“Ipfi Ḽa Mudzimu . . . Ḽi Na Maanḓa”
“Ipfi ḽa Mudzimu ḽi a tshila nahone ḽi na maanḓa.”—VHAHEB. 4:12.
NYIMBO: 114, 113
1. Ndi ngani zwi sa timatimisi uri Ipfi ḽa Mudzimu ḽi na maanḓa? (Sedzani tshifanyiso tsha u thoma.)
SA VHATHU vha Yehova, a ri timatimi uri Ipfi ḽa Mudzimu ḽine ḽa vha mulaedza we a u ṅwalela vhathu “ḽi a tshila nahone ḽi na maanḓa.” (Vhaheb. 4:12) Ro no vhona nḓila ye Bivhili ya shandula ngayo vhutshilo hashu na ha vhaṅwe. Vhaṅwe vhahashu vho vha vhe zwigevhenga, vha tshi shumisa luvhi zwidzidzivhadzi kana u ḓifara luvhi nga zwa vhudzekani. Vhaṅwe vho vha vha tshi ḓiphina nga u bvelela kha ḽino shango, fhedzi vho ṱhogomela uri hu na zwine zwa khou ṱahela vhutshiloni havho. (Muh. 2:3-11) Zwi takadzaho ndi uri vhathu vhanzhi vhe vha vha vha si na fulufhelo nahone vho xela vho thuswa nga Bivhili u wana nḓila yo teaho na fulufhelo. Khamusi no no vhala nahone no takalela tshenzhelo nnzhi dze na dzi vhala kha Tshiingamo kha thero ine ya ri “Bivhili I Shandula Vhutshilo.” Nahone no no ṱhogomela uri naho vhenevho Vhakriste vho no ṱanganedza ngoho, vho bvela phanḓa vha tshi ita mvelaphanḓa ya lwa muya vha tshi thuswa nga Maṅwalo.
2. Ipfi ḽa Mudzimu ḽo sumbedza hani u vha na maanḓa ḓanani ḽa u thoma ḽa miṅwaha?
2 Naa zwi fanela u ri mangadza uri vhunzhi ha vhathu musalauno vho ita tshanduko dzi swayeaho vhukuma nge vha guda Ipfi ḽa Mudzimu? Na khathihi! Dzenedzo tshenzhelo dzi ri humbudza nga ha 1 Vhakorinta 6:9-11.) Musi muapostola Paulo o no amba nga ha vhathu vhane vha sa ḓo ḽa ifa ḽa Muvhuso wa Mudzimu, o ri: “Vhaṅwe vhaṋu vho vha vha tshi ita zwenezwo.” Fhedzi vho shanduka vha tshi thuswa nga Maṅwalo na nga muya mukhethwa wa Mudzimu. Naho vho no ṱanganedza ngoho, vhaṅwe vho ita vhukhakhi vhuhulwane vhukuma he ha kwama vhushaka havho na Yehova. Bivhili i amba nga ha muṅwe Mukriste wa muḓodzwa wa ḓanani ḽa u thoma ḽa miṅwaha we a bviswa tshivhidzoni; nahone nga murahu, a vhuyedzedzwa tshivhidzoni. (1 Vhakor. 5:1-5; 2 Vhakor. 2:5-8) Naa a zwi ri khwaṱhisi u vhala nga ha thaidzo dze vhatendi nga riṋe vha sedzana nadzo na nḓila ye vha dzi kunda ngayo vha tshi thuswa nga Bivhili?
vhahashu vha ḓanani ḽa u thoma ḽa miṅwaha vhe vha vha vhe na fulufhelo ḽa u tshila ṱaḓulu. (Vhalani3. Ri ḓo ṱolisisa mini kha ino thero?
3 Nga nṱhani ha uri Ipfi ḽa Mudzimu ndi tshi shumiswa tshi re na maanḓa, ri naḽo nahone ri ṱoḓa u ita vhungoho ha uri ri ḽi shumise. (2 Tim. 2:15) Kha ino thero, ri ḓo ṱolisisa nḓila ine Ipfi ḽa Mudzimu ḽa vha na maanḓa ngayo (1) vhutshiloni hashu, (2) musi ri tshi shela mulenzhe vhuḓinḓani na (3) musi ri tshi ṋekedza nyambo tshivhidzoni. Zwenezwi zwi ḓo ri thusa uri ri sumbedze nḓila ine ra funa ngayo na u livhuha Khotsi ashu wa ṱaḓulu ane a ri gudisa zwine zwa ri vhuyedza.—Yes. 48:17.
VHUTSHILONI HASHU
4. (a) Ndi mini zwine ra fanela u zwi ita u itela uri Ipfi ḽa Mudzimu ḽi shume kha riṋe? (b) Ri nga ḓiṋea hani tshifhinga tsha u vhala Bivhili?
4 Arali ri tshi ṱoḓa uri Ipfi ḽa Mudzimu ḽi shume kha riṋe, ri fanela u ḽi vhala tshifhinga tshoṱhe—ḓuvha ḽiṅwe na ḽiṅwe arali zwi tshi konadzea. (Yosh. 1:8) Ndi ngoho uri vhunzhi hashu ro farakanea. Naho zwo ralo, a ro ngo fanela u tendela naho hu mini—u katela na vhuḓifhinduleli—zwi tshi khakhisa mbekanyamushumo yashu ya u vhala Bivhili. (Vhalani Vhaefesa 5:15, 16.) Vhunzhi ha vhathu vha Yehova vho wana nḓila dzi shumaho dza u ḓiṋea tshifhinga tsha u vhala Bivhili ḓuvha ḽiṅwe na ḽiṅwe, hu sa londwi uri ndi nga matsheloni kana nga madekwana kana tshifhinga tshiṅwe na tshiṅwe. Vha ḓipfa nga nḓila i fanaho na ya mupsalme we a ṅwala uri: “Milayo yau ndi i tama hani! Ndi ṱwa ndi tshi elekanya yone misi yoṱhe.”—Ps. 119:97.
5, 6. (a) Ndi ngani u elekanya zwi zwa ndeme? (b) Ri nga elekanya hani nga nḓila i bvelelaho? (c) No vhuyelwa hani nga u vhala Ipfi ḽa Mudzimu na u elekanya nga haḽo?
5 Nga nnḓa ha u guda Bivhili, ndi zwa ndeme uri ri elekanye nga ha zwine ra zwi vhala. (Ps. 1:1-3) Musi ri tshi ita zwenezwo, ri ḓo kona u shumisa zwe ra zwi guda vhutshiloni hashu. Hu sa londwi uri ri vhala Ipfi ḽa Mudzimu kha masiaṱari a Bivhili o gandiswaho kana kha tshishumiswa tsha thekinolodzhi, tshipikwa tshashu tshi fanela u vha tsha u ita uri zwi kwame mbilu dzashu.
6 Ri nga elekanya hani nga nḓila i bvelelaho? Vhanzhi vho wana zwi tshi thusa u ima nyana musi vho no fhedza u vhala zwipiḓa zwa Maṅwalo 2 Vhakor. 10:4, 5.
nahone vha ḓivhudzisa mbudziso dzi tevhelaho: ‘Zwenezwi zwi mmbudza mini nga ha Yehova? Ndi shumisa hani zwe nda zwi guda vhutshiloni hanga? Ndi ngafhi hune nda nga khwinisa hone?’ Musi ri tshi elekanya na u rabela nga ha zwine ra zwi guda Ipfini ḽa Mudzimu, zwi ḓo ri ṱuṱuwedza uri ri shumise zwe ra zwi guda nga ho engedzeaho. Vhukuma, ri ḓo vhona nḓila ine maanḓa a Ipfi ḽa Mudzimu a shuma ngayo vhutshiloni hashu.—VHUḒINḒANI
7. Ri nga shumisa hani Ipfi ḽa Mudzimu zwavhuḓi vhuḓinḓani hashu?
7 Ndi mini zwine zwa nga ri thusa uri ri shumise Ipfi ḽa Mudzimu zwavhuḓi vhuḓinḓani hashu? Tshithu tsha u thoma tshine ra nga tshi ita ndi u shumisa Ipfi ḽa Mudzimu tshifhinga tshoṱhe musi ri tshi funza na u gudisa. Muṅwe wahashu o ri, “Arali no vha ni tshi khou huwelela nnḓu nga nnḓu ni na Yehova, naa ho vha hu tshi ḓo amba inwi fhedzi kana no vha ni tshi ḓo mu tendela uri a ambe?” Mbuno yawe yo vha i ya uri: Musi ri tshi vhala Ipfi ḽa Mudzimu nga ho livhaho vhuḓinḓani, ri vha ri tshi khou tendela Yehova a tshi amba na ṋemuḓi. U khetha zwavhuḓi luṅwalo zwi nga mu kwama vhukuma u fhira zwine ra nga zwi amba. (1 Vhathes. 2:13) Ḓivhudziseni uri, ‘Naa ndi shumisa tshibuli tshiṅwe na tshiṅwe tshine nda tshi wana tsha u shumisa Ipfi ḽa Mudzimu kha vhane nda huwelela khavho mafhungo maḓifha?’
8. Ndi ngani ri tshi fanela u ita zwi fhiraho u sokou vhala luṅwalo musi ri tshi khou huwelela?
8 Vhukuma, nga nnḓa ha u vha vhalela Bivhili, ri fanela u ita zwo engedzeaho kha vhane ra huwelela khavho. Ndi ngani? Ndi nga nṱhani ha uri vhathu vhanzhi vha na nḓivho ṱhukhu kana a vha pfesesi Bivhili. Zwo vha zwo tou ralo tshifhingani tsho fhiraho nahone zwo tou ralo na ṋamusi. (Vharoma 10:2) Nga zwenezwo, a ro ngo fanela u sokou humbulela uri muthu u ḓo wana mbuno ine ya vha kha ndimana nga u sokou i vhala. Ri fanela u ḓiṋea tshifhinga tsha u dovholola mbuno kha ndimana na u ṱalutshedza zwine ya amba zwone. U ita nga u ralo zwi ḓo thusa uri mulaedza u re Ipfini ḽa Mudzimu u kwame mbilu dza vhane ra huwelela khavho.—Vhalani Luka 24:32.
9. Ri nga shumisa hani maṅwalo nga nḓila ine ya ḓo ita uri vhane ra huwelela khavho vha ṱhonifhe Bivhili? Ṋeani tsumbo.
9 Ri fanela u shumisa maṅwalo nga nḓila ine ya ḓo ita uri vhane ra huwelela khavho vha ṱhonifhe Bivhili. Sa tsumbo, ri nga amba uri, “Kha ri vhone uri Musiki washu uri mini nga ha ya mafhungo.” Musi ri tshi khou amba na muthu a sa ḓivhiho tshithu nga ha vhurereli, ri nga amba uri, “Ṱhogomelani zwine Maṅwalo Makhethwa a ri vhudza zwone.” Kana arali ri tshi khou huwelela kha muthu a si na ndavha na zwa vhurereli, ri nga mu vhudzisa uri, “Naa no no vhuya na pfa nga ha hoyu murero wo ṅwalwaho kale?” Arali ri tshi ṱhogomela uri vhathu vha na vhubvo vhu sa fani na uri zwine vha zwi tenda a zwi fani, ri ḓo ita zwoṱhe zwine ra nga kona u itela uri zwine ra zwi amba zwi kunge.—1 Vhakor. 9:22, 23.
10. (a) Ṱalutshedzani zwe muṅwe wahashu a zwi tshenzhela. (b) No vhona hani maanḓa a Ipfi ḽa Mudzimu musi ni vhuḓinḓani?
10 Vhanzhi vho wana uri u shumisa Ipfi ḽa Mudzimu vhuḓinḓani zwi kwama mbilu dza vhane vha huwelela khavho. Ṱhogomelani tsumbo i tevhelaho. Muṅwe wahashu o ita lwendo lwa u vhuyelela kha muṅwe mukalaha we a vha e na miṅwaha minzhi a tshi vhala magazini dzashu. Nṱhani ha u sokou mu ṋea khandiso ntswa ya Tshiingamo, onoyo wahashu o dzhia phetho ya u mu vhalela luṅwalo lu re kha yeneyo khandiso. O vhala luṅwalo lwa 2 Vhakorinta 1:3, 4, lune lwa ri: “Khotsi wa u khathutshela hoṱhe na Mudzimu wa u khuthadza hoṱhe, ane a ri khuthadza kha vhuṱungu hashu hoṱhe.” Lwonolo luṅwalo lwo kwama mbilu ya onoyo mukalaha nahone zwenezwo zwo ita uri a humbele onoyo wahashu uri a dovhe a lu vhale. Onoyo mukalaha o amba nga ha nḓila ye ene na mufumakadzi wawe vha vha vha tshi ṱoḓa ngayo khuthadzo, nga nṱhani ha zwenezwo, o vha a tshi ṱoḓa u ḓivha zwo engedzeaho nga ha Bivhili. Naa a ni tendelani nazwo uri Ipfi ḽa Mudzimu ḽi na maanḓa vhuḓinḓani hashu?—Mish. 19:20.
MUSI NI TSHI ṊEKEDZA NYAMBO TSHIVHIDZONI
11. Vhahashu vhane vha ṋekedza nyambo vha na vhuḓifhinduleli vhufhio?
11 Roṱhe ri takalela u ya miṱanganoni yashu ya Vhukriste, maguvhanganoni na mabuthanoni. Tshiitisi tshashu tshihulwane tsha u ya henefho ndi u gwadamela Yehova. Ri dovha ra vhuyelwa vhukuma nga nyeletshedzo i bvaho maṅwaloni. Vhahashu vhane vha funza kha zwenezwo zwiitea vha takalela vhukuma yeneyo ndugelo. Fhedzi vha fanela u ṱhogomela uri vha na vhuḓifhinduleli vhuhulwane. (Yak. 3:1) Vha fanela u ita vhungoho ha uri zwine vha zwi funza zwo thewa Maṅwaloni. Arali no ṋewa nyambo, ni nga tendela hani maanḓa a Ipfi ḽa Mudzimu a tshi shuma kha nyambo yaṋu?
12. Muthu ane a khou ṋekedza nyambo a nga ita hani uri Maṅwalo a vhe tshipiḓa tsha ndeme vhukuma kha nyambo yawe?
12 Maṅwalo a fanela u vha tshipiḓa tsha ndeme vhukuma kha nyambo iṅwe na iṅwe. (Yoh. 7:16) Zwenezwi zwi katela mini? Ri fanela u ṱhogomela uri tshenzhelo, zwifanyiso kana nḓila ine na ṋekedza ngayo nyambo zwi si ite uri vhathu vha livhise ṱhogomelo kha zwenezwo zwithu nṱhani ha u livhisa ṱhogomelo kha Maṅwalo. Zwiṅwe hafhu, ri fanela u humbula uri u vhala maṅwalo manzhi a zwi bviseli khagala zwine Bivhili ya zwi funza. Zwi re zwone ndi uri u shumisa maṅwalo manzhi-manzhi zwi nga ita uri vha thetshelesi vha si tsha humbula na luṅwalo na luthihi zwalwo. Nga zwenezwo, khethani maṅwalo ane na ḓo a shumisa nga vhuronwane, ni ḓiṋee tshifhinga tsha u a vhala, u a ṱalutshedza, u ṋea tsumbo na u a shumisa zwavhuḓi. (Neh. 8:8) Musi no ṋewa bammbiri ḽa nyambo, ḽi vhaleni u katela na maṅwalo a re khaḽo. Lingedzani u pfesesa nḓila ine mafhungo o ṅwalwaho kha ḽeneḽo bammbiri na maṅwalo o redzwaho zwa tshimbidzana ngayo. Nga murahu, khethani maṅwalo ane na ḓo a shumisa u itela u bvisela mbuno khagala. (Ni nga wana nyeletshedzo dzi shumaho kha ngudo 21 u swika kha 23 kha bugu Vhuyelwani Nga Tshikolo tsha Vhuḓinḓa ha lwa Ṱaḓulu.) Zwa ndeme vhukuma, humbelani Yehova uri a ni thuse ni kone u amba zwithu zwi bvaho khae ni tshi shumisa Ipfi ḽawe.—Vhalani Esera 7:10; Mirero 3:13, 14.
13. (a) Muṅwe wahashu wa tshisadzini o kwamea hani nga nḓila ye ha shumiswa ngayo maṅwalo miṱanganoni ya Vhukriste? (b) No vhuyelwa hani nga nḓila ye ha shumiswa ngayo Maṅwalo miṱanganoni yashu?
13 Muṅwe wahashu wa tshisadzini wa ngei Australia o vha o kwamea vhukuma nga nḓila ye maṅwalo a shumiswa ngayo miṱanganoni ya Vhukriste. Hu sa londwi nḓila i vhavhaho ye a aluwa ngayo, o kwamiwa nga mulaedza u re Bivhilini nahone a ṋekedzela vhutshilo hawe kha Yehova. Naho zwo ralo, o wana zwi khaedu u ṱanganedza uri Yehova u a mu funa. Nga u ya ha tshifhinga, o vha na khwaṱhisedzo ya uri Mudzimu u a mu funa. Ndi mini zwe zwa mu thusa uri a swikelele kha yeneyo phetho? Zwenezwo zwo itea musi a tshi khou elekanya nga ha luṅwalo lwe lwa shumiswa miṱanganoni yashu nahone o vhambedza zwenezwo na dziṅwe ndimana dzi re Bivhilini. * Naa no no vhuya na kwamiwa nga nḓila ye Ipfi ḽa Mudzimu ḽa shumiswa ngayo miṱanganoni, maguvhanganoni na mabuthanoni?—Neh. 8:12.
14. Ri nga sumbedza hani uri ri dzhiela nṱha Ipfi ḽa Yehova?
14 Naa a ri livhuhi Yehova nge a ri ṋea Ipfi ḽawe ḽine ḽa vha Bivhili? Ho ngo ṋea vhathu fhedzi Bivhili, o dovha a fulufhedzisa uri Ipfi ḽawe ḽi ḓo dzula ḽo ima lini na lini. (1 Pet. 1:24, 25) Vhukuma, ri ita zwavhuḓi musi ri tshi guda Ipfi ḽa Mudzimu ḓuvha ḽiṅwe na ḽiṅwe, u ḽi shumisa vhutshiloni hashu na u thusa vhaṅwe ngaḽo. Musi ri tshi ita nga u ralo, ri vha ri tshi khou sumbedza uri ri funa na u dzhiela nṱha Ipfi ḽawe nahone zwa ndeme vhukuma Muṅwali waḽo ane a vha Yehova Mudzimu.
^ phar. 13 Sedzani bogisi “ U Shanduka Ha Zwithu.”