1-2. (a) Miṅwe mivhuso yo tovhola hani vhathu vha Yehova, fhedzi vhenevha vhathu vho ita mini? (b) Ndi ngani ri tshi nga takala naho ri tshi tovholwa? (Fhindulani ni tshi shumisa na tshifanyiso tshi re kha gwati.)

 ZWA zwino, mishumo yashu yoṱhe kana miṅwe ya mishumo yashu yo thivhelwa kha mashango a fhiraho 30. Kha maṅwe a eneo mashango vhavhusi vho valela vhahashu dzhele. Vho khakha nga mini? Kha Yehova a vho ngo khakha. Zwe vha zwi ita ndi u vhala na u guda Bivhili, u vhudza vhaṅwe zwine vha zwi tenda na u ya miṱanganoni na vhatendi ngavho. A vha dzhii sia kha mafhungo a politiki. Vhenevha vhashumeli vha Mudzimu vho dzula vha tshi fhulufhedzea hu sa londwi u tovholwa nahone u ita zwenezwo zwi ita uri vha takale.

² Khamusi no no vhona vhaṅwe vha Ṱhanzi dza Yehova kha zwinepe vha tshi khou sumbedza vhe na tshivhindi nahone vha tshi vhonala vho takala. Vho takala ngauri vha a zwi ḓivha uri vha khou takadza Yehova nga u dzula vha tshi fhulufhedzea khae. (1 Koron. 29:17a) Yesu o ri: “Hu takala vho tovholwaho nga nṱhani ha uri vho luga . . . Takalani ni pembele, ngauri ni ḓo fhaṱutshedzwa zwihulu.”—Mat. 5:10-12.

3. Samusi zwo sumbedzwa kha Mishumo 4:19, 20, vhaapostola vho ita mini musi vha tshi tovholwa nahone ndi ngani vho ita nga u ralo?

³ Vhahashu vha khou sedzana na milingo ye vhaapostola vha Yesu vha sedzana nayo musi vha tshi tovholwa nga nṱhani  ha u funza nga ha Yesu. Ndi lunzhi vhahaṱuli vha khothe khulwane ya Vhayuda vha tshi “vha vhudza uri vha litshe u amba nga ha dzina ḽa Yesu.” (Mish. 4:18; 5:27, 28, 40) Vhaapostola vho ita mini? (Vhalani Mishumo 4:19, 20.) Vho vha vha tshi zwi ḓivha uri Mudzimu a re na maanḓa u fhira vhoṱhe o vha ‘laedza uri vha huwelele kha vhathu na u ṱanziela nga vhuḓalo’ nga ha Kristo. (Mish. 10:42) Petro na Yohane, vhane vha vha vhaimeleli vha vhaapostola, vho vha na tshivhindi vha amba uri vha ḓo thetshelesa Mudzimu nṱhani ha vhenevho vhahaṱuli nahone vha amba uri a vha nga litshi u amba nga ha Kristo. Nga maṅwe maipfi, vho vha vha tshi khou ri: ‘Vhoiwe ni vhona u nga ni na maanḓa a fhiraho a Mudzimu?’

4. Samusi zwo sumbedzwa kha Mishumo 5:27-29, vhaapostola vho vhetshela Vhakriste vhoṱhe tsumbo ifhio nahone ri nga vha edzisa hani?

⁴ Vhaapostola vho vhea tsumbo yavhuḓi ye Vhakriste vhoṱhe vha ngoho vha i tevhela u bva tsheetsho. Vho vha vho ḓiimisela u “thetshelesa Mudzimu ane a vha muvhusi nṱhani ha vhathu.” (Vhalani Mishumo 5:27-29.) Na musi vhaapostola vho no rwiwa nga nṱhani ha u fhulufhedzea, vho bva henefho khothe khulwane ya Vhayuda “vho takala, ngauri Mudzimu o tenda vha tshi nyadziwa nga nṱhani ha dzina ḽa Yesu” nahone vho bvela phanḓa vha tshi huwelela.—Mish. 5:40-42.

5. Ndi mbudziso dzifhio dzine ra tea u dzi fhindula?

⁵ Tsumbo ye vhaapostola vha ri vhetshela yone i ita uri hu vhe na dziṅwe mbudziso. Sa tsumbo, vhaapostola vho vha vha tshi nga thetshelesa hani Mudzimu nṱhani ha vhathu vha dovha vha tevhedza mulayo u re Maṅwaloni une wa ri vha “ḓiṱukufhadze kha mivhuso”? (Vharoma 13:1) Samusi muapostola Paulo o amba, riṋe ṋamusi ri nga kona hani u ‘thetshelesa mivhuso na vhavhusi’ ra dovha ra dzula ri tshi fhulufhedzea kha Mudzimu ane a vha Muvhusi washu muhulwane?—Tito 3:1.

6. (a) “Mivhuso” yo ambiwaho kha Vharoma 13:1 i ambela kha vhafhio nahone ri tea u i fara hani? (b) Vhavhusi vha vhathu vha na vhuimo vhufhio?

⁶ Vhalani Vharoma 13:1. Kha heyi ndimana, ipfi “mivhuso” hu khou ambiwa mivhuso ya vhathu ine ya vha na maanḓa a u langa  vhaṅwe. Vhakriste vha tea u thetshelesa yeneyi mivhuso ya vhathu. Yeneyi mivhuso i ita uri hu vhe na mulalo, i ita uri vhathu vha tevhedze mulayo nahone nga zwiṅwe zwifhinga i ita na u tsireledza vhathu vha Yehova. (Nzumb. 12:16) Nga zwenezwo, ri tea u i fha mithelo, u i luvha, u i ofha na u i ṱhonifha. (Vharoma 13:7) Fhedzi Yehova o tou tendela mivhuso ya shango i tshi vha na maanḓa ane ya vha nao. Yesu o zwi vhea khagala musi a tshi khou sengiswa nga Pontio Pilato, Muvhusi wa Muroma. Musi Pilato a tshi vhudza Yesu uri o vha a tshi nga mu tshidza kana a mu vhulaya, Yesu o mu vhudza a ri: “Wo vha u tshi ḓo vha u si na maanḓa kha nṋe arali u vhe u songo tou a ṋewa a tshi bva ṱaḓulu.” (Yoh. 19:11) Maanḓa ane vhavhusi vhoṱhe vha vhathu na vhorapolitiki vha vha nao ṋamusi, a fana na e Pilato a vha e nao ngauri o vhetshelwa mikano.

7. Ndi lini hune ra tea u sa thetshelesa vhavhusi vha vhathu nahone ndi zwifhio zwine vhenevho vhavhusi vha tea u zwi humbula?

⁷ Vhakriste vha tea u tevhedza milayo ya mivhuso ya vhathu ine i si ite uri vha pfuke milayo ya Mudzimu. Fhedzi a ro ngo tea u thetshelesa vhavhusi vha vhathu arali vha tshi ri ri ite zwine Mudzimu a zwi hanela kana vha tshi ri dzivhisa u ita zwine Mudzimu a ri ri tea u zwi ita. Sa tsumbo, vha nga ṱoḓa uri vhaṱhannga vha ye vhuswoleni. * Kana vha thivhela Bivhili yashu kana khandiso dzashu dzo thewaho Bivhilini nahone vha ri dzivhisa u huwelela na u kuvhangana u itela vhurabeli. Musi vhavhusi vha tshi shumisa maanḓa avho luvhi nga u tovhola vhafunziwa vha Kristo, vha ḓo ḓifhindulela kha Mudzimu. Yehova u khou zwi vhona!—Muh. 5:8.

8. Phambano ndi ifhio vhukati ha u vha na “maanḓa” na u vha “Wa-Maanḓa-oṱhe” nahone ndi ngani zwi zwa ndeme u zwi ḓivha?

⁸ Mivhuso i nga vha na maanḓa, ya ita zwithu zwivhuya na u vhusa vhaṅwe vhathu. Fhedzi a zwi ambi uri a i khakhi kana i na maanḓa mahulwane. Hu na muthu a sa khakhi a re na maanḓa u fhira vhoṱhe. Onoyo ndi Yehova Mudzimu. Ndi luṋa Bivhilini hune Yehova Mudzimu a ṋewa dzina zwaḽo “Wa-Maanḓa-oṱhe.”—Dan. 7:18, 22, 25, 27.

9. Muporofita Daniele o vhona mini kha mabono?

⁹ Muporofita Daniele o vhona mabono ane a sumbedza uri Yehova u na maanḓa u fhira mivhuso yoṱhe. Daniele o thoma a vhona zwivhanda zwihulu zwiṋa zwine zwa fanyisela mivhuso i langaho shango ḽoṱhe ya tshifhingani tsho fhiraho na ya zwino, ine ya vha Babele, Meda na Peresia, Gerika, Roma na muvhuso u langaho shango ḽoṱhe zwino une wa vha Anglo-America. (Dan. 7:1-3, 17) Nga murahu ha zwenezwo, Daniele a vhona Yehova kha khuluṋoni ngei ṱaḓulu hu na tsengo. (Dan. 7:9, 10) Zwe onoyo muporofita a fhulufhedzeaho a zwi vhona nga murahu zwi tea u vha tsevho kha vhavhusi vha ṋamusi.

10. U ya nga Daniele 7:13, 14, 27, ndi vhafhio vhane Yehova a vha ṋea maanḓa a u vhusa ḽifhasi nahone zwenezwo zwi sumbedza mini nga ha Yehova?

¹⁰ Vhalani Daniele 7:13, 14, 27. Mudzimu u dzhiela mivhuso ya vhathu vhuhosi a vhu ṋea vho teaho na vha re na maanḓa mahulu. Ndi vhafhio vhenevho? Ndi Yesu Kristo, “ane a nga murwa muthu” na “vhakhethwa vha Wa-Maanḓa-oṱhe” vha 144 000 vhane vha ḓo vhusa “lini na lini.” (Dan. 7:18) Zwi tou pfala uri Yehova ndi ene “Wa-Maanḓa-oṱhe” ngauri ndi ene e eṱhe ane a nga dzhia vhukando ho raloho.

11. Ndi zwifhio zwiṅwe zwe Daniele a zwi ṅwala zwine zwa sumbedza uri Yehova u na maanḓa ane a fhira a dzitshaka?

 ¹¹ Tshiitea tshe Daniele a tshi vhona kha bono tshi khwaṱhisedza zwe a vhuya a zwi amba u thomani. O ri: “Mudzimu wa ṱaḓulu . . .  u bvisa na u vhea mahosi.” O dovha a ṅwala uri: “Wa-Ṱaḓulu-ṱaḓulu ndi Muvhusi wa mivhuso ya vhathu na uri u ṋea vhuhosi ane a funa.” (Dan. 2:19-21; 4:17) Naa Yehova o vhuya a bvisa mahosi kana a a vhea? Ee!

12. Ṋeani tsumbo dzi sumbedzaho uri Yehova o bvisa hani mahosi tshifhingani tsho fhiraho. (Sedzani tshifanyiso.)

¹² Yehova o zwi sumbedza uri u na maanḓa u fhira “mivhuso.” Kha ri ambe nga ha tsumbo tharu. Farao wa Egipita o ita vhathu vha Yehova dziphuli nahone a hana lunzhi-lunzhi u vha vhofholola. Fhedzi Yehova a vha vhofholola a vhulayela Farao Lwanzheni Lutswuku. (Ek. 14:26-28; Ps. 136:15) Khosi Beḽesatsara wa Babele o vhuya a ita tshimima a “ḓikukumusa phanḓa ha Murena wa ṱaḓulu” a “renda midzimu ya musuku na siḽiva” nṱhani ha Yehova. (Dan. 5:22, 23) Fhedzi Yehova a tsitsa onoyo munna ane a ḓihudza. Nga “honoho vhusiku” Beḽesatsara o mbo ḓi vhulawa nahone muvhuso wawe wa ṋewa Vhameda na Vhaperesia. (Dan. 5:28, 30, 31) Khosi Herode Agripa wa u thoma wa ngei Palestina o ita uri muapostola Yakobo a vhulawe na u valela muapostola Petro dzhele a tshi khou humbula uri na ene a mu vhulaye. Fhedzi Yehova a si tende Herode a tshi ita zwe a vha o zwi humbula. “Nga u ṱavhanya muruṅwa wa Yehova a ita uri a lwale,” nahone a fa.—Mish. 12:1-5, 21-23.

13. Ṋeani tsumbo ya uri Yehova o kunda hani vhavhusi vhe vha langana u lwa na Vhaisiraele.

¹³ Yehova o dovha a sumbedza uri ndi muhulwane kha vhavhusi vhoṱhe vhe vha langana u lwa na Vhaisiraele. O lwela Vhaisiraele a vha thusa uri vha fhelise mahosi oṱhe a Vhakanana a 31 na u kunda zwipiḓa zwihulwane zwa Shango ḽo Fhulufhedziswaho. (Yosh. 11:4-6, 20; 12:1, 7, 24) Yehova o dovha a thusa Vhaisiraele uri vha kunde Khosi Benihadada na maṅwe mahosi a 32 a Siria e a vha a tshi khou lwa na Vhaisiraele.—1 Dzikh. 20:1, 26-29.

14-15. (a) Khosi Nebukadanetsara na Dario vho ri mini nga ha vhuvhusahoṱhe ha Yehova? (b) Muphisalema o ri mini nga ha Yehova na lushaka lwawe?

¹⁴ Ndi lunzhi Yehova a tshi ḓisumbedza uri  ndi Wa-Maanḓa-oṱhe. Musi Khosi Nebukadanetsara wa Babele a tshi ḓihudza nga uri ‘u na nungo na maanḓa na u sumbedza vhugala na vhuhulu hawe,’ nṱhani ha u tenda uri Yehova ndi ene ane a fanelwa nga u khoḓiwa, Mudzimu o ita uri a penge. Musi Nebukadanetsara o no fhola, o “renda Wa-Ṱaḓulu-ṱaḓulu” nahone a tenda uri “muvhuso [wa Yehova] ndi wa tshoṱhe.” O dovha a ri: “A hu na ane a nga mu thivhela. (Dan. 4:30, 33-35) Musi u fhulufhedzea ha Daniele kha Mudzimu ho no lingiwa nahone Yehova o no mu tshidza dindini ḽa dzindau, Khosi Dario o vhea mulayo a ri: “Vhathu vha fanela u ofha na u ṱhonifha Mudzimu wa Daniele. Ngauri ndi Mudzimu a tshilaho, ane a dzula e hone lini na lini. Muvhuso wawe a u nga ḓo vhuya wa fheliswa na vhuvhusahoṱhe hawe ndi ha tshoṱhe.”—Dan. 6:7-10, 19-22, 26, 27, ṱms.

¹⁵ Muphisalema o ri: “Yehova o kanganyisa vhukwila ha dzitshaka; O thithisa maano a vhathu.” O dovha a ri: “Hu takala lushaka lune Mudzimu walwo a vha Yehova, vhathu vhe a vha nanga uri vha vhe vhawe.” (Ps. 33:10, 12) Ri na tshiitisi tshavhuḓi tsha u dzula ri tshi fhulufhedzea kha Yehova.

16. Ri nga vha na vhungoho ha mini nga ha “maṱungu mahulu” nahone ndi ngani? (Sedzani tshifanyiso.)

¹⁶ Ro vhala nga ha zwe Yehova a zwi ita tshifhingani tsho fhiraho. Ri nga lavhelela uri hu ḓo itea mini hu si kale? Ri nga fhulufhela uri Yehova u ḓo lamulela vhashumeli vhawe vha fhulufhedzeaho nga tshifhinga tsha “maṱungu mahulu.” (Mat. 24:21; Dan. 12:1) U ḓo zwi ita musi tshaka dzo langanaho dzi vhidzwaho Gogo wa Magogo dzi tshi ṱhasela vha fhulufhedzeaho kha Yehova vha re kha ḽifhasi ḽoṱhe. Naho dzenedzo tshaka dzi tshi katela miraḓo yoṱhe ya United Nations ya 193, dzi nga si kone u lwa na Wa-Maanḓa-oṱhe na mmbi yawe ya ṱaḓulu. Yehova u ri: “Ndi ḓo ḓihulisa nda ita uri ndi vhe mukhethwa na u ita uri ndi ḓivhiwe nga tshaka nnzhi; uri dzi kone u ḓivha uri ndi nṋe Yehova.”—Hesek. 38:14-16, 23; Ps. 46:10.

17. Bivhili i ri hu ḓo itea mini tshifhingani tshi ḓaho kha mahosi a ḽifhasi na kha vhane vha fhulufhedzea kha Yehova?

 ¹⁷ U ṱhasela ha Gogo hu ḓo ita uri hu vhe na nndwa ya Haramagedo musi Yehova a tshi fhelisa “mahosi a ḽifhasi ḽoṱhe.” (Nzumb. 16:14, 16; 19:19-21) “Ndi vho lugaho fhedzi vhane vha ḓo dzula kha ḽifhasi, vha fhulufhedzeaho ndi vhone vhane vha ḓo sala khaḽo.”—Mir. 2:21, ṱms.

18. Vhakriste vhanzhi vha ngoho vho ḓiimisela u ita mini nahone ndi ngani? (Daniele 3:28)

¹⁸ U bva kale, Vhakriste vhanzhi vha ngoho vho vhea mbofholowo yavho na vhutshilo havho khomboni nga nṱhani ha u funa Yehova sa Muvhusi wavho wa Fhethu Hoṱhe. Vhenevho Vhakriste vho ḓiimisela u dzula vha tshi fhulufhedzea kha Yehova. Vha fana na Vhahevheru vhararu vhe vha dzula vha tshi fhulufhedzea kha Wa-Maanḓa-oṱhe, we nga tshenetsho tshifhinga a vha tshidza ṋanḓoni ya mulilo.—Vhalani Daniele 3:28.

19. Yehova u ḓo haṱula vhathu vhawe o sedza mini nahone ri tea u ita mini zwino?

¹⁹ Muphisalema Davida o amba uri ndi zwa ndeme u dzula ri tshi fhulufhedzea kha Mudzimu. O ri: “Yehova u ḓo haṱula vhathu. Iwe Yehova, nkhaṱhule u ya nga u luga hanga na u ya nga u fhulufhedzea hanga.” (Ps. 7:8) Davida o dovha a ri: “Ngavhe u fhulufhedzea na u luga zwi tshi ntsireledza.” (Ps. 25:21) Nḓila yavhuḓi ya u tshila ndi u dzula ri tshi fhulufhedzea kha Yehova naho hu tshi nga itea mini vhutshiloni hashu. Ndi hone ri tshi ḓo ḓipfa nga nḓila ye muphisalema a ḓipfa ngayo musi a tshi ri: “Hu takala vhane vha fhulufhedzea, vhane vha tshimbila nga mulayo wa Yehova.”—Ps. 119:1, ṱms.