim. 3:2) Yesu o vha a tshi zwi ḓivha uri vhafunziwa vhawe vha nga lingea u funa tshelede. O ri: “A hu na ane a nga kona u shumela vhaṋe vhavhili, ngauri u ḓo vhenga muṅwe a funa muṅwe kana u ḓo nambatela muṅwe, a nyadza muṅwe. Ni nga si kone u shumela Mudzimu na Lupfumo.” (Mat. 6:24) Muthu ane a lingedza u shumela vhaṋe vhavhili ndi muthu ane a gwadamela Yehova ngeno o farakanea nga u ṱoḓa lupfumo lwa ḽino shango. Muthu o raloho u vha a sa khou gwadamela Yehova e eṱhe.

6. Ri nga guda mini kha zwe Yesu a zwi vhudza tshivhidzo tsha Laodikea?

⁶ Mafheleloni a ḓanani ḽa u thoma, Vhakriste vha Laodikea vho zuwa vha ri: “Ndo pfuma, ndo kuvhanganya lupfumo, a hu na tshine nda tshi shaya na luthihi.” Fhedzi Yehova na Yesu vho vha vha tshi vha dzhia vha ‘songo takala, vha tshi pfisa vhuṱungu, vha  vhashai, vho pofula nahone vhe fhedzi.’ Yesu o vha kaidza. Ho ngo vha kaidzela uri vho pfuma, fhedzi o vha kaidza ngauri u funa havho tshelede zwo vha zwi khou tshinya vhushaka havho na Yehova. (Nzumb. 3:14-17) Arali ra vhona uri ri khou thoma u funa tshelede, ri tea u shandula nḓila ine ra humbula ngayo nga u ṱavhanya. (1 Tim. 6:7, 8) Arali ra sa ralo, mbilu yashu i ḓo fhandekana nahone u mu gwadamela hashu ha vha mahandana. Yehova u ṱoḓa ri tshi mu funa nga ‘mbilu yashu yoṱhe.’ (Marko 12:30) Tshelede i nga thoma hani u vha ya ndeme kha riṋe?

7-9. Ni guda mini kha tshenzhelo ya David?

⁷ Ṱhogomelani tsumbo ya David ane a dzula ngei United States. David ndi muhulwane wa tshivhidzo ane a vha mushumi wa biko. U amba uri o vha a tshi shuma vhukuma mushumoni wawe. Kha khamphani ye a vha a tshi shuma khayo, o ṋewa mushumo wa khwine kha we a vha a tshi u ita henefho nahone o vha e muṅwe wa vhomakone vha wonoyo mushumo kha ḽeneḽo shango. O ri: “Ndo vha ndi tshi humbula uri ndi khou fhaṱutshedzwa nga Yehova.” Naa zwenezwo zwo vha zwi ngoho?

⁸ Nga zwiṱuku nga zwiṱuku, David o thoma u vhona uri mushumo wawe u khou tshinya vhushaka hawe na Yehova. U ri: “Ndo vha ndi tshi humbula nga ha thaidzo dza mushumoni na musi ndi miṱanganoni na tsimuni. Naho ndo vha ndi tshi hola buto, ndo vha ndo tsikeledzea nahone mbingano yanga ya thoma u bva mitwe.”

⁹ David o zwi vhona uri u tea u ita phetho ya zwine zwa tea u ḓa u thoma vhutshiloni hawe. U ri: “Ndo vha ndo ḓiimisela u lugisa zwithu.” David o vhudza mutholi wawe uri u  ṱoḓa u shandula nḓila ine a shuma ngayo. Ho itea mini? O pandelwa mushumoni! David o ita mini? O ri: “Nga ḓuvha ḽi tevhelaho, ndo mbo ḓi ita khumbelo ya u vha muvulanḓila wa u thusa a bvelaho phanḓa.” David na mufumakadzi wawe vha thoma u tshila nga u kunakisa zwifhaṱo. Nga murahu, David o thoma u vha muvulanḓila wa tshifhinga tshoṱhe nahone nga u ya ha tshifhinga na mufumakadzi wawe a vha muvulanḓila. Vhenevho vhavhingani vho khetha u ita mushumo une vhanzhi vha u dzhiela fhasi, khavho uri vha shuma mushumo ḓe a si zwone zwa ndeme. Naho vha tshi vho hola tshelede ṱhukhu ṱhukhu, a vha lali na nḓala. Vha ṱoḓa u vhea Yehova u thoma nahone vho vhona nga avho maṱo uri Yehova u ṱhogomela vhane vha vhea Muvhuso wawe u thoma.—Mat. 6:31-33.

10. Ri nga linda hani mbilu dzashu?

¹⁰ Ri tea u linda mbilu dzashu, hu sa londwi uri ri na tshelede nnzhi kana ṱhuku. Ri nga zwi ita hani? Ni songo funa tshelede. Ni songo tenda mushumo waṋu u tshi vha wa ndeme u fhira u shumela Yehova. Ni nga zwi ḓivha hani uri ni khou thoma u funa tshelede? Ni nga ḓivhudzisa uri: ‘Naa ndi dzulela u humbula nga ha mushumo na musi ndi miṱanganoni kana tsimuni? Naa ndi dzulela u vhilaela nga ha u vha na tshelede yo eḓanaho tshifhingani tshi ḓaho? Naa nṋe na mufarisi wanga ri na thaidzo nga nṱhani ha tshelede na thundu? Naa ndo ḓiimisela u ita mushumo une wa dzhielwa fhasi, fhedzi une wa ntendela u shumela Yehova nga ho engedzeaho?’ (1 Tim. 6:9-12) Musi ri tshi khou ḓivhudzisa dzenedzo mbudziso, ri humbule uri Yehova u a ri funa nahone u fhulufhedzisa vhane vha mu gwadamela e eṱhe zwi tevhelaho, u ri: “Ndi nga si vhuye nda u ṱutshela nahone ndi nga si vhuye nda u laṱa.” Ndi ngazwo Paulo o ṅwala uri: “Nḓila ine na tshila ngayo i songo vha ya u funa tshelede.”—Vhaheb. 13:5, 6.

11. Vhuḓimvumvusi vhu nga ita uri vhathu vha ite mini?

¹¹ Yehova u ṱoḓa ri tshi ḓiphiṋa nga vhutshilo nahone iṅwe nḓila ine ra nga ḓiphiṋa ngayo ndi nga u ḓimvumvusa. Bivhili i ri: “A huna tshi re khwine kha muthu; nga a ḽe, nga a nwe; mbilu yawe nga i takalele vhuḓi a tshee kha mishumo yawe.” (Muh. 2:24) Naho zwo ralo, vhunzhi ha vhuḓimvumvusi ha ḽino shango a si havhuḓi. Vhu ita uri vhathu vha  ṱanganedze na u funa zwithu zwine Bivhili ya amba uri ndi zwivhi.

12. U ya nga 1 Vhakorinta 10:21, 22, ndi ngani ri tshi tea u ṱhogomela zwine ra ḓimvumvusa ngazwo?

¹² Ngauri ri ṱoḓa u gwadamela Yehova e eṱhe, a ri nga ḓo ḽa “ṱafulani ḽa Yehova” na “ṱafulani ḽa madimoni.” (Vhalani 1 Vhakorinta 10:21, 22.) Kanzhi ri ḽa na vhathu vhane ra vha na vhukonani navho. U khetha u ḓimvumvusa nga zwithu zwine zwa ṱuṱuwedza dzikhakhathi, vhungome, u ḓifara luvhi, nyemulo mmbi na mahumbulele a songo kunaho zwi fana na u dzula ṱafulani na maswina a Mudzimu ra ḽa nao zwiḽiwa zwe a bika. Arali ra ita zwenezwo, ri ḓo vha ri tshi khou ḓiokela masimbe nṱha ha ṱhoho, zwa tshinya na vhushaka hashu na Yehova.

13-14. U ya nga Yakobo 1:14, 15, ndi ngani ri tshi tea u ṱhogomela musi ri tshi khetha vhuḓimvumvusi? Fanyisani.

¹³ Vhuḓimvumvusi vhu fana na zwiḽiwa. Nga nḓila ḓe? Musi ri tshi ḽa zwiḽiwa, ri a kona u khetha zwine ra ḓo zwi ḽa. Fhedzi musi ro no mila, a ri tsha zwi langa, muvhili u a gaya nahone pfushi dza zwenezwo zwiḽiwa dza vha tshipiḓa tsha muvhili. U ḽa zwiḽiwa zwi re na pfushi, zwi ita uri ri vhe na mutakalo wavhuḓi, ngeno u ḽa zwi si na pfushi, zwi tshi nga ri lwadza. Zwi nga itea uri masiandoitwa a si ṱavhanye u vhonala, fhedzi nga u ya ha tshifhinga a ḓo vhonala.

¹⁴ Nga nḓila i fanaho, musi ri tshi khetha vhuḓimvumvusi, ri vha ri tshi khou khetha zwine zwa ḓo dzhena mihumbuloni yashu. Nga murahu, a ri tsha kona u langa nḓila ine mihumbulo yashu na mbilu dzashu zwa ḓo kwamea ngayo. Vhuḓimvumvusi havhuḓi vhu nga ri homolosa, ngeno vhu si havhuḓi vhu tshi nga ri vhaisa. (Vhalani Yakobo 1:14, 15.) Zwi nga itea uri masiandoitwa a si ṱavhanye u vhonala, fhedzi nga u ya ha tshifhinga a ḓo vhonala. Ndi ngazwo Bivhili i tshi ri tsivhudza uri: “Ni songo fhurwa: Mudzimu ni nga si mu fhure. Ngauri tshiṅwe na tshiṅwe tshine muthu a zwala u ḓo kaṋa tshenetsho; ngauri ane a zwala ṋamani yawe u ḓo kaṋa u sina zwi tshi bva kha ṋama.” (Vhagal. 6:7, 8) Ndi zwa ndeme vhukuma u iledza u ḓimvumvusa nga zwithu zwine Yehova a zwi vhenga!—Ps. 97:10.

15. Yehova o ri ṋea tshifhiwa tshifhio?

¹⁵ Vhunzhi ha vhathu vha Yehova vha a takalela tshiṱitshi tsha inthanethe tsha JW Broadcasting^®. Wahashu wa tshifumakadzini ane a pfi Marilyn o ri: “JW Broadcasting i nthusa uri ndi takale nahone zwoṱhe zwi re khayo zwi a vhuyedza. Musi ndi tshi khou ḽiwa nga vhuludu kana ndo tsikeledzea, ndi vhona nyambo i ṱuṱuwedzaho kana Vhurabeli Ha Nga Matsheloni. Zwi ita uri ndi ḓipfe ndi tsini na Yehova na ndangulo yawe. JW Broadcasting yo shandula vhutshilo hanga.” Naa ni khou shumisa tshenetshi tshifhiwa tshe Yehova a ni ṋea? Kha tshenetshi tshiṱitshi, hu na JW Broadcasting ya ṅwedzi muṅwe na muṅwe, nyimbo na vidio dzine na nga dzi ṱalela tshifhinga tshiṅwe na tshiṅwe.

16-17. Ndi ngani ri tshi tea u langa tshifhinga tshine ra tshi fhedza ri tshi khou ḓimvumvusa nahone ri nga zwi ita hani?

¹⁶ Ri tea u langa zwine ra ḓimvumvusa ngazwo na tshifhinga tshine ra tshi fhedza ri tshi khou ḓimvumvusa. Arali ra sa ralo, ri nga fhedza tshifhinga tshinzhi ri tshi khou ḓimvumvusa nṱhani ha u shumela Yehova. Vhanzhi vha a kundelwa u langa tshifhinga tshine vha tshi fhedza vha tshi khou ḓimvumvusa. Wahashu wa tshifumakadzini ane a pfi Abigail a re na miṅwaha ya 18 u ri: “Ndi a homolowa nga u vhona TV ndo no fhedza mishumo  ya ḓuvha. Fhedzi arali nda sa ṱhogomela, ndi nga fhedza awara nnzhi ndo i donolela.” Muṅwe wahashu wa tshinnani ane a pfi Samuel u ri: “Tshiṅwe tshifhinga ndi vhona vhuvidio vhunzhi kha inthanethe. Ndi thoma nga u vhona kuthihi, ndi tshi ri papara ndi wana uri ndo no fhedza awara tharu kana nṋa ndi khadzo.”

¹⁷ Ni nga langa hani tshifhinga tshine na tshi fhedza ni tshi khou ḓimvumvusa? Thomani nga u ḓivha uri ni fhedza tshifhinga tshingafhani. Khamusi ni nga ṅwala tshifhinga tshine na tshi fhedza nga vhege ni tshi khou ḓimvumvusa. Ṅwalani kha khalenda tshifhinga tshine na tshi fhedza ni tshi khou vhona TV, ni kha inthanethe kana ni tshi khou tamba dzi-game kha zwishumiswa zwa thekinolodzhi. Arali na vhona uri tsho ḓalesa, lingedzani u ita mbekanyamushumo. Thomani nga u ḓivhetshela tshifhinga tsha u ita zwithu zwa ndeme, ni kone u vhea tsha u ḓimvumvusa. Ni humbele Yehova uri a ni thuse u ita zwe na ṅwala. Arali na ita zwenezwo, ni ḓo vha na tshifhinga na nungo zwa u ita ngudo ya muthu nga eṱhe, vhurabeli ha muṱa, u ya miṱanganoni na tsimuni. Ni ḓo ḓifhelwa nga u ḓimvumvusa ngauri no vhea Yehova u thoma.

18-19. Ri nga sumbedza hani uri ri gwadamela Yehova fhedzi?

¹⁸ Musi muapostola Petro o no ṅwala uri shango ḽa Sathane ḽi ḓo fheliswa na uri hu ḓo vha na ḽifhasi ḽiswa, o ri: “Vhafunwa, samusi no lindela zwenezwi zwithu, itani zwine na nga kona uri mafheleloni ni wanwe ni si na madondo ni sa solei nahone ni na mulalo.” (2 Pet. 3:14) Ri sumbedza uri ri ṱoḓa u gwadamela Yehova fhedzi nga u thetshelesa zwe Petro a amba na nga u ita zwoṱhe zwine ra nga kona u tshila nga nḓila ine Yehova a i funa.

¹⁹ Sathane na shango ḽawe vha ḓo dzula vha tshi lingedza u ri ita uri ri si vhee Yehova u thoma. (Luka 4:13) Fhedzi hu sa londwi thaidzo dzine ra vha nadzo, a ri nga tendeli naho tshi tshini tshi tshi ri ita uri ri si tsha funa Yehova. Ro ḓiimisela u gwadamela Yehova fhedzi ngauri ndi ene e eṱhe o tewaho nga u gwadamelwa!