1, 2. (a) Ndi mushumo ufhio wa ndeme we Salomo a ṋewa wone? (b) Ndi ngani Davida o vha a tshi vhilaela nga ha Salomo?

SALOMO o vha o ṋewa mushumo wa ndeme vhukuma wa u vha mulavhelesi wa u fhaṱa thembele ya ngei Yerusalema. Yeneyo thembele yo vha i tshi fanela u vha “[yo nakaho vhukuma, NW], ine ya ḓo ḓihwa ya khoḓiwa kha mashango oṱhe.” Tsha ndeme vhukuma, thembele yo vha i tshi ḓo vha ‘nnḓu ya Yehova Mudzimu wa ngoho.’ Yehova o vha o amba uri Salomo u ḓo vha mulavhelesi wa wonoyo mushumo.—1 Koron. 22:1, 5, 9-11.

² Khosi Davida o vha e na tshivhindi tsha uri Mudzimu u ḓo mu tikedza, fhedzi Salomo o vha a “tshee ṅwana, [a] tshee mutete.” Naa o vha a tshi ḓo vha na tshivhindi tsha u fhaṱa thembele? Naa onoyo ṅwana ane a kha ḓi vha mutete o vha a tshi ḓo mu hanela u ita nga u ralo? U itela uri a bvelele, Salomo o vha a tshi fanela u vha na tshivhindi na u shuma.

3. Salomo o guda mini kha khotsi awe nga ha u vha na tshivhindi?

³ Khamusi Salomo o guda zwinzhi kha khotsi awe nga ha u vha na tshivhindi. Musi a tshee muswa, Davida o lwa na zwivhanda zwa ḓaka zwe zwa vha zwo zhondongedza nngu dza khotsi awe. (1 Sam. 17:34, 35) O sumbedza u vha na tshivhindi musi a tshi kunda Goliata we a vha  a tshi ofhisa nahone e na maanḓa. Davida o rwa Goliata nga tombo a tshi thuswa nga Mudzimu.—1 Sam. 17:45, 49, 50.

4. Ndi ngani Salomo o vha a tshi fanela u vha na tshivhindi?

⁴ Zwo vha zwo tea vhukuma uri Davida a ṱuṱuwedze Salomo uri a vhe na tshivhindi na u fhaṱa thembele! (Vhalani 1 Koronika 28:20.) Arali Salomo o vha a songo sumbedza u vha na tshivhindi, nyofho yo vha i tshi ḓo mu kula nungo nahone zwo vha zwi tshi ḓo ita uri a si kone u fhaṱa thembele.

5. Ndi ngani ri tshi fanela u vha na tshivhindi?

⁵ U fana na Salomo, ri ṱoḓa uri Yehova a ri thuse uri ri vhe na tshivhindi na u ita mushumo. Nga zwenezwo, kha ri haseledze nga ha dziṅwe tsumbo dza vhathu vha tshifhingani tsho fhiraho vhe vha sumbedza u vha na tshivhindi. Nahone ri nga humbula nga ha nḓila ine ra nga sumbedza ngayo tshivhindi na u khunyeledza mushumo washu.

6. Ndi mini zwine zwa ni takadza nga ha nḓila ye Yosefa a sumbedza ngayo tshivhindi?

⁶ Ṱhogomelani nḓila ye Yosefa a sumbedza ngayo u vha na tshivhindi musi mufumakadzi wa Potifara a tshi lingedza u ita nae zwa vhudzekani. Khamusi o vha a tshi zwi ḓivha uri u ḓo sedzana na masiandoitwa a si avhuḓi arali a hana. Naho zwo ralo, nṱhani ha u ita honoho vhukhakhi, o sumbedza u vha na tshivhindi nahone a dzhia phetho ya vhuṱali.—Gen. 39:10, 12.

7. Ṱalusani nḓila ye Rahaba a sumbedza ngayo u vha na tshivhindi. (Sedzani tshifanyiso tsha u thoma.)

⁷ Na Rahaba o vha na tshivhindi. Musi ṱholi dza Isiraele dzi tshi dzhena muḓini wawe ngei Yeriko, o vha a tshi nga ofha nahone a vha pandela. Fhedzi ngauri o vha a tshi fulufhela Yehova, nga tshivhindi o dzumba vhenevho vhanna vhavhili nahone a vha thusa uri vha shavhe kha wonoyo muḓi vho tsireledzea. (Yosh. 2:4, 5, 9, 12-16) Rahaba o tenda uri Yehova ndi Mudzimu wa ngoho nahone o vha a tshi fulufhela uri nga ḽiṅwe ḽa maḓuvha Yehova u ḓo ṋea ḽeneḽo shango Vhaisiraele. O ita zwenezwo ngauri o vha a sa ofhi vhathu u katela na khosi ya Yeriko na vhathu vhayo. Nṱhani hazwo, o ita zwithu zwe nga murahu zwa tsireledza ene na vha muṱa wawe.—Yosh. 6:22, 23.

8. Nḓila ye Yesu a sumbedza ngayo u vha na tshivhindi yo kwama hani vhaapostola?

⁸ Vhaapostola vha Yesu vha fulufhedzeaho vho ri vhetshela tsumbo yavhuḓi ya u vha na tshivhindi. Vho vhona nḓila ye Yesu a sumbedza ngayo u vha na tshivhindi. (Mat. 8:28-32; Yoh. 2:13-17; 18:3-5) Zwenezwo zwo vha thusa uri vha vhe na tshivhindi. Musi vha tshi tovholwa nga Vhasadukei, vhaapostola a vho ngo litsha u funza nga ha dzina ḽa Yesu.—Mish. 5:17, 18, 27-29.

9. Luṅwalo lwa 2 Timotheo 1:7 lu ri thusa hani u pfesesa nḓila ine ra nga vha ngayo na tshivhindi?

⁹ Yosefa, Rahaba, Yesu na vhaapostola, vho sumbedza u vha na tshivhindi nahone zwenezwo zwo vha ṱuṱuwedza uri vha ite mishumo yavhuḓi. U vha havho na tshivhindi zwo vha zwi sa sumbedzi uri vha a ḓifulufhela vhone vhaṋe, fhedzi vho vha vha tshi ḓitika nga Yehova. Na riṋe ri sedzana na vhuimo vhune ha ṱoḓa uri ri vhe na tshivhindi. Nṱhani ha u ḓitika nga riṋe vhaṋe, ri fanela u ḓitika nga Yehova. (Vhalani 2 Timotheo 1:7.) Kha ri ṱolisise masia mavhili ane ra fanela u sumbedza tshivhindi: muṱani na tshivhidzoni.

10. Ndi ngani vhaswa vha Vhakriste vha tshi fanela u vha na tshivhindi?

¹⁰ Vhaswa vha Vhakriste vha sedzana na vhuimo vhune ha ita uri vha sumbedze u vha na tshivhindi u itela u shumela Yehova. Vha nga guda na u tevhela tsumbo ya Salomo samusi o sumbedza u vha na tshivhindi musi a tshi dzhia phetho ya vhuṱali ya u fhaṱa thembele. Naho vhaswa vha Vhakriste vha tshi fanela u livhiswa nga vhabebi vhavho, fhedzi vha fanela u ḓidzhiela phetho dza ndeme. (Mir. 27:11) Phetho dzoṱhe dza vhuṱali dzine vha dzi dzhia malugana na u khetha khonani dzavhuḓi, vhuḓimvumvusi havhuḓi, vhuḓifari ho kunaho na u lovhedzwa,  zwi ṱoḓa tshivhindi. Vhaswa vha fanela u vha na tshivhindi ngauri musi vha tshi ita nga u ralo vha vha vha tshi khou lwisana na Sathane ane a nyadza Mudzimu.

11, 12. (a) Mushe o ri vhetshela hani tsumbo ya u vha na tshivhindi? (b) Vhaswa vha nga edzisa hani tsumbo ya Mushe?

¹¹ Iṅwe phetho ya ndeme ine vhaswa vha fanela u i dzhia ndi u ḓivhetshela zwipikwa. Kha maṅwe mashango, vhaswa vha tsikeledzwa uri vha livhise ṱhogomelo kha pfunzo ya nṱha na u wana mushumo u holelaho vhukuma. Huṅwe, vhuimo ha zwa ekonomi vhu nga ita uri vhaswa vha vhone u nga vha fanela u thusa miṱa yavho nga zwa masheleni. Arali na ḓiwana ni kha vhuṅwe ha honoho vhuimo, humbulani tsumbo ya Mushe. Samusi Mushe o aluswa nga ṅwananyana wa Farao, o vha a tshi nga ḓivhetshela zwipikwa zwa u ṱoḓa u pfuma kana bvumo. Edzani u humbula nḓila ye a vha a tshi nga vha o tsikeledzea ngayo musi muṱa wa hawe wa ngei Egipita, vhadededzi na vhaeletshedzi vha tshi mu ṱuṱuwedza uri a tovhole zwenezwo! Nṱhani ha u ita zwenezwo, nga tshivhindi Mushe o imela vhurabeli ho kunaho. Musi a tshi ṱutshela lupfumo lwa ngei Egipita, Mushe o fulufhela Yehova. (Vhaheb. 11:24-26) Zwenezwo zwo ita uri Yehova a fhaṱutshedze Mushe nahone a zwi timatimisi uri u ḓo wana dziṅwe phaṱhutshedzo nnzhi tshifhingani tshi ḓaho.

¹² Nga hu fanaho, Yehova u ḓo fhaṱutshedza vhaswa vhane nga tshivhindi vha vhea zwithu zwa lwa muya na Muvhuso u thoma vhutshiloni havho. U ḓo vha thusa uri vha kone u ṱunḓela miṱa yavho. Ḓanani ḽa u thoma ḽa miṅwaha, Timotheo we a vha a tshee muswa o livhisa ṱhogomelo kha u ḓivhetshela zwipikwa zwa lwa muya nahone na inwi ni nga ita nga u ralo. *—Vhalani Vhafilipi 2:19-22.

13. U vha na tshivhindi zwo thusa hani muṅwe muswa uri a swikelele zwipikwa zwawe?

¹³ Wahashu wa tshisadzini wa ngei Alabama kha ḽa U.S.A., o vha a tshi fanela u vha na tshivhindi u itela u ḓivhetshela zwipikwa zwa lwa muya. O ṅwala uri: “Musi ndi tshi aluwa ndo vha ndi na ṱhoni vhukuma. Zwo vha zwi tshi nkonḓela u amba na vhathu Holoni ya Muvhuso nahone zwi muhwalo u amba na vhathu vhane ndi si vha ḓivhe vhuḓinḓani ha nnḓu nga nnḓu.” A tshi thuswa nga vhabebi vhawe na vhaṅwe tshivhidzoni, onoyo muswa wa Mukriste o kona u swikelela tshipikwa tshawe tsha u vha muvulanḓila wa tshifhinga tsho ḓalaho. O ri: “Shango ḽa Sathane ḽi ṱuṱuwedza vhathu uri vha ḓivhetshele zwipikwa zwa u vha na pfunzo ya nṱha, bvumo, u vha na tshelede na u vha na zwithu zwinzhi zwi vhonalaho. Kanzhi vhathu a vha koni u swikelela zwenezwo zwipikwa nahone zwi ita uri vha vhe na mutsiko na mbilaelo. Naho zwo ralo, u shumela Yehova zwo ita uri ndi takale vhukuma nahone ndi pfa ndo fushea.”

14. Ndi kha vhuimo vhufhio vhune vhabebi vha Vhakriste vha fanela u vha na tshivhindi?

¹⁴ Vhabebi vha Vhakriste na vhone vha fanela u vha na tshivhindi. Sa tsumbo, tshifhinga tshoṱhe mutholi waṋu a nga ni humbela uri ni shume awara dzo engedzeaho nga madekwana na mafheloni a vhege—tshifhinga tshe na ḓivhetshela u ita vhurabeli ha muṱa, u ya vhuḓinḓani na u ya miṱanganoni ya Vhukriste. Hu ṱoḓea tshivhindi uri ni landule u ita zwenezwo u itela u vhetshela vhana vhaṋu tsumbo yavhuḓi. Kana khamusi vhaṅwe vhabebi vha si gathi tshivhidzoni vha tendela vhana vhavho vha tshi ita zwiṅwe zwithu zwine inwi na hanela ṅwana waṋu a tshi zwi ita. Vhenevho vhabebi vha nga vhudzisa uri ndi ngani ṅwana waṋu a sa iti zwenezwo zwithu. Naa ni nga vha na tshivhindi nahone nga vhuṱali na vha ṱalutshedza zwiitisi zwa phetho yaṋu?

15. Psalme ya 37:25 na Vhaheberu 13:5 dzi nga thusa hani vhabebi?

¹⁵ Musi ri tshi thusa vhana vhashu u ḓivhetshela zwipikwa na u zwi swikelela, zwi sumbedza u vha na tshivhindi. Sa tsumbo, vhaṅwe vhabebi vha nga timatima u ṱuṱuwedza vhana vhavho uri vha tovhole tshipikwa tsha u vha muvulanḓila, u shuma hune ha vha na ṱhoḓea  khulwane, u dzhenela tshumelo ya Bethele kana u fhaṱa zwifhaṱo zwa lwa ṱaḓulu. Vhabebi vha nga ofha uri vhana vhavho vha nga si kone u vha ṱhogomela musi vho no vha vhalala. Naho zwo ralo, vhabebi vho ṱalifhaho vha sumbedza u vha na tshivhindi nahone vha na lutendo kha mafulufhedziso a Yehova. (Vhalani Psalme ya 37:25; Vhaheberu 13:5.) Iṅwe nḓila ine na sumbedza ngayo u vha na tshivhindi na u fulufhela Yehova ndi nga u thusa ṅwana waṋu uri a ite zwi fanaho.—1 Sam. 1:27, 28; 2 Tim. 3:14, 15.

16. Vhaṅwe vhabebi vho thusa hani vhana vhavho u ḓivhetshela zwipikwa zwa lwa muya, nahone zwenezwo zwo vha vhuyedza hani?

¹⁶ Vhaṅwe vhabebi vha ngei United States vho thusa vhana vhavho uri vha ḓivhetshele zwipikwa zwa lwa muya. Khotsi vho ri: “Musi vhana vhashu vha sa athu u kona u tshimbila na u amba, ro vha ri tshi amba nga ha dakalo ḽine ḽa hone nga u vha muvulanḓila na u shumela tshivhidzo. Zwino vha na tshipikwa tshenetsho. U vha na zwipikwa zwa lwa muya na u zwi swikelela zwo thusa vhana vhashu u kunda mitsiko ya ḽino shango ḽa Sathane na u livhisa ṱhogomelo kha zwithu zwa vhukuma—Yehova.” Muṅwe wahashu wa tshinnani ane a vha na vhana vhavhili o ri: “Vhabebi vhanzhi vha ḓiṋea tshifhinga tsha u thusa na u ṱuṱuwedza vhana vhavho uri vha swikelele zwipikwa zwi ngaho mitambo, u ḓimvumvusa na pfunzo ya nṱha. Zwi a pfesesea u ita vhuḓidini ha u thusa vhana vhashu u swikelela zwipikwa zwine zwa ḓo vha thusa u vha na vhushaka havhuḓi na Yehova. Zwo vha zwithu zwi takadzaho vhukuma u vhona vhana vhashu vha tshi swikelela zwipikwa zwa lwa muya na u shela navho mulenzhe kha u ita zwenezwo.” Ni nga vha na vhungoho ha uri Mudzimu u ḓo fhaṱutshedza vhabebi vhane vha thusa vhana vhavho u ḓivhetshela zwipikwa zwa lwa muya na u zwi swikelela.

17. Ṋeani tsumbo ya nḓila ine ra vha ngayo na tshivhindi tshivhidzoni.

¹⁷ Zwi a ṱoḓea uri ri vhe na tshivhindi tshivhidzoni. Sa tsumbo, vhahulwane vha fanela u vha na tshivhindi musi vha tshi dzudzanya milandu mihulwane kana u thusa vhane vhutshilo havho ha vha khomboni nga nṱhani ha malwadze. Vhaṅwe vhahulwane vha dalela dzi dzhele u itela u guda na vhane vha vha na dzangalelo kana u fara miṱangano. Hu pfi mini nga vhahashu vha tshisadzini vha si ho mbinganoni? Zwino hu na zwibuli zwinzhi zwa uri vha ite zwo engedzeaho  vhuḓinḓani nga u vha vhavulanḓila, u pfulutshela hune ha vha na ṱhoḓea khulwane, mushumo wa u fhaṱa na u ita khumbelo ya u ya Tshikoloni tsha Vhahuweleli vha Muvhuso. Vhaṅwe vha ya na Tshikoloni tsha Gilead.

18. Vhafumakadzi vhahulwane vha nga vha hani na tshivhindi?

¹⁸ U vha na vhafumakadzi vhahulwane tshivhidzoni ndi phaṱhutshedzo. Ri a vha funa vhukuma vhenevho vhahashu! Vhaṅwe vha nga vha vha si tsha kona u ita zwo engedzeaho tshumeloni ya Mudzimu u fana na mathomoni, fhedzi vha kha ḓi vha na tshivhindi nahone vha a shuma. (Vhalani Tito 2:3-5.) Sa tsumbo, wahashu wa tshisadzini o no aluwaho u fanela u vha na tshivhindi arali o humbelwa uri a ambe na wahashu wa tshisadzini ane a kha ḓi vha muswa nga ha kuambarele. A nga si ambe nga nḓila i si yavhuḓi na onoyo wahashu nga ha kuambarele kwawe, fhedzi u ḓo thusa onoyo muswa uri a ṱhogomele nḓila ine Kuambarele kwawe kwa kwama ngayo vhaṅwe. (1 Tim. 2:9, 10) Yeneyo nḓila ya lufuno i nga ita uri hu vhe na mvelelo dzavhuḓi.

19. (a) Vhahashu vho lovhedzwaho vha nga vha hani na tshivhindi? (b) Luṅwalo lwa Vhafilipi 2:13 na 4:13 lu nga thusa hani vhahashu u vha na tshivhindi?

¹⁹ Vhahashu vho lovhedzwaho vha fanela u vha na tshivhindi na u shuma. Vhahashu vha tshinnani vho ḓiimiselaho u hwala vhuḓifhinduleli ho engedzeaho ndi phaṱhutshedzo tshivhidzoni. (1 Tim. 3:1) Naho zwo ralo, vhaṅwe vha nga timatima u swikelela zwenezwo. Khamusi wahashu o no vhuya a ita vhukhakhi tshifhingani tsho fhiraho nahone u vhona u nga ho ngo fanelea u vha mushumeli kana muhulwane. Muṅwe wahashu a nga vhona u nga ha na vhukoni ha u ita wonoyo mushumo. Arali ni tshi ḓipfa nga yeneyo nḓila, Yehova a nga ni thusa u ri ni vhe na tshivhindi. (Vhalani Vhafilipi 2:13; 4:13.) Humbulani uri nga zwiṅwe zwifhinga, Mushe o vhuya a vhona u nga ha fanelei u ita mushumo. (Ek. 3:11) Naho zwo ralo, Yehova o mu thusa nahone nga u ya ha tshifhinga o vha na tshivhindi tsha u khunyeledza mushumo we a ṋewa. Wahashu o lovhedzwaho a nga vha na tshivhindi musi a tshi humbela thuso kha Yehova nga thabelo i bvaho mbiluni na u guda Bivhili tshifhinga tshoṱhe. A nga dovha a thuswa na nga u elekanya nga ha mafhungo a ambaho nga ha u vha na tshivhindi. Nga u ḓiṱukufhadza a nga humbela vhahulwane uri vha mu gudise na u humbela u thusa tshivhidzoni kha zwiṅwe na zwiṅwe zwine zwa ṱoḓea. Ri ṱuṱuwedza vhahashu vhoṱhe vha tshinnani vho lovhedzwaho uri vha vhe na tshivhindi na u shuma nga nungo dzoṱhe tshivhidzoni!

20, 21. (a) Davida o humbudza mini Salomo? (b) Ri fanela u vha na vhungoho ha mini?

²⁰ Khosi Davida o humbudza Salomo uri Yehova u ḓo vha nae u swika a tshi fhedza mushumo wa u fhaṱa thembele. (1 Koron. 28:19) Salomo o dzula a tshi humbula nga ha maipfi a khotsi awe nahone ho ngo tendela u vha hawe muṱuku zwi tshi mu thivhela u ita mushumo. O sumbedza u vha na tshivhindi, a shuma nahone nga thuso ya Yehova o kona u fhedza thembele yo nakaho vhukuma nga miṅwaha ya sumbe na hafu.

²¹ Samusi Yehova o thusa Salomo, na riṋe a nga ri thusa uri ri vhe na tshivhindi na u khunyeledza mushumo washu, muṱani na tshivhidzoni. (Yes. 41:10, 13) Musi ri tshi sumbedza u vha na tshivhindi kha vhurabeli hashu kha Yehova, ri nga vha na fulufhelo ḽa uri u ḓo ri fhaṱutshedza zwino na tshifhingani tshi ḓaho. Nga zwenezwo, ‘ivhani na tshivhindi, ni ite.’