MUTHU ane a shuma u vumba mutsho u ṱhogomela uri fhethu hune ha dzula vhathu vhanzhi hu khou ḓa ḓumbu ḽihulu. Onoyo muthu u ita zwoṱhe zwine a nga kona u itela u vha tsivhudza hu tshee na tshifhinga ngauri u na ndavha navho.

Yehova u khou ita zwi fanaho nga u tsivhudza vhathu vhoṱhe nga ha “ḓumbu” ḽi tshinyadzaho u fhira oṱhe e a vhuya a vha hone. U khou zwi ita hani zwenezwo? Nahone ndi ngani ri tshi nga vha na vhungoho ha uri u khou ṋea vhathu tshifhinga tsha uri vha shandule nḓila dzavho? U itela u wana phindulo, kha ri ṱolisise nḓila ye Yehova a tsivhudza ngayo vhathu tshifhingani tsho fhiraho.

Zwifhingani zwa kale, Yehova o tsivhudza vhathu musi a sa athu ḓisa “ḓumbu” ḽa u fhelisa vhathu vha sa thetshelesi. (Mir. 10:25; Yer. 30:23) U dzulela u tsivhudza vhathu hu tshee na tshifhinga nahone a vha vhudza zwine vha tea u ita. (2 Dzikh. 17:12-15; Neh. 9:29, 30) U itela u ṱuṱuwedza vhathu uri vha shanduke, kanzhi Yehova o shumisa vhashumeli vhawe vha kha ḽifhasi u ḓivhadza nḓila ye a vha a tshi ḓo haṱula ngayo na u vha thusa uri vha ite tshanduko nga u ṱavhanya.—Amosi 3:7.

Noaxe ndi muṅwe wa vhe Yehova a vha shumisa u ḓivhadza khaṱhulo. O fhedza miṅwaha minzhi a tshi khou tsivhudza vhathu nga ha u ḓa ha Maḓi Mahulu nahone o zwi ita a sa ofhi. (Gen. 6:9-13, 17) O vha vhudza na zwe vha tea u ita uri vha ponye. Noaxe o huwelela vhukuma lwe nga murahu a ṱaluswa sa muhuweleli we a “huwelela nga ha u luga.”—2 Pet. 2:5.

Hu sa londwi vhuḓidini he Noaxe a vhu ita ha u huwelela mulaedza u bvaho kha Yehova, vhathu vho konyolela matanda nḓevheni. A vho ngo vha na lutendo. Nga zwenezwo, Maḓi Mahulu o vha “kumba vhoṱhe,” vha fa. (Mat. 24:39; Vhaheb. 11:7) Musi vhe tsini na u fa, vho vha vha si nga si ambe uri Mudzimu ho ngo vha tsivhudza hu tshee na tshifhinga.

Nga zwiṅwe zwifhinga, Yehova o tsivhudza vhathu ho sala tshifhinga tshiṱuku uri a ḓise “ḓumbu” ḽa khaṱhulo. Naho zwo ralo, tshenetsho tshifhinga tsho vha tshi tshi tendela vhane vha ṱoḓa u shanduka uri vha ite nga u ralo. Sa tsumbo, vhathu vha Egipita vho tsivhudzwa musi vha sa athu rwiwa nga Ṱhamu Dza Fumi. Kha ri humbule nga ha musi Yehova a tshi ruma Mushe na Aroni uri vha tsivhudze Farao nga ha ṱhamu ya vhusumbe ya tshifhango tshe tsha tshinyadza vhukuma. Samusi tshifhango tsho vha tshi tshi ḓo na nga ḓuvha ḽi tevhelaho, naa Yehova o vha ṋea tshifhinga tsho linganaho tsha u ponya? Bivhili i ri: “Vhalanda vha Farao vhe vha ofha ḽeneḽo fhungo ḽa Yehova, vha shavhisa miṱambi yavho na vhalisa vhavho, vha dzhena dzinḓuni. We a vha a sa sedzi, a litsha vhalanda vha bva na miṱambi.” (Ek. 9:18-21) Zwi tou vha khagala uri Yehova o vha tsivhudza hu tshee na tshifhinga.

Nga nḓila i fanaho, Farao na vhashumeli vhawe vho tsivhudzwa hu sa athu ḓa ṱhamu ya vhufumi. Fhedzi vha konyolela matanda nḓevheni. (Ek. 4:22, 23) Nga nṱhani ha zwenezwo, matanzhe avho a vhatukana o fa. Zwi ṱungufhadza hani! (Ek. 11:4-10; 12:29) Naa zwo vha zwi tshi konadzea u ponya yeneyi ṱhamu? Ee! Nga u ṱavhanya, Mushe o vhudza Vhaisiraele nga ha yeneyo ṱhamu nahone a vha  vhudza zwine vha tea u ita u itela u tshidza miṱa yavho. (Ek. 12:21-28) Ndi vhathu vhangana vhe vha mu thetshelesa? Dziṅwe ṱhoḓisiso dzi sumbedza uri vhathu vho ponyaho khaṱhulo ya Mudzimu nahone vha bva Egipita ndi milioni tharu. Kha tshenetsho tshivhalo ho katelwa Vhaisiraele, “vhaṅwe vhathu” vhane vha si vhe Vhaisiraele na Vhaegipita.—Ek. 12:38.

Kha dzenedzi tsumbo dzoṱhe, ro vhona uri Yehova o ṋea vhathu tshifhinga tsho linganaho tsha u shanduka a sa athu haṱula. (Doit. 32:4) Ndi ngani o ita zwenezwo? Muapostola Petro o sumbedzisa uri Yehova “ha ṱoḓi muthu naho e ufhio a tshi lozwiwa, fhedzi u tama vhoṱhe vha tshi rembuluwa.” (2 Pet. 3:9) Tshe Mudzimu a vha e na ndavha natsho ndi vhathu. O vha a tshi ṱoḓa uri vha rembuluwe na u shanduka a sa athu haṱula.—Yes. 48:17, 18; Vharoma 2:4.

Na ṋamusi, vhathu shangoni ḽoṱhe vha khou tsivhudzwa nahone vha fanela u shanduka vha ita zwo lugaho. Musi Yesu e kha ḽifhasi, o amba uri shango ḽi ḓo fheliswa mafheleloni a “maṱungu mahulu.” (Mat. 24:21) O amba hu tshee nga phanḓa nga ha khaṱhulo ine ya khou ḓa nahone a vhudza vhatevheli vhawe nga ha zwoṱhe zwine zwa ḓo itea musi yeneyo khaṱhulo yo no vha tsini. Nga zwenezwo, zwoṱhe zwine zwa khou itea ṋamusi ndi zwe Yesu a amba uri zwi ḓo itea.—Mat. 24:3-12; Luka 21:10-13.

Nga nṱhani ha honovho vhuporofita, Yehova u khou ṱuṱuwedza vhoṱhe uri vha khethe u mu thetshelesa na u mu shumela. U ṱoḓa vhane vha mu thetshelesa vha tshi vha na vhutshilo havhuḓi zwino na u tshila shangoni ḽiswa. (2 Pet. 3:13) Yehova o ṋea vhathu ‘mafhungo maḓifha a Muvhuso’ u itela u vha thusa uri vha vhe na lutendo kha zwe a fhulufhedzisa nahone Yesu o amba uri a ḓo ‘ḓivhadzwa ḽifhasini ḽoṱhe uri zwi vhe vhuṱanzi kha tshaka dzoṱhe.’ (Mat. 24:14) Yehova o dzudzanya uri vhathu vhawe vha ḓivhadze mulaedza wawe kha mashango a ṱoḓaho u vha 240. U ṱoḓa uri vhoṱhe vha ponye musi a tshi ḓisa khaṱhulo i ngaho “ḓumbu.”—Tsef. 1:14, 15; 2:2, 3.

A ri tsha vhudzisa arali Yehova a tshi ṋea vhathu tshifhinga tsho linganaho tsha u shanduka musi a sa athu ḓisa khaṱhulo. Zwi tou vha khagala uri u a zwi ita. Mbudziso yo salaho ndi heyi: Naa vhathu vha ḓo shanduka hu tshee na tshifhinga? U nga ri ri nga thusa vhathu vhanzhi nga hune ra nga kona uri vha ponye musi vhufhelo vhu tshi swika.