1. Ri zwi ḓivha hani uri mushumo wa u ita vhafunziwa u tshidza vhathu?

MUSHUMO wa u ita vhafunziwa u tshidza vhathu. Ri zwi ḓivha hani? Musi Yesu a tshi ri laedza kha Mateo 28:19, 20 o ri: “Iyani ni ite vhathu . . . vhafunziwa, ni vha lovhedze.” Ndi zwa ndeme lungafhani u lovhedzwa? Ri tea u lovhedzwa arali ri tshi ṱoḓa vhutshilo vhu sa fheli. Muthu ane a khou ṱoḓa u lovhedzwa u tea u tenda uri vhutshilo vhu sa fheli vhu wanala fhedzi nge Yesu a ri fela na u vuswa. Ndi ngazwo muapostola Petro o vhudza Vhakriste ngae uri: “Ndovhedzo, [i] khou ni tshidza zwino, nge ha vuswa Yesu Kristo.” (1 Pet. 3:21) Nga zwenezwo, musi muthu a tshi lovhedzwa, u vha na fhulufhelo ḽa u tshila nga hu sa fheli.

2. U ya nga 2 Timotheo 4:1, 2, ri tea u vha vhagudisi vha hani?

² U itela uri ri kone u ita vhafunziwa, ri tea “u funza nga vhutsila.” (Vhalani 2 Timotheo 4:1, 2.) Ndi ngani? Ndi ngauri Yesu o ri laya a ri: “Iyani ni ite vhathu . . . vhafunziwa, ni vha . . . funze.” Muapostola Paulo o amba uri ri tea u “konḓelela” kha wonoyu mushumo ‘ngauri ri tshi ita zwenezwo ri ḓo ḓitshidza, ra tshidza na vhane vha ri thetshelesa.’ Ndi ngazwo Paulo o ri: “U ṱhogomele . . . nḓila ine wa funza ngayo.” (1 Tim. 4:16) Arali ri tshi ṱoḓa u ita vhafunziwa, ri tea u vha vhomakone kha u funza.

3. Ino thero i ḓo ri gudisa mini nga ha u fara pfunzo dza Bivhili?

³ Hu farwa pfunzo dza Bivhili dza dzimiḽioni shangoni ḽoṱhe. Fhedzi samusi ro zwi amba kha thero yo fhiraho, ri ṱoḓa u ḓivha uri ri nga thusa hani vhunzhi havho uri vha lovhedzwe. Kha ino thero, ri ḓo guda zwiṅwe zwithu zwiṱanu zwine mugudisi a nga zwi ita u itela u thusa mugudiswa wawe u vhuya u swika a tshi lovhedzwa.

4. Ndi ngani mugudisi a songo tea u ambesa musi o fara pfunzo ya Bivhili? (Sedzani ṱhaluso i re magumoni a siaṱari.)

⁴ Ri a zwi takalela u gudisa vhaṅwe Bivhili. Nga zwenezwo, musi ro fara pfunzo ya Bivhili, ri nga lingea u amba u vhuya u swika ri tshi bva na vhuphugwane. Naho zwo ralo, hu sa londwi uri no fara Pfunzo ya Tshiingamo, Pfunzo ya Bivhili ya Tshivhidzo kana pfunzo ya Bivhili, a no ngo tea u ambesa. Mugudisi u tea u ḓifara, a tendela Bivhili i tshi vha yone ine ya funza nṱhani ha uri a vhe ene ane a ambesa. Ho ngo tea u lingedza u ṱalutshedza zwoṱhe zwine a zwi ḓivha nga mafhungo ane vha khou a guda kana luṅwalo lwe vha lu vhala. * (Yoh. 16:12) Ni songo hangwa uri musi ni tshi lovhedzwa, no vha ni sa ḓivhi zwithu zwinzhi nga ha Bivhili u fana na zwino. Khamusi no vha ni tshi tou ḓivha zwithu zwiṱukuṱuku zwa mutheo nga ha Bivhili. (Vhahev. 6:1) Lwo vha lwendo lulapfu uri ni ḓivhe zwoṱhe zwine na zwi ḓivha ṋamusi, nga zwenezwo, ni songo lingedza u gudisa mugudiswa waṋu zwithu zwoṱhe nga luthihi.

5. (a) Ri ṱoḓa uri mugudiswa washu a ṱhogomele mini samusi zwo sumbedzwa kha 1 Vhathesalonika 2:13? (b) Ri nga thusa hani mugudiswa uri a ambe musi ro fara pfunzo?

⁵ Ri tea u thusa mugudiswa washu u vhona uri zwine a khou zwi guda zwi bva Bivhilini. (Vhalani 1 Vhathesalonika 2:13.) Ri nga zwi itisa hani? Musi no fara pfunzo, mu ṱuṱuwedzeni uri a ambe. Nṱhani ha u dzulela u ṱalutshedza maṅwalo, humbelani mugudiswa waṋu uri a a ṱalutshedze. Thusani mugudiswa waṋu u vhona uri a nga shumisa hani zwine a khou zwi guda. Mu vhudziseni mbudziso dzine dza ḓo ita uri a kone u amba nḓila ine a khou ḓipfa ngayo nga ha maṅwalo e a a vhala. (Luka 10:25-28) Sa tsumbo, mu vhudziseni uri: “Ulu luṅwalo lu ni thusa hani u vhona zwine Yehova a vha zwone?” “Zwine na khou zwi guda Bivhilini zwi nga ni thusa hani?” “Ni ḓipfa hani nga zwine na khou zwi guda?” (Mir. 20:5) Zwa ndeme a si u ita uri a ḓivhe zwithu zwinzhi-zwinzhi, fhedzi ndi uri a fune na u shumisa zwine a khou zwi guda.

6. Ndi ngani zwi zwa ndeme u ṱuwa na wahashu a re na tshenzhelo musi ni tshi ya u fara pfunzo ya Bivhili?

⁶ Naa ni a ṱuwa na vhahashu vha re na tshenzhelo musi ni tshi ya u fara pfunzo ya Bivhili? Arali ni tshi ita nga u ralo, ni nga vha vhudzisa uri vho vhona no fara hani yeneyo pfunzo na uri no shumisa Bivhili naa musi ni  tshi funza. Arali ni tshi khou ṱoḓa u khwinisa nḓila ine na funza ngayo, ni tea u ḓiṱukufhadza. (Vhambedzani Mishumo 18:24-26.) Nga murahu, ni vhudzise onoyo wahashu arali o vhona u nga mugudiswa waṋu u khou pfesesa zwine a khou zwi vhala. Ni nga dovha na humbela onoyo wahashu uri a fare pfunzo ya Bivhili na mugudiswa waṋu arali ni tshi ḓo vha ni siho lwa vhege nthihi kana u fhira. Zwenezwo zwi ḓo ita uri mugudiswa waṋu a gude vhege iṅwe na iṅwe nahone u ḓo zwi vhona uri u guda ndi zwa ndeme. Ni songo vhuya na ḓivhudza uri ndi ngudo yaṋu ni noṱhe na uri vhaṅwe vha nga si gude na mugudiswa waṋu. Tsha ndeme ndi uri mugudiswa waṋu a bvele phanḓa a tshi guda ngoho.

7. Ndi mini zwine zwa nga thusa mugudiswa u takalela zwine a khou zwi guda?

⁷ Mugudiswa waṋu u tea u zwi vhona uri ni a fhisetshela ngoho na u vhona uri ni a tenda zwine Bivhili ya zwi funza. (1 Vhathes. 1:5) Zwenezwo zwi ḓo ita uri na ene a takalele zwine a khou zwi guda. Khamusi ni nga mu vhudza uri Bivhili yo ni thusa hani kha vhutshilo haṋu. Zwenezwo zwi ḓo ita uri a zwi vhone uri na ene Bivhili i nga mu thusa.

8. Ndi zwifhio zwiṅwe zwine na nga ita uri ni thuse mugudiswa waṋu nahone ndi ngani?

⁸ Musi ni tshi khou guda, ni nga vhudza mugudiswa nga ha tshenzhelo dza vhaṅwe vhahashu vhe vha ṱangana na thaidzo dzi fanaho na dzawe na uri vho dzi kunda hani. Ni nga ḓa na muṅwe a bvaho tshivhidzoni tsha vhoiwe ane tsumbo yawe ya nga mu vhuyedza. Kana ni nga wana tshenzhelo dzi ṱuṱuwedzaho kha mutevhe wa “Bivhili I Shandula Vhutshilo” kha magazini dza kale dza Tshiingamo na kha jw.org. * Dzenedzo thero na dzividio dzi ḓo thusa mugudiswa u vhona uri Bivhili i nga mu thusa u ita tshanduko vhutshiloni hawe.

9. Ni nga ṱuṱuwedza hani mugudiswa waṋu uri a vhudze muṱa na khonani dzawe nga ha zwine a khou zwi guda?

⁹ Arali mugudiswa waṋu e mbinganoni, naa na mufarisi wawe u khou guda? Arali zwi songo ralo, mu rambeni. Ṱuṱuwedzani mugudiswa waṋu uri a vhudze muṱa wawe na dzikhonani nga ha zwine a khou zwi guda. (Yoh. 1:40-45) Ni nga zwi itisa hani? Ni nga mu vhudzisa uri: “Iyi mbuno ni nga i ṱalutshedza hani vha muṱa waṋu?” kana “Ndi luṅwalo lufhio lune na nga lu shumisa u ṱalutshedza izwi zwithu kha khonani yaṋu?” Nga yeneyi nḓila ni ḓo vha ni tshi khou mu gudisa uri a vhe mugudisi  wavhuḓi. Nga zwenezwo, musi a tshi vho fanelea, a nga kona u vha muhuweleli a songo lovhedzwaho. Ni nga vhudzisa mugudiswa waṋu arali a tshi ḓivha muṅwe ane a ṱoḓa u guda Bivhili. Arali a tshi vha ḓivha, ni nga vha kwama nga u ṱavhanya, na humbela u guda navho Bivhili. Ni vha sumbedze vidio Pfunzo Ya Bivhili I Farwa Hani? *

10. Ri nga edzisa hani tsumbo ya Paulo samusi zwo sumbedzwa kha 1 Vhathesalonika 2:7, 8?

¹⁰ Mugudisi u tea u sumbedza uri u na ndavha na mugudiswa. Ni tea u mu dzhia sa ane a ḓo vha wahashu hu si kale. (Vhalani 1 Vhathesalonika 2:7, 8.) Zwi nga vha zwi songo vha lelutshela u ṱutshela khonani dzine dza si vhe dziṱhanzi na u ita tshanduko u itela u shumela Yehova. Ri tea u vha thusa uri vha wane khonani dza vhukuma tshivhidzoni. Ivhani khonani ya mugudiswa waṋu, ni fhedze tshifhinga nae, hu si musi no fara pfunzo ya Bivhili fhedzi. Ni nga sumbedza uri ni na ndavha nae nga u mu founela, u mu rumela mulaedza kana u mu dalela.

11. Ri ṱoḓa vhagudiswa vhashu vha tshi wana mini tshivhidzoni nahone ndi ngani?

¹¹ Samusi vhathu vha muvhundu muthihi vha tshi nga ri ṅwana wa muṅwe ndi ṅwana wau, nga nḓila i fanaho, muṅwe na muṅwe tshivhidzoni a nga shela mulenzhe kha u ita muthu mufunziwa. Ndi ngazwo vhagudisi vha re na tshenzhelo vha tshi thusa vhagudiswa vhavho uri vha ḓivhane na vhaṅwe tshivhidzoni vhane vha nga vha thusa u sendela tsini na Yehova. Mugudiswa u ḓo ḓiphiṋa nga vhukonani na vhathu vha Yehova vhane vha ḓo mu thusa uri a sendele tsini nae na u mu ṱuṱuwedza musi e na thaidzo. Ri ṱoḓa uri mugudiswa muṅwe na muṅwe a ḓipfe e wa ndeme tshivhidzoni na uri a ḓipfe e muraḓo wa muṱa. Ri ṱoḓa na ene a tshi vha muraḓo wa muṱa wa vhahashu vha re na lufuno. Nga zwenezwo, zwi ḓo mu lelutshela u ṱutshela vhathu vhane vha si mu thuse u funa Yehova. (Mir. 13:20) Musi khonani dzawe dzi tshi mu laṱa, u ḓo zwi ḓivha uri a nga wana khonani dza vhukuma ndanguloni ya Yehova.​—Marko 10:29, 30; 1 Pet. 4:4.

12. Ndi ngani ri tshi tea u amba nga ha u ḓiṋekedza na u lovhedzwa na mugudiswa washu?

¹² Ni tea u dzula ni tshi vhudza mugudiswa waṋu uri ndi zwa ndeme u ḓiṋekedza kha Yehova na u lovhedzwa. Tshipikwa tsha u guda na muthu ndi u mu thusa uri a shumele  Yehova na u lovhedzwa. Musi no no guda na mugudiswa lwa miṅwedzi i si gathi nahone o no thoma u ḓa miṱanganoni, u tea u pfesesa uri ri khou ṱoḓa u mu thusa uri a vhe Ṱhanzi ya Yehova.

13. Ndi mini zwine mugudiswa a fanela u zwi ita uri a kone u swikelela ndovhedzo?

¹³ Hu na maga ane mugudiswa wa Bivhili a tea u a dzhia uri a kone u swikelela ndovhedzo. Ḽa u thoma, mugudiswa u tea u ḓivha Yehova, a mu fune, na u vha na lutendo khae. (Yoh. 3:16; 17:3) Zwenezwo zwi ḓo ita uri a vhe khonani ya Yehova na vhahashu tshivhidzoni. (Vhahev. 10:24, 25; Yak. 4:8) Nga u ya ha tshifhinga, mugudiswa u ḓo laṱa mikhwa yawe mivhi nahone a rembuluwa. (Mish. 3:19) U vha hawe na lutendo zwi ḓo ita uri a vhudze vhaṅwe zwine a khou zwi guda. (2 Vhakor. 4:13) Nga murahu, u ḓo ḓiṋekedza kha Yehova nahone a zwi sumbedza nga u lovhedzwa. (1 Pet. 3:21; 4:2) Ḽi ḓo vha ḓuvha ḽa dakalo vhukuma kha muṅwe na muṅwe. Musi mugudiswa a tshi khou lwela u swikelela tshipikwa tshawe tsha u lovhedzwa, dzulani ni tshi mu khoḓa. Mu ṱuṱuwedzeni uri a dzule a tshi bvela phanḓa a tshi lwela u swikelela tshenetsho tshipikwa.

14. Ni nga ḓivha hani uri mugudiswa waṋu u khou ita mvelaphanḓa?

¹⁴ Musi ri tshi khou thusa mugudiswa u swikelela tshipikwa tshawe tsha u lovhedzwa, a ro ngo tea u mu fhelela mbilu. Fhedzi ri tea u ḓivha arali a tshi ṱoḓa u shumela Yehova. Naa mugudiswa u a sumbedza uri u khou lingedza u thetshelesa milayo ya Yesu Kristo? Kana naa hu tou vha na zwiṅwe zwipiḓa Bivhilini zwine a ṱoḓa u zwi ḓivha?

15. Ndi mini zwine zwa sumbedza uri mugudiswa u khou ita mvelaphanḓa?

¹⁵ Dzulani ni tshi sedza arali mugudiswa waṋu a tshi khou ita mvelaphanḓa. Sa tsumbo, naa u a amba uri u ḓipfa hani nga ha Yehova? Naa u a amba na Yehova nga thabelo? (Ps. 116:1, 2) Naa u a ḓiphiṋa nga u vhala Bivhili? (Ps. 119:97) Naa u a ḓa miṱanganoni tshifhinga tshoṱhe? (Ps. 22:22) Naa o no ita tshanduko kha nḓila ine a tshila ngayo? (Ps. 119:112) Naa o no thoma u vhudza vha muṱa wawe na dzikhonani nga ha zwine a khou zwi guda? (Ps. 9:1) Tsha ndeme vhukuma, naa u a ṱoḓa u vha Ṱhanzi ya Yehova? (Ps. 40:8) Arali mugudiswa a sa khou ita mvelaphanḓa, lingedzani u pfa tshiitisi nga vhuṱali nahone ni  ambe nae nga ha eneo mafhungo no khwaṱhisa tshanḓa fhedzi nga vhuthu. *

16. Ndi mini zwine zwa nga ita uri ni si tsha bvela phanḓa na pfunzo ya Bivhili?

¹⁶ Musi tshifhinga tshi tshi khou ḓi ya, sedzulusani arali ngudo i kha ḓi vha yo tea u bvela phanḓa. Ḓivhudziseni uri: ‘Naa mugudiswa u a lugiselela? Naa u na dzangalelo ḽa u ḓa miṱanganoni? Naa o litsha zwithu zwi si zwavhuḓi zwe a vha a tshi zwi ita? Naa o litsha vhurereli he a vha e khaho?’ Arali phindulo i hai, u bvela phanḓa na ngudo zwi ḓo fana na u gudisa muthu u bambela, ngeno onoyo muthu a sa ṱoḓi u ṋukala. Arali mugudiswa waṋu a sa funi zwine a khou guda nahone a sa ṱoḓi u ita tshanduko, ni ḓidinelani nga u bvela phanḓa ni tshi guda nae?

17. Ndi mini zwine vhagudisi vha tea u zwi ita u ya nga 1 Timotheo 4:16?

¹⁷ Ri dzhiela nṱha vhuḓifhinduleli hashu ha u ita vhafunziwa nahone ri ṱoḓa u thusa vhagudiswa vhashu u swika vha tshi lovhedzwa. Ndi ngazwo ri tshi ḓo tendela Bivhili uri i vhe yone ine ya funza. Ri ḓo funza nga u fhisea na u tenda zwine ra funza. Ri ḓo ṱuṱuwedza mugudiswa uri a vhe na dzikhonani ngomu tshivhidzoni. Ri ḓo dzula ri tshi amba nae nga ha u ḓiṋekedza na u lovhedzwa na u dzula ri tshi ṱolisisa mvelaphanḓa yawe. (Sedzani bogisi “ Mugudisi A Nga Thusa Hani Mugudiswa Uri A Lovhedzwe?”) Zwi a ri takadza u shela mulenzhe kha hoyu mushumo wa u ita vhafunziwa. Ri ṱoḓa u ita zwoṱhe zwine ra nga kona u thusa mugudiswa washu u swika a tshi lovhedzwa.