1. Ndi mini zwine muruṅwa a khou zwi amba nahone zwi amba mini kha riṋe?

 ARALI muruṅwa o vha a tshi nga amba na inwi, naa no vha ni tshi ḓo mu thetshelesa? Ṋamusi muruṅwa u khou amba na vhathu vha “tshaka dzoṱhe, ndimi dzoṱhe na vhathu vhoṱhe.” Ndi mulaedza ufhio une a vha nawo? U ri: ‘Ofhani Mudzimu ni mu ṋee vhugala, rabelani We a sika ḽiṱaḓulu na ḽifhasi.’ (Nzumb. 14:6, 7) Yehova ndi ene Mudzimu wa ngoho e eṱhe ane vhathu vhoṱhe vha tea u mu gwadamela. Ri livhuwa lungafhani uri o ri ṋea tshibuli tshavhuḓi tsha u mu gwadamela thembeleni yawe ya pfanyisedzo.

2. Thembele ya Yehova ya pfanyisedzo ndi mini? (Sedzani bogisi ḽine ḽa ri “ Zwine Thembele Ya Pfanyisedzo Ya Si Vhe Zwone.”)

² Thembele ya pfanyisedzo ndi mini nahone ndi ngafhi hune ra nga wana zwidodombedzwa zwine zwa i ṱalusa? Yeneyi thembele ya pfanyisedzo a si tshifhaṱo tsha vhukuma tshine ra nga kona u tshi vhona nga maṱo. Ndi ndugiselo ya Yehova ya u mu gwadamela nga nḓila ine a i ṱanganedza yo thewaho kha tshiṱhavhelo tsha Murwa wawe Yesu Kristo. Muapostola Paulo u ṱalutshedza yeneyi ndugiselo kha vhurifhi he a vhu ṅwalela Vhakriste vha Vhahevheru vha ngei Yudea. b

3-4. Ndi mini zwe zwa vha zwi tshi khou vhilaedzisa Paulo nga ha Vhakriste vha Vhahevheru vha ngei Yudea nahone o vha thusa hani?

³ Ndi ngani Paulo o ṅwalela Vhakriste vha Vhahevheru vha ngei Yudea vhurifhi? A nga vha o vha e na zwiitisi zwivhili. Tsha u thoma, o vha a tshi khou ṱoḓa u vha ṱuṱuwedza. U thomani vhunzhi havho vho vha vha tshi tevhela vhurabeli ha Tshiyuda vha sa athu u vha Vhakriste. Musi vha tshi vha Vhakriste, vharangaphanḓa vha  vhurabeli havho ha kale vha nga vha vho vha vha tshi vha goḓa. Ndi ngani? Ndi ngauri Vhakriste vho vha vhe si na thembele ine vha nga ya khayo u gwadamela Yehova, vho vha vhe si na aḽeṱare ine vha nga ṋekedza khayo zwiṱhavhelo nahone vho vha vhe si na vhotshifhe vha u vha thusa. Zwenezwo zwi nga vha zwo kula vhafunziwa vha Yesu Kristo nungo na u ita uri lutendo lwavho lu fhungudzee. (Vhahev. 2:1; 3:12, 14) Vhaṅwe vhavho vha nga vha vho lingea na u humela murahu kha vhurabeli ha Tshiyuda.

⁴ Tsha vhuvhili, Paulo o vhudza vhenevho Vhakriste uri vho vha vha sa khou ita vhuḓidini ha u pfesesa zwithu zwiswa kana ngoho yo dzikaho yo dzumbamaho ine ya vha “zwiḽiwa zwo dziaho,” i re Ipfini ḽa Mudzimu. (Vhahev. 5:11-14) Zwi vhonala uri vhaṅwe vhavho vho vha vha tshi kha ḓi tevhedza Mulayo wa Mushe. Paulo o ṱalutshedza uri zwiṱhavhelo zwine zwa ṋekedzwa u ya nga wonoyo Mulayo zwo vha zwi sa koni u phumula tshivhi nga ho fhelelaho. Nga nṱhani ha zwenezwo, wonoyo Mulayo wo “fheliswa.” Paulo o bvela phanḓa a tshi vha funza ngoho yo dzikaho. O vhudza vhatendi ngae uri Mudzimu o vha “fhulufhedzisa zwa khwine” zwo thewaho kha tshiṱhavhelo tsha Yesu zwine zwa ḓo vha “sendedza tsini nae.”​—Vhahev. 7:18, 19.

5. Ndi mini zwi re kha bugu ya Vhahevheru zwine ra tea u zwi pfesesa nahone ndi ngani?

⁵ Paulo o ṱalutshedza vhahawe vha Vhakriste vha Vhahevheru uri ndi ngani vhurabeli ha Tshikriste vhu khwiṋe u fhira vhurabeli ha Tshiyuda he vha vha vhe khaho u thomani. Nḓila ya vhurabeli ha Tshiyuda yo vha i tshi tou vha “murunzi wa zwi ḓaho, fhedzi a itaho wonoyo murunzi ndi Kristo.” (Vhakol. 2:17) Murunzi u tou sumbedza fhedzi nḓila ine tshithu tshine tsha khou ita wonoyo murunzi tsha vha ngayo, fhedzi u vha u si tshenetsho tshithu zwa vhukuma. Nga hu fanaho, nḓila ye Vhayuda vha vha vha tshi gwadamela ngayo Mudzimu tshifhingani tsho fhiraho yo vha i tshi tou vha murunzi wa vhurabeli ha khwiṋe vhu ḓaho. U itela uri ri kone u gwadamela Yehova nga nḓila ine a i ṱanganedza, ndi zwa ndeme uri ri pfesese ndugiselelo ya thembele ya pfanyisedzo ye a i ita, ine ya ita uri ri hangwelwe zwivhi zwashu. Kha ri vhambedze “murunzi” (vhurabeli ha kale ha Tshiyuda) na “a itaho wonoyo murunzi” (vhurabeli ha Tshikriste) samusi zwo ṱalutshedziwa kha Vhahevheru. Musi ri tshi ita nga u ralo, ri ḓo kona u pfesesa thembele ya pfanyisedzo na uri riṋe i ri kwama hani.

6. Dennde ḽikhethwa ḽo vha ḽi tshi shumiselwa mini?

⁶ Vhurabeli ha kale ha Tshiyuda. Paulo o vha  o thea mafhungo e a amba kha dennde ḽikhethwa ḽe ḽa itiwa nga Mushe nga 1512 B.C.E. (Sedzani tshati “Vhurabeli Ha Kale Ha Tshiyuda—Vhurabeli Ha Tshikriste.”) U thomani ḽeneḽi dennde ḽikhethwa Vhaisiraele vho vha vha tshi ḽi hwala vha ya naḽo huṅwe na huṅwe hune vha pfulutshela hone. Vho ḽi shumisa lwa miṅwaha i ṱoḓaho u vha 500 u vhuya u swika hu tshi fhaṱiwa thembele ngei Yerusalema. (Ek. 25:8, 9; Num. 9:22) Vhaisiraele vho vha vha tshi ya kha Yehova kha ḽeneḽo “dennde ḽa muṱangano,” u ṋekedza zwiṱhavhelo na u mu gwadamela khaḽo. (Ek. 29:43-46) Naho zwo ralo, ḽeneḽo dennde ḽikhethwa ḽo vha ḽi tshi imela zwithu zwihulwane zwe zwa vha zwi tshi ḓo vha hone tshifhingani tsha Vhakriste.

7. Thembele ya pfanyisedzo yo vha hone lini?

⁷ Vhurabeli ha Tshikriste. Dennde ḽikhethwa ḽa kale ḽo vha ḽi tshi “imela zwithu zwa ṱaḓulu,” ḽo vha ḽi tshi imela thembele ya Yehova khulwane ya pfanyisedzo. Paulo o amba uri: “Ḽeneḽi dennde ḽi fanyisela tshenetshi tshifhinga.” (Vhahev. 8:5; 9:9) Nga zwenezwo, musi a tshi ṅwala vhurifhi vhu yaho kha Vhahevheru, thembele ya pfanyisedzo yo vha yo no vha hone. Yo vha hone nga 29 C.E. Wonoyo ndi ṅwaha we Yesu a lovhedzwa ngawo, a ḓodzwa nga muya mukhethwa na u thoma u shuma sa “tshifhe muhulu” wa Yehova thembeleni ya pfanyisedzo. c​—Vhahev. 4:14; Mish. 10:37, 38.

8-9. U ya nga Vhahevheru 7:23-27, ndi ifhio phambano ine ya vha hone vhukati ha vhotshifhe vhahulu vha Isiraele na Tshifhe Muhulu Yesu Kristo?

⁸ Vhurabeli ha kale ha Tshiyuda. Tshifhe muhulu o vha a tshi imela vhathu phanḓa ha Mudzimu. Aroni o vha ene tshifhe muhulu wa u thoma kha Vhaisiraele nahone o vhewa nga Yehova musi hu tshi ṋekedzwa dennde ḽikhethwa. Naho zwo ralo, Paulo o ṱalutshedza uri: “Vhotshifhe a vho ngo kona u bvela phanḓa na mushumo wavho ngauri vho vha vha tshi fa, ndi ngazwo vho dzhielwa vhudzulo nga vhaṅwe uri mushumo u bvele phanḓa.” d (Vhalani Vhahevheru 7:23-27.) Nahone ngauri vhenevho vhanna vhe vha vha vha tshi vha vhotshifhe vhahulu vho vha vhe na tshivhi, vho vha vha tshi tea u ṋekedza zwiṱhavhelo vha tshi itela zwivhi zwavho. Ndi henefho hune tshifhe muhulu wa Isiraele a fhambana hone na Tshifhe Muhulu Yesu Kristo.

⁹ Vhurabeli ha Tshikriste. Ngauri Yesu Kristo ndi Tshifhe Muhulu washu, u “mushumeli wa . . . denndeni ḽa ngoho, ḽe ḽa athwa nga Yehova, hu si nga muthu.” (Vhahev. 8:1, 2) Paulo o ṱalutshedza uri “a hu na ane a nga dzhiela Yesu vhudzulo sa tshifhe ngauri u tshila nga hu sa fheli.” O dovha a ṱalutshedza uri Yesu ha ngo ‘tshikafhadzwa nahone ha fani na vhaitazwivhi’ na uri ha fani na vhaṅwe vhotshifhe vhahulu “ngauri a zwi ṱoḓei uri a ṋekedze zwiṱhavhelo ḓuvha ḽiṅwe na ḽiṅwe” a tshi itela zwivhi zwawe. Zwino ṱhogomelani uri aḽeṱare na zwiṱhavhelo zwe zwa vha zwi tshi ṋekedzwa khayo kha ḽa Isiraele ḽa kale zwo fhambana hani na nḓila ine Vhakriste vha zwi ita ngayo ṋamusi.

10. Zwiṱhavhelo zwe zwa vha zwi tshi itwa kha aḽeṱare ya koporo zwo vha zwi tshi imela mini?

¹⁰ Vhurabeli ha kale ha Tshiyuda. Nga nnḓa ha dennde ḽikhethwa ho vha hu na aḽeṱare ya koporo ye ha vha hu tshi itwa zwiṱhavhelo khayo, zwe zwa vha zwi tshi khou ṋekedzwa Yehova. (Ek. 27:1, 2; 40:29) Naho zwo ralo, zwenezwo zwiṱhavhelo zwo vha zwi sa koni u ita uri vhathu vha hangwelwe zwivhi zwavho lwa tshoṱhe. (Vhahev. 10:1-4) U ṋekedzwa ha zwiṱhavhelo denndeni ḽikhethwa tshifhinga tshoṱhe, zwo vha zwi tshi imela tshiṱhavhelo tshe tsha vha tshi tshi  ḓo ita uri vhathu vha hangwelwe zwivhi zwavho lwa tshoṱhe.

11. Yesu o ḓiṋekedza sa tshiṱhavhelo kha aḽeṱare ifhio? (Vhahevheru 10:5-7, 10)

¹¹ Vhurabeli ha Tshikriste. Yesu o vha a tshi zwi ḓivha uri Yehova o mu ruma uri a ḓe kha ḽifhasi a ṋekedze vhutshilo hawe sa tshiṱhavhelo, a tshi itela vhathu vhoṱhe. (Mat. 20:28) Nga zwenezwo, musi Yesu a tshi lovhedzwa, o ḓiimisela u ita zwoṱhe zwine Yehova a zwi funa. (Yoh. 6:38; Vhagal. 1:4) Aḽeṱare ye Yesu a ḓiṋekedza khayo yo vha i si aḽeṱare yo itiwaho nga vhathu, fhedzi yo vha i tshi imela zwine Mudzimu a zwi “funa.” Yesu o ṋekedza vhutshilo hawe “luthihi nahone lwa tshoṱhe” u itela u phumula zwivhi zwa vhathu vhoṱhe vhane vha vha na lutendo kha Kristo lwa tshoṱhe. (Vhalani Vhahevheru 10:5-7, 10.) Zwazwino kha ri haseledze nga ha zwe zwa vha zwi nga ngomu ha dennde ḽikhethwa.

12. Ndi vhonnyi vhe vha vha vho tendelwa u dzhena Fhethu Hukhethwa na Fhethu Hukhethwa-khethwa denndeni ḽikhethwa?

¹² Vhurabeli ha kale ha Tshiyuda. Dennde ḽikhethwa na thembele dze dza fhaṱiwa Yerusalema dzo vha dzi na zwithu zwi fanaho nga ngomu. Ho vha hu na kamara mbili, “Fhethu Hukhethwa” na “Fhethu Hukhethwa-khethwa” nahone dzenedzo kamara dzo vha dzo fhandekanywa nga labi. (Vhahev. 9:2-5; Ek. 26:31-33) Fhethu Hukhethwa ho vha hu na tshiṱomambone tsha musuku, aḽeṱare ya u fhisa zwioro na ṱafula i re na vhurotho ho ṱaniwaho. Ndi “vhotshifhe vho ḓodzwaho” fhedzi vhe vha vha vha tshi tendelwa u dzhena Fhethu Hukhethwa uri vha ite mushumo wavho. (Num. 3:3, 7, 10) Fhethu Hukhethwa-khethwa ho vha hu na mbulungelo ya  mulanga yo itwaho nga musuku ye ya vha i tshi imela u vha hone ha Yehova. (Ek. 25:21, 22) Tshifhe muhulu ndi ene e eṱhe we a vha o tendelwa u dzhena Fhethu Hukhethwa-khethwa luthihi nga ṅwaha nga Ḓuvha Ḽa U Pfumelelwa. (Lev. 16:2, 17) Ṅwaha muṅwe na muṅwe, o vha a tshi dzhena o fara malofha a zwifuwo u itela u pfumelela zwivhi zwawe na zwivhi zwa lushaka lwoṱhe. Nga u ya ha tshifhinga, Yehova o shumisa muya wawe mukhethwa u bvisela khagala uri zwenezwi zwithu zwe zwa vha zwi denndeni ḽikhethwa zwo vha zwi tshi khou imela mini.​—Vhahev. 9:6-8. e

13. Fhethu Hukhethwa na Fhethu Hukhethwa-khethwa denndeni ḽikhethwa hu imela mini kha Vhakriste?

¹³ Vhurabeli ha Tshikriste. Hu na tshivhalo tshiṱuku tsha vhatevheli vha Kristo vho ḓodziwaho nga muya mukhethwa vha re na vhushaka ho khetheaho na Yehova. Vhenevho vhathu vha 144 000 vha ḓo vha vhotshifhe na Yesu ngei ṱaḓulu. (Nzumb. 1:6; 14:1) Fhethu Hukhethwa kha dennde ḽikhethwa hu imela vhuimo vhune vhaḓodzwa vha vha naho sa vhana vha Mudzimu musi vha tshi kha ḓi vha kha ḽifhasi. (Vharoma 8:15-17) Fhethu Hukhethwa-khethwa kha dennde ḽikhethwa hu imela ṱaḓulu hune Yehova a vha hone. “Labi” ḽe ḽa vha ḽi tshi fhandekanya Fhethu Hukhethwa na Fhethu Hukhethwa-khethwa ḽi imela muvhili wa Yesu wa ṋama. Yesu o vha a sa ḓo kona u ya ṱaḓulu a vha Tshifhe Muhulu kha thembele ya pfanyisedzo e na muvhili wa ṋama. Musi a tshi ṋekedza muvhili wawe sa tshiṱhavhelo, o ita uri vhaḓodzwa vhoṱhe vha kone u ya u tshila ṱaḓulu. Vhaḓodzwa na vhone vha ḓo tea u sia mivhili yavho ya ṋama uri vha kone u wana malamba avho ngei ṱaḓulu. (Vhahev. 10:19, 20; 1 Vhakor. 15:50) Musi Yesu a tshi vuswa, o dzhena Fhethu Hukhethwa-khethwa thembeleni ya pfanyisedzo nahone mafheleloni vhaḓodzwa vhoṱhe vha ḓo vha nae henefho.

14. U ya nga Vhahevheru 9:12, 24-26, ndi mini zwine zwa ita uri ndugiselo ya u gwadamela Yehova thembeleni yawe ya pfanyisedzo i vhe ya nṱha?

¹⁴ Ri kona u vhona uri ndugiselo ya Yehova ya uri ri mu gwadamele kha vhurabeli ho kunaho, ho thewaho kha tshiṱhavhelo na vhune Kristo a vha Tshifhe Muhulu ndi ya nṱha vhukuma. Tshifhe muhulu kha ḽa Isiraele o vha a tshi dzhena Fhethu Hukhethwa-khethwa e na malofha a zwiṱhavhelo zwa zwifuwo, fhedzi Yesu o dzhena “ṱaḓulu” hune ha vha fhethu hukhethwa u fhira hoṱhe nahone a ḓivhonadza phanḓa ha Yehova. O ṋekedza vhutshilo hawe ho fhelelaho a tshi itela riṋe “uri a fhelise tshivhi nga u vha tshiṱhavhelo ene muṋe.” (Vhalani Vhahevheru 9:12, 24-26.) Tshiṱhavhelo tsha Yesu ndi tshone tshine tsha ita uri ri hangwelwe zwivhi lwa tshoṱhe. Samusi ri tshi ḓo zwi vhona, roṱhe ri nga gwadamela Yehova thembeleni yawe ya pfanyisedzo hu sa londwi uri ri na fhulufhelo ḽa u tshila ṱaḓulu kana kha ḽifhasi.

15. Ndi vhonnyi vhe vha vha vha tshi shuma muṱani wa dennde ḽikhethwa?

¹⁵ Vhurabeli ha kale ha Tshiyuda. Dennde ḽikhethwa ḽo vha ḽi na muṱa muthihi. Wo vha u muhulu nahone u na luhura u mona nawo. Vhotshifhe vho vha vha tshi kona u ita mishumo yavho henefho. Wonoyo muṱa wo vha u na aḽeṱare khulwane ya koporo ya tshifhiwa tsha u fhiswa na sambelo ḽa koporo ḽi re na maḓi e vhotshifhe vha vha vha tshi ṱamba ngao vha sa athu ita mishumo yavho mikhethwa. (Ek. 30:17-20; 40:6-8) Thembele dze dza fhaṱwa nga murahu dzo vha dzi na muṅwe muṱa we vhathu vhane vha si vhe vhotshifhe vha vha vha tshi ya khawo na u gwadamela Yehova hone.

16. Ndi vhonnyi vhane vha shuma muṱani wa nga ngomu na muṱani wa nnḓa thembeleni ya pfanyisedzo?

¹⁶ Vhurabeli ha Tshikriste. Musi vhaḓodzwa vha sa athu ya ṱaḓulu u shuma sa vhotshifhe na Yesu Kristo, vha tea u thoma vha shuma nga u  fhulufhedzea fhano kha ḽifhasi kha muṱa wa nga ngomu thembeleni ya pfanyisedzo. Sambelo ḽihulu ḽa maḓi ḽe ḽa vha ḽi hone denndeni ḽikhethwa na thembeleni dza kale ḽi humbudza vhaḓodzwa na Vhakriste vhoṱhe zwithu zwa ndeme, zwa uri ri tea u dzula ri na vhuḓifari ho kunaho na u gwadamela Yehova nga nḓila ine a i ṱanganedza. Vha “gogo ḽihulu” vhane vha tikedza vhaḓodzwa nga u fhulufhedzea vha gwadamela Yehova vhe ngafhi? Muapostola Yohane o vha vhona vho ima ‘phanḓa ha khuluṋoni vha tshi khou shumela Mudzimu masiari na vhusiku thembeleni yawe.’ Vha ita zwenezwi vhe fhano kha ḽifhasi kha muṱa wa nga nnḓa wa thembele ya pfanyisedzo. (Nzumb. 7:9, 13-15) Ri livhuwa lungafhani uri Yehova o ri ṋea tshibuli tsha u mu gwadamela thembeleni yawe ya pfanyisedzo.

17. Ri na ndugelo ya u ṋekedza Yehova zwiṱhavhelo zwifhio?

¹⁷ Ṋamusi Vhakriste vhoṱhe vha na ndugelo ya u ṋea Yehova tshiṱhavhelo vha tshi shumisa tshifhinga, nungo na zwine vha vha nazwo u itela u mu shumela. Samusi muapostola Paulo o zwi vhudza Vhakriste vha Vhahevheru, na riṋe ri nga ‘renda Mudzimu nga u mu ṋekedza tshiṱhavhelo ri tshi shumisa milomo yashu u ḓivhadza vhathu dzina ḽawe.’ (Vhahev. 13:15) Ri nga sumbedza u livhuwa ndugelo ine ra vha nayo ya u gwadamela Yehova nga u ita zwoṱhe zwine ra nga kona u mu shumela.

18. U ya nga Vhahevheru 10:22-25, ndi mini zwine ra fanela u dzula ri tshi zwi ita nahone ndi mini zwine a ro ngo fanela u zwi hangwa?

¹⁸ Vhalani Vhahevheru 10:22-25. Mafheloni a vhurifhi he Paulo a vhu ṅwalela Vhahevheru o amba nga ha zwithu zwine ra fanela u dzula ri tshi zwi ita musi ri tshi gwadamela Yehova. O amba uri ri tea u dzula ri tshi rabela, ri tshi huwelela, ri tshi kuvhangana sa tshivhidzo na u ṱuṱuwedzana ‘zwihuluhulu samusi ri tshi vhona uri ḓuvha ḽi khou sendela.’ Mafheloni a bugu ya Nzumbululo, muruṅwa wa Yehova o ri: “Rabela Mudzimu.” O amba enea maipfi luvhili u sumbedza nḓila ine zwa vha zwa ndeme ngayo. (Nzumb. 19:10; 22:9) Kha ri dzule ri tshi humbula zwithu zwo dzikaho zwe ra zwi guda nga ha thembele khulwane ya Yehova ya pfanyisedzo na u dzula ri tshi dzhiela nṱha ndugelo ine ra vha nayo ya u gwadamela Mudzimu washu muhulu.