U MONA na shango ḽoṱhe, vhahulwane vha dzhiela nṱha mushumo une vha vha nawo vhukati ha vhathu vha Mudzimu. Vhenevho vhahulwane ndi phaṱhutshedzo khulwane kha riṋe roṱhe! Naho zwo ralo, a si kale-kale ho itwa tshanduko. Vhahulwane vho no vhaho vhalala vho humbelwa uri vha ṋee vhahulwane vha tshivhidzo vhane vha kha ḓi vha vhaswa vhuṅwe ha vhuḓifhinduleli vhuhulwane he vha vha vhe naho. Nga nḓila-ḓe?

Nzudzanyo ntswa ndi ya uri vhalavhelesi vha ḽiisela na vhahashu vhane vha gudisa kha zwikolo zwi re hone ndanguloni ya Mudzimu vha si tsha bvela phanḓa na yeneyo tshumelo musi vha tshi swikisa miṅwaha ya 70. Zwiṅwe hafhu, vhahulwane vhane vha vha na miṅwaha ya 80 vha ḓirula mishumo i ngaho u vha mudzudzanyi wa Komiti ya Davhi kana u vha mudzudzanyi wa vhahulwane vha tshivhidzo tsha henefho, vha i hwesa vhahulwane vha zwivhidzo vhane vha kha ḓi vha vhaswa. Vhenevha vhahulwane vhono vhaho vhalala vho aravha hani kha yeneyi tshanduko? Vho sumbedza u fulufhedzea kha Yehova na ndangulo yawe!

Ken we a shuma sa mudzudzanyi wa Komiti ya Davhi lwa miṅwaha i ṱoḓaho u vha 49, o ri: “Ndo tendelana vhukuma na tsheo ye ya dzhiiwa. Nga matsheloni a ḽeneḽo ḓuvha, ndo rabela Yehova ndi tshi khou mu vhudza nga ha uri hu khou ṱoḓea wahashu ane a kha ḓi vha muswa uri a shume sa mudzudzanyi.” Nḓila ye Ken a ḓipfa ngayo i fana na ine vhahulwane vha fulufhedzeaho vho no vhaho  vhalala vha ḓipfa ngayo u mona na shango ḽoṱhe. Mathomoni vho kulea nungo, samusi vho vha vha tshi takalela u shumela vhahavho.

Esperandio we a vha e mudzudzanyi wa tshigwada tsha vhahulwane tshivhidzoni tshawe o ri: “Zwo mmbavha nyana.” O dovha a ri, “Fhedzi ndo vha tshi ṱoḓa tshifhinga tsho engedzeaho u itela u ṱhogomela mutakalo wanga u si wavhuḓi.” Samusi ri tshi nga vha ro zwi lavhelela, Esperandio o bvela phanḓa a tshi vha phaṱhutshedzo tshivhidzoni tshawe na u shumela Yehova nga u fulufhedzea.

Hu pfi mini nga vhalavhelesi vha dalelaho vhe vha fhedza tshifhinga tshilapfu kha wonoyo mushumo, vhe vha fanela uri vha ite muṅwe mushumo? Allan we a shuma sa mulavhelesi a dalelaho lwa miṅwaha ya 38, o ri, “Ḓuvha ḽe nda pfa eneo mafhungo, ndo vha ndo mangala vhukuma.” Naho zwo ralo, o ṱhogomela mbuyelo dza u gudisa vhanna vhane vha kha ḓi vha vhaswa uri vha ite wonoyo mushumo nahone zwino Allan u khou bvela phanḓa na u shumela Mudzimu nga u fulufhedzea.

Russell we a shuma sa mulavhelesi a dalelaho na u gudisa kha zwikolo zwa vhahulwane vha zwivhidzo lwa miṅwaha ya 40, uri mathomoni ene na mufumakadzi wawe vho vha vho kulea nungo. O ri: “Ro vha ri tshi dzhiela nṱha yeneyo ndugelo nahone ro vha ri tshi pfa u nga ri kha ḓi vha na maanḓa a u bvela phanḓa.” Russell na mufumakadzi wawe vha khou shumisa tshenzhelo yavho na zwe vha zwi guda u itela u thusa vhaṅwe tshivhidzoni tshine vha vha khatsho.

Naho ni sa athu u ḓipfa nga nḓila ye vhathu vho ambiwaho afho nṱha vha ḓipfa ngayo, mafhungo ane a wanala kha 2 Samuele a nga ni thusa u pfesesa vhe vha vhuya vha ḓipfa nga yeneyo nḓila.

Humbulani nga ha musi murwa wa Khosi Davida ane a pfi Abesalomo a tshi vusa dzipfudzungule. Davida o shavhela ngei Mahanaimi, vhubvaḓuvha ha Mulambo wa Yorodane a tshi bva e Yerusalema. Musi Davida na vhe a vha e navho vhe henefho, vho vha vha tshi shaya. Naa ni kha ḓi humbula zwe zwa itea?

Vhanna vhararu vho vha isela mimbete, zwiḽiwa na zwishumiswa zwine vha ḓo zwi shumisa u itela u ḽa. Barasilai o vha e muṅwe wa vhenevho vhanna. (2 Sam. 17:27-29) Musi vhushandukwa ha Abesalomo ho no fhela, Davida o vha a tshi nga kona u humela Yerusalema nahone Barasilai o mu fhelekedza u swika mulamboni wa Yoradane. Davida o mu humbela uri a ye nae Yerusalema. Khosi Davida o humbela u ṋea Barasilai zwiḽiwa naho Barasilai o vha e “mupfumi muhulu” nahone a sa ṱhogi zwiḽiwa zwe Davida a vha a tshi ṱoḓa u mu ṋea. (2 Sam. 19:32-34) Zwe Davida a vha a tshi khou ṱoḓa ho vha hu u vha tsini na Barasilai u itela u vhuyelwa nga nyeletshedzo yawe sa izwi o vha e na tshenzhelo. Zwo vha zwi tshi ḓo vha zwi ndugelo khulwane vhukuma u dzula na u shuma pfamoni!

Nga u ḓiṱukufhadza na u ṱanganedza zwithu nga nḓila ine zwa vha ngayo, Barasilai o sumbedza uri u na miṅwaha ya 80. O dovha a ri: “Naa ndi a kona u fhambanya [vhuḓi] na vhuvhi?” O vha a tshi khou amba uri mini? Barasilai a nga vha o wana vhuṱali musi miṅwaha yawe i tshi khou ḓitanḓulukana i tshi ya. O vha a tshi kona u ṋea  nyeletshedzo yavhuḓi, u fana na “vhahulwane” vhe vha eletshedza Khosi Rehabeamu. (1 Dzikh. 12:6, 7; Ps. 92:12-14; Mir. 16:31) Khamusi zwe Barasilai a amba nga ha u fhambanya vhuḓi na vhuvhi zwo vha zwi tshi khou ambela kha zwe a vha a si tsha kona u zwi ita nga nṱhani ha u vha mulala. O tenda uri u vha mulala zwo vha zwo no kwama nḓila ye a vha a tshi pfa muḓifho wa zwiḽiwa zwavhuḓi ngayo na nḓila ine nḓevhe dzawe dza pfa ngayo. (Muh. 12:4, 5) Barasilai o humbela Davida uri a ye Yerusalema na Kinehamu ane a kha ḓi vha muswa. Khamusi Kinehamu ndi ṅwana wa Barasilai.—2 Sam. 19:36-41.

Tshanduko ntswa ye ha ambiwa nga hayo mathomoni a ino thero, i sumbedza nḓila ye Barasilai a vha a tshi vhona ngayo zwithu. Zwi a pfesesea uri musalauno, a hu sokou sedziwa vhuimo na vhukoni ha muthu u fana na tshifhingani tsha Barasilai, fhedzi hu sedziwa zwo engedzeaho. Ho tea uri hu sedziwe zwe zwa vha zwi tshi ḓo vhuyedza vhahulwane vha fulufhedzeaho u mona na shango ḽoṱhe.

Vhenevho vhanna vha Vhakriste vho no vhaho vhalala vho kona u zwi vhona uri ndangulo ya Yehova i ḓo kona u ita zwo engedzeaho arali vhuḓifhinduleli havho ha nga ṋewa vhaswa. Vhahashu vha tshinnani vho no vhaho vhalala ndi vhone vhane vha gudisa vhaswa, samusi na Barasilai o gudisa murwa wawe na muapostola Paulo o gudisa Timotheo. (1 Vhakor. 4:17; Vhafil. 2:20-22) Vhenevho vhahashu vhane vha kha ḓi vha vhaswa vho sumbedza uri zwino vha “zwifhiwa zwine zwa vha vhathu” nahone vha thusa kha u ‘fhaṱa muvhili wa Kristo.’—Vhaef. 4:8-12; vhambedzani Numeri 11:16, 17, 29.

Vhunzhi ha vhathu vha Yehova zwivhidzoni u mona na shango ḽoṱhe vhe vha ṋea vhaṅwe vhuṅwe ha vhuḓifhinduleli havho, vha kona u ita zwo engedzeaho tshumeloni ya Yehova.

Marco we a vha e mulavhelesi a dalelaho lwa miṅwaha ya 19 o ri: “Zwino vhuimo hanga vhu a ntendela uri ndi swikelele vhafarisi vha vhahashu vha tshifumakadzini vhane vha si vhe vhatendi vha tshivhidzoni tshashu.”

Geraldo we a vha e mulavhelesi a dalelaho lwa miṅwaha ya 28 o ri: “Zwipikwa zwashu zwiswa zwi katela u thusa vho fholaho muyani na u fara pfunzo dza Bivhili dzo engedzeaho.” O amba uri zwa zwino, ene na mufumakadzi wawe vha na pfunzo dza Bivhili dza 15 na uri hu na vhaṅwe vho fholaho muyani vhane vha ḓa miṱanganoni.

Allan we ra amba nga hae mathomoni, o ri: “Zwino ri kona u fhedza tshifhinga tsho engedzeaho kha mushumo wa u huwelela. Ri ḓiphina nga u huwelela fhethu ha vhomuthumunzhi, u huwelela fhethu ha vho ramabindu na u huwelela kha vhahura vhashu nahone kha vhe ra huwelela khavho, vhavhili vho no ḓa Holoni ya Muvhuso.”

Arali ni wahashu ane a fulufhedzea nahone no ṋewa mushumo muswa vhukati ha vhathu vha Mudzimu, hu na nḓila yo khetheaho ine na nga ita zwo engedzeaho. Ni nga tikedza mushumo wa Yehova nga u amba nga ha tshenzhelo yaṋu na vhanna vhane vha kha ḓi vha vhaswa tshivhidzoni. Russell we ra amba nga hae mathomoni, o ri: “Yehova u khou gudisa na u shumisa vhaswa vhavhuḓi na vhane vha vha na vhutsila. Vhahashu vhoṱhe vha khou vhuyelwa vhukuma nga mafulufulu a vhenevho vhahashu musi vha tshi funza na u ita nyendo dza vhulisa!”—Sedzani bogisi ḽine ḽa ri “ Thusani Vhane Vha Kha Ḓi Vha Vhaswa Uri Vha Ite Mvelaphanḓa.”

Arali ni kha ḓi tou bva u dzhenela kha tshumelo yo fhambanaho na ye na vha ni khayo, dzulani ni na mavhonele avhuḓi. Mushumo we na u ita zwi tshi bva mbiluni wo no kwama vhutshilo ha vhathu vhanzhi nahone ni nga bvela phanḓa ni tshi ita nga u ralo. No funwa nahone a zwi timatimisi uri ni do bvela phanḓa ni tshi funwa.

Tsha ndeme vhukuma ndi uri no takadza mbilu ya Yehova. A nga si “[hangwe] mushumo waṋu na lufuno lwe na lu sumbedza ni tshi itela dzina ḽawe, ngauri no shumela vhakhethwa nahone ni khou bvela phanḓa ni tshi vha shumela.” (Vhaheb. 6:10) Lwonolwo luṅwalo lu ri khwaṱhisedza uri zwoṱhe zwe a zwi fulufhedzisa zwi fhira zwithu zwe  ra zwi ita tshifhingani tsho fhiraho. Ni wa ndeme nga maanḓa kha Yehova lune a nga si hangwe mishumo ye na i ita tshifhingani tsho fhiraho na vhuḓidini vhune na bvela phanḓa ni tshi vhu ita, u itela u mu takadza!

Hu pfi mini arali hu si inwi we na wana mushumo muswa samusi ro zwi haseledza afho nṱha? Eneo mafhungo a nga kha ḓi ni kwama ngaho livhaho. Nga nḓila-ḓe?

Arali ni na vhukwamani na wahashu a fulufhedzeaho o no vhaho mulala ane a khou ita muṅwe mushumo, ni nga vhuyelwa vhukuma. Ngauri onoyo wahashu u vha o no vhibva nahone e na tshenzhelo. Ṱoḓani nyeletshedzo yawe. Humbelani vhulivhisi khae. Nahone thogomelani nḓila ine a shumisa ngayo tshenzhelo ine a vha nayo kha mushumo wawe muswa na u fulufhedzea hawe musi a tshi u ita.

Hu sa londwi uri ni mulala o wanaho mushumo muswa kana wahashu wa tshinnani kana wa tshifumakadzini ane a nga vhuyelwa nga mushumo wonoyo, dzulani ni tshi humbula uri Yehova u dzhiela nṱha u fulufhedzea ha vhane ndi kale vha khou mu shumela na vhane vha bvela phanḓa vha tshi ita nga u ralo.