1. Vhakriste vho lovhedzwaho vha tea u bvela phanḓa vha tshi ita mini?

NAA no lovhedzwa? Arali zwo ralo, musi ni tshi lovhedzwa no zwi sumbedza phanḓa ha vhathu uri ni na lutendo kha Yehova na uri ni ṱoḓa u mu shumela ni nga fhasi ha ndangulo * yawe. Ndi ngoho uri ni fanela u bvela phanḓa ni tshi khwaṱhisa lutendo lwaṋu. Nahone ni fanela u bvela phanḓa ni tshi tenda uri ndangulo ya Yehova i khou ita zwi funwaho ngae ṋamusi.

2-3. Yehova u khou livhisa ndangulo yawe nga nḓila-ḓe ṋamusi? Ṋeani tsumbo tharu.

² Ṋamusi Yehova u livhisa ndangulo yawe nga nḓila ine ya sumbedza zwine a vha zwone, zwine a ṱoḓa u zwi ita na matshilele ane a a ṱanganedza. Sa tsumbo, kha ri ambe nga ha zwithu zwiraru zwine Yehova a vha zwone zwine zwa vhonala kha ndangulo yawe.

³ Tsha u thoma, “Mudzimu ha ṱaluli.” (Mish. 10:34) Lufuno lwo ita uri Yehova a ṋekedze Murwa wawe uri a “rengulule vhathu vhoṱhe.” (1 Tim. 2:6; Yoh. 3:16) Yehova o shumisa vhathu vhawe u huwelela mafhungo maḓifha kha vhoṱhe vha funaho u thetshelesa u itela u thusa vhoṱhe vha ṱoḓaho u tshidzwa nga tshirengululi. Tsha vhuvhili, Yehova ndi Mudzimu o dzudzanyeaho na wa mulalo. (1 Vhakor. 14:33, 40) Nga zwenezwo, ri fanela u lavhelela uri vhagwadameli vhawe vha mu shumele vhe tshigwada tsho dzudzanyeaho na tshi re na mulalo. Tsha vhuraru, Yehova ndi ‘Mufunzi Muhulwane.’ (Yes. 30:20, 21) Ndi ngazwo ndangulo i tshi zwi dzhia zwi zwa ndeme u funza vhathu Ipfi ḽawe Bivhili tshivhidzoni na tsimuni. Vhe vha vha vhe kha tshivhidzo tsha u thoma  tsha Vhukriste vho sumbedza hani enea masia mararu a zwine Yehova a vha zwone? Vhathu vha Yehova ṋamusi vha sumbedza hani enea masia a zwine Yehova a vha zwone? Ni nga thuswa hani nga muya mukhethwa musi ni tshi khou shuma na ndangulo ya Yehova ṋamusi?

4. Samusi zwo ṅwaliwa kha Mishumo 1:8, Yesu o laedza vhatevheli vhawe uri vha ite mini nahone vho vha vha tshi ḓo thuswa nga mini?

⁴ Tshifhingani tsha Vhakriste vha u thoma. Mulaedza we Yesu a u huwelela wo vha u tshi ṋea vhathu vhoṱhe fhulufhelo. (Luka 4:43) O laedza vhatevheli vhawe uri vha bvele phanḓa na mushumo we ene a u thoma wa u huwelela “u swika magumoni a ḽifhasi.” (Vhalani Mishumo 1:8.) Fhedzi vho vha vha sa ḓo u kona nga vhone vhaṋe. Vho vha vha tshi ḓo ṱoḓa “muthusi” ane a vha muya mukhethwa we Yesu a vha fhulufhedzisa.—Yoh. 14:26; Sak. 4:6.

5-6. Muya mukhethwa wo thusa hani vhatevheli vha Yesu?

⁵ Vhatevheli vha Yesu vho wana muya mukhethwa nga Pentekoste ya 33 C.E. Vho mbo ḓi thoma u huwelela vha tshi thuswa nga wonoyo muya mukhethwa nahone vhathu vha zwigidi vha ṱanganedza mafhungo maḓifha nga tshifhinga tshiṱukuṱuku. (Mish. 2:41; 4:4) Musi vhafunziwa vha tshi pikiswa, a vho ngo ofha vha litsha u huwelela, fhedzi vho humbela thuso kha Mudzimu. Vho rabela vha ri: “U thuse vhalanda vhau uri vha dzule vha tshi amba ipfi ḽau nga tshivhindi.” Nga tshenetsho tshifhinga, vha ḓadzwa nga muya mukhethwa, vha bvela phanḓa na u “ḓivhadza ipfi ḽa Mudzimu nga tshivhindi.”—Mish. 4:18-20, 29, 31.

⁶ Vhafunziwa vha Yesu vho vha na dziṅwe thaidzo. Sa tsumbo, kopi dza Maṅwalo dzo vha dzi si nnzhi. Ho vha hu si na bugu dzi ṱalutshedzaho Bivhili sa dzine ra vha nadzo ṋamusi. Vho vha vha tshi tea u huwelela kha vhathu vha ambaho nyambo dzo fhambanaho. Naho vhenevho vhafunziwa vhane vha fhisea vhe na dzenedzo thaidzo, vho ita zwithu zwe zwa vha zwi tshi vhonala zwi sa konadzei. Nga miṅwaha i ṱoḓaho u vha 30 fhedzi, vho vha vho no huwelela mafhungo maḓifha kha “vhathu vhoṱhe shangoni ḽoṱhe.”—Vhakol. 1:6, 23.

7. Miṅwaha i fhiraho 100 yo fhiraho, vhashumeli vha Yehova vho ḓivha hani zwine a zwi ṱoḓa khavho nahone vho ita mini?

⁷ Musalauno. Yehova u bvela phanḓa a tshi livhisa na u ṋea vhathu vhawe maanḓa a u ita zwine a funa. U livhisa vhathu vhawe nga Bivhili ye ya ṅwalwa nga thuso ya muya wawe mukhethwa. Khayo ri vhala mafhungo a vhuḓinḓa ha Yesu na zwe a laedza vhafunziwa vhawe zwa uri vha bvele phanḓa na mushumo we a u thoma. (Mat. 28:19, 20) Tshiingamo tsha July 1881 tsho ri: “Mudzimu ho ngo ri ḓodza uri ri huliswe nga vhathu kana uri ri pfume. Fhedzi o zwi ita uri ri ite zwoṱhe zwine ra nga kona u itela u huwelela mafhungo maḓifha.” Bugwana ine ya pfi To Whom the Work Is Entrusted, yo gandiswaho nga 1919 yo ri: “Mushumo ndi munzhi, fhedzi ndi wa Murena, nga zwenezwo, u ḓo ri ṋea nungo dza u u ita.” Vhenevho vhahashu, vho vha na tshivhindi u fana na Vhakriste vha u thoma nahone vho shuma vhukuma ngauri vho vha vha tshi fhulufhela uri muya mukhethwa u ḓo vha thusa u huwelela kha vhathu vha mifuda yoṱhe. Na riṋe ri fhulufhela uri muya mukhethwa u ḓo ri thusa ṋamusi.

8-9. Ndi dzifhio nḓila dza u huwelela dze ndangulo ya Yehova ya dzi shumisa?

⁸ Ndangulo ya Yehova yo shumisa zwishumiswa zwa khwinesa zwine zwa wanala u itela u phaḓaladza mafhungo maḓifha. Zwenezwo zwishumiswa zwi katela khandiso dzo gandiswaho, “Photo-Drama of Creation,” dzi-phonograph, goloi dzi re na khudzaipfi, radio na thekinolodzhi ya musalauno. Ndangulo ya Mudzimu yo farakanea zwihulu nga mushumo wa u ṱalutshedzela nga nyambo nnzhi u fhira naho hu lini. Ndi ngani? U itela uri vhathu vha mifuda yoṱhe vha pfe mafhungo maḓifha nga luambo lwavho lwa ḓamuni. Yehova ha ṱaluli nahone o dzula o amba  uri mafhungo maḓifha a ḓo ḓivhadzwa “kha tshaka dzoṱhe, ndimi dzoṱhe na vhathu vhoṱhe.” (Nzumb. 14:6, 7) U ṱoḓa vhathu vhoṱhe vha tshi pfa mulaedza wa Muvhuso.

⁹ Hu pfi mini nga vhathu vhane ri si kone u vha swikelela, khamusi ngauri vha dzula miḓini ine ha dzula ho lindiwa kana hu na magethe mahulu ane a dzula o khiiwa? Yehova o thusa ndangulo yawe uri i shumise dziṅwe nḓila dza u huwelela khagala uri ri kone u huwelela kha vhunzhi ha vhenevha vhathu. Sa tsumbo, nga 2001, Tshigwada tshi Langaho tsho tenda hu tshi shumiswa zwigariki na zwiṅwe zwa u ṱana khandiso ngei Fura na kha maṅwe mashango nga murahu. Ho vha na mvelelo dzavhuḓi. Nga 2011 ho thoma u huweleliwa nga nḓila ntswa kha tshipiḓa tshine ha vha na vhathu vhanzhi ḓoroboni ya New York ngei Amerika. Kha ṅwaha wa u thoma, ho tshimbidzwa bugu dza 102 129 na magazini dza 68 911. Ha vha na vhathu vha 4 701 vhe vha humbela uri hu gudwe navho Bivhili. Zwi tou pfala uri Yehova u khou shumisa muya wawe mukhethwa u tikedza wonoyu mushumo. Tshigwada tshi Langaho tsho mbo ḓi tenda uri vhahashu shangoni ḽoṱhe vha huwelele vha tshi shumisa tshigariki kana dziṅwe nḓila dza u ṱana khandiso.

10. Ri nga ita mini uri ri khwinise kha u huwelela na u funza?

¹⁰ Zwine na nga zwi ita. Shumisani nga vhuḓalo zwine Yehova a ni gudisa zwone miṱanganoni ya Vhukriste. Dzulani ni tshi shuma tsimu na tshigwada tshe na avhelwa tshone tshivhidzoni. Vhahaṋu vhane vha vha kha tshenetsho tshigwada, vha nga ni thusa uri ni kone u khwinisa nḓila ine na huwelela na u funza ngayo na u ni ṱuṱuwedza nga tsumbo dzavho dzavhuḓi. Dzulani ni tshi shuma tsimu naho ha vha na vhuleme. Samusi ndimana ya ino thero yo ri humbudza, a ri koni u ita zwine Mudzimu a zwi funa nga nungo dzashu, ri zwi koniswa fhedzi nga muya mukhethwa wawe. (Sak. 4:6) Ri nga vha na vhungoho ha uri Mudzimu u ḓo ri ṋea nungo dzine ra dzi ṱoḓa ngauri ri khou ita mushumo wawe.

11. Nga tshifhinga tsha Vhakriste vha u thoma, Tshigwada tshi Langaho tsho shumisana hani nga vhuthihi uri vhathu vha Mudzimu vha dzule vho dzudzanyea?

¹¹ Tshifhingani tsha Vhakriste vha u thoma. Tshigwada tshi Langaho ngei Yerusalema tsho vha tshi tshi shuma nga vhuthihi u itela uri hu  vhe na mulalo na u dzudzanyea. (Mish. 2:42) Sa tsumbo, musi hu tshi vha na mafhungo a u fumba nga vho 49 C.E., Tshigwada tshi Langaho tsho ambedzana nga ha ḽeneḽo fhungo tshi tshi thuswa nga muya mukhethwa. Arali tshivhidzo tsha Vhukriste tshi si pfane kha ḽeneḽo fhungo, mushumo wa u huwelela wo vha u sa ḓo tshimbila zwavhuḓi. Naho vhaapostola na vhahulwane vho vha vhe Vhayuda, a vho ngo ṱuṱuwedzwa nga mikhuvha ya Tshiyuda kana nga vhathu vhe vha vha vha tshi i funza. Nṱhani hazwo, vho sedza Ipfini ḽa Mudzimu nahone vha humbela muya wawe mukhethwa uri u vha thuse u ita phetho yo teaho. (Mish. 15:1, 2, 5-20, 28) Ho vha na mvelelo dzifhio? Yehova o fhaṱutshedza phetho yavho, ha vha na mulalo na vhuthihi nahone vha bvela phanḓa vha tshi huwelela mafhungo maḓifha.—Mish. 15:30, 31; 16:4, 5.

12. Ndi mini zwi sumbedzaho uri ndangulo ya Yehova yo dzudzanyea nahone i na mulalo ṋamusi?

¹² Musalauno. Ndangulo ya Yehova yo thusa vhathu vha Yehova uri vha dzule vho dzudzanyea nahone vhe na mulalo. Nga 1895, Zion’s Watch Tower and Herald of Christ’s Presence ya 15 November yo vha i na thero i re na tshiṱoho tshine tsha ri “Zwithu Zwoṱhe Kha Zwi Itwe Nga Nḓila Yavhuḓi Na Yo Dzudzanyeaho” tsho thewaho kha 1 Vhakorinta 14:40. Yeneyo thero yo ri: “Vhaapostola vho ṅwalela tshivhidzo tsha u thoma zwithu zwinzhi nga ha u dzudzanyea . . . Ndi zwa ndeme uri ri tevhedze zwo ṅwalwaho kale, ‘zwo ṅwalelwaho u ri funza.’” (Vharoma 15:4) Ndangulo ya Yehova ṋamusi i a ḓidina vhukuma u itela uri zwivhidzo zwa Vhukriste zwi dzule zwo dzudzanyea nahone zwi na mulalo u fana na zwa Vhakriste vha u thoma. Sa tsumbo, arali na ya kha tshiṅwe tshivhidzo kha shango ḽine na vha khaḽo kana kha ḽiṅwe shango, ni vha ni tshi khou zwi ḓivha uri Pfunzo ya Tshiingamo i ḓo farwa hani na uri hu ḓo gudiwa thero ifhio. Ni mbo ḓi rudza mbilu. Ndi muya wa Mudzimu fhedzi une wa nga ita uri honoho vhuthihi vhu vhe hone.—Tsef. 3:9.

13. Yakobo 3:17 i ri ita uri ri ḓivhudzise mbudziso dzifhio?

¹³ Zwine na nga zwi ita. Yehova u ṱoḓa uri vhathu vhawe vha ‘dzule vhe na vhuthihi he vha vhu ṋewa nga muya mukhethwa une wa ita uri vha vhe na mulalo.’ (Vhaef. 4:1-3) Nga zwenezwo, ḓivhudziseni: ‘Naa ndi ita uri tshivhidzoni hu dzule hu na vhuthihi na mulalo? Naa  ndi a thetshelesa vhane vha ranga phanḓa? Naa vhaṅwe vhathu vha nga ḓitika nga nṋe, zwihuluhulu arali ndi na vhuḓifhinduleli tshivhidzoni? Naa ndi a fara tshifhinga, ndi thusa vhaṅwe na u fhisetshela u shumela vhaṅwe?’ (Vhalani Yakobo 3:17.) Arali ni tshi vhona u nga hu na huṅwe hune na tea u khwinisa, rabelani uri muya mukhethwa u ni thuse. Arali na u tendela u tshi ṱuṱuwedza vhumuthu haṋu na zwine na ita, ni ḓo vhona vhahaṋu vha tshi ni funa na u ni dzhia ni wa ndeme.

14. U ya nga Vhakolosa 1:9, 10, Yehova o funza hani Vhakriste vha u thoma?

¹⁴ Tshifhingani tsha Vhakriste vha u thoma. Yehova u takalela u funza vhathu vhawe. (Ps. 32:8) U ṱoḓa vha tshi mu ḓivha, u mu funa na uri vha tshile tshoṱhe sa vhana vhawe vhane a vha funa. Zwenezwi zwoṱhe zwo vha zwi sa ḓo konadzea arali o vha a sa ri funzi. (Yoh. 17:3) Yehova o shumisa ndangulo yawe u itela u funza Vhakriste vha u thoma. (Vhalani Vhakolosa 1:9, 10.) Muya mukhethwa une wa vha “muthusi” we Yesu a dzula o amba uri u ḓo vha ṋea wo vha thusa. (Yoh. 14:16) Wo vha thusa u pfesesa Ipfi ḽa Mudzimu na u humbula zwithu zwoṱhe zwe Yesu a zwi amba na u zwi ita. Nahone nga murahu, zwenezwo vho zwi vhala kha Dzievangeli. U ḓivha zwe Yesu a zwi amba na u zwi ita, zwo ita uri vha vhe na lutendo lwo khwaṱhaho na uri vha fune Mudzimu, Murwa wawe na vhahavho nga ho engedzeaho.

15. Ni vhona Yehova a tshi khou ita hani zwe a fhulufhedzisa kha Yesaya 2:2, 3?

¹⁵ Musalauno. Yehova o dzula o amba uri “maḓuvhani a vhufhelo,” vhathu vha tshaka dzoṱhe vha ḓo ḓa “thavhani” yawe, zwine zwa amba u ḓa ngohoni, u itela u funzwa nḓila dzawe. (Vhalani Yesaya 2:2, 3.) Honoho vhuporofita vhu khou itea ṋamusi. Ri a vhona uri vhurabeli ha ngoho vhu khwine kha vhurabeli naho vhu vhufhio ha mazwifhi. Yehova o ṋea vhathu vhawe mafhungo manzhi nga ha Bivhili. (Yes. 25:6) U khou shumisa “mulanda a fhulufhedzeaho na wa vhuṱali” u  ri fha madzanga o fhambafhambanaho a fhungo ḽawe. Sa tsumbo, hu na khandiso dzine ra nga dzi vhala, nyambo dzine ra nga dzi thetshelesa na zwipopayi na dzividio dzine ra nga dzi ṱalela. (Mat. 24:45) Ri ḓipfa u fana na Elihu khonani ya Yobo we a ri: “Ndi nnyi ane a funza u fana [na Mudzimu]?”—Yobo 36:22.

16. Ni nga ita mini uri ni vhuyelwe nga pfunzo ya Yehova?

¹⁶ Zwine na nga zwi ita. Muya mukhethwa u ḓo ni thusa uri ni shumise zwine na zwi guda Bivhilini. Ni rabele sa muphisalema we a ri: “Iwe Yehova, mpfunze nḓila yau. Ndi ḓo tshimbila ngohoni yau. Ita uri ndi ofhe dzina ḽau nga mbilu yanga yoṱhe.” (Ps. 86:11) Bvelani phanḓa ni tshi vhala na u guda Bivhili na dziṅwe khandiso dza ndangulo ya Yehova. Tshipikwa tshaṋu tshi songo vha u sokou wana nḓivho. Ni tea u tenda zwine na khou zwi guda na u zwi shumisa vhutshiloni haṋu. Muya wa Yehova u nga ni thusa u zwi ita. Ni tea u khuthadza vhahaṋu. (Vhahev. 10:24, 25) Ndi ngani? Ngauri ndi muṱa wahaṋu. Rabelani uri muya wa Mudzimu u ni thuse u fhindula miṱanganoni ya Vhukriste zwi tshi bva mbiluni na uri ni ite zwine na nga kona arali no avhelwa nyambo. Musi ni tshi ita zwenezwi, ni vha ni tshi khou sumbedza Yehova na Murwa wawe uri ni funa “ngwana” dzavho.—Yoh. 21:15-17.

17. Ni nga sumbedza hani uri ni tikedza ndangulo ya Yehova nga u fhulufhedzea?

¹⁷ Hu si kale, kha ḽifhasi hu ḓo sala fhedzi ndangulo i livhiswaho nga muya wa Mudzimu. Nga zwenezwo, shumisanani na ndangulo ya Yehova nga u fhisea. Edzisani Mudzimu nga u funa vhathu ni sa vha ṱaluli nga u ḓivhadza vhoṱhe vhane na ṱangana navho mafhungo maḓifha. Edzisani u funa hawe u dzudzanyea na mulalo nga u ita uri hu dzule hu na vhuthihi tshivhidzoni. Nahone ni thetshelese Mufunzi waṋu Muhulwane nga u shumisa nga vhuḓalo zwine a ri gudisa. Na ita zwenezwo, a ni nga ofhi musi shango ḽa Saṱhane ḽi tshi fhela. Nṱhani hazwo, ni ḓo ima nga tshivhindi na vhane vha khou shuma na ndangulo ya Yehova.