Mbudziso Dzi Bvaho Kha Vhavhali
Naa Vhaisiraele vho vha vhe na zwiṅwe zwiḽiwa zwa u ḽa musi vhe sogani nga nnḓa ha mana na khwali?
Kanzhi Vhaisiraele vho vha vha tshi ḽa mana kha miṅwaha ya 40 ye vha i fhedza vhe sogani. (Ek. 16:35) Kha zwiṅwe zwiitea zwivhili, Yehova o vha ṋea khwali. (Ek. 16:12, 13; Num. 11:31) Naho zwo ralo, Vhaisiraele vho vha vha tshi dovha hafhu vha vha na zwiṅwe zwiḽiwa zwe vha vha vha tshi zwi ḽa.
Sa tsumbo, nga tshiṅwe tshifhinga Yehova o ita uri vhathu vhawe vha wane fhethu “hune vha ḓo awela hone” he ha vha hu na maḓi a u nwa na zwiḽiwa. (Num. 10:33) Huṅwe ha henefho fhethu ho vha hu Elima, he ha vha hu na “zwisima zwa maḓi zwa 12 na miri ya mitshevho ya 70.” Zwi vhonala u nga yeneyi miri ya mitshevho yo vha i tshi dovha hafhu ya vha na mitshelo. (Ek. 15:27) Bugu ine ya pfi Plants of the Bible i amba uri muri wa mutshevho ndi wone une wa wanala fhethu hunzhi, ndi wone une wa shumiselwa zwiḽiwa zwinzhi sogani. U shumiselwa u wana zwiḽiwa, mapfura na vhudzulo ha vhathu vha dzimiḽioni.
Vhaisiraele vha nga vha vho ima fhethu hu re na maḓi hune namusi ha ḓivhiwa sa Govha ḽa Feiran. a Bugu ine ya pfi Discovering the World of the Bible i amba uri ḽeneḽi govha “ḽo lapfa khilomithara dza 130 nahone ndi ḽiṅwe ḽa magovha o lapfesaho, o nakesaho na ane a ḓivhea kha ḽa Sinai.” Yeneyo bugu yo dovha ya amba uri arali muthu a fara lwendo lwa khilomithara dza 45 u bva fhethu hune mulambo wa ḽeneḽo govha wa dzhena lwanzheni u ḓo swika fhethu hune ha vhidzwa Feiran. Henefha fhethu hu nṱha nga mithara dza 610 nṱha ha hune maḓi a lwanzhe a guma hone. Nahone ho lapfa khilomithara dza 4.8. Ho ḓala miri ya mitshevho nahone ho naka lune ha fanyiswa na tsimu ya Edeni. Vhathu vho ḓa henefho lwa miṅwaha ya zwigidi vha tshi kungwa nga miri minzhi-minzhi ya mitshevho.
Mitshelo ya miri ya mitshevho ya ngei Feiran
Musi Vhaisiraele vha tshi bva Egipita, vho vha vhe na fuḽauru na zwigoḓelo zwa u sukela fuḽauru, khamusi vha nga vha vho vha vha tshi dovha vha vha na thoro na mapfura. Zwi tou pfala uri zwenezwi zwithu a zwo ngo fhedza tshifhinga tshilapfu. Vho vha vha tshi dovha hafhu vha vha na “nngu, kholomo, zwo vha zwi zwifuwo zwinzhi vhukuma.” (Ek. 12:34-39) Vhunzhi ha zwifuwo zwe vha vha vhe nazwo, zwi nga vha zwo fa nga nṱhani ha zwiimo zwi si zwavhuḓi zwa sogani. Zwiṅwe zwazwo vha nga vha vho tou zwi ḽa ngeno zwiṅwe vha nga vha vho zwi ṋekedza sa zwiṱhavhelo khamusi kha midzimu ya zwifanyiso. b (Mish. 7:39-43) Vhaisiraele vho vha vhe na nngu na kholomo, zwenezwi ri zwi vhona kha zwe Yehova a zwi vhudza vhathu vhawe musi vha sa mu thetshelesi. O ri “Vhana vhaṋu vha ḓo vha vhalisa sogani miṅwaha ya 40.” (Num. 14:33) Khamusi zwifuwo zwavho zwo vha zwi tshi vha thusa nga mafhi na nga ṋama nga tshiṅwe tshifhinga, fhedzi yo vha i sa lingani vhathu vhoṱhe vha ṱoḓaho u vha 3 miḽioni lwa miṅwaha ya 40. c
Zwifuwo zwavho zwo vha zwi tshi wana ngafhi zwiḽiwa na maḓi a u nwa? d Nga tshenetshiḽa tshifhinga, mvula i nga vha yo vha i tshi nesa u fhira zwino nahone hu nga ho vha hu na zwimela zwinzhi sogani. Insight on the Scriptures Voḽumu 1 i amba uri miṅwaha ya 3 500 yo fhiraho, “ho vha hu na maḓi manzhi Arabia he Vhaisiraele vha vha vhe hone ane a fhira ane a vha hone zwino. Zwenezwi ri zwi ḓivha nga nṱhani ha uri hu na magovha manzhi o tsaho namusi e avha hone nga nṱhani ha milambo ye ya vha i henefho.” Naho zwo ralo, sogani ho vha hu fhethu hu sa dzulei nahone ho vha hu tshi ofhisa. (Dot. 8:14-16) Vhaisiraele na zwifuwo zwe vha vha vhe nazwo, vho vha vha tshi ḓo vha vho fela sogani arali Yehova o vha a songo vha ṋea maḓi nga lwa vhuṱolo.—Ek. 15:22-25; 17:1-6; Num. 20:2, 11.
Mushe o vhudza Vhaisiraele uri Yehova o vha ṋea mana uri vha “ḓivhe uri muthu ha tshili nga zwiḽiwa fhedzi, u tshila na nga maipfi oṱhe a bvaho mulomoni wa Yehova.”—Dot. 8:3.
a Vhalani Tshiingamo tsha Tshiisimane tsha ḽa 1 May 1992, masiaṱ. 24-25.
b Bivhili i amba nga ha zwiitea zwivhili he zwifuwo zwa ṋekedzwa Yehova sa tshiṱhavhelo sogani. Tshiitea tsha u thoma ndi musi hu tshi khou vhewa vhotshifhe nahone tshiitea tsha vhuvhili ndi nga tshifhinga tsha Paseka. Zwenezwi zwiitea zwo itea nga 1512 B,C.E., ho no fhela ṅwaha Vhaisiraele vho bva Egipita.—Lev. 8:14–9:24; Num. 9:1-5.
c Musi miṅwaha ya 40 i tsini na u fhela, Vhaisiraele vho thuba zwifuwo zwa zwigidi. (Num. 31:32-34) Naho zwo ralo, vho bvela phanḓa vha tshi ḽa mana u vhuya u swika musi vha tshi dzhena Shangoni Ḽo Fhulufhedziswaho.—Yosh. 5:10-12.
d A hu na zwine zwa sumbedza uri zwifuwo zwo vha zwi tshi ḽa mana, samusi muṅwe na muṅwe o vha a tshi fanela u kuvhanganya zwine a nga kona u zwi ḽa a zwi fhedza.—Ek. 16:15, 16.
