1. Yesu o fhulufhedzisa mini u ya nga Mateo 11:28-30?

YESU o fhulufhedzisa gogo ḽe ḽa vha ḽo mu thetshelesa zwithu zwi takadzaho. O ri: “Iḓani ha nṋe . . . ndi ḓo ni homolosa.” (Vhalani Mateo 11:28-30.) Ḽeneḽo ḽo vha ḽi si fhulufhedziso zwaḽo. Sa tsumbo, humbulani nga ha zwe a zwi itela mufumakadzi we a vha a tshi khou lwala.

2. Ndi mini zwe Yesu a zwi itela mufumakadzi we a vha a khou lwala?

² Onoyo mufumakadzi o vha e kha vhuimo vhu ṱungufhadzaho vhukuma nahone a tshi khou ṱoḓa thuso. O ya kha madokotela manzhi a tshi fhulufhela uri a ḓo mu fhodza. O tambula nga honoho vhulwadze lwa miṅwaha ya 12, fhedzi ho ngo wana dzilafho. U ya nga Mulayo wa Mushe o vha e na tshika. (Lev. 15:25) Musi a tshi pfa uri Yesu u khou fhodza vhathu vhane vha khou lwala, o ya a mu ṱoḓa. Musi a tshi mu wana, o kwama lupendelo lwa tshiambaro tshawe tsha nga nnḓa nahone a fhola nga u bonya ha iṱo. Yesu ho ngo sokou mu fhodza fhedzi, fhedzi o mu fara nga nḓila ye ya ita uri a ḓipfe a tshi funwa na u ṱhonifhiwa. Sa tsumbo, musi Yesu a tshi amba nae o sumbedza uri u a mu funa na u mu ṱhonifha nga u shumisa ipfi “ṅwana’nga.” Zwenezwo zwo homolosa na u khwaṱhisa onoyo mufumakadzi.—Luka 8:43-48.

3. Ri ḓo fhindula mbudziso dzifhio?

³ Ṱhogomelani uri onoyo mufumakadzi ndi ene we a ya kha Yesu. O ita vhuḓidini ha u ya khae. Na riṋe ri tea u ita vhuḓidini ha u ya kha Yesu. Musalauno, Yesu ha fhodzi nga lwa vhuṱolo vhathu vhane vha ya khae. Fhedzi u kha ḓi ramba vhathu  vhoṱhe, u ri: “Iḓani ha nṋe. . . ndi ḓo ni homolosa.” Kha ino thero ri ḓo fhindula mbudziso ṱhanu dzine dza ri: Ri nga ya hani kha Yesu? Yesu o vha a tshi khou amba mini musi a tshi ri: “Hwalani dzhogo yanga”? Ri nga guda mini kha Yesu? Ndi ngani mushumo we a ri ṋea wone u tshi homolosa? Nahone ri nga bvela hani phanḓa ri tshi homolowa nga fhasi ha dzhogo ya Yesu?

4-5. Ri nga ya hani kha Yesu?

⁴ Ri nga ya kha Yesu nga u guda zwoṱhe zwine ra nga kona nga ha zwithu zwe a zwi amba na u zwi ita. (Luka 1:1-4) Ndi vhuḓifhinduleli hashu u ita zwenezwo, a hu na muthu ane a nga ri itela zwone. Zwiṅwe hafhu, ri ya kha Yesu nga u dzhia phetho ya u lovhedzwa nahone ra vha mufunziwa wawe.

⁵ Iṅwe nḓila ine ra nga ya ngayo kha Yesu ndi nga u ya kha vhahulwane vha tshivhidzo musi ri tshi ṱoḓa thuso. Yesu u shumisa zwenezwi “zwifhiwa zwine zwa vha vhathu” u itela u ṱhogomela nngu dzawe. (Vhaef. 4:7, 8, 11; Yoh. 21:16; 1 Pet. 5:1-3) Ri tea u ita vhuḓidini ha u humbela thuso yavho. Ri nga si lavhelele uri vhahulwane vha ḓivhe zwine ra khou humbula kana zwine ra zwi ṱoḓa. Wahashu wa tshinnani ane a pfi Julian o ri: “Ndo tea u ṱuwa Bethele nga nṱhani ha mutakalo u si wavhuḓi nahone iṅwe khonani yanga yo mmbudza uri ndi nga humbela vhahulwane uri vha ḓe vha nṱuṱuwedze. Ndo vha ndi tshi vhona u nga a zwi ṱoḓei. Fhedzi nga murahu ndo humbela thuso yavho nahone vha ḓa, tshenetsho ndi tshiṅwe tsha zwifhiwa zwavhuḓi zwe nda vhuya nda zwi ṋewa.” U fana na vhahulwane vhavhili vhe vha dalela Julian, vhahulwane vha fhulufhedzeaho vha nga ri thusa uri ri ḓivhe “muhumbulo wa Kristo” uri ri kone u pfesesa na u edzisa nḓila ine a humbula na u dzhia ngayo zwithu. (1 Vhakor. 2:16; 1 Pet. 2:21) Tshenetsho ndi tshiṅwe tsha zwifhiwa zwavhuḓi zwine vha nga ri ṋea zwone.

6. Yesu o vha a tshi khou amba mini musi a tshi ri: “Hwalani dzhogo yanga”?

⁶ Musi Yesu a tshi ri: “Hwalani dzhogo yanga,” khamusi o vha a tshi khou amba uri: “Tendani u vhuswa nga nṋe.” Kana khamusi o vha a tshi khou amba uri: “Ivhani nga fhasi ha dzhogo yanga nahone ni shumele Yehova na nṋe.” Hu sa londwi uri o vha a tshi khou amba zwifhio, u hwala dzhogo yawe zwi amba uri ri tea u bva biko.

7. U ya nga Mateo 28:18-20, ro ṋewa mushumo ufhio nahone ri nga vha na vhungoho ha mini?

⁷ Ri ya kha Yesu nga u ḓiṋekedzela kha Yehova na u lovhedzwa. Yesu o ramba vhathu vhoṱhe uri vha ḓe khae nahone a nga si vhuye a thudzela kule vhane vha ṱoḓa u shumela Mudzimu zwi tshi bva mbiluni. (Yoh. 6:37, 38) Vhatevheli vha Kristo vho ṋewa ndugelo ya u ita mushumo we Yehova a u ṋea Yesu. Ri nga vha na vhungoho ha uri Yesu u ḓo dzula e na riṋe kha wonoyo mushumo.—Vhalani Mateo 28:18-20.

8-9. Ndi ngani vhathu vhane vha ḓiṱukufhadza vho vha vha tshi funa Yesu nahone ndi mbudziso dzifhio dzine ra fanela u ḓivhudzisa dzone?

⁸ Vhathu vhane vha ḓiṱukufhadza vho vha vha tshi funa Yesu. (Mat. 19:13, 14; Luka 7:37, 38) Ndi ngani? Humbulani nga ha phambano ye ya vha i hone vhukati ha Yesu na Vhafarisei. Vhafarisei vho vha vhe si na lufuno nahone vha tshi ḓihudza. (Mat. 12:9-14) Fhedzi Yesu o vha e na lufuno nahone a tshi ḓiṱukufhadza. Vhafarisei vho vha vha tshi ṱoḓa u dzhielwa nṱha na u vha vhaḓivhalea. Yesu o amba uri ri songo vha nga yeneyo nḓila nahone o vhudza vhafunziwa vhawe uri vha ḓiṱukufhadze na uri  vha shumele vhaṅwe. (Mat. 23:2, 6-11) Vhafarisei vho ita uri vhathu vha ite zwine vhone vha funa nga u vha shushedza. (Yoh. 9:13, 22) Fhedzi zwe Yesu a zwi ita na u zwi amba zwo homolosa vhaṅwe ngauri zwo vha zwi tshi sumbedza uri u na lufuno na vhuthu.

⁹ Naa no guda kha Yesu? Ḓivhudziseni uri: ‘Naa vhaṅwe vha ndzhia ndo vuḓa nahone ndi tshi ḓiṱukufhadza? Naa ndi a ita mishumo ine ya vhonala i ya fhasi ndi tshi itela vhaṅwe nga u ḓifunela? Naa ndi a sumbedza vhaṅwe vhuthu?’

12-14. Ndi ngani mushumo we Yesu a ri ṋea u tshi homolosa?

¹² Ndi ngani u ita mushumo we Yesu a ri ṋea wone zwi tshi ri homolosa? Hu na zwiitisi zwinzhi, fhedzi kha ri haseledze zwiṅwe zwazwo.

¹³ Ri na vhalisa vha khwinesa. Naho Yehova e Wa-Ṱaḓulu-ṱaḓulu, u a livhuwa na u dzhiela nṱha mushumo une ra u ita. (Vhaheb. 6:10) Nahone u ri ṋea maanḓa ane ra a ṱoḓa uri ri kone u ita mushumo we a ri ṋea wone. (2 Vhakor. 4:7; Vhagal. 6:5) Yesu ane a vha Khosi yashu, o ri vhetshela tsumbo ya nḓila ine ra tea u fara ngayo vhaṅwe. (Yoh. 13:15) Nahone vhahulwane vhane vha ri lisa vha lingedza u edzisa tsumbo ya Yesu ane a vha “mulisa . . . muhulwane.” (Vhaheb. 13:20; 1 Pet. 5:2) Vha ita zwoṱhe zwine vha nga kona uri vha vhe na vhuthu, vha ri ṱuṱuwedze na uri vha vhe na tshivhindi musi vha tshi khou ri ṱhogomela na u ri tsireledza.

¹⁴ Ri na khonani dza khwinesa. Ri na khonani dzine dza ri funa vhukuma nahone riṋe navho ri ita mushumo u fhiraho yoṱhe. Ri na ndugelo ya u shuma na vhathu vhane vha ḓifara zwavhuḓi fhedzi a vha ḓidzhieli nṱha. Vha na vhukoni vhunzhi fhedzi vha a ḓiṱukufhadza nahone vha dzhia vhaṅwe vhe vhahulwane khavho. A vha ri dzhii sa vhashumisani vhavho fhedzi, fhedzi vha ri dzhia sa khonani dzavho. Nahone vha a ri funa vhukuma lune vha nga ri fela.

15. Ri tea u ḓipfa hani nga mushumo une ra khou ita?

¹⁵ Ri na mushumo wa khwinesa. Ri funza vhathu ngoho nga ha Yehova na u bvukulula mazwifhi o ambiwaho nga Diabolo. (Yoh. 8:44) Sathane u khou tsikeledza vhathu nga mazwifhi awe. Sa tsumbo, u ṱoḓa ri tshi tenda uri Yehova a nga si ri hangwele zwivhi zwashu na uri a ri funei. Enea ndi mazwifhi madala-dala ane a tsikeledza vhathu. Musi ri tshi ya kha Kristo, ri hangwelwa zwivhi zwashu. Nahone ngoho ndi ya uri Yehova u a ri funa vhukuma. (Vharoma 8:32, 38, 39) Zwi a ri takadza vhukuma u thusa vhathu uri vha ḓitike nga Yehova na u vhona vha tshi khwinisa vhutshilo havho!

16. Muhwalo une Yesu a ri humbela uri ri u hwale wo fhambana hani na mihwalo ine ra vha nayo?

¹⁶ Muhwalo une Yesu a ri humbela uri ri u hwale wo fhambana na mihwalo ine riṋe ra vha nayo. Sa tsumbo, musi ri tshi bva mishumoni ya u ḓitshidza ri ḓipfa ro neta nahone ri songo takala. Zwo fhambanaho na zwenezwo, musi ri tshi bva u shumela Yehova na Kristo, ri ḓipfa ro takala vhukuma. Ri nga ḓipfa ro neta musi ri tshi bva mishumoni ya u ḓitshidza nahone ra ḓikombetshedza u ya miṱanganoni nga eneo madekwana. Fhedzi musi ri tshi bva miṱanganoni ri ḓipfa ro homolowa vhukuma. Nga hu fanaho, musi ri tshi ita vhuḓidini ha u guda Bivhili riṋe vhaṋe na u huwelela, ri ḓipfa ro homolowa!

17. Ri fanela u pfesesa mini nga ha vhuimo hashu nahone ri fanela u humbulisisa nga ha mini?

¹⁷ Ri fanela u pfesesa uri a ri vho makona-zwoṱhe. Nga zwenezwo, ri fanela u humbulisisa nga zwine ra lingedza u zwi ita. Sa tsumbo, ri nga fhedza nungo nnzhi ri khou ḓikuvhanganyela lupfumo. Ṱhogomelani zwe Yesu a vhudza munna wa mupfumi we a mu vhudzisa uri: “Ndi tea u ita mini uri ndi wane vhutshilo vhu sa fheli?” Onoyo munna o vha a tshi tevhedza Mulayo. A nga vha o vha e muthu wavhuḓi ngauri Evangeli ya Marko i ri Yesu “a mu funa.” Yesu o ramba onoyo munna, o ri: “Tshimbila u ye u rengise zwithu zwine wa vha nazwo . . . u kone u ḓa u vhe mutevheli wanga.” Onoyo munna o vha a tshi ṱoḓa u tevhela Yesu, fhedzi a sa ṱoḓi u ṱutshela “thundu nnzhi” dze a vha e nadzo. (Marko 10:17-22) O hana dzhogo ye Yesu a vha a tshi khou ṱoḓa u mu ṋea yone nahone a bvela phanḓa a tshi shumela “Lupfumo.” (Mat. 6:24) No vha ni tshi ḓo ita mini?

18. Nga zwiṅwe zwifhinga ri fanela u ita mini nahone ndi ngani?

¹⁸ Ndi zwavhuḓi uri nga zwiṅwe zwifhinga, ri humbulisise nga ha zwithu zwine zwa ḓa u thoma vhutshiloni hashu. Ndi ngani? U itela u vhona arali ri khou shumisa nungo dzashu nga vhuṱali. Muṅwe muṱhannga ane a pfi Mark o ri: “Ndo vha ndi tshi humbula uri ndi khou ḓidzima zwiṅwe zwithu. Ndo vha ndi khou vula nḓila, fhedzi ndi tshi fhedza tshifhinga tshinzhi na nungo dzanga ndi tshi khou lingedza u wana tshelede u itela uri ndi kapule mapfura nga lebula. Ndo vha ndi tshi ḓivhudzisa uri ndi ngani vhutshilo hanga vhu muhwalo. Ndo mbo ḓi zwi ṱhogomela uri ndo vha ndi khou vhea madzangalelo anga u thoma nahone nda fha Yehova masalela.” Mark o shandula nḓila ine a humbula na u tshila ngayo u itela uri a kone u ita zwo engedzeaho tshumeloni ya Yehova. O ri: “Nga zwiṅwe zwifhinga ndi a vhilaela nga ha tshelede, fhedzi nga thuso ya Yehova na thikhedzo ya Yesu, ndi livhisa ṱhogomelo kha u shumela Yehova.”

19. Ndi ngani zwi zwa ndeme u vha na mavhonele o teaho?

¹⁹ Ri ḓo bvela phanḓa ri tshi homoloswa nga dzhogo ya Yesu arali ra ita zwithu zwiraru. Tsha u thoma, ivhani na mavhonele o teaho. Ri khou ita mushumo wa Yehova, nga zwenezwo, wonoyo mushumo u fanela u itwa nga nḓila yawe. Riṋe ri vhashumi nahone Yehova ndi ene o ri ṋeaho mushumo. (Luka 17:10) Arali ra lingedza u ita mushumo wawe nga nḓila yashu, zwi ḓo ri konḓela. Na mboho i re na maanḓa i nga ḓihuvhadza arali ya dzulela u ita phambana-nadzo na u lwisana na dzhogo ya muṋe wayo. Fhedzi arali ra tevhela vhulivhisi ha Yehova, ri ḓo kona u ita zwithu zwe ra vha ri tshi humbula uri ri nga si zwi kone na u kunda thaidzo dze ra vha ri tshi humbula u nga ri nga si dzi kunde. Ni songo hangwa uri a hu na muthu  ane a nga kona u thivhela zwine Yehova a ṱoḓa u zwi ita!—Vharoma 8:31; 1 Yoh. 4:4.

20. Tshiṱuṱuwedzi tshashu tsha u hwala dzhogo ya Yesu tshi tea u vha tshifhio?

²⁰ Tsha vhuvhili, itani zwithu ni na zwiṱuṱuwedzi zwavhuḓi. Tsha ndeme kha riṋe ndi u rendisa Yehova Khotsi ashu wa lufuno. Vhathu vha ḓanani ḽa u thoma vhe vha ita zwithu vha tshi ṱuṱuwedzwa nga tseḓa vho fheleledza vha songo takala nahone vho litsha u hwala dzhogo ya Yesu. (Yoh. 6:25-27, 51, 60, 66; Vhafil. 3:18, 19) Fhedzi vhathu vhe vha ita zwithu vha tshi ṱuṱuwedzwa nga u funa Mudzimu na u funa vhahavho vho bvela phanḓa vha tshi hwala dzhogo ya Yesu vhutshilo havho hoṱhe vho takala nahone vhe na fhulufhelo ḽa u shuma na Kristo ngei ṱaḓulu. Na riṋe ri ḓo dzula ro takala arali ra hwala dzhogo ya Yesu ri na zwiṱuṱuwedzi zwavhuḓi.

21. Ndi mini zwine Yehova a nga zwi ita u ya nga Mateo 6:31-33?

²¹ Tsha vhuraru, ivhani na vhungoho ha uri Yehova u ḓo vha na inwi. Ro khetha u ḓidzima zwiṅwe zwithu na u ita mushumo u songo leluwaho. Yesu o ri vhudza uri ri ḓo tovholwa. Fhedzi ri tea u vha na vhungoho ha uri Yehova u ḓo ri thusa uri ri konḓelele musi ro sedzana na thaidzo. U konḓelela zwi ita uri ri vhe na nungo. (Yak. 1:2-4) Ri nga vha na vhungoho ha uri Yehova u ḓo ri ṋea zwithu zwine ra zwi ṱoḓa, uri Yesu u ḓo ri lisa na uri vhahashu vha ḓo ri ṱuṱuwedza. (Vhalani Mateo 6:31-33; Yoh. 10:14; 1 Vhathes. 5:11) A ri lili tshithu!

22. Ri nga vhuyelwa nga mini?

²² Mufumakadzi we Yesu a mu fhodza o ḓipfa o homolosea nga ḓuvha ḽe a fhodzwa ngaḽo. Fhedzi o vha a tshi ḓo bvela phanḓa o homolosea arali o vha mufunziwa wa Kristo a fhulufhedzeaho. Ni vhona u nga o ita mini? Arali o khetha u hwala dzhogo ya Yesu, u ḓo vha o lambedzwa nga u vhusa na Yesu ṱaḓulu. Zwoṱhe zwe a ḓidzima a tshi itela Yesu zwo vha zwi tshi ḓo vha zwi zwiṱuku musi ri tshi zwi vhambedza na yeneyo phaṱhutshedzo. Hu sa londwi uri ri na fhulufhelo ḽa u tshila kha ḽifhasi kana ṱaḓulu, ri a vhuyelwa nge ra tenda Yesu a tshi ri ramba nga maipfi ane a ri: “Iḓani ha nṋe!”