1. Ndi ngani vhathu vhanzhi vho ḓaḓa?

HU NA vhurereli vhunzhi ṋamusi vhune ha amba uri ndi ha Vhukriste na uri vhu gwadamela Mudzimu nga nḓila ine a i funa. Ndi ngazwo vhathu vhanzhi vho ḓaḓa nga u rali! Vha ḓivhudzisa uri: “Naa hu na vhurereli vhuthihi ha ngoho kana vhurereli hoṱhe vhu takadza Mudzimu?” Naa ri na vhungoho ha uri riṋe Ṱhanzi dza Yehova ri khou funza ngoho na uri ri gwadamela Yehova nga nḓila ine ya mu takadza? Naa ri nga zwi ḓivha? Kha ri sedze vhuṱanzi vhu tevhelaho.

2. Ndi ngani muapostola Paulo o vha a tshi tenda uri o wana ngoho? (1 Vhathesalonika 1:5)

² Muapostola Paulo o vha a tshi tenda uri o wana ngoho. (Vhalani 1 Vhathesalonika 1:5.) O vha a sa sokou zwi tenda ngauri zwi a mu takadza. Nṱhani hazwo, Paulo o vha a tshi guda Ipfi ḽa Mudzimu nga vhuronwane. O vha a tshi tenda uri “Maṅwalo oṱhe o hevhedzwa nga Mudzimu.” (2 Tim. 3:16) O guda mini? Paulo o wana vhuṱanzi vhu sa hanedzei Maṅwaloni ha uri Yesu o vha e Messia o fhulufhedziswaho, zwithu zwe vharangaphanḓa vha vhurereli ha Tshiyuda vha si zwi tende. Vhenevho vharangaphanḓa vha re na muhoyo vho amba uri vha khou gudisa vhathu ngoho nga ha Mudzimu, ngeno vha tshi ita zwine a zwi vhenga. (Tito 1:16) Paulo o vha a sa fani na vhenevho vhanna ngauri o vha a tshi tenda zwoṱhe zwi re Ipfini ḽa Mudzimu nahone a sa ḓinangeli uri u ḓo tenda zwifhio. O vha o ḓiimisela u ita “zwine Mudzimu a zwi funa” na u zwi funza vhaṅwe.—Mish. 20:27.

3. Naa ri tea u wana phindulo dza mbudziso dzashu dzoṱhe uri ri tende uri ro wana ngoho? (Sedzani na bogisi “ Mishumo Ya Yehova Na Zwine A Humbula Ndi ‘Zwinzhi Vhukuma’ A ‘Zwi Ambei.’”)

³ Vhaṅwe vhathu vha vhona u nga vhurereli ha ngoho vhu  tea u kona u fhindula mbudziso iṅwe na iṅwe u katela na mbudziso dzi sa fhindulwi nga Bivhili. Naa zwenezwi zwi a konadzea? Ṱhogomelani tsumbo ya Paulo. O vhudza vhatendi ngae uri vha “ṱolisis[e] zwithu zwoṱhe” fhedzi a amba uri hu na zwinzhi zwe a vha a sa zwi pfesesi. (1 Vhathes. 5:21) O ri “ri na nḓivho ṱhukhu” nahone “zwi tou nga ri khou vhona nga tshivhoni tshi sa vhonadzi zwavhuḓi.” (1 Vhakor. 13:9, 12) U fana na riṋe, Paulo o vha a sa pfesesi zwithu zwoṱhe. O vha a tshi pfesesa zwine ra tea u zwi ḓivha nga ha Yehova. Fhedzi zwe a vha a tshi zwi ḓivha zwo vha zwo lingana u ita uri a tende uri o wana ngoho!

4. Ndi mini tshine tsha nga ri thusa u tenda uri ro wana ngoho nahone ri ḓo haseledza mini nga ha Vhakriste vha vhukuma?

⁴ Tshiṅwe tshithu tshine tsha nga ita uri ri tende uri ro wana ngoho ndi u vhambedza nḓila ye Yesu a ri ri gwadamele ngayo Yehova na nḓila ine Ṱhanzi dza Yehova vha mu gwadamela ngayo ṋamusi. Kha ino thero, ri ḓo zwi vhona uri Vhakriste vha ngoho (1) a vha gwadameli zwifanyiso, (2) vha ṱhonifha dzina ḽa Yehova, (3) vha funa ngoho nahone (4) vha a funana nga maanḓa.

5. Ri guda mini kha Yesu nga ha nḓila yo teaho ya u gwadamela Mudzimu nahone ri nga shumisa hani zwe a ri funza?

⁵ Yesu o vha a tshi funa Yehova nga maanḓa. Ndi ngazwo o gwadamela ene e eṱhe, musi a tshee ṱaḓulu na musi e kha ḽifhasi. (Luka 4:8) O funza vhafunziwa vhawe uri na vhone vha gwadamele Yehova fhedzi. Yesu na vhafunziwa vhawe vha fhulufhedzeaho a vho ngo vhuya vha shumisa zwifanyiso kha vhurabeli. Samusi Mudzimu a sa vhonali, a hu na ane a nga ita tshithu tshine tsha fana nae. (Yes. 46:5) Fhedzi ri nga ri mini nga ha vhathu vhane  vha ita zwifanyiso zwa vhathu vhane vha ri ndi vhakhethwa nahone vha zwi rabela? Kha mulayo wa vhuvhili wa Milayo ya Fumi, Yehova o ri: “U songo ḓivhaḓela tshifanyiso kana u ita tshifanyiso tsha zwa ṱaḓulu kana zwi re kha ḽifhasi . . . U songo zwi gwadamela.” (Ek. 20:4, 5) Vhathu vhane vha ṱoḓa u takadza Mudzimu vha a zwi pfesesa uri ha funi ri tshi gwadamela zwifanyiso.

6. Ṱhanzi dza Yehova vha edzisa tsumbo ifhio ya vhurabeli ṋamusi?

⁶ Vhagudi vha mafhungo a zwo iteaho kale vha amba uri Vhakriste vho vha vha tshi gwadamela Mudzimu fhedzi nga tshifhinga tsha vhaapostola. Sa tsumbo, iṅwe bugu ya ḓivhazwakale i amba uri vhenevho Vhakriste “vho vha vha tshi vhenga” u shumisa zwifanyiso fhethu ha vhurabeli. Ṱhanzi dza Yehova ṋamusi vha tevhela tsumbo ya Vhakriste vha u thoma. A ri rabeli zwifanyiso zwa vhakhethwa kana vharuṅwa, na ene Yesu a ri mu rabeli. A ri loshi fuḽaga kana u ita tshithu tshine tsha ḓo sumbedza uri ri khou gwadamela muvhuso. Naho hu tshi nga itea mini, ro ḓiimisela u tevhedza maipfi a Yesu ane a ri: “U tea u rabela Yehova Mudzimu wau.”—Mat. 4:10.

7. Ṱhanzi dza Yehova vho fhambana hani na dziṅwe kereke dzoṱhe?

⁷ Vhathu vhanzhi ṋamusi vha takalela u thetshelesa vhafunzi vha re na bvumo. Vha takalela vhenevha vhafunzi lune vha nga vha sa vha gwadamela. Vhathu vhanzhi vha dzhena kereke dzavho, vha renga bugu dzavho, vha ita na u bvisela vhenevho vhafunzi tshelede dzi si na vhukono kana dza u tikedza madzangano ane vhenevho vhafunzi vha a tikedza. Vhaṅwe vha tenda zwoṱhe zwine vha vhudzwa nga vhenevho vhafunzi. U nga ḓivhudzisa arali vhathu vha tshi nga takalela Yesu u fana na nḓila ine vha takalela vhafunzi vhavho ngayo. Fhedzi vhane vha gwadamela Yehova nga nḓila ine a i funa a vha na vhafunzi. Naho ri tshi ṱhonifha vho rangaho phanḓa, ri tevhedza zwe Yesu a amba a tshi ri: “Inwi noṱhe ni vharathu na vhakomana.” (Mat. 23:8-10) A ri gwadameli vhathu, vha nga vha vhe vharangaphanḓa vha vhurereli kana vhavhusi. Na zwipikwa zwavho a ri zwi tikedzi. A ri dzhii sia kha mafhungo a shango ḽino nahone a ri tshipiḓa tshaḽo. Ndi hune ra fhambana hone na dziṅwe kereke dzine dza ḓivhidza uri ndi dza Vhukriste.—Yoh. 18:36.

8. Ri zwi ḓivha hani uri Yehova u ṱoḓa uri dzina ḽawe ḽi ṋewe vhugala na uri ḽi ḓivhadzwe vhathu vhoṱhe?

⁸ Yesu o vhuya a rabela a ri: “Khotsi, hulisa dzina ḽau.” Yehova a fhindula yeneyo thabelo nga ipfi ḽihulu e ṱaḓulu a fhulufhedzisa uri o vha a tshi ḓo ṋea dzina ḽawe vhugala. (Yoh. 12:28) Yesu o ṋea dzina ḽa Khotsi awe vhugala kha vhuḓinḓa hawe hoṱhe. (Yoh. 17:26) Ngauralo, Vhakriste vha ngoho vha ḓirwa khana nga u shumisa dzina ḽa Mudzimu na u ḽi ḓivhadza vhaṅwe.

9. Vhakriste vha u thoma vho zwi sumbedza hani uri vha ṱhonifha dzina ḽa Mudzimu?

⁹ Musi tshivhidzo tsha Vhukriste tshi tshi kha ḓi bva u thomiwa kha ḓana ḽa u thoma ḽa miṅwaha, Yehova o ‘humbula vha dzitshaka a thoma u nanga khavho vhane vha ḓo vhidzwa nga dzina ḽawe.’ (Mish. 15:14) Vhenevho Vhakriste vha u thoma vho vha vha tshi takalela u shumisa dzina ḽa Mudzimu na u ḽi vhudza vhaṅwe. Vho vha vha tshi shumisa dzina ḽa Mudzimu musi vha tshi huwelela na musi vha tshi ṅwala bugu dza Bivhili. * Vho zwi sumbedza nga yeneyi nḓila uri ndi vhone fhedzi vhane vha ḓivhadza dzina ḽa Mudzimu.—Mish. 2:14, 21.

10. Ri zwi ḓivha hani uri Ṱhanzi dza Yehova ndi vhone fhedzi vhane vha ḓivhadza dzina ḽa Mudzimu?

 ¹⁰ Naa Ṱhanzi dza Yehova ndi vhone fhedzi vhane vha ḓivhadza dzina ḽa Mudzimu? Kha ri vhone vhuṱanzi vhu tevhelaho. Vhafunzi vhanzhi ṋamusi vho ita zwoṱhe zwine vha nga kona uri vha dzumbe ngoho ya uri Mudzimu u na dzina. Vho ḽi bvisa kha ṱhalutshedzelo dzavho dza Bivhili nahone kha dziṅwe kereke a vha tendi ḽi tshi shumiswa. * Zwi tou pfala uri ndi Ṱhanzi dza Yehova fhedzi vhane vha ṱhonifha dzina ḽa Mudzimu na u ḽi hulisa. Ndi riṋe fhedzi vhane vha ḓivhadza dzina ḽa Mudzimu kha ḽifhasi ḽoṱhe u fhira kereke dzoṱhe. Ri khou ita zwoṱhe zwine ra nga kona uri ri tshimbidzane na dzina ḽine ra vhidzwa ngaḽo, ḽine ḽa vha Ṱhanzi dza Yehova. (Yes. 43:10-12) Ro bveledza kopi dzi fhiraho miḽioni dza 240 dza Bivhili ya Ṱhalutshedzelo Ya Shango Ḽiswa Ya Maṅwalo Makhethwa. Yeneyi Bivhili i shumisa dzina ḽa Yehova fhethu he dziṅwe Bivhili dza si ḽi bule. Ri bveledza na khandiso dzo thewaho Bivhilini nga nyambo dzi fhiraho 1 000 dzine dza shumisa dzina ḽa Mudzimu.

11. Vhakriste vha u thoma vho zwi sumbedza hani uri vha funa ngoho?

¹¹ Yesu o vha a tshi funa ngoho, ine ya vha ngoho nga ha Mudzimu na zwine a ṱoḓa u itela vhathu. Nḓila ye Yesu a vha a tshi tshila ngayo yo vha i tshi sumbedza uri o vha a tshi tenda yeneyo ngoho nahone o i ḓivhadza vhaṅwe.  (Yoh. 18:37) Vhatevheli vha Yesu vha ngoho na vhone vho vha vha tshi funa ngoho. (Yoh. 4:23, 24) Muapostola Petro o amba uri Vhukriste ndi “pfunzo ya ngoho.” (2 Pet. 2:2) Vhakriste vha u thoma vho vha vha sa tendelani na zwithu zwe zwa vha zwi sa tshimbidzani na ngoho, zwi ngaho pfunzo dza vhurereli, masialala na kuhumbulele kwa vhathu ngauri vho vha vha tshi funa ngoho. (Vhakol. 2:8) Na ṋamusi, Vhakriste vha ngoho vha lingedza u “bvela phanḓa vha tshi tshimbila ngohoni” nga u ita uri zwine vha zwi tenda na nḓila ine vha tshila ngayo zwi tshimbidzane na Ipfi ḽa Mudzimu.—3 Yoh. 3, 4.

12. Hu itea mini musi Tshigwada tshi Langaho tshi tshi vhona uri nḓila ine ra pfesesa ngayo zwiṅwe zwithu i tea u khwiniswa nahone ndi ngani vha tshi dzhia honoho vhukando?

¹² Ṱhanzi dza Yehova a vha ambi uri vha dzula vha tshi pfesesa nga vhuḓalo zwoṱhe zwi re Bivhilini. Nga zwiṅwe zwifhinga vha a khakha musi vha tshi ṱalutshedza Bivhili kana musi vha tshi dzudzanya tshivhidzo. Zwenezwo zwi songo ri mangadza. Bivhili i zwi bvisela khagala uri vhathu vha Mudzimu vha ya vha tshi pfesesa ngoho nga u ya ha tshifhinga. (Vhakol. 1:9, 10) Yehova u dzumbulula ngoho nga zwiṱuku nga zwiṱuku nahone ri tea u mu lindela ri sa fheli mbilu u swikela ri tshi pfesesa ngoho nga nḓila ya khwine. (Mir. 4:18) Musi Tshigwada tshi Langaho tshi tshi vhona uri nḓila ine ra pfesesa ngayo zwiṅwe zwithu kana ra ita ngayo zwiṅwe zwithu i tea u shanduka, vha ita tshanduko nga u ṱavhanya. Kereke nnzhi ṋamusi dzi shandula pfunzo dzadzo dzi tshi itela u takadza miraḓo yadzo kana shango. Fhedzi musi Ṱhanzi dza Yehova vha tshi ita tshanduko vha dzi itela uri vha takadze Yehova na u mu gwadamela nga nḓila ye Yesu a mu gwadamela ngayo. (Yak. 4:4) Musi ri tshi ita tshanduko, a ri dzi itiswi ngauri mavhonele a vhathu vha shango o shanduka, fhedzi ri dzi itiswa ngauri ri pfesesa Bivhili nga nḓila ya khwine. Ri funa ngoho.—1 Vhathes. 2:3, 4.

13. Ndi tshifhio tshithu tshihulwane tshine Vhakriste vha ngoho vha vhonala ngatsho nahone tshi vhonala hani kha Ṱhanzi dza Yehova ṋamusi?

¹³ Lufuno ndi tshithu tshihulwane tshe Vhakriste vha u thoma vha vha vha tshi vhonala ngatsho. Yesu o ri: “Arali ni tshi funana, ndi hone vhathu vhoṱhe vha tshi ḓo ḓivha zwa uri ni vhafunziwa vhanga.” (Yoh. 13:34, 35) Ṱhanzi dza Yehova ṋamusi kha ḽifhasi ḽoṱhe vha na lwonolwo lufuno na vhuthihi. Ro fhambana na dziṅwe kereke ngauri ri tshila sa muṱa muthihi naho ri tshi bva kha mashango o fhambanaho na mvelele dzashu dzi sa fani. Lwonolwu lufuno ri lu vhona miṱanganoni yashu, maguvhanganoni na mabuthanoni. Zwenezwi zwi ri thusa u vhona uri ri khou gwadamela Yehova nga nḓila ine a i takalela.

14. U ya nga Vhakolosa 3:12-14, ndi ifhio nḓila khulwane ine ra nga sumbedza ngayo uri ri funana nga maanḓa?

¹⁴ Maṅwalo a ri ṱuṱuwedza uri ri “funane nga maanḓa.” (1 Pet. 4:8) Iṅwe nḓila ya u sumbedza lwonolwo lufuno ndi nga u hangwelana na u konḓelelana musi ri tshi khakhelana. Ri dovha ra ṱoḓa nḓila dza u sumbedza vhahashu vhoṱhe vha re tshivhidzoni mafunda na u vha ṱanganedza, u katela na vhane vha nga vha vho ri khakhela. (Vhalani Vhakolosa 3:12-14.) Ri sumbedza uri ri Vhakriste vha ngoho musi ri na lufuno lwo raloho.

15. Ndi nga dzifhio dziṅwe nḓila dzine ra edzisa ngadzo nḓila ye Vhakriste vha u thoma vha vha vha tshi gwadamela Yehova ngayo?

¹⁵ Hu dovha ha vha na dziṅwe nḓila dzine ra edzisa ngadzo nḓila ye Vhakriste vha u thoma  vha vha vha tshi gwadamela Yehova ngayo. Sa tsumbo, ndangulo yashu yo dzudzanywa sa ya Vhakriste vha u thoma. Ri na vhalavhelesi vha dalelaho zwivhidzo, vhahulwane na vhalanda vha shumelaho, u fana navho. (Vhafil. 1:1; Tito 1:5) Ri dovha ra fana navho nga u ṱhonifha milayo ya Yehova i tshimbidzanaho na zwa vhudzekani na mbingano, zwine Mudzimu a amba nga ha u shumisa malofha, na u tsireledza tshivhidzo kha vhane vha si fune u tevhedza milayo ya Mudzimu.—Mish. 15:28, 29; 1 Vhakor. 5:11-13; 6:9, 10; Vhahev. 13:4.

16. Ri guda mini kha zwo ṅwalwaho kha Vhaefesa 4:4-6?

¹⁶ Yesu o amba uri vhathu vhanzhi vho vha vha tshi ḓo amba uri ndi vhafunziwa vhawe, fhedzi vhe si vhoṱhe vha re vha vhukuma. (Mat. 7:21-23) Maṅwalo o dovha a ri vhudza uri maḓuvhani a vhufhelo vhathu vhanzhi vho vha vha tshi ḓo “ḓiita u nga vho ḓikumedzela kha Mudzimu.” (2 Tim. 3:1, 5) Zwiṅwe hafhu, Bivhili i ri vhudza banga kupalula musi i tshi ri hu na “lutendo luthihi” kana vhurereli vhuthihi vhune Mudzimu a vhu ṱanganedza.—Vhalani Vhaefesa 4:4-6.

17. Ndi vhafhio vhane ṋamusi vha khou tevhela Yesu na u vha kha vhurereli vhuthihi ha ngoho?

¹⁷ Ndi vhafhio vha re kha vhurereli vhuthihi ha ngoho ṋamusi? Vhuṱanzi ro vhu vhona. Ro amba nga ha nḓila ya u gwadamela Yehova ye Yesu a ri funza yone na ye ya tevhedzwa nga Vhakriste vha ḓana ḽa u thoma ḽa miṅwaha. Phindulo ndi nthihi fhedzi, ndi Ṱhanzi dza Yehova. Ro huliswa vhukuma nga u vha vhathu vha Yehova na u ḓivha ngoho nga ha Yehova na zwine a ṱoḓa u zwi itela vhathu. U nga ri ri nga ita zwoṱhe zwine ra nga kona uri ri farelele ngoho ri sa timatimi.