1. Ndi ngani vhashumeli vha Yehova vhe vhathu vho takalaho? (Sedzani tshifanyiso tsha u thoma.)

ṰHANZI DZA YEHOVA ndi vhathu vho takalaho. Musi vhe miṱanganoni, mabuthanoni na musi vho kuvhangana nga tshavho hu vha hu zwiseo na mapwapwalala. Ndi ngani vho takala? Ndi nga nṱhani ha uri vha ḓivha, u shumela na u lwela u edzisa Yehova ane a vha “Mudzimu o takalaho.” (1 Tim. 1:11; Ps. 16:11) Samusi Mudzimu e Mudzimu o takalaho, u ṱoḓa na riṋe ri tshi takala nahone uri ṋea zwiitisi zwinzhi zwa u takala.—Doit. 12:7; Muh. 3:12, 13.

2, 3. (a) Dakalo ndi mini? (b) Ndi ngani zwi tshi nga ri konḓela uri ri takale?

² Hu pfi mini nga inwi? Naa no takala? Naa ni nga vha na dakalo ḽo engedzeaho? U takala ndi u ḓipfa nga nḓila yavhuḓi na u fushea nga zwine na vha nazwo. Bivhili i sumbedza uri muthu o takalaho ndi ane a fhaṱutshedzwa nga Yehova. Shango ḽine ra khou tshila khaḽo ḽi nga ita uri zwi konḓe uri ri takale. Ndi ngani?

³ Musi ro sedzana na zwiimo zwi konḓaho zwi nga ri konḓela uri ri takale. Zwiimo zwi ngaho sa u felwa nga ane ra mu  funa kana muthu ane ra mu funa a tshi bviswa tshivhidzoni, musi ro sedzana na ṱhalano kana u fhelelwa nga mushumo. Zwi nga ri konḓela uri ri takale arali hu si na mulalo muṱani. U kolelwa nga vhane ra shuma navho kana vhane ra dzhena navho tshikolo, u tovholwa nga zwine ra zwi tenda kana u valelwa dzhele zwi nga ita uri ri si takale. Mutakalo u si wavhuḓi, vhulwadze vhu sa fholi kana u tsikeledzea zwi nga ita uri ri si takale. Yesu Kristo “Murena wa Maanḓa o takalaho ane a vha ene e eṱhe” o vha a tshi takadzwa nga u khuthadza vhathu na u ita uri vha takale. (1 Tim. 6:15; Mat. 11:28-30) Kha Pfunzo yawe ya Thavhani, Yesu o amba nga pfaneleo dzo vhalaho dzine dza ita uri ri takale hu sa londwi uri ri khou tshila kha ḽino shango ḽine ḽa langwa nga Sathane.

4, 5. Ri nga wana hani dakalo na u dzula ro takala?

⁴ Tshithu tsha u thoma tshe Yesu a livhisa ṱhogomelo khatsho ndi tsha ndeme vhukuma: “Hu takala vhane vha ṱhogomela uri vha ṱoḓa u ḓivha Mudzimu, ngauri Muvhuso wa ṱaḓulu ndi wa vhenevho.” (Mat. 5:3) Ri nga sumbedza hani uri ri ṱoḓa u ḓivha Mudzimu? Ri nga zwi sumbedza nga u guda Bivhili, u thetshelesa ndaela dzawe na u ita uri u mu shumela zwi ḓe u thoma vhutshiloni hashu. Arali ra ita zwenezwo, ri ḓo takala. Ri ḓo vha na lutendo lwa khwaṱhaho kha mafulufhedziso ane Mudzimu a ḓo a ḓadzisa hu si kale. “Fulufhelo ḽavhuḓi” ḽine ra ḽi wana Bivhilini ḽi ḓo ri thusa u konḓelela musi ro sedzana na dzithaidzo.—Tito 2:13.

⁵ U vha na vhushaka ho khwaṱhaho na Yehova zwi ita uri ri wane dakalo ḽa tshoṱhe. Muapostola Paulo o ṅwala uri: “Takalani Murenani [Yehova] tshifhinga tshoṱhe. Ndi dovha nda ri, Takalani!” (Vhafil. 4:4) U itela u ḓiphina nga honoho vhushaka, ri tea u vha na vhuṱali vhu bvaho ha Mudzimu. Bivhili i ri: “Muthu wa mashudu ndi we a wana vhuṱali, muthu we a pfuma ṱhalukanyo. Vhuṱali ndi muri wa vhutshilo wa vhe vha vhu fara; ane a pfi wa mashudu ndi uyo we a vhu fara a khwaṱhisa.”—Mir. 3:13, 18.

6. Ri nga wana hani dakalo ḽa tshoṱhe?

⁶ U itela uri ri wane dakalo ḽa tshoṱhe, ri tea u vhala Bivhili na u shumisa zwine ra zwi vhala. Yesu o sumbedza uri ndi zwa ndeme uri ri shumise zwine ra zwi vhala musi a tshi ri: “Arali ni tshi ḓivha zwenezwi zwithu, ni ḓo takala arali na zwi ita.” (Yoh. 13:17; vhalani Yakobo 1:25.) Zwenezwi ndi zwa ndeme arali ri tshi ṱoḓa u vha na vhushaka ho khwaṱhaho na Mudzimu na u wana dakalo ḽa tshoṱhe. Fhedzi ri nga takala hani naho hu na zwithu zwinzhi zwine zwa nga ita uri ri si takale? Kha ri ṱolisise zwiṅwe zwe Yesu a zwi amba kha Pfunzo yawe ya Thavhani.

7. Vhane vha lila vha nga takala hani?

⁷ Bivhili i ri: “Hu takala vhane vha lila, ngauri vha ḓo fhumudzwa.” (Mat. 5:4) Vhaṅwe vha nga ḓivhudzisa uri, ‘Zwi konadzea hani uri vhane vha lila vha takale?’ Yesu o vha a sa khou amba nga ha muṅwe na muṅwe ane a lila. Na vhathu vhavhi vha a lila nga nṱhani ha vhuimo vhu konḓaho vhune ha vhangiwa nga “zwifhinga zwi lemelaho zwi konḓaho u sedzana nazwo.” (2 Tim. 3:1) Fhedzi honoho u lila a hu vha sendedzi tsini na Yehova nahone a hu vha iti uri vha takale. Yesu o vha a tshi khou amba nga vhathu vhane vha ṱoḓa u ḓivha  Mudzimu. Vha lila nga nṱhani ha uri vhathu a vha ṱoḓi u ḓivha Mudzimu na u tshila u tendelana na zwine a zwi ṱoḓa. Vha ḓivha uri vha na tshivhi nahone vha vhona zwithu zwivhi zwine zwa itea kha ḽino shango. Yehova u ṱhogomela vhenevho vhathu vhane vha lila zwi tshi bva mbiluni; u vha khuthadza a tshi shumisa Bivhili na u vha ita uri vha takale.—Vhalani Hesekiele 5:11; 9:4.

8. Ṱalutshedzani uri u vuḓa zwi nga ita hani uri ni takale.

⁸ Bivhili i ri: “Hu takala vho vuḓaho, ngauri vha ḓo vha vhaṋe vha ḽifhasi.” (Mat. 5:5) U vuḓa zwi nga ita hani uri ni takale? Vhathu vhanzhi vha a shanduka nga murahu ha u ḓivha ngoho. Khamusi vho vha vhe vhathu vha tshikhuna, u vusa dzikhakhathi na vhane vha vha na mbiti. Fhedzi zwino vho ambara “vhumuthu vhuswa” nahone vha sumbedza “u pfela vhuṱungu, vhuthu, u ḓiṱukufhadza, u vuḓa, na u sa fhela mbilu.” (Vhakol. 3:9-12) Nga nṱhani ha zwenezwo, zwino vha na mulalo, lufuno nahone vho takala. Bivhili i fulufhedzisa uri vhathu vho raloho vha “ḓo vha vhaṋe vha ḽifhasi.”—Ps. 37:8-10, 29.

9. (a) Vho vuḓaho vha ḓo vha “vhaṋe vha ḽifhasi” nga nḓila-ḓe? (b) Ndi ngani vhathu vhane vha vha na “nḓala na ḓora ḽa zwo lugaho” vho takala?

⁹ Vho vuḓaho “vha ḓo vha vhaṋe vha ḽifhasi” nga nḓila-ḓe? Vhafunziwa vha Yesu vho ḓodzwaho vha ḓo vha vhaṋe vha ḽifhasi musi vha tshi ḽi vhusa sa mahosi na vhotshifhe. (Nzumb. 20:6) Vhathu vhanzhi vhane vha sa ḓo tshila ṱaḓulu vha ḓo vha vhaṋe vha ḽifhasi samusi vha tshi ḓo tshila tshoṱhe khaḽo nga mulalo, vho fhelela nahone vho takala. Vhenevho vhathu vho takala nga nṱhani ha uri vha na “nḓala na ḓora ḽa zwo lugaho.” (Mat. 5:6) Nḓala na ḓora ḽavho ḽa zwo lugaho ḽi ḓo fushwa shangoni ḽiswa. (2 Pet. 3:13) Vhathu vho lugaho vha ḓo takala nahone a vha tsha ḓo dovha vha lila nga nṱhani zwithu zwi si zwavhuḓi zwine zwa itiwa nga vhathu vhavhi.—Ps. 37:17.

10. U khathutshela zwi amba mini?

¹⁰ Bivhili i ri: “Hu takala vhakhathutsheli, ngauri vha ḓo khathutshelwa.” (Mat. 5:7) Ipfi ḽa Luheberu ḽine ḽa ri u khathutshela ḽi amba “u pfela vhuṱungu.” Nga hu fanaho, na ipfi ḽa Lugerika ḽi amba nga u pfela muṅwe muthu vhuṱungu. U khathutshela zwi fhira u sokou pfela muṅwe muthu vhuṱungu. Bivhili i amba uri u khathutshela zwi katela u ita zwiṅwe zwithu u itela u thusa vhaṅwe.

11. Ri guda mini kha tshifanyiso tsha Musamaria nga ha u khathutshela?

¹¹ Vhalani Luka 10:30-37. Tshifanyiso tsha Yesu tsha Musamaria tshi sumbedza zwine u khathutshela zwa amba zwone. U pfela vhuṱungu na u khathutshela ha Musamaria zwo mu sudzulusela uri a thuse munna we a vha o huvhala. Nga murahu ha u amba tshenetsho tshifanyiso, Yesu o ri: “Tshimbila u ite zwenezwo.” Ri nga ḓivhudzisa uri: ‘Naa ndi khou ita zwi fanaho? Naa ndi a pfela vhuṱungu u fana na Musamaria? Naa ndi nga khathutshela na u sumbedza vhuthu vhane vha khou sedzana na vhuimo vhu konḓaho? Naa ndi nga ita zwo engedzeaho u itela u thusa vhahashu vho no vhaho vhalala, tshilikadzi na vhana vha si na vho khotsi? Naa ndi nga ita vhuḓidini ha u “ṱuṱuwedzani vho tsikeledzeaho”?’—1 Vhathes. 5:14; Yak. 1:27.

12. U khathutshela zwi ita hani uri ri takale?

¹² U khathutshela zwi ita hani uri ri takale? Musi ri tshi khathutshela vhaṅwe, ri a takala ngauri ri vha ro ṋea. Zwiṅwe hafhu, ri vha ri tshi khou takadza Yehova. (Mish. 20:35; vhalani Vhaheberu 13:16.)  Musi Khosi Davida a tshi amba nga ane a khathutshela vhaṅwe, o ri: “Yehova u ḓo mu linda, u ḓo londola vhutshilo hawe; u ḓo dzula hayani ó takala.” (Ps. 41:1, 2) Arali ra khathutshela vhaṅwe na Yehova u ḓo ri khathutshela nahone ri ḓo wana dakalo ḽa tshoṱhe.—Yak. 2:13.

13, 14. U vha na mbilu yo ṱambaho zwi ita hani uri ni takale?

¹³ Yesu o ri: “Hu takala vha mbilu dzo ṱambaho, ngauri vha ḓo vhona Mudzimu.” (Mat. 5:8) U itela uri mbilu dzashu dzi dzule dzo ṱamba, ri tea u humbula na u tama zwithu zwo kunaho. Zwine ra humbula zwi tea u dzula zwo kuna u itea uri ri kone u vha na vhushaka ho khwaṱhaho na Yehova.—Vhalani 2 Vhakorinta 4:2; 1 Tim. 1:5.

¹⁴ Vhane vha vha na mbilu dzo ṱambaho vha ḓiphina nga u vha na vhushaka ho khwaṱhaho na Yehova. O ri: “Vha a takala vhane vha kuvha zwiambaro zwavho.” (Nzumb. 22:14) Vha “kuvha zwiambaro zwavho” nga muhumbulo ufhio? Kha Vhakriste vho ḓodzwaho u “kuvha zwiambaro zwavho” zwi amba uri Yehova u vha dzhia vho kuna phanḓa hawe, a vha tsha ḓo sina nahone vha ḓo ḓiphina nga hu sa fheli ngei ṱaḓulu. Vha gogo ḽihulu vhane vha vha na fulufhelo ḽa u tshila kha ḽifhasi vha nga ḓiphina nga u vha na vhushaka havhuḓi na Mudzimu sa khonani dzawe. Zwino vha khou “ṱanzwa zwiambaro zwavho vha zwi tshenisa nga malofha a Ngwana.”—Nzumb. 7:9, 13, 14.

15, 16. Vha mbilu dzo ṱambaho vha nga “vhona” hani Mudzimu?

¹⁵ Vha mbilu dzo ṱambaho vha nga “vhona” hani Mudzimu ngeno a tshi ri “muthu á mbona ha nga tshili”? (Ek. 33:20) Ipfi ḽa Lugerika ḽine ḽa ri “vhona,” ḽi nga amba u vhona zwithu nga maṱo a muhumbulo, u pfesesa na u ḓivha. U “vhona” Mudzimu zwi amba u pfesesa nḓila ine a vha ngayo na u funa pfaneleo dzawe. (Vhaef. 1:18) Yesu o sumbedza pfeneleo dzine Mudzimu a vha nadzo, ndi ngazwo o ri: “A vhonaho nṋe u vhona na Khotsi.”—Yoh. 14:7-9.

¹⁶ Vhagwadameli vha ngoho vha “vhona” Mudzimu musi vha tshi ṱhogomela zwine a vha itela zwone. (Yobo 42:5) Vha dovha vha “vhona” kana u livhisa ṱhogomelo kha zwithu zwavhuḓi zwine Yehova a fulufhedzisa uri u ḓo zwi itela vha mbilu dzo ṱambaho na vhane vha mu shumela nga u fulufhedzea. Zwi tou vha khagala uri vhaḓodzwa vho vuswaho vha funi vha ḓo vhona Yehova zwa vhukuma musi vha tshi wana malamba avho a u tshila ṱaḓulu.—1 Yoh. 3:2.

17. U vha na mulalo zwi ita hani uri ni takale?

¹⁷ Yesu o dovha a ri: “Hu takala vhadzia-mulalo.” (Mat. 5:9) Vhane vha ita vhuḓidini ha u lwela uri vha ite mulalo na vhaṅwe vhathu vha a takala. Mufunziwa Yakobo o ṅwala uri: “Mbeu ya mutshelo wa u luga yo zwalwa hu na mulalo vhukati ha vhane vha ita uri hu vhe na mulalo.” (Yak. 3:18) Arali ro khukhulisana na muṅwe tshivhidzoni kana muṱani, ri nga humbela thuso kha Mudzimu uri a ri thuse uri ri ite mulalo na onoyo muthu. Nga zwenezwo, Yehova u ḓo ni ṋea muya wawe mukhethwa une wa ḓo ni thusa uri ni vhe na pfeneleo dzine Mukriste a fanela u vha nadzo nahone ni ḓo takala. Yesu o sumbedza nḓila ine zwa vha zwa ndeme ngayo uri ri vhe na mulalo musi a tshi ri: “Arali u tshi khou isa tshifhiwa tshau aletareni nahone musi u henefho wa humbula uri wahau o u sinyutshela, sia tshifhiwa tshau henefho phanḓa ha aletare, u thome u ye u ite mulalo na wahau, nga murahu u kone u ṋekedza tshifhiwa tshau.”—Mat. 5:23, 24.

18, 19. Vhakriste vha nga takala hani naho vha tshi tovholwa?

¹⁸ Bivhili i ri: “Ni takale musi vhathu vha tshi ni sema na u ni tovhola, vha tshi ni pomoka vhuvhi hoṱhe hu u zwifha nga nṱhani ha dzina ḽanga.” Yesu o vha a tshi khou amba uri mini? O ri: “Takalani ni pembele, ngauri malamba aṋu ndi manzhi ngei ṱaḓulu, na vhaporofita vhe vha vha hone phanḓa haṋu vho ḓi vha tovhola.” (Mat. 5:11, 12) Musi vhaapostola vha tshi rwiwa na u vhudzwa u pfi vha songo tsha huwelela vho “ṱuwa henefho Sanhedrini vho takala.” A si uri vho vha vho takalela uri vho rwiwa. Fhedzi vho takala “ngauri Mudzimu o vhona vho fanela u nyadziwa nga nṱhani ha dzina ḽa Yesu.”—Mish. 5:41.

¹⁹ Ṋamusi, vhathu vha Yehova vha konḓelela vho takala musi vha tshi tovholwa nga nṱhani ha dzina ḽa Yesu kana musi vho sedzana na milingo i konḓaho. (Vhalani Yakobo 1:2-4.) U fana na vhaapostola, a ri vhi ri tshi khou takalela honoho u tovholwa. Fhedzi arali ra dzula ri tshi fulufhedzea kha Yehova Mudzimu kha tshenetsho tshifhinga tsha musi ro sedzana na milingo, u ḓo ri thusa uri ri konḓelele. Sa tsumbo, ṱhogomelani zwe zwa itea kha Henryk Dornik na ṅwana wa hawe. Nga August 1944, vho iswa gammbani ya tshengedzo. Vhatovholi vho ri: “A zwi konadzei u vha kombetshedza uri vha ite zwine ra ṱoḓa vha tshi zwi ita. U tovholwa zwi ita uri vha takale.” Wahashu Dornik o ri: “Naho ndo vha ndi sa zwi ṱoḓi u tovholwa, u vha na tshivhindi na u dzula ndi tshi fulufhedzea kha Yehova zwo nnyita uri ndi takale. . . . Thabelo dzi bvaho mbiluni dzo ntsendedza tsini-tsini na Yehova nahone o nthusa tshifhinga tshoṱhe.”

20. Ndi ngani ri tshi takalela u shumela “Mudzimu o takalaho”?

²⁰ Musi ri tshi ḓivha uri ri takalelwa nga “Mudzimu o takalaho,” ri ḓo takala hu sa londwi u tovholwa nga nṱhani ha zwine ra tenda khazwo, u pikiswa nga vha muṱani, vhulwadze kana u vha mulala. (1 Tim. 1:11) Ri dovha ra takala nga nṱhani ha mafulufhedziso a Mudzimu washu “a sa zwifhi.” (Tito 1:2) Ri ḓo takala vhukuma musi mafulufhedziso a Yehova a tshi ḓadzea. Ri ḓo takadzwa nga u vhona thaidzo na milingo ine ra sedzana nayo zwino zwi si tsha vha hone. Paradisoni ine ya khou ḓa, phaṱhutshedzo dza Yehova dzi ḓo fhira u ṱalukanya hashu hoṱhe. Ri ḓo tou khana sa ṋamana. Ri ḓo “takalela muḓalo wa mulalo.”—Ps. 37:11.