ṄWAHA muṅwe na muṅwe hu na vhanzhi vha re dzinngu vhane vha vhuyedzedzwa tshivhidzoni tsha Vhukriste. Humbulani uri hu vha na dakalo ḽingafhani “ṱaḓulu” musi muṅwe na muṅwe wavho a tshi vhuya! (Luka 15:7, 10) Arali ni muṅwe wa vho vhuyedzedzwaho, ni nga vha na vhungoho ha uri Yesu, vharuṅwa na Yehova vho takala nga maanḓa uri no vhuyelela tshivhidzoni. Naho zwo ralo, musi ni tshi vusulusa vhukonani haṋu na Yehova, ni nga ṱangana na dzithaidzo. Dziṅwe dzadzo ndi dzifhio nahone ni nga thuswa nga mini?

Vhunzhi ha vhahashu vha a kulea nungo musi vho no vhuyelela tshivhidzoni. Khamusi ni a pfesesa nḓila ye Khosi Davida a ḓipfa ngayo. Musi o no hangwelwa zwivhi, o ri: “Vhukhakhi hanga . . . vhu khou ntsikeledza.” (Ps. 40:12; 65:3) Musi muthu o vhuyelela tshivhidzoni, a nga ḓipfa o kulea nungo kana e na ṱhoni lwa tshifhinga tshilapfu. Isabelle o fhedza miṅwaha i fhiraho 20 o bviswa tshivhidzoni. * O ri: “Zwo nkonḓela u tenda uri Yehova a nga nkhangwela.” Arali na tenda u kulea nungo, vhukonani haṋu na Yehova vhu nga si khwaṱhe. (Mir. 24:10) Lingedzani u sa zwi tendela zwi tshi itea kha inwi.

Vhaṅwe vha nga vhilaedziswa nga uri a vha nga koni u ita zwine zwa ṱoḓea uri vha dovhe vha vhe na vhushaka na Yehova. Musi Antoine o vhuyedzedzwa tshivhidzoni, o ri: “Ndo vha ndo no hangwa zwoṱhe zwe nda zwi ita na u zwi guda tshifhingani tsho fhelaho musi ndi Ṱhanzi.” U ḓipfa nga yeneyo nḓila zwi ita uri vhaṅwe vha si itele Yehova zwine vha nga kona.

Sa tsumbo, musi muthu o thuthelwa nnḓu yawe ine a i funa nga ḓumbu, a nga kulea nungo musi a tshi humbula nga ha tshifhinga na mushumo une wa tea u itwa u itela u fhaṱulula nnḓu yawe.  Nga hu fanaho, arali no ita tshivhi tshihulwane tsha tshinya vhushaka haṋu na Yehova, ni nga pfa u nga hu ḓo ṱoḓea mushumo muhulwane u itela u vusulusa honoho vhushaka. Fhedzi ni nga wana thuso.

Yehova u a ri ramba. U ri: “Iḓani ri dzudzanye mafhungo.” (Yes. 1:18) No no shuma vhukuma uri ni “dzudzanye mafhungo.” Yehova u a ni funa nge na ita honoho vhuḓidini. Humbulani hezwi: No ṋea Yehova tshiitisi tsho khwaṱhaho tsha u fhindula zwine Saṱhane a mu pomoka ngazwo.—Mir. 27:11.

Nga u ita zwenezwo, no no sendela tsini na Yehova, na ene u fhulufhedzisa u sendela tsini na inwi. (Yak. 4:8) Fhedzi hu ṱoḓea zwo engedzeaho u fhira u ṱhogomelwa nga vhaṅwe uri ni tshipiḓa tsha tshivhidzo. Ni tea u dzula ni tshi khwaṱhisa nḓila ine na funa ngayo Yehova a re Khotsi aṋu na Khonani. Zwenezwo ni nga zwi itisa hani?

Lingedzani u ḓivhetshela zwipikwa zwine na nga zwi swikelela. Khamusi ni kha ḓi humbula zwithu zwa mutheo zwe na zwi guda nga ha Yehova na nga fhulufhedziso ḽawe ḽa Pharadiso. Fhedzi zwino ni tea u dovha na vha na nḓowelo yavhuḓi, sa tsumbo, u dzula ni tshi ya tsimuni, u ḓikonanya na vhahaṋu na u ya miṱanganoni. Humbulani nga ha zwipikwa zwi tevhelaho.

Dzulani ni tshi amba na Yehova. Khotsi aṋu u a zwi pfesesa uri arali ni tshi dzulela u ḓivhona mulandu, zwi nga ni konḓela u amba nae nga thabelo. (Vharoma 8:26) Naho zwo ralo, “ni dzule ni tshi rabela,” ni vhudze Yehova uri ni ṱoḓa a tshi vha khonani yaṋu. (Vharoma 12:12) Andrej u ri: “Ndo vha ndi tshi ḓivhona mulandu na u pfa ndi na ṱhoni. Tshifhinga tshoṱhe musi ndo no rabela, ndo vha ndi tshi pfa ndi khwine. Ndo pfa mbilu yanga yo rula.” Arali ni sa ḓivhi zwine na nga rabela nga hazwo, ni nga humbula thabelo dza Khosi Davida dzi re kha Phisalema 51 na 65.

Gudani Bivhili tshifhinga tshoṱhe. Zwi ḓo ita uri ni vhe na lutendo lwo khwaṱhaho na u ni thusa uri ni fune Yehova nga ho engedzeaho. (Ps. 19:7-11) Felipe o ri: “U sa vha na nḓowelo yavhuḓi ya u guda Bivhili ndi zwone zwe zwa ita uri ndi si tsha vha na lutendo nda fhedza ndo khakhela Yehova. U itela uri ndi si tsha dovha nda ita honoho vhukhakhi, ndo humbula u ḓitsireledza nga u guda Bivhili.” Na inwi ni nga ita zwenezwo. Arali ni tshi ṱoḓa u thusiwa nga zwine na nga guda nga hazwo, ni nga humbela khonani i re na vhushaka ho khwaṱhaho na Yehova uri i ni thuse.

Vusulusani vhukonani haṋu na vhahaṋu. Vhaṅwe vhane vha vhuyelela tshivhidzoni vha humbula uri vhaṅwe vha ḓo vha dzhia nga nḓila i si yavhuḓi. Larissa u ri: “Ndo vha ndi tshi niwa nga ṱhoni. Ndo vha ndi tshi pfa u nga ndo vhaisa vhahashu na u vha shonisa. Ndo fhedza tshifhinga tshilapfu ndi tshi ḓipfa nga u rali.” Ivhani na vhungoho ha uri vhahulwane na vhaṅwe tshivhidzoni vha re na lutendo lwo khwaṱhaho vha ṱoḓa u ni thusa uri ni vusuluse vhushaka haṋu na Yehova. (Sedzani bogisi “ Vhahulwane Vha Nga Ita Mini?”) Vho takala ngauri no vhuya nahone vha ṱoḓa uri na inwi ni takale!—Mir. 17:17.

Ndi zwifhio zwine zwa nga ni sendedza tsini na tshivhidzo? Dzulani ni tshi ya miṱanganoni na tsimuni na vhahaṋu. Zwenezwi zwi ḓo ni thusa hani? Felix o ri: “Tshivhidzo tsho vha tsho lavhelela uri ndi vhuye. Ndo pfa ndo ṱanganedzwa. Vhoṱhe vho nthusa uri ndi dovhe ndi ḓipfe ndi muraḓo wa tshivhidzo, uri Yehova o nkhangwela na uri ndi nga bvela phanḓa ndi tshi mu shumela.”—Sedzani bogisi “ Ni Nga Ita Mini?”

Saṱhane u ḓo ḓi bvela phanḓa a tshi ni ḓisela dzithaidzo uri a ni kule nungo musi ni tshi khou lingedza u vusulusa vhukonani haṋu na Yehova. (Luka 4:13) Dzulani no lugela nga u khwaṱhisa vhukonani haṋu na Yehova zwino.

Yehova u fhulufhedzisa zwi tevhelaho nga ha nngu dzawe: “Dzo xelaho ndi ḓo dzi ṱoḓa nda dzi vhuisa, dzo vhaisalaho ndi ḓo dzi banditsha, dzi si na nungo ndi ḓo dzi khwaṱhisa.” (Hesek. 34:16) Ndi vhanzhi vhe Yehova a vha thusa uri vha vusuluse vhushaka havho nae. Ivhani na vhungoho ha uri u ḓo ḓi bvela phanḓa a tshi ni thusa uri ni fhaṱe vhushaka ho khwaṱhaho nae.