THERO I GUDWAHO 43
LUIMBO 90 Ṱuṱuwedzanani
Ni Nga Thuswa Nga Mini Uri Ni Si Tsha Timatima?
“Ṱolisisani zwithu zwoṱhe.”—1 VHATHES. 5:21.
ZWINE RA ḒO ZWI GUDA
Ri ḓo amba nga ha u timatima hune ha nga kwama nḓila ine ra nga shumela ngayo Yehova.
1-2. (a) Vhashumeli vha Yehova vha nga ḓivhudzisa mbudziso dzifhio? (b) Ri ḓo amba nga ha mini kha ino thero?
ROṰHE ri a timatima a nga zwiṅwe zwifhinga, hu sa londwi miṅwaha yashu. Sa tsumbo, muhuweleli ane a kha ḓi vha muswa a nga ḓivhudzisa arali Yehova e na ndavha nae. Zwenezwi zwi nga ita uri a timatime arali a tshi tea u lovhedzwa. Kana humbulani nga ha wahashu we a dzhia phetho ya u ita uri u shumela Yehova zwi ḓe u thoma vhutshiloni hawe nṱhani ha u ḓiitela tshelede nnzhi-nnzhi. Musi o no aluwa, u ḓiwana e na tshelede yo linganaho fhedzi u ṱunḓela muṱa wawe. A nga kha ḓi ḓivhudzisa arali phetho ye a i dzhia a tshi kha ḓi vha muṱuku yo vha i yavhuḓi. Ni nga humbula na nga wahashu wa tshifumakadzini o no vhaho mulala ane a si tsha vha na nungo nnzhi. A nga ḓipfa o kulea nungo ngauri ha tsha kona u ita zwinzhi tshumeloni ya Yehova u fana na kale. Naa no no vhuya na ḓivhudzisa idzi mbudziso: ‘Naa Yehova u na ndavha na nṋe? Naa phetho ye nda i dzhia ya u ḓidzima zwiṅwe zwithu ndi tshi itela Yehova, yo vha i yavhuḓi? Naa hu na zwine nda nga kha ḓi zwi ita tshumeloni ya Yehova?’
2 Arali ra sa lingedza u wana phindulo dza dzenedzi mbudziso, zwi nga ita uri ri si tsha vha na lutendo kha Yehova na uri ri litshe u mu gwadamela. Kha ino thero, ri ḓo amba nga ha nḓila ine vhulivhisi ha Bivhili ha nga ri thusa ngayo arali ri tshi timatima uri (1) Yehova u na ndavha na riṋe, (2) phetho dze ra dzi dzhia dzo vha dzi dza vhuṱali, kana (3) hu na zwiṅwe zwine ra nga kha ḓi zwi ita tshumeloni ya Yehova.
NI NGA THUSWA NGA MINI URI NI SI TSHA TIMATIMA?
3. Ndi mini tshine tsha nga ri thusa uri ri si tsha timatima?
3 Tshiṅwe tshithu tshine tsha nga ri thusa uri ri si tsha timatima ndi u ṱoḓa phindulo dza mbudziso dzashu Bivhilini. Arali ra ita zwenezwo, ri ḓo khwaṱhisa lutendo lwashu kha Yehova na vhukonani hashu nae nahone ri ḓo kona u ‘ima ro khwaṱha lutendoni.’—1 Vhakor. 16:13.
4. Ri ‘ṱolisisa hani zwithu zwoṱhe’? (1 Vhathesalonika 5:21)
4 Vhalani 1 Vhathesalonika 5:21. Bivhili i ri ṱuṱuwedza uri ri ‘ṱolisise zwithu zwoṱhe.’ Ri nga zwi ita hani? Musi hu na tshithu tshine ra khou tshi timatima, ri tea u ṱolisisa uri Bivhili i ri mini nga hatsho. Humbulani nga ha houḽa wahashu ane a kha ḓi vha muswa we a vha a tshi khou timatima arali Yehova e na ndavha nae. Naa u tea u sokou zwi litsha zwo ralo? Hai. U tea u ‘ṱolisisa zwithu zwoṱhe’ nga u guda Bivhili u itela u vhona uri Yehova u mu dzhia hani.
5. Yehova a nga ri thusa hani u wana phindulo dza mbudziso dzashu?
5 Musi ri tshi vhala Bivhili, zwi vha zwi tshi tou nga ri khou pfa Yehova a tshi amba na riṋe. Fhedzi uri ri kone u wana phindulo dza mbudziso dzashu, ri tea u ita zwi fhiraho u sokou vhala Bivhili. Ri tea u ṱoḓa maṅwalo ane a ḓo ri thusa u wana phindulo dza mbudziso dzashu. Ri nga ita ṱhoḓisiso nga ha mafhungo ane ra khou a ṱoḓa ri tshi shumisa zwishumiswa zwine ndangulo ya Yehova ya ri ṋea zwone. (Mir. 2:3-6) Ri nga rabela ra humbela Yehova uri a ri thuse musi ri tshi ita ṱhoḓisiso na uri a ri thuse uri ri wane phindulo. Nga murahu ra ṱoḓa vhulivhisi Bivhilini na mafhungo ane a nga ri thusa kha vhuimo vhune ra vha khaho. Ri nga dovha ra vhuyelwa nga u vhala mafhungo a re Bivhilini a ambaho nga ha vhashumeli vha Yehova vha tshifhingani tsho fhiraho vhe vha sedzana na vhuimo vhu fanaho na hashu.
6. Miṱangano i nga ri thusa hani uri ri si tsha timatima?
6 Yehova a nga shumisa miṱangano u ri thusa uri ri si tsha timatima. Arali ri tshi ya miṱanganoni tshifhinga tshoṱhe, ri nga wana phindulo dza mbudziso dze ra vha ri nadzo. Ri nga dzi wana kha nyambo kana kha phindulo ya muṅwe wahashu henefho miṱanganoni. (Mir. 27:17) Zwino kha ri haseledze nga ha uri ri nga wana hani phindulo dza dziṅwe mbudziso dzine ra nga vha ri nadzo.
MUSI NI TSHI TIMATIMA URI YEHOVA U NA NDAVHA NA INWI
7. Ndi mbudziso ifhio ine vhaṅwe vha nga ḓivhudzisa yone?
7 Naa no no vhuya na ḓivhudzisa arali Yehova e na ndavha na inwi? Arali ni tshi ḓipfa ni si muthu wa ndeme, ni nga vhona u nga zwi nga si konadzee u vha khonani na muthu we a sika zwithu zwoṱhe. Na Khosi Davida a nga vha o vha a tshi ḓipfa nga nḓila i fanaho. O mangala vhukuma uri Yehova u na ndavha na vhathu. O ri: “Iwe Yehova, muthu u tou vha mini ane wa mu ṱhogomela, ṅwana wa muthu u tou vha mini ane wa fanela u livhisa ṱhogomelo khae?” (Ps. 144:3) Ri nga wana ngafhi phindulo ya yeneyi mbudziso?
8. U ya nga 1 Samuele 16:6, 7, 10-12, ndi mini zwine Yehova a livhisa ṱhogomelo khazwo musi a tshi sedza vhathu?
8 Bivhili i ri gudisa uri Yehova u na ndavha na vhathu vhane vhaṅwe vha vha dzhia vhe si vha ndeme. Sa tsumbo, musi Yehova a tshi ruma Samuele uri a ye muḓini wa Isai u ḓodza muṅwe wa vharwa vhawe uri a vhe khosi, Isai o vhidza vharwa vhawe vha sumbe uri vha ḓe kha Samuele, fhedzi a si vhidze Davida we a vha e ene muṱukusa. b Naho zwo ralo, Yehova o khetha Davida uri a vhe khosi. (Vhalani 1 Samuele 16:6, 7, 10-12.) Yehova o vha a tshi zwi ḓivha uri Davida ndi muthu-ḓe. O vha a tshi zwi ḓivha uri u a mu funa.
9. Ndi ngani ni tshi nga vha na vhungoho ha uri Yehova u na ndavha na inwi? (Sedzani tshifanyiso.)
9 Humbulani nga ha uri Yehova o no ni sumbedza hani uri u na ndavha na inwi. U ni ṋea nyeletshedzo yo tou teaho vhuimo vhune na vha khaho. (Ps. 32:8) Zwenezwi zwi sumbedza uri u a ni ḓivha zwavhuḓi. (Ps. 139:1) Musi ni tshi shumisa nyeletshedzo ya Yehova na u vhona nḓila ine ya ni thusa ngayo, zwi ḓo ita uri ni vhe na vhungoho ha uri Yehova u na ndavha na inwi. (1 Koron. 28:9; Mish. 17:26, 27) Yehova u vhona zwoṱhe zwine na zwi ita uri ni mu shumele na u mu thetshelesa. U vhona zwine na vha zwone nga ngomu nahone u khou ṱoḓa u vha khonani yaṋu. (Yer. 17:10) A nga takala vhukuma arali na tenda u vha khonani yawe.—1 Yoh. 4:19.
‘Arali wa ṱoḓa Yehova, ene u ḓo ita uri u mu wane.’—1 Koron. 28:9 (Sedzani phara 9) c
MUSI NI TSHI TIMATIMA URI PHETHO DZE NA DZI DZHIA TSHIFHINGANI TSHO FHIRAHO DZO VHA DZI DZA VHUṰALI
10. Musi ri tshi humbula nga ha phetho dze ra dzi ita tshifhingani tsho fhiraho, ri nga ḓivhudzisa mbudziso dzifhio?
10 Nga zwiṅwe zwifhinga vhaṅwe vha nga humbula nga ha phetho dze vha dzi ita tshifhingani tsho fhiraho nahone vha ḓivhudzisa arali dzo vha dzi dza vhuṱali. Khamusi vho litsha mushumo u holelaho tshelede nnzhi kana vho ita phetho ya u sa thoma bindu u itela uri vha kone u shumela Yehova nga ho engedzeaho. Musi ho no fhela miṅwaha minzhi, vha nga vhona vhaṅwe vhe vha ita phetho dzi sa fani na dzavho vha tshi vhonala u nga vha na tshelede nnzhi-nnzhi nahone vha tshi vhonala u nga vha khou kapula mapfura nga lebula. Zwi nga ita uri vha ḓivhudzise uri: ‘Naa phetho dze nda dzi ita u itela u shumela Yehova dzo vha dzi dza vhuṱali? Kani ho vha ho tea ndo thoma nda shumanyana uri ndi kone u vha na tshelede nnzhi zwino?’
11. Ndi mini zwe zwa vha zwi tshi khou dina muṅwali wa Phisalema 73?
11 Arali no vhuya na ḓivhudzisa mbudziso dzi fanaho, ṱhogomelani nḓila ye muṅwali wa Phisalema 73 a ḓipfa ngayo. Na ene o vhona vhathu vha sa shumeli Yehova vha tshi vhonala vho takala, vho pfuma nahone zwi tshi nga a vha na na thaidzo. (Ps. 73:3-5, 12) Musi a tshi vhona vhenevha vhathu zwi tshi tou nga zwi khou vha tshimbilela zwavhuḓi, zwo ita uri a vhone u nga phetho ye a i ita ya u shumela Yehova yo vha i si ya vhuṱali. U humbula nga ha zwenezwi zwithu ‘zwo mu tambudza ḓuvha ḽoṱhe.’ (Ps. 73:13, 14) O thuswa nga mini?
12. U ya nga Phisalema 73:16-18, ndi mini zwo thusaho muphisalema?
12 Vhalani Phisalema 73:16-18. Onoyu muphisalema o ya nḓuni khethwa ya Mudzimu. U vha henefho vhukati ha vhathu vha Yehova zwo mu thusa uri a dzike, a kone u humbula zwavhuḓi. O zwi vhona uri naho vhaṅwe vhathu vha tshi vhonala vha tshi khou tshila vhutshilo ha vhuphuvhephuvhe, vho vha vha si na fhulufhelo ḽa vhumatshelo. U humbula nga ha zwenezwi zwo ita uri a si tsha kulea nungo na uri a vhe na vhungoho ha uri u shumela Yehova yo vha i phetho yavhuḓi. Nga nṱhani ha zwenezwi, o vha o ḓiimisela u bvela phanḓa a tshi shumela Yehova.—Ps. 73:23-28.
13. Ni nga ita mini arali ni tshi khou timatima phetho dze na dzi ita tshifhingani tsho fhiraho? (Sedzani tshifanyiso.)
13 Na riṋe Bivhili i nga ri thusa u kunda mahumbulele a si avhuḓi u fana na muphisalema. I nga ri thusa hani? Ri nga humbula nga ha zwithu zwavhuḓi zwine ra vha nazwo, u katela na nḓila ye Yehova a ri fhaṱutshedza ngayo na u humbula uri vhane vha si shumele Yehova a vha wani thuso yawe. Kha vha sa shumeli Yehova, u vha na mushumo wavhuḓi ndi zwone zwa ndeme khavho ngauri a vha na fhulufhelo ḽa vhumatshelo. Fhedzi Yehova ha sokou ni ṋea zwifhiwa zwavhuḓi zwino, u fhulufhedzisa u ni ṋea zwithu zwinzhi zwavhuḓi tshifhingani tshi ḓaho. (Ps. 145:16) Zwiṅwe hafhu, humbulani uri ri nga si tou vha na vhungoho ho fhelelaho ha uri vhutshilo hashu ho vha vhu tshi ḓo vha vhu hani arali ri vhe ro ita phetho dzo fhambanaho na dze ra dzi ita. Fhedzi zwine ra nga vha na vhungoho nazwo ndi uri: Musi ri tshi ita phetho nga nṱhani ha uri ri funa Mudzimu na vhaṅwe, ri ḓo dzula ro takala.
Livhisani ṱhogomelo kha phaṱhutshedzo dze Yehova a ni fhulufhedzisa dzone (Sedzani phara 13) d
MUSI NI TSHI VHONA U NGA NI NGA SI TSHA KONA U ITA ZWINZHI TSHUMELONI YA YEHOVA
14. Ndi mini zwine zwa nga ita uri vhaṅwe vha timatime arali vha kha ḓi vha vha ndeme kha Yehova nahone vha nga ḓivhudzisa mbudziso ifhio?
14 Vhaṅwe vhashumeli vha Yehova a vha tsha kona u ita zwinzhi u fana na zwe vha vha vha tshi kona u zwi ita tshifhingani tsho fhiraho. Zwi nga vha zwi tshi khou itwa nga nṱhani ha vhulala, mutakalo u si wavhuḓi kana vhuholefhali. Zwenezwi zwi nga ita uri vha vhone u nga a vha tsha vha vha ndeme kha Yehova. Vha nga ḓivhudzisa uri: ‘Naa hu na zwine nda nga kha ḓi zwi ita tshumeloni ya Yehova?’
15. Muṅwali wa Phisalema 71 o vha e na vhungoho ha mini?
15 Muṅwali wa Phisalema 71 na ene o vha a tshi khou vhilaela ngauri na ene o vha a si tsheena nungo u fana na kale. O rabela a ri: “U songo nndaṱa musi ndi si tshee na nungo.” (Ps. 71:9, 18) Naho o vha a tshi khou ḓipfa a si tsheena nungo, onoyo muphisalema o vha e na vhungoho ha uri arali a bvela phanḓa a tshi khou shumela Mudzimu nga u fhulufhedzea, Yehova o vha a tshi ḓo bvela phanḓa na u mu livhisa na u mu tikedza. Onoyo muphisalema o zwi vhona uri Yehova u takalela vhane vha ita zwoṱhe zwine vha nga kona u itela u mu shumela, hu sa londwi uri ndi zwiṱuku lungafhani.—Ps. 37:23-25.
16. Ndi zwifhio zwine vhalala vha nga zwi ita tshumeloni ya Yehova? (Phisalema 92:12-15)
16 Arali no no vha mulala, humbulani nga ha nḓila ine Yehova a ḓipfa ngayo nga ha inwi. A nga ni thusa uri ni bvele phanḓa ni tshi mu shumela nga u fhulufhedzea naho ni si tsheena nungo. (Vhalani Phisalema 92:12-15.) Nṱhani ha u livhisa ṱhogomelo kha zwine na si tsha kona u zwi ita, dzulani ni tshi humbula nga ha zwine na kona u zwi ita. Sa tsumbo, ni nga khwaṱhisa vhaṅwe nga tsumbo yaṋu ya u fhulufhedzea na nga u sumbedza uri ni na ndavha navho. Ni nga vha vhudza nga ha nḓila ye Yehova a ni tikedza ngayo musi miṅwaha i tshi khou ḓi ya na u vha vhudza uri ndi mini zwe na lavhelela u zwi vhona tshifhingani tshi ḓaho kha zwe Bivhili ya zwi fhulufhedzisa. Zwiṅwe hafhu, ni songo hangwa uri u rabelisa vhaṅwe na zwone zwi nga vha thusa. (1 Pet. 3:12) Hu sa londwi zwiimo zwine ra vha khazwo, roṱhe ri nga ita zwiṅwe zwithu ri tshi itela Yehova na vhaṅwe.
17. Ndi ngani ri songo tea u ḓivhambedza na vhaṅwe?
17 Arali ni tshi vhilaedziswa ngauri a ni koni u ita zwo engedzeaho tshumeloni ya Yehova, ni nga vha na vhungoho ha uri Yehova u a dzhiela nṱha zwine na kona u zwi ita. Ni songo vhuya na vhambedza zwine na kona u zwi ita na zwine vhaṅwe vha zwi ita. Ndi ngani? Ndi ngauri Yehova ha ni vhambedzi na vhaṅwe. (Vhagal. 6:4) Sa tsumbo, Maria o ṋea Yesu tshifhiwa tsha mapfura a ḓuraho vhukuma. (Yoh. 12:3-5) Ngeno tshilikadzi i shayaho yo ṋeela nga zwipeni zwivhili zwi si na ndeme thembeleni. (Luka 21:1-4) Yesu ho ngo vhambedza vhenevho vhafumakadzi vhavhili. Nṱhani hazwo, o zwi vhona uri vhoṱhe vha na lutendo lwo khwaṱhaho. Yehova na ene u dzhiela nṱha zwoṱhe zwine na mu itela zwi tshi itiswa ngauri ni a mu funa, hu sa londwi uri ndi zwiṱuku lungafhani.
18. Ndi mini zwine zwa ḓo ri thusa uri ri si tsha timatima? (Sedzani bogisi “ Ipfi Ḽa Yehova Ḽi Nga Ni Thusa Uri Ni Si Tsha Timatima.”)
18 Roṱhe ri a ita ri tshi timatima nga zwiṅwe zwifhinga. Fhedzi samusi ro zwi guda, Bivhili i nga ri thusa uri ri si tsha timatima. Nga zwenezwo, itani zwoṱhe zwine na nga kona uri ni wane phindulo dza mbudziso dzine na vha nadzo nahone zwenezwo zwi ḓo ni thusa uri ni sa tsha vhilaela. Yehova u na ndavha na inwi, u dzhiela nṱha phetho dzoṱhe dze na dzi ita u itela u mu shumela nahone u ḓo ni lambedza sa zwe a fhulufhedzisa. Yehova u a funa vhashumeli vhawe vhoṱhe vha fhulufhedzeaho nahone u na ndavha navho.
LUIMBO 111 Zwi Itaho Uri Ri Takale
a ṰHALUTSHEDZELO YA MAIPFI: Kha ino thero ri khou amba nga ha u timatima hune ha ita uri ri vhone u nga a ri vha ndeme kha Yehova kana hune ha ita uri ri vhone u nga phetho dze ra dzi dzhia dzo vha dzi si dza vhuṱali. A ri khou amba nga ha u timatima hune Bivhili ya amba uri hu sumbedza u sa vha na lutendo kha Yehova na zwe a zwi fhulufhedzisa.
b Naho Bivhili i sa ri vhudzi uri Davida o vha e na miṅwaha mingana musi Yehova a tshi mu khetha, zwi vhonala uri o vha a tshi kha ḓi vha muṱuku.—Vhalani Tshiingamo tsha 1 October 2011, siaṱ. 21, phara 2.
