MUZIKA wo vha u wa ndeme kha Vhaisiraele. Bivhili i amba nga ha vhathu vhe vha tamba muzika na u imba. Zwavhuḓivhuḓi, dziṅwe dza dzibugu dzi re Bivhilini ndi dzinyimbo. Sa tsumbo, bugu ya Dziphisalema, Luimbo lwa Salomo na Zwililo ndi nyimbo. Iṅwe bugu i ambaho nga ha zwithu zwe zwa itea tshifhingani tsha Bivhili i amba uri Bivhili i bvisela khagala uri Vhaisiraele vho vha vha tshi katela muzika kha zwithu zwinzhi zwe vha vha vha tshi zwi ita vhutshiloni havho.

Muzika wo vha u tshipiḓa tsha vhutshilo havho. Vhaisiraele vho vha vha tshi lidza muzika na u imba u itela u bvisela khagala nḓila ye vha vha vha tshi khou ḓipfa ngayo. (Yes. 30:29) Vhafumakadzi vho vha vha tshi lidza mirumba, vha imba vho takala na u tshina musi hu tshi khou pembeleliwa u fana na musi hu tshi vhewa khosi ntswa, musi maswole o kunda nndwani na kha zwiṅwe zwiitea zwa vhurabeli. (Vhahaṱ. 11:34; 1 Sam. 18:6, 7; 1 Dzikh. 1:39, 40) Vhaisiraele vho vha vha tshi ita na u imba nyimbo dzi ṱungufhadzaho u itela u sumbedza nḓila ye vha ṱungufhala ngayo musi muṅwe muthu o lovha. (2 Koron. 35:25) Zwi tou vha khagala uri Vhaisiraele vho vha vha tshi funa muzika.

Khosi dza Isiraele dzo vha dzi tshi funa muzika. Khosi Saulo o ita na u vhidza Davida uri a ḓe pfamoni uri a mu lidzele muzika. (1 Sam. 16:18, 23) Musi Davida a tshi vha khosi, na ene o ita zwilidzo, a ṅwala muzika, na u dzudzanya uri hu vhe na vhathu vhane vha lidza na u imba thembeleni ya Yehova. (2 Koron. 7:6; Amosi 6:5) Na Khosi Salomo o vha e na vhaimbi vha vhanna na vha vhafumakadzi pfamoni yawe.—Muh. 2:8.

Vhaisiraele vho vha vha tshi shumisa muzika u itela u gwadamela Yehova. Zwavhuḓivhuḓi, ho vha hu na vhanna vha 4 000 vhe vha vha vha tshi lidza zwilidzo thembeleni ngei Yerusalema. (1 Koron. 23:5) Vho vha vha tshi lidza simbala, zwilidzo zwi re na ṱhale, haripa na phalaphala. (2 Koron. 5:12) Fhedzi vhenevha vhanna a si vhone vhe vhoṱhe vhe vha vha vha tshi gwadamela Yehova nga muzika. Vhunzhi ha Vhaisiraele vho vha vha tshi imba musi vha tshi khou ya vhuṱamboni ngei Yerusalema. Dzenedzi nyimbo dzo vha dzi tshi vhidzwa u pfi ndi Nyimbo dza Zwikwarani. (Ps. 120–134) Nahone Maṅwalo a Tshiyuda a sumbedza uri Vhaisiraele vho vha vha tshi imba dziṅwe dza Dziphisalema a nga vhuṱambo ha Paseka.

Muzika u kha ḓi vha wa ndeme kha vhashumeli vha Mudzimu na ṋamusi. (Yak. 5:13) Ri a imbela Yehova u itela u mu renda. (Vhaef. 5:19) Muzika u ita uri ri vhe na vhuthihi na vhahashu. (Vhakol. 3:16) Nahone u a ri khwaṱhisa musi ri tshi khou sedzana na vhuimo vhu konḓaho. (Mish. 16:25) Ri nga kona u sumbedza uri ri na lutendo kha Yehova na uri ri a mu funa ri tshi shumisa muzika.