1. Yehova o ri ṋea fhulufhelo ḽifhio?

 YEHOVA o ri ṋea fhulufhelo ḽavhuḓi ḽa u tshila nga hu sa fheli. Vhaṅwe vha na fhulufhelo ḽa u tshila tshoṱhe ṱaḓulu vhe zwivhumbiwa zwa muya zwi sa fi. (1 Vhakor. 15:50, 53) Fhedzi vhunzhi hashu ri na fhulufhelo ḽa u tshila kha ḽifhasi lwa tshoṱhe, ri na mutakalo wavhuḓi nahone ro takala. (Nzumb. 21:3, 4) Hu sa londwi uri ri na fhulufhelo ḽa u tshila ṱaḓulu kana kha ḽifhasi, fhulufhelo ḽashu ndi ḽa ndeme kha riṋe.

2. Fhulufhelo ḽashu ḽo thewa kha mini nahone ndi ngani ri tshi ralo?

² Ipfi “fhulufhelo” Bivhilini ḽi nga ṱaluswa sa “u lavhelela uri hu itee zwithu zwavhuḓi.” Ri nga vha na vhungoho ha uri zwe ra fhulufhela uri zwi itee tshifhingani tshi ḓaho zwi ḓo itea ngauri zwi bva kha Yehova. (Vharoma 15:13) Ri a ḓivha zwe Yehova a ri fhulufhedzisa zwone nahone ri a zwi ḓivha uri u dzula a tshi ita zwe a fhulufhedzisa. (Num. 23:19) Ri na vhungoho ha uri Yehova u na lutamo na maanḓa zwa u ita zwithu zwoṱhe zwine a amba uri u ḓo zwi ita. Nga zwenezwo, fhulufhelo ḽashu a si u sokou tama zwine zwa nga itea, fhedzi ḽo thewa kha zwithu zwa vhukuma.

3. Ri ḓo amba nga ha mini kha ino thero? (Phisalema 27:14)

³ Khotsi ashu wa ṱaḓulu u a ri funa nahone u ṱoḓa ri tshi mu fhulufhela. (Vhalani Phisalema 27:14.) Musi fhulufhelo ḽashu kha Yehova ḽo khwaṱha, ri ḓo kona u konḓelela thaidzo nga tshivhindi nahone ro takala hu sa londwi uri hu itea mini kha riṋe. Kha ri vhone uri fhulufhelo ḽashu ḽi ri tsireledza hani. Ri ḓo thoma nga u amba nga ha uri fhulufhelo ḽi fana hani na thikho na gondolo. Ra kona u amba nga ha uri ri nga ḽi khwaṱhisa hani.

4. Fhulufhelo ḽashu ḽi fana hani na thikho? (Vhahevheru 6:19)

⁴ Kha vhurifhi he a vhu ṅwalela Vhakriste vha Vhahevheru, muapostola Paulo o fanyisa fhulufhelo ḽashu na thikho. (Vhalani Vhahevheru 6:19.) Paulo o vha a tshi anzela u tshimbila nga tshikepe, nga zwenezwo o vha a tshi zwi ḓivha uri thikho i shumiselwa u itela u tika tshikepe uri tshi si ye ngeno na ngei. Nga tshiṅwe tshifhinga, Paulo o vha o ṋamela tshikepe musi hu tshi vha na ḓumbu ḽihulu. O vhona vhaalavhi vha tshenetsho tshikepe vha tshi posa dzithikho maḓini u itela uri tshi si vhudzulelwe kha matombo. (Mish. 27:29, 39-41) Samusi thikho i tshi ita uri tshikepe tshi si ye ngeno na ngei, fhulufhelo ḽashu ḽi ita uri ri dzule ri tsini na Yehova naho ri tshi khou sedzana na thaidzo dzi ngaho ḓumbu. Fhulufhelo ḽashu ḽi ita uri ri kone u dzika musi ro sedzana na dzithaidzo ngauri ri vha ri na vhungoho ha uri zwithu zwi ḓo vha khwine. Ni songo hangwa uri Yesu o ri tsivhudza uri ri ḓo tovholwa. (Yoh. 15:20) Nga zwenezwo, u elekanya nga ha zwe Yehova a ri fhulufhedzisa zwone zwi ḓo ri thusa uri ri dzule ri tshi mu shumela.

5. Fhulufhelo ḽo thusa hani Yesu musi o sedzana na lufu?

⁵ Ṱhogomelani nḓila ye fhulufhelo ḽa thusa ngayo Yesu uri a dzule a tshi fhulufhedzea naho o vha a tshi zwi ḓivha uri u ḓo fa nga nḓila i vhavhaho. Nga ḓuvha ḽa Pentekoste ya 33 C.E., muapostola Petro o redza vhuṅwe vhuporofita vhu bvaho kha bugu ya Phisalema he ha ṱalusa nḓila ye Yesu a vha o dzika ngayo na u vha na fhulufhelo. O ri: “Ndi ḓo dzula ndi na fhulufhelo; ngauri u nga si nnditshe ndi Vhiḓani, u nga si tende muvhuya wau a tshi sina. . . . U ḓo ita uri ndi dzule ndo takala phanḓa hau.” (Mish. 2:25-28; Ps. 16:8-11) Naho Yesu o vha a tshi zwi ḓivha uri u ḓo fa, o vha e na fhulufhelo ḽa uri Mudzimu u ḓo mu vusa na uri u ḓo dovha a takalela u vha na Khotsi awe ngei ṱaḓulu.—Vhahev. 12:2, 3.

6. Muṅwe wahashu o ri mini nga ha fhulufhelo?

⁶ Fhulufhelo ḽashu ḽo no ḓi thusa vhunzhi ha vhahashu u konḓelela. Ṱhogomelani tsumbo ya wahashu a fhulufhedzeaho Vho Leonard Chinn vha dzulaho ngei England. Nga Nndwa Ya Shango Ya U Thoma, vho farwa vha valelwa dzhele nga nṱhani ha uri vho vha vha sa ṱoḓi u vha swole. Vho fhedza miṅwedzi mivhili vho valelwa fhethu havho vhe vhoṱhe. Nga murahu ha zwenezwo, vha kombetshedzwa uri vha ite mushumo u vhavhaho. Vho ṅwala uri: “Zwe nda tshenzhela zwo ita uri ndi kone u vhona uri ri ṱoḓa fhulufhelo u itela u kona u konḓelela. Ri na tsumbo ya Yesu, vhaapostola, vhaporofita u katela na zwe Yehova a ri fhulufhedzisa zwone Bivhilini. Zwoṱhe hezwi zwi ita uri ri kone u vha na fhulufhelo ḽavhuḓi ḽa vhumatshelo nahone zwi a ri khwaṱhisa zwa ita uri ri kone u konḓelela.” Fhulufhelo ḽo vha ḽi tshi tou nga thikho kha Vho Leonard nahone ḽi nga fana na thikho na kha riṋe.

7. Milingo i khwaṱhisa hani fhulufhelo ḽashu? (Vharoma 5:3-5; Yakobo 1:12)

⁷ Musi ri tshi konḓelela milingo na u vhona ndila ine Yehova a ri thusa ngayo, zwi ita uri ri vhone uri Yehova u a ri takalela. Zwenezwo zwa ita uri fhulufhelo ḽashu ḽi khwaṱhe. (Vhalani Vharoma 5:3-5; Yakobo 1:12.) Zwa zwino, fhulufhelo ḽashu ḽo no khwaṱha u fhira musi ri tshi ṱanganedza mafhungo maḓifha. Saṱhane u ṱoḓa uri milingo i ri tsikeledze, fhedzi Yehova u a ri thusa uri ri kone u konḓelela mulingo muṅwe na muṅwe nga nḓila i bvelelaho.

8. Fhulufhelo ḽashu ḽi fana hani na gondolo? (1 Vhathesalonika 5:8)

⁸ Bivhili i dovha ya fanyisa fhulufhelo ḽashu na gondolo. (Vhalani 1 Vhathesalonika 5:8.) Swole ḽi ambara gondolo u itela u tsireledza ṱhoho yaḽo kha maswina aḽo. Sa izwi ri tshi khou lwa na Saṱhane, ri tea u tsireledza mihumbulo  yashu khae. Saṱhane u shumisa zwithu zwinzhi u itela u ri linga na u ṱoḓa u tshinya nḓila ine ra humbula ngayo. Samusi gondolo ḽi tshi tsireledza ṱhoho ya swole, na fhulufhelo ḽashu ḽi tsireledza nḓila ine ra humbula ngayo u itela uri ri dzule ri tshi fhulufhedzea kha Yehova.

9. Hu itea mini kha vhathu vha si na fhulufhelo?

⁹ Fhulufhelo ḽashu ḽa u tshila tshoṱhe ḽi ḓo ri thusa uri ri ite phetho dza vhuṱali. Fhedzi arali ḽa sa khwaṱha nahone ra thoma u humbula nga ha nyemulo dzashu fhedzi, ri nga hangwa nga ha fhulufhelo ḽashu ḽa u tshila tshoṱhe. Humbulani zwe zwa itea kha Vhakriste vhe vha vha vha tshi khou tshila kha ḽa Korinta tshifhingani tsho fhiraho. Vho laṱa fhulufhelo ḽa ndeme ḽa mvuwo. (1 Vhakor. 15:12) Paulo o ṅwala uri vhenevha vhathu vhe vha vha vha sa tendi kha mvuwo, vho vha vha tshi khou tshilela u ḓitakadza. (1 Vhakor. 15:32) Na ṋamusi, vhathu vhanzhi vhane vha si fhulufhele zwe Mudzimu a zwi fhulufhedzisa, vha tshilela u ḓitakadza nahone vha ita tshiṅwe na tshiṅwe tshine tsha ita uri vha takale zwino. Fhedzi riṋe a ri fani navho ngauri ri fhulufhela zwe Mudzimu a ri fhulufhedzisa. Fhulufhelo ḽashu ḽi fana na gondolo ḽine ḽa tsireledza nḓila ine ra humbula ngayo nahone ḽi ri thusa uri ri si humbule nga ha riṋe vhaṋe fhedzi ngauri zwi nga tshinya vhushaka hashu na Yehova.—1 Vhakor. 15:33, 34.

10. Fhulufhelo ḽashu ḽi nga ri tsireledza hani kha mahumbulele o khakheaho?

¹⁰ Fhulufhelo ḽashu ḽi nga ri tsireledza na kha u humbula uri ri nga si vhuye ra kona u takadza Yehova. Sa tsumbo, muṅwe a nga humbula uri: ‘Ndi nga si vhuye nda tshila tshoṱhe. A thi fanelei. Ndi nga si vhuye nda kona u ita zwine Mudzimu a ṱoḓa ndi tshi zwi ita.’ Humbulani uri Elifasi khonani mmbi ya Yobo o vhudza Yobo zwi fanaho na zwenezwo. Elifasi o ri: “Muthu a nga vha hani o kunaho.” A dovha a amba zwi tevhelaho nga ha Mudzimu a ri: “Ha fhulufheli vhakhethwa vhawe, na maṱaḓulu ho ngo kuna phanḓa hawe.” (Yobo 15:14, 15) Eneo o vha e mazwifhi madala-dala. Ni songo hangwa uri Saṱhane ndi ene ane a ṱoḓa ri tshi humbula nga yeneyo nḓila. U a zwi ḓivha uri arali na dzula ni tshi humbula nga yeneyo nḓila, ni ḓo thoma u xelelwa nga fhulufhelo. Ri tea u hanedza eneo mazwifhi nahone ri livhise ṱhogomelo kha zwe Yehova a zwi fhulufhedzisa. Ri songo vhuya ra timatima uri Mudzimu u khou ṱoḓa ri tshi tshila tshoṱhe na uri u ḓo ri thusa uri ri kone u swikelela tshenetsho tshipikwa.—1 Tim. 2:3, 4.

11. Ndi ngani ri songo tea u fhela mbilu musi ro lindela uri zwe ra fhulufhela zwi itee?

¹¹ A zwi leluwi u dzula ri na fhulufhelo ḽo khwaṱhaho. Ri nga kha ḓi fhela mbilu musi ro lindela uri Mudzimu a ite zwe a fhulufhedzisa. Fhedzi ngauri Mudzimu o ḓi dzula e hone, tshifhinga tshilapfu kha riṋe tshi vha tshi tshifhinga tshipfufhi khae. (2 Pet. 3:8, 9) U ḓo ita zwe a ri fhulufhedzisa nga tshifhinga tsho teaho, fhedzi tshenetsho tshifhinga tshi nga kha ḓi sa vha tshe riṋe ra tshi lavhelela. Ri nga thuswa nga mini u dzula ri na fhulufhelo ḽo khwaṱhaho musi ro lindela uri Mudzimu a ite zwe a ri fhulufhedzisa?—Yak. 5:7, 8.

12. U ya nga Vhahevheru 11:1, 6, fhulufhelo ḽi tshimbidzana hani na lutendo?

¹² Arali ra dzula ri tsini na Yehova, fhulufhelo ḽashu ḽi ḓo khwaṱha ngauri ndi ene ane a ḓo ita zwe ra zwi fhulufhela. Zwavhuḓi-vhuḓi, Bivhili i amba uri arali ri tshi ṱoḓa u vha na fhulufhelo, ri tea u vha na lutendo lwa uri Yehova u hone na uri ndi ene ane a “lambedza vhane vha mu ṱoḓa zwi tshi bva mbiluni.” (Vhalani Vhahevheru 11:1, 6.) Arali ri tshi tenda zwa uri Yehova u hone zwa vhukuma, ri ḓo vha na vhungoho ha uri u ḓo ita zwe a ri fhulufhedzisa. Kha ri ambe nga ha nḓila dzine ra nga dzi shumisa u itela u khwaṱhisa vhushaka hashu na Yehova na u ita uri fhulufhelo ḽashu ḽi dzule ḽo khwaṱha.

13. Ri nga sendela hani tsini na Mudzimu?

 ¹³ Rabelani kha Yehova nahone ni vhale Ipfi ḽawe. Naho ri sa koni u vhona Yehova, ri nga kona u sendela tsini nae. Ri nga amba nae nga thabelo ri na vhungoho ha uri u ḓo ri thetshelesa. (Yer. 29:11, 12) Ri nga mu thetshelesa nga u vhala Ipfi ḽawe na u elekanya nga ha zwine ra zwi vhala khaḽo. Musi ri tshi vhala nga ha nḓila ye Yehova a ṱhogomela ngayo vhathu vhe vha fhulufhedzea khae tshifhingani tsho fhiraho, zwi khwaṱhisa fhulufhelo ḽashu. Zwoṱhe zwi re Ipfini ḽa Mudzimu “zwo ṅwalelwa u ri funza, uri nga u konḓelela hashu na nga u khuthadzwa nga Maṅwalo ri vhe na fhulufhelo.”—Vharoma 15:4.

14. Ndi ngani ri tshi tea u humbulisisa nga ha zwe Yehova a zwi itela vhaṅwe tshifhingani tsho fhiraho?

¹⁴ Elekanyani nga ha nḓila ye Yehova a ita ngayo zwe a fhulufhedzisa tshifhingani tsho fhiraho. Ṱhogomelani zwe Mudzimu a zwi itela Abrahamu na Sara. Vho vha vho no aluwa vha sa koni u vha na vhana. Naho zwo ralo, Mudzimu a vha fhulufhedzisa uri vha ḓo vha na ṅwana. (Gen. 18:10) Abrahamu o ita mini? Bivhili i ri: “O tenda uri u ḓo vha khotsi a tshaka nnzhi.” (Vharoma 4:18) Naho vhathu vho vha vha tshi vhona u nga zwi nga si konadzee uri Abrahamu na Sara vha vhe na ṅwana, Abrahamu o vha a tshi tenda uri Yehova u ḓo ita zwe a fhulufhedzisa. Yehova o fhedzisela o ita zwe a fhulufhedzisa onoyo munna a fhulufhedzeaho. (Vharoma 4:19-21) Mafhungo a ngaho enea a ri gudisa uri ri nga vha na vhungoho ha uri Yehova u ḓo dzula a tshi ita zwoṱhe zwe a fhulufhedzisa, naho zwi tshi vhonala zwi sa konadzei.

15. Ndi ngani ri tshi tea u humbulisisa nga ha zwe Mudzimu a ri itela zwone?

¹⁵ Humbulani nga ha zwe Yehova a ni itela zwone. Humbulani uri no no vhuyelwa hani nga zwithu zwo no iteaho zwe zwa fhulufhedziswa Bivhilini. Sa tsumbo, Yesu o fhulufhedzisa  uri Khotsi awe u ḓo ni ṋea zwine na zwi ṱoḓa u itela u tshila. (Mat. 6:32, 33) Yesu o dovha a fhulufhedzisa uri Yehova u ḓo ni ṋea muya mukhethwa musi ni tshi u humbela. (Luka 11:13) Yehova o ita hezwo zwithu zwoṱhe zwe a fhulufhedzisa. Nga hu fanaho, ni nga humbula nga ha zwiṅwe zwe Mudzimu a fhulufhedzisa zwe a ni itela zwone. Sa tsumbo, u fhulufhedzisa u ni hangwela, u ni khuthadza na u ni ṋea zwine na zwi ṱoḓa u itela uri ni dzule ni na vhushaka havhuḓi nae. (Mat. 6:14; 24:45; 2 Vhakor. 1:3) Musi ni tshi elekanya nga ha zwe Mudzimu a ni itela zwone, fhulufhelo ḽaṋu ḽi ḓo khwaṱha, na vha na vhungoho ha uri u ḓo ita zwe a zwi fhulufhedzisa tshifhingani tshi ḓaho.

16. Ndi ngani fhulufhelo ḽi tshifhiwa tshavhuḓi?

¹⁶ Fhulufhelo ḽa u tshila tshoṱhe ndi tshifhiwa tshavhuḓi tshi bvaho kha Mudzimu. Ro lavhelela vhumatshelo havhuḓi nga maṱo matswuku nahone ri na vhungoho ha uri vhu ḓo ḓa. Fhulufhelo ḽi fana na thikho, ḽi a ri tika uri ri kone u konḓelela milingo ine ra sedzana nayo, u konḓelela musi ri tshi tovholwa na musi ro sedzana na lufu. Fhulufhelo ḽi dovha ḽa fana na gondolo ngauri ḽi tsireledza nḓila ine ra humbula ngayo uri ri iledze u ita zwo khakheaho na uri ri ite zwo lugaho. Ḽeneḽi fhulufhelo ḽine ra ḽi wana Bivhilini ḽi ri thusa uri ri kone u ḓivha Mudzimu khwiṋe nahone ḽi ri sumbedza nḓila ine Mudzimu a ri funa ngayo. Ri a vhuyelwa vhukuma musi ri tshi dzula ri na fhulufhelo ḽo khwaṱhaho.

17. Ndi ngani fhulufhelo ḽashu ḽi tshi ita uri ri takale?

¹⁷ Kha vhurifhi he muapostola Paulo a vha ṅwalela Vharoma, o vha ṱuṱuwedza uri vha ‘takale ngauri vha na fhulufhelo.’ (Vharoma 12:12) Paulo o kona u takala ngauri o vha e na vhungoho ha uri arali a dzula a tshi fhulufhedzea, u ḓo wana vhutshilo vhu sa fheli ṱaḓulu. Na riṋe ri nga takalela fhulufhelo ḽine ra vha naḽo ngauri ri na vhungoho ha uri Yehova u ḓo ita zwe a fhulufhedzisa. Muphisalema o ṅwala uri: “Hu takala muthu ane . . . a fhulufhela Yehova Mudzimu wawe, . . . Ane a dzula a tshi fhulufhedzea.”—Ps. 146:5, 6.