1. Yehova a nga ita mini u itela u khunyeledza tshipikwa tshawe?

YEHOVA a nga vha tshiṅwe na tshiṅwe u itela u khunyeledza tshipikwa tshawe. Sa tsumbo, o vha Mufunzi, Mukhuthadzi na Muhuweleli. (Yes. 48:17; 2 Vhakor. 7:6; Vhagal. 3:8) Naho zwo ralo, kanzhi u shumisa vhathu u itela u khunyeledza zwipikwa zwawe. (Mat. 24:14; 28:19, 20; 2 Vhakor. 1:3, 4) Yehova a nga ṋea muṅwe na muṅwe washu vhuṱali na nungo zwine zwa ḓo ita uri ri vhe zwine zwa ṱoḓea u itela u khunyeledza tshipikwa tshawe. Vhaṱoḓisisi vhanzhi vha amba uri zwenezwi ndi tshipiḓa tsha zwine dzina ḽa Yehova ḽa amba zwone.

2. (a) Ndi ngani nga zwiṅwe zwifhinga ri tshi nga timatima uri Yehova u khou ri shumisa? (b) Ri ḓo haseledza mini kha ino thero?

² Roṱhe ri ṱoḓa u shumiswa nga Yehova, fhedzi vhaṅwe vha nga timatima uri u khou vha shumisa. Ndi ngani? Ndi ngauri vha pfa u nga miṅwaha yavho, vhuimo na vhukoni havho zwi vha thivhela u ita zwo engedzeaho. Kha ḽiṅwe sia, vhaṅwe vha nga vhona u nga zwine vha khou ita zwo lingana na uri a hu na ṱhoḓea ya u ita zwo engedzeaho. Kha ino thero, ri ḓo haseledza nḓila ine Yehova a nga ri thusa ngayo u itela u khunyeledza tshipikwa tshawe. Ri ḓo dovha ra haseledza zwiitea zwa Bivhilini zwine zwa sumbedza nḓila ye Yehova a ṋea vhashumeli vhawe vha vhanna na vha vhafumakadzi lutamo  na maanḓa zwa u ita zwine a funa. Ri ḓo fhedzisela nga u haseledza nḓila ine ra nga tendela ngayo Yehova a tshi ri shumisa.

3. U tendelana na zwi re kha Vhafilipi 2:13, Yehova a nga ri ṋea hani lutamo lwa u ita zwine a funa?

³ Vhalani Vhafilipi 2:13. * Yehova a nga ri ṋea lutamo lwa u ita zwine a funa. A nga zwi ita hani? Khamusi ri wana uri tshivhidzoni hu na muṅwe ane a khou ṱoḓa thuso kana zwiṅwe zwine zwa tea u itwa. Kana vhahulwane vha vhala luṅwalo lu bvaho ofisini ya davhi lune lwa amba uri hu na ṱhoḓea huṅwe fhethu. Ri tshi pfa zwenezwo ri nga ḓivhudzisa uri: ‘Ndi nga ita mini u itela u thusa?’ Kana musi ro ṋewa mushumo u konḓaho, ri nga ḓivhudzisa arali ri tshi ḓo kona u u ita zwavhuḓi. Kana nga murahu ha u vhala Bivhili, ri nga ḓivhudzisa uri: ‘Ndi nga shumisa hani zwe nda guda u itela u thusa vhaṅwe?’ Yehova ha nga ri kombetshedzi. Fhedzi musi a tshi vhona uri ri a humbula nga ha u ita zwo engedzeaho, a nga ri ṋea lutamo lwa u zwi ita.

4. Yehova a nga ri ṋea hani maanḓa a u ita zwine a funa?

⁴ Yehova a nga dovha a ri ṋea maanḓa a u ita zwine a funa. (Yes. 40:29) A nga ri ṋea muya mukhethwa u ri thusa u khwinisa vhukoni hashu. (Ek. 35:30-35) A nga shumisa ndangulo yawe u ri gudisa mushumo. Arali no ṋewa mushumo nahone ni sa ḓivhi uri u itiswa hani, humbelani thuso. Nahone tshifhinga tshiṅwe na tshiṅwe ni nga humbela “maanḓa a fhiraho o ḓoweleaho” kha Khotsi ashu wa ṱaḓulu a re na mafunda. (2 Vhakor. 4:7; Luka 11:13) Hu na tsumbo nnzhi Bivhilini dza nḓila ye Yehova a ṋea vhanna na vhafumakadzi lutamo na maanḓa zwi ṱoḓeaho u itela u ita zwine a funa. Musi ri tshi khou haseledza dzenedzi tsumbo, humbulani nga ha nḓila ine Yehova a nga ni thusa ngayo u ita zwi fanaho.

5. Ri guda mini kha nḓila ye Yehova a shumisa Mushe ngayo na tshifhinga tshee a mu shumisa ngatsho?

⁵ Yehova o ita uri Mushe a vhe muvhofhololi wa Vhaisiraele. Fhedzi o thoma u mu shumisa lini? Naa o thoma u mu shumisa musi Mushe a tshi ḓipfa e na vhukoni nge a “funzwa vhuṱali hoṱhe ha Vhaegipita”? (Mish. 7:22-25) Hai, Yehova o shumisa Mushe nga murahu ha musi o no mu thusa uri a ḓiṱukufhadze na u vuḓa. (Mish. 7:30, 34-36) O mu ṋea tshivhindi tsha u amba na Farao we a vha e na maanḓa vhukuma kha ḽa Egipita. (Ek. 9:13-19) Ri guda mini nga ha nḓila ye Yehova a shumisa Mushe ngayo na tshifhinga tshee a mu shumisa ngatsho? Yehova u shumisa vhane vha edzisa tsumbo yawe na vhane vha ḓitika ngae.—Vhafil. 4:13.

6. Ri guda mini kha nḓila ye Yehova a shumisa ngayo Barasilai u itela u thusa Khosi Davida?

⁶ Nga murahu, Yehova o shumisa Barasilai u itela u thusa Khosi Davida. Davida na vhe a vha e navho vho vha vhe na ‘nḓala, vho neta nahone vhe na ḓora’ musi vha tshi khou shavha Abesalomo murwa wa Davida. Barasilai wa mulala na vhaṅwe vho vhea vhutshilo havho khomboni u itela u thusa Davida na vhe a vha e navho. Barasilai ho ngo humbula uri Yehova a nga si mu shumise ngauri o no kalaha. Nṱhani hazwo, o sumbedza u vha na mafunda nga u shumisa zwe a vha e nazwo u itela u thusa vha shayaho. (2 Sam. 17: 27-29) Ri guda mini kha tsumbo yawe? Hu sa londwi miṅwaha yashu, Yehova a nga ri shumisa u thusa vhahashu vha shayaho vha hune ra dzula hone kana vha kha ḽiṅwe shango. (Mir. 3:27, 28; 19:17) Naho ri sa ḓo kona u vha thusa riṋe vhaṋe, ri nga ṋeela u itela uri vha wane thuso musi wa khombo.—2 Vhakor. 8:14, 15; 9:11.

7. Yehova o shumisa hani Simeoni nahone ndi ngani zwi tshi nga ri ṱuṱuwedza?

⁷ Yehova o fhulufhedzisa Simeoni, mukalaha a fhulufhedzeaho wa ngei Yerusalema uri a nga si fe a sa athu vhona Messia. Samusi Simeoni o vha o fhedza miṅwaha minzhi o lindela Messia, ḽeneḽo fhulufhedziso ḽi nga vha ḽo mu ṱuṱuwedza vhukuma. O lambedzwa nge a konḓelela na u vha na lutendo. Ḽiṅwe ḓuvha o ya thembeleni “a tshi livhiswa nga muya mukhethwa.” A vhona Yesu a tshee lushie nahone Yehova a mu shumisa uri a porofite nga ha lwonolo lushie lwe lwa vha lu tshi ḓo vha Kristo. (Luka 2:25-35) Naho Simeoni a tshi nga vha o vha o no fa musi Yesu a tshi thoma vhuḓinḓa hawe, o livhuwa vhukuma ndugelo ye a vha nayo nahone u kha ḓi ḓo wana phaṱhutshedzo nnzhi tshifhingani tshi ḓaho! Shangoni ḽiswa u ḓo vhona nḓila ine vhathu vhoṱhe vha ḓo fhaṱutshedzwa ngayo musi Kristo a tshi vhusa. (Gen. 22:18) Na riṋe ri nga takalela u shumiswa nga Yehova nga nḓila naho i ifhio.

8. Yehova a nga ri shumisa hani u fana na Baranaba?

⁸ Ḓanani ḽa u thoma, muṅwe munna wa mafunda we a vha a tshi pfi Yosefa o tenda u shumiswa nga Yehova. (Mish. 4:36, 37) Khamusi zwo itaho uri vhaapostola vha mu rine dzina ḽa Baranaba zwine zwa amba “Murwa wa Khuthadzo” ndi ngauri o vha a tshi khuthadza vhaṅwe. Sa tsumbo, musi Saulo a tshi vha Mukriste, vhunzhi ha vhahashu vho vha vha tshi mu ofha ngauri o vhuya a tovhola Vhakriste. Naho zwo ralo, Baranaba o thusa na u khuthadza Saulo nahone Saulo a nga vha o zwi livhuwa vhukuma. (Mish. 9:21, 26-28) Nga murahu, vhahulwane vha ngei Yerusalema vho vhona zwi tshi ṱoḓea u ṱuṱuwedza vhahashu vha dzulaho kule ngei Antiokia. Vho ruma nnyi? Baranaba! Vho khetha muthu ene ene. Bivhili i ri, Baranaba “a thoma u vha ṱuṱuwedza vhoṱhe uri vha bvele phanḓa Murenani nga u ḓiimisela zwi tshi bva mbiluni.” (Mish. 11:22-24) Na ṋamusi Yehova a nga ri thusa uri ri vhe “murwa wa khuthadzo” kha vhahashu. Sa tsumbo, a nga ri shumisa u khuthadza vho felwaho. Kana a ri ṱuṱuwedza u dalela kana u founela ane a khou lwala kana o tsikeledzeaho uri ri mu khuthadze. Naa ni ḓo tenda Yehova a tshi ni shumisa nga nḓila i fanaho na ye a shumisa Baranaba ngayo?—1 Vhathes. 5:14.

9. Ri guda mini kha nḓila ye Yehova a thusa ngayo Vasily u vha mulisa wavhuḓi tshivhidzoni?

⁹ Yehova o thusa wahashu ane a pfi Vasily u vha mulisa wavhuḓi tshivhidzoni. O vha e na miṅwaha ya 26 musi a tshi vha muhulwane nahone a tshi ofha uri a nga si kone u thusa vhathu tshivhidzoni, zwihuluhulu vha re na thaidzo. Naho zwo ralo, o gudiswa nga vhaṅwe vhahulwane vha re na tshenzhelo na nga Tshikolo Tsha Vhuḓinḓa Ha Muvhuso. O finya dza khwaṱha u itela u khwinisa. Sa tsumbo, o ḓivhetshela zwipikwa zwine zwa swikelelea. Musi a tshi zwi swikelela nga tshithihi nga tshithihi, o pfa a si tsha ofha u ita zwo engedzeaho. U ri: “Ndo vha ndi tshi khou ofha swiswi ḽi si na phele. Ndi a takala musi Yehova a tshi nthusa u wana luṅwalo lwo teaho lwa u khuthadza wahashu.” Vhahashu vha tshinnani, arali na edzisa Vasily nga u tendela Yehova a tshi ni shumisa, a nga ni ṋea  vhukoni ha u ita zwo engedzeaho tshivhidzoni!

10. Ndi mini zwe Abigaili a zwi ita nahone ni guda mini kha tsumbo yawe?

¹⁰ Davida na vhanna vhawe vho ṱoḓa thuso ngauri vho vha vha tshi khou shavha Khosi Saulo. Davida o rumela vhanna uri vha ye u humbela zwiḽiwa zwa u farisa kha munna wa Muisiraele wa tshigwili we a vha a tshi pfi Nabali. A vho ngo shona u mu humbela ngauri vho vha vha tshi khou tsireledza zwifuwo zwawe sogani. Fhedzi Nabali we a vha e na tseḓa a vha dzima. Davida o vha o ḽa nyala nahone o ḓiimisela u fhedza nga Nabali na vhanna vhoṱhe vha nnḓu yawe. (1 Sam. 25:3-13, 22) Naho zwo ralo, mufumakadzi wa Nabali, Abigaili we a vha e ṱhase o sumbedza u vha na ṱhalukanyo. O vha na tshivhindi nahone a gwadama milenzheni ya Davida a mu humbela uri a songo ḓiitela mulandu wa malofha nga u ḓilifhedzela. O mu tsivhudza uri a tendele Yehova a tshi zwi lugisa nga dzawe. Zwe Abigaili a amba na u zwi ita zwo kwama Davida. A phetha nga ḽa uri Abigaili o rumiwa nga Yehova. (1 Sam. 25:23-28, 32-34) Abigaili o vha a tshi ḓifara nga nḓila ye ya ita uri Yehova a mu shumise. Nga nḓila i fanaho, Yehova a nga shumisa vhahashu vha tshifumakadzini vha re na vhuṱali na ṱhalukanyo u itela u khwaṱhisa miṱa yavho na tshivhidzo.—Mir. 24:3; Tito 2:3-5.

11. Ndi mini zwe vhananyana vha Salumu vha zwi ita nahone ndi vhafhio vhane vha khou vha edzisa ṋamusi?

¹¹ Nga murahu, Yehova o shumisa na vhananyana vha Salumu u itela u fhaṱulula mbondo dza Yerusalema. (Neh. 2:20; 3:12) Naho khotsi avho vho vha vhe mukololo, vhenevho vhananyana vho vha vho ḓiimisela u ita wonoyu mushumo u konḓaho na une wa nga vhea vhutshilo havho khomboni. (Neh. 4: 9-12) Vho vha vho fhambana vhukuma na vhahulwane vha Thekoa vhe vha si ‘tende’ u u ita. (Neh. 3:5) Edzani u humbula nḓila ye vhananyana vha Salumu vha takala ngayo musi wonoyo mushumo u tshi fhela nga maḓuvha a 52 fhedzi! (Neh. 6:15) Ṋamusi, vhahashu vha tshifumakadzini vha ita mushumo wo khetheaho vhukuma wa u fhaṱa na u ṱhogomela zwifhaṱo zwa ndangulo. Vha ita wonoyu mushumo zwavhuḓi ngauri vha na vhutsila, vha a fhisea nahone vha a fhulufhedzea.

12. Yehova a nga ri shumisa hani u fana na Tabita?

¹² Yehova o ṱuṱuwedza Tabita u “ita mishumo mivhuya na u thusa vhashai,” zwihuluhulu dzitshilikadzi. (Mish. 9:36) Vhanzhi vho lila musi a tshi fa ngauri o vha e na vhuthu na mafunda. Fhedzi vho takala na zwikunwane musi muapostola Petro a tshi mu vusa. (Mish. 9:39-41) Ri guda mini kha tsumbo ya Tabita? Hu na zwine ra nga thusa vhahashu ngazwo, hu sa londwi miṅwaha yashu kana uri ri vhanna kana vhafumakadzi.—Vhaheb. 13:16.

13. Wahashu wa tshifumakadzini ane a pfi Ruth we a vha a tshi shona o shumiswa hani nga Yehova nahone o ri mini?

¹³ Muṅwe wahashu wa tshifumakadzini ane a pfi Ruth we a vha a tshi shona, o vha a tshi ṱoḓa u vha murumiwa. Musi a tshee muṱuku, o ya nnḓu nga nnḓu a tshi khou ṋea vhathu zwibammbiri. O ri: “Ndo vha ndi tshi zwi funa.” Naho zwo ralo, zwo vha zwi tshi mu konḓela u tou amba navho nga ha Muvhuso wa Mudzimu. Naho a tshi shona, o thoma u vula nḓila e na miṅwaha ya 18. Nga 1946, o ya Tshikoloni Tsha  Gilead, nga murahu a ya a shuma Hawaii na Dzhapani. Yehova o mu shumisa u itela u phaḓaladza mafhungo maḓifha kha eneo mashango. Nga murahu ha miṅwaha i ṱoḓaho u vha 80 a tshi khou huwelela, o ri: “Yehova ndi ene a nṋeaho nungo. O nthusa uri ndi si tsha shona. Ndi a tenda uri arali muthu a tshi fhulufhela Yehova, a nga mu shumisa.”

14. U ya nga Vhakolosa 1:29, ri tea u ita mini arali ri tshi ṱoḓa u shumiswa nga Yehova?

¹⁴ U bva kale, Yehova u shumisa vhathu vhawe nga nḓila dzo fhambanaho. Ndi mini zwine Yehova a ḓo ita uri ni vhe zwone? Zwi ḓitika nga nḓila ye na ḓiimisela ngayo u finya dza khwaṱha. (Vhalani Vhakolosa 1:29.) Arali ni tshi ṱoḓa Yehova a tshi ni shumisa, a nga ni ita uri ni vhe muhuweleli a fhiseaho, mufunzi makone, mukhuthadzi, mushumi a re na vhutsila, khonani yavhuḓi kana tshiṅwe na tshiṅwe tshine tsha ṱoḓea u itela u khunyeledza zwine a funa.

15. U ya nga 1 Timotheo 4:12, 15, vhaswa vho lovhedzwaho vha tea u humbela Yehova uri a vha thuse u ita mini?

¹⁵ Hu pfi mini nga vhaswa vho lovhedzwaho? Hu khou ṱoḓea vhanna vha re na nungo uri vha vhe vhashumeli. Kha zwivhidzo zwinzhi, hu na vhahulwane vhanzhi u fhira vhashumeli. Naa ni nga ṱahulela lutamo lwa u ita zwo engedzeaho tshivhidzoni? Nga zwiṅwe zwifhinga, vhaṅwe vha nga amba uri, “Kha nṋe u sokou tou vha muhuweleli fhedzi zwo eḓana.” Arali ni tshi ḓipfa nga yeneyo nḓila, humbelani Yehova uri a ni thuse u ṱahulela lutamo lwa u vha mushumeli na uri a ni ṋee maanḓa a u ita zwoṱhe zwine na nga kona musi ni tshi mu shumela. (Muh. 12:1) Mushumo u shavha zwanḓa!—Vhalani 1 Timotheo 4:12, 15.

16. Ri tea u humbela mini kha Yehova nahone ndi ngani?

¹⁶ Yehova a nga ita uri ni vhe tshiṅwe na tshiṅwe tshine tsha ṱoḓea u itela u khunyeledza zwine a funa. Mu humbeleni uri a ni ṋee lutamo na maanḓa zwa u ita mushumo wawe. Hu sa londwi miṅwaha yaṋu, shumisani tshifhinga tshaṋu, nungo dzaṋu na zwine na vha nazwo u itela u shumela Yehova zwino. (Muh. 9:10) Musi no ṋewa mushumo wavhuḓi nga Yehova, ni songo ofha na ṱavhanya na hana ni tshi humbula uri ni nga si u kone. Roṱhe ri na ndugelo khulwane ya u ita zwoṱhe zwine ra nga kona ri tshi itela u hulisa Yehova, Khotsi ashu wa lufuno!