1. Luṅwalo lwa 2 Vhakorinta 3:1-3 lu ri thusa hani u dzhiela nṱha ndugelo ya u fara pfunzo ya Bivhili u swikela muthu a tshi lovhedzwa? (Sedzani tshifanyiso tshi re kha gwati.)

NI ḒIPFA hani musi ni tshi vhona mugudiswa wa Bivhili a re tshivhidzoni tshaṋu a tshi lovhedzwa? Zwi tou pfala uri ni tou takala na zwikunwane! (Mat. 28:19) Hone arali onoyo mufunziwa muswa o gudiswa nga inwi, ni a takala vhukuma musi ni tshi vhona a tshi lovhedzwa. (1 Vhathes. 2:19, 20) Mvelaphanḓa ye a i ita na u lovhedzwa zwi sumbedza uri inwi na tshivhidzo tshoṱhe no ḓidina vhukuma uri ni mu thuse. Nga zwenezwo, ri nga amba uri vhafunziwa vhane vha kha ḓi bva u lovhedzwa ndi “marifhi [a u] themendela” vhe vha guda navho na tshivhidzo tshoṱhe.—Vhalani 2 Vhakorinta 3:1-3.

2. (a) Ri ḓo amba nga ha mbudziso ifhio ya ndeme nahone ndi ngani? (b) Pfunzo ya Bivhili ndi mini? (Sedzani ṱhaluso i re magumoni a siaṱari.)

² Ndi zwavhuḓi u vhona uri miṅwahani miṋa yo fhiraho ho vha hu tshi khou vhigwa pfunzo dza Bivhili * dzi linganaho 10 miḽioni ṅwedzi muṅwe na muṅwe shangoni ḽoṱhe. Kha yeneyo miṅwaha miṋa, ho lovhedzwa vha fhiraho 280 000 ṅwaha muṅwe na muṅwe uri vha vhe Ṱhanzi dza Yehova na u vha vhafunziwa vha Kristo. Ri nga thusa hani vhunzhi ha vhagudiswa vha Bivhili vha sa athu u lovhedzwaho uri vha lovhedzwe? Yehova u kha ḓi fha vhathu tshibuli tsha uri vha vhe Ṱhanzi dzawe. Ndi ngazwo  ri tshi ita zwoṱhe zwine ra nga kona u vha thusa uri vha ṱavhanye vha ite mvelaphanḓa u swika vha tshi lovhedzwa. Tshifhinga tsho salaho ndi tshiṱuku.​—1 Vhakor. 7:29a; 1 Pet. 4:7.

3. Ri ḓo guda mini kha ino thero nga ha u fara pfunzo dza Bivhili?

³ Sa izwi zwi zwa ndeme u ita vhafunziwa nga tshino tshifhinga, Tshigwada tshi Langaho tsho vhudzisa ofisi dza madavhi uri hu nga itwa mini uri vhunzhi ha vhagudiswa vhashu vha Bivhili vha ite mvelaphanḓa u swika vha tshi lovhedzwa. Kha ino thero na kha i tevhelaho, ri ḓo vhona zwine ra nga zwi guda kha vhavulanḓila, vharumiwa na vhalavhelesi vha ḽiisela vha re na tshenzhelo. * (Mir. 11:14; 15:22) Vho amba nga ha zwine vhahuweleli na vhagudiswa vhavho vha nga zwi ita uri vha vhe na pfunzo ya Bivhili i bvelelaho. Kha ino thero, ri ḓo amba nga ha zwithu zwiṱanu zwine mugudiswa a tea u zwi ita uri a ite mvelaphanḓa u vhuya u swika a tshi lovhedzwa.

4. Ri tea u humbula mini nga ha pfunzo dza Bivhili dzine dza vha pfufhi?

⁴ Vhunzhi ha vhahashu vha fara pfunzo pfufhi dza Bivhili, nga tshiṅwe tshifhinga vho ima muṋangoni wa nnḓu ya ṋemuḓi. Khamusi dzenedzi pfunzo dza Bivhili a dzi farwi vhege iṅwe na iṅwe. Naho zwenezwi zwi tshi nga ita uri muthu a thome u vha na dzangalelo ḽa u guda Bivhili, ri tea u mu thusa uri a dzule e naḽo. Uri onoyo muthu a dzule e na dzangalelo, vhaṅwe vha dzhia nomboro dzawe dza luṱingo uri vha mu founele kana u mu rumela mulaedza u ambaho nga ha Bivhili. Vha nga fhedza miṅwedzi vha tshi khou fara pfunzo ya Bivhili nga yeneyo nḓila, fhedzi, i vha i si pfunzo ya Bivhili ine ya khou ita mvelaphanḓa. Arali mugudiswa a sa iti vhuḓidini na u guda Bivhili na mugudisi wawe nga ho engedzeaho, naa u ḓo ita mvelaphanḓa u vhuya u swika a tshi ḓiṋekedza kha Mudzimu na u lovhedzwa? Zwi nga konḓa uri a ite nga u ralo.

5. Ndi mini zwe Yesu a zwi amba kha Luka 14:27-33 nahone zwi nga ri thusa hani?

⁵ Yesu o shumisa tshifanyiso u itela u ṱalutshedza zwine muthu a fanela u zwi ita musi a tshi ṱoḓa u vha mufunziwa wawe. O amba nga ha muthu ane a khou ṱoda u fhaṱa mutsheṱo na nga ha khosi ine ya khou ṱoḓa u ya ndwani. Yesu o amba uri onoyo munna ane a khou ṱoḓa u fhaṱa mutsheṱo u thoma “a vhalela” u itela u vhona arali e na tshelede yo eḓanaho u fhedza mushumo wawe na uri khosi i tea u thoma “ya amba na vhaeletshedzi vhayo” u itela u vhona  arali i tshi nga kunda. (Vhalani Luka 14:27-33.) Nga hu fanaho, Yesu o vha a tshi zwi ḓivha uri muthu ane a ṱoḓa u vha mutevheli wawe o vha a tshi tea u thoma a humbulisisa uri zwi amba mini u vha mutevheli wa Yesu. Nga zwenezwo, ri tea u ṱuṱuwedza vhane ra guda navho Bivhili uri ri gude navho vhege iṅwe na iṅwe. Ri nga zwi itisa hani?

6. Ri nga lingedza u ita mini uri ri vhe na pfunzo ya Bivhili i bvelelaho?

⁶ Thomani nga u engedza tshifhinga tshine na tshi fhedza musi ni tshi guda na mugudiswa waṋu. Khamusi ni nga engedza mafhungo ane na ḓo a haseledza musi ni tshi ya khae. Musi ṋemuḓi o no ḓowela, ni nga mu humbela arali e na tshifhinga tsho engedzeaho tsha u haseledza. Arali no vha ni tshi fara yeneyo pfunzo no ima muṋangoni, ni nga mu vhudzisa arali hu na huṅwe fhethu hune na nga dzula hone u itela u fara yeneyo pfunzo. Nḓila ine a ḓo fhindula ngayo i ḓo sumbedza uri u guda Bivhili ndi zwa ndeme lungafhani khae. Nga u ya ha tshifhinga, u itela u mu thusa uri a ite mvelaphanḓa nga u ṱavhanya, ni nga mu vhudzisa arali a tshi nga takalela u guda luvhili nga vhege. Fhedzi a zwi fheleli kha u sokou guda luthihi kana luvhili nga vhege.

7. Mugudisi a nga lugiselela hani zwavhuḓi a sa athu u fara pfunzo ya Bivhili?

⁷ Inwi mugudisi ni tea u lugiselela zwavhuḓi ni sa athu u fara ngudo na muthu. Ni nga thoma nga u vhala khandiso ine na ḓo guda nae na u vhala maṅwalo a re khayo. Pfesesani mbuno khulwane. Humbulisisani nga ha tshiṱoho tsha yeneyo ngudo, zwiṱohwana, mbudziso dza dziphara, maṅwalo o ṅwalwaho u pfi “vhalani,” zwifanyiso na vidio dzine dza nga thusa u ṱalutshedza yeneyo thero. Nga murahu ni humbulisise nga ha mugudiswa waṋu uri ni ḓo mu ṱalutshedza hani eneo mafhungo nga nḓila yo leluwaho na i pfalaho uri a kone u zwi pfesesa na u zwi shumisa.​—Neh. 8:8; Mir. 15:28a.

8. Zwe muapostola Paulo a zwi amba kha Vhakolosa 1:9, 10 zwi ri gudisa mini nga ha u rabelela vhagudiswa vhashu?

⁸ Musi ni tshi khou lugiselela, rabelani nga ha onoyo mugudiswa na thaidzo dzine a nga vha e nadzo. Humbelani Yehova uri a ni thuse uri ni funze zwi bvaho Bivhilini nga nḓila ine ya ḓo kwama mbilu ya onoyo muthu. (Vhalani Vhakolosa 1:9, 10.) Lingedzani u humbula nga ha zwine zwa nga mu konḓela u zwi pfesesa na zwine na vhona u nga ha nga tendelani nazwo. Ni songo hangwa uri tshipikwa tshaṋu  ndi u mu thusa uri a ite mvelaphanḓa u vhuya u swika a tshi lovhedzwa.

9. Mugudisi a nga thusa hani mugudiswa uri a lugiselele pfunzo yawe? Ṱalutshedzani.

⁹ Ri fhulufhela uri musi pfunzo ya Bivhili i tshi farwa tshifhinga tshoṱhe, zwi ḓo thusa mugudiswa uri a dzhiele nṱha zwoṱhe zwe Yehova na Yesu Kristo vha zwi ita na u ṱoḓa u guda zwo engedzeaho. (Mat. 5:3, 6) Mugudiswa u tea u livhisa ṱhogomelo kha zwine a khou zwi guda uri a kone u vhuyelwa. Uri a kone u livhisa ṱhogomelo, ri nga mu ṱalutshedza uri ndi zwa ndeme uri a lugiselele pfunzo iṅwe na iṅwe. A nga lugiselela nga u vhala ngudo iṅwe na iṅwe musi ri sa athu u i vhala na nga u humbulisisa uri a nga shumisa hani zwe a zwi vhala. Ni nga thusa hani mugudiswa waṋu u lugiselela? Ni nga zwi ita nga u lugiselela iṅwe ya dzingudo nae. * Ni nga mu sumbedza uri a nga wana hani phindulo yo livhaho na uri u talela maipfi a si gathi zwi ḓo mu thusa u humbula phindulo. Ni mu humbele uri a fhindule nga maipfi awe. Musi a tshi fhindula nga maipfi awe, ni ḓo kona u zwi vhona uri u khou pfesesa lungafhani zwine a khou zwi guda. Fhedzi hu na zwiṅwe zwine na nga ṱuṱuwedza mugudiswa waṋu uri a zwi ite.

10. Ndi ngani zwi zwa ndeme u vhala Bivhili ḓuvha na ḓuvha nahone mugudiswa u tea u ita mini uri a kone u vhuyelwa?

¹⁰ Nṱhani ha u sokou guda vhege iṅwe na iṅwe, hu na zwiṅwe zwine mugudiswa a tea u zwi ita ḓuvha na ḓuvha nga ene muṋe u itela u vhuyelwa. U tea u davhidzana na Yehova. Nga nḓila ḓe? Nga u mu thetshelesa na u amba nae. A nga thetshelesa Mudzimu nga u vhala Bivhili ḓuvha na ḓuvha. (Yosh. 1:8; Ps. 1:1-3) Mu sumbedzeni uri a nga shumisa hani “Mbekanyo ya Muvhalo wa Bivhili” i re kha jw.org. * U itela uri a kone u vhuyelwa nga muvhalo wawe wa Bivhili, mu ṱuṱuwedzeni uri a humbulisise nga ha zwine Bivhili ya khou mu funza zwone nga ha Yehova na uri a nga zwi shumisa hani vhutshiloni hawe.​—Mish. 17:11; Yak. 1:25.

11. Ni nga gudisa hani mugudiswa waṋu u rabela nga nḓila yo teaho nahone ndi ngani zwi zwa ndeme uri a rabele ḓuvha na ḓuvha?

¹¹ Ṱuṱuwedzani mugudiswa waṋu u amba na Yehova ḓuvha na ḓuvha. Rabelani zwi tshi bva mbiluni musi ni tshi thoma u guda na musi ni tshi fhedza, na u bula mugudiswa waṋu nga dzina kha yeneyo thabelo. Zwenezwo zwi ḓo mu gudisa u rabela zwi tshi bva mbiluni, na uri a ambe na Yehova nga thabelo a tshi shumisa  dzina ḽa Yesu Kristo. (Mat. 6:9; Yoh. 15:16) U vhala Bivhili ḓuvha na ḓuvha zwine zwa vha u thetshelesa Yehova, na u rabela zwine zwa vha u amba na Yehova, zwi ḓo mu thusa u sendela tsini na Yehova. (Yak. 4:8) Musi a tshi ita zwenezwo ḓuvha na ḓuvha, zwi ḓo mu thusa u ita mvelaphanḓa u vhuya u swika a tshi ḓiṋekedza kha Yehova na u lovhedzwa.

12. Ni nga thusa hani mugudiswa waṋu uri a vhe na vhushaka havhuḓi na Yehova?

¹² Ri ṱoḓa uri mugudiswa washu a gude nga ha Yehova. Fhedzi zwine a khou zwi guda zwi tea u mu kwama mbilu u itela uri a kone u zwi shumisa kha vhutshilo hawe. Yesu o funza vhathu zwithu zwinzhi nahone vho vha vha tshi funa u guda khae. Fhedzi tshe tsha ita uri vhathu vha mu tevhele ndi uri o kwama mbilu dzavho. (Luka 24:15, 27, 32) Thusani mugudiswa waṋu u dzhia Yehova sa muthu wa vhukuma na ane a nga vha na vhushaka nae. Ni tea u dovha na mu thusa uri a kone u dzhia Yehova sa Khotsi awe, Mudzimu wawe na Khonani yawe. (Ps. 25:4, 5) Musi no fara pfunzo ya Bivhili, itani uri mugudiswa waṋu a kone u vhona zwine Yehova a vha zwone. (Ek. 34:5, 6; 1 Pet. 5:6, 7) Mu thuseni u vhona zwine Yehova a vha zwone kha thero iṅwe na iṅwe. Thusani mugudiswa waṋu u vhona uri Yehova u na lufuno, u na vhuthu nahone u a pfela vhuṱungu. Yesu o ri “mulayo muhulwane na wa u thoma” ndi u “funa Yehova Mudzimu wau.” (Mat. 22:37, 38) Lingedzani u thusa mugudiswa waṋu uri a fune Yehova.

13. Ni nga thusa hani mugudiswa waṋu u ḓivha zwine Yehova a vha zwone? Ṋeani tsumbo.

¹³ Musi ni tshi amba na mugudiswa waṋu, mu ṱalutshedzeni uri ndi ngani ni tshi funa Yehova. Zwenezwo zwi nga mu thusa u vhona uri na ene a nga vha khonani ya Yehova. (Ps. 73:28) Sa tsumbo, naa hu na zwiṅwe zwithu kha khandiso dzashu kana Bivhilini zwine zwa sumbedza lufuno lwa Yehova, vhuṱali hawe, u haṱula hawe nga nḓila yo teaho na maanḓa awe zwine zwa kwama mbilu yaṋu? Ambani nga hazwo na mugudiswa waṋu uri a ḓivhe tshiṅwe tsha zwiitisi zwi itaho uri ni fune Yehova. Hu na zwiṅwe zwine mugudiswa wa Bivhili a tea u ita uri a kone u ita mvelaphanḓa u swika a tshi lovhedzwa.

14. Vhahevheru 10:24, 25 i ri vhudza mini nga ha miṱangano zwine zwa nga thusa mugudiswa waṋu u ita mvelaphanḓa?

¹⁴ Roṱhe ri ṱoḓa uri vhagudiswa vhashu vha ite mvelaphanḓa u swika vha tshi lovhedzwa. Iṅwe nḓila ine ra nga vha thusa ngayo ndi nga u vha ṱuṱuwedza uri vha vhe hone miṱanganoni ya tshivhidzo. Vhagudisi vha re na tshenzhelo  vha amba uri vhagudiswa vhane vha ya miṱanganoni vha ita mvelaphanḓa nga u ṱavhanya. (Ps. 111:1) Vhaṅwe vhagudisi vha vhudza vhagudiswa vhavho uri musi vha tshi ṱoḓa u guda zwithu zwinzhi nga ha Bivhili, vha tea u ya miṱanganoni. Vhalani Vhahevheru 10:24, 25 na mugudiswa waṋu, ni mu ṱalutshedze uri u ḓo vhuyelwa nga mini nga u ya miṱanganoni. Mu sumbedzeni vidio Hu Itwa Mini Holoni Ya Muvhuso? * Thusani mugudiswa waṋu uri a ite zwoṱhe zwine a nga kona uri a vhe hone miṱanganoni yoṱhe.

15. Ri nga ṱuṱuwedza hani mugudiswa washu uri a vhe hone miṱanganoni tshifhinga tshoṱhe?

¹⁵ Ni nga ita mini arali mugudiswa waṋu a sa athu u ḓa miṱanganoni kana a sa anzeli u ḓa? Mu vhudzeni nga mafulufulu zwe na zwi guda miṱanganoni ya zwenezwino. Musi a tshi vhona nḓila ine na ḓipfa ngayo nga miṱangano, zwi nga ita uri na ene a ṱoḓe u ḓa. Mu ṋeeni Tshiingamo kana Tshibugwana Tsha Muṱangano Wa Vhutshilo Na Vhuḓinḓa zwine ra khou zwi guda nga tshenetsho tshifhinga. Mu sumbedzeni zwine zwa ḓo gudwa miṱanganoni i tevhelaho, ni mu vhudzise uri ndi zwifhio zwine a zwi takalela. Zwine a ḓo zwi vhona na u zwi pfa kha miṱangano yawe ya u thoma, zwi ḓo fhira zwoṱhe zwe a vhuya a ṱangana nazwo kha vhuṅwe vhurereli. (1 Vhakor. 14:24, 25) A nga guda kha tsumbo dzavhuḓi dza vhathu vhane a ḓo ṱangana navho, vhane vha ḓo mu thusa u swikela a tshi lovhedzwa.

16. Ri nga fara hani pfunzo dza Bivhili dzine dza nga thusa mugudiswa uri a lovhedzwe nahone ri ḓo guda mini kha thero i tevhelaho?

¹⁶ Ri nga fara hani pfunzo dza Bivhili dzine dza nga thusa mugudiswa uri a lovhedzwe? Ṱuṱuwedzani mugudiswa waṋu uri ni vhale nae vhege iṅwe na iṅwe na uri a lugiselele. Zwenezwi zwi ḓo mu thusa u vhona uri pfunzo ya Bivhili ndi ya ndeme. Ri ṱoḓa u dovha ra mu thusa uri a davhidzane na Yehova ḓuvha na ḓuvha na uri a vhe na vhushaka ha tsini-tsini nae. Zwiṅwe hafhu, ri ṱoḓa u mu thusa uri a vhe hone miṱanganoni ya tshivhidzo. (Sedzani bogisi “ Mugudiswa U Tea U Ita Mini Uri A Lovhedzwe?”) Samusi thero i tevhelaho i tshi ḓo zwi sumbedza, hu na zwiṅwe zwithu zwiṱanu zwine mugudisi a tea u zwi ita u itela u thusa mugudiswa u ita mvelaphanḓa u swika a tshi lovhedzwa.