THERO I GUDWAHO 37
Ndi Ngani Ri Tshi Tea U Ita Zwine Yehova A Ṱoḓa Nga U Ḓifunela Nahone Ri Nga Zwi Ita Hani?
“Ri nga kundwa hani u ḓiṱukufhadzela Khotsi?” —VHAHEB. 12:9.
LUIMBO 9 Yehova Ndi Khosi Yashu!
MANWELEDZO *
1. Ndi ngani ri tshi tea u ita zwine Yehova a ṱoḓa?
RI TEA u ita zwine Yehova a ṱoḓa * ngauri ndi ene Musiki washu. Nga nṱhani ha zwenezwo, ndi ene a re na ndugelo ya u ri vhudza zwine ra tea u zwi ita. (Nzumb. 4:11) Tshiṅwe tshiitisi tshine ra vha natsho tsha u mu thetshelesa ndi uri u vhusa nga nḓila yo teaho. Vhathu vhanzhi vho no vhusa vhaṅwe vhathu. U fhambana navho, Yehova ndi Muvhusi o ṱalifhaho, a re na lufuno, khathutshelo na ane a pfela vhuṱungu u fhira vhoṱhe.—Ek. 34:6; Vharoma 16:27; 1 Yoh. 4:8.
2. Ndi zwifhio zwiitisi zwine Vhaheberu 12:9-11 ya ri ṋea zwone zwa u thetshelesa Yehova?
2 Yehova u ṱoḓa ri tshi mu thetshelesa, hu si nga nṱhani ha uri ri a mu ofha, fhedzi nga nṱhani ha uri ri a mu funa sa Khotsi ashu wa lufuno. Kha vhurifhi he Paulo a vhu ṅwalela Vhaheberu o amba uri ri tea “u ḓiṱukufhadzela Khotsi” ngauri u ri gudisa u itela uri “ri vhuyelwe.”—Vhalani Vhaheberu 12:9-11.
3. (a) Ri nga sumbedza hani uri ri ita zwine Yehova a ṱoḓa? (b) Ri ḓo fhindula mbudziso dzifhio?
3 Ri ita zwine Yehova a ṱoḓa nga u ita zwoṱhe zwine ra nga kona u itela u mu thetshelesa kha zwithu zwoṱhe na nga u sa ḓitika nga ṱhalukanyo yashu. (Mir. 3:5) Zwi a ri lelutshela u ita zwine Yehova a ṱoḓa musi ri tshi guda nga ha nḓila yavhuḓi ine a vha ngayo. Ndi ngani? Ndi ngauri nḓila ine a vha ngayo i ṱuṱuwedza zwoṱhe zwine a zwi ita. (Ps. 145:9) Musi ri tshi guda zwo engedzeaho nga ha Yehova, ri ḓo mu funa nga ho engedzeaho. Nahone musi ri tshi funa Yehova, a zwi ṱoḓei uri ri vhe na milayo minzhi ya zwine ra tea u zwi ita na u sa zwi ita. Ri lingedza u humbula na u ḓipfa nga nḓila ine ya takadza Yehova na u iledza zwithu zwi si zwavhuḓi. (Ps. 97:10) Fhedzi nga zwiṅwe zwifhinga ri nga kundelwa u thetshelesa Yehova. Ndi ngani? Nahone vhahulwane, vhokhotsi na vhomme vha nga guda mini kha tsumbo ya Muvhusi Nehemia, Khosi Davida na Maria, mme a Yesu? Ino thero i ḓo fhindula dzenedzi mbudziso.
NDI NGANI ZWI TSHI NGA RI KONḒELA U ITA ZWINE YEHOVA A ṰOḒA?
4-5. U ya nga Vharoma 7:21-23, ndi ngani zwi tshi nga ri konḓela uri ri ite zwine Yehova a ṱoḓa?
4 Zwi nga ri konḓela uri ri ite zwine Yehova a ṱoḓa nga nṱhani ha uri ro mamela tshivhi nahone a ro ngo fhelela. Nga zwenezwo, zwi a ri konḓela u mu thetshelesa tshifhinga tshoṱhe. Musi Adamu na Eva vha tshi shandukela Mudzimu nga u ḽa mutshelo we vha dzivhiswa uri vha u ḽe, vho dzhia phetho ya u ḓikhethela zwo lugaho na zwi songo lugaho. (Gen. 3:22) Na ṋamusi hu kha ḓi vha na vhathu vhanzhi vha sa thetshelesi Yehova, vhane vha ṱoḓa u ḓikhethela zwo lugaho na zwi songo lugaho.
5 Vhaṅwe zwi nga vha konḓela u ita zwine Yehova a ṱoḓa tshifhinga tshoṱhe naho vha tshi mu ḓivha na u mu funa. Na muapostola Paulo zwo mu konḓela. (Vhalani Vharoma 7:21-23.) Ri ṱoḓa u ita zwine zwa takadza Yehova, u fana na Paulo. Fhedzi ri tea u dzula ri tshi lwisana na lutamo lwa u ita zwithu zwo khakheaho.
6-7. Ndi tshifhio tshiṅwe tshiitisi tshine tsha nga ita uri zwi konḓe u ita zwine Yehova a ṱoḓa? Ṋeani tsumbo.
6 Tshiṅwe tshiitisi tshine tsha nga ita uri zwi ri konḓele u ita zwine Yehova a ṱoḓa ndi mikhuvha na kuhumbulele kwa vhathu vha fhethu he ra alutshela hone. Zwithu zwine vhathu vhanzhi vha ri vhudza zwone zwi lwisana na zwine zwa funwa nga Mudzimu nahone ri tea u lwa nga nungo dzoṱhe uri ri si humbule u fana navho. Kha ri ṱhogomele iṅwe tsumbo.
7 Fhethu hunzhi zwo ḓowelea uri vhaswa vha ṱuṱuwedzwe uri vha ite tshelede nnzhi. Ho itea zwi fanaho na kha wahashu wa tshifumakadzini ane a pfi Mary *. Musi a sa athu guda nga ha Yehova, o dzhena kha iṅwe ya yunivesithi dza khwine shangoni ḽa hawe. Muṱa wa hawe wo lingedza u mu kombetshedza uri a wane mushumo une wa ḓo ita uri a kapule mapfura nga lebula na une wa ḓo ita uri a ṱhonifhiwe. Nae o vha a tshi ṱoḓa zwi fanaho. Fhedzi zwenezwo zwo shanduka musi a tshi guda nga ha Yehova na u mu funa. Naho zwo ralo, o ri: “Tshiṅwe tshifhinga ndi wana zwibuli zwa u wana tshelede nnzhi fhedzi zwine zwa nga nthivhela u shumela Yehova nga nḓila ine nda khou mu shumela ngayo zwino. Zwi a nkonḓela u hana nga nṱhani ha nḓila ye nda aluswa ngayo. Ndi tea u humbela Yehova uri a nthuse ndi si ṱanganedze mushumo une wa nga ita uri zwi konḓe u mu shumela nga vhuḓalo.”—Mat. 6:24.
8. Ri ḓo haseledza mini?
8 Ri a vhuyelwa musi ri tshi ita zwine zwa funwa nga Yehova. Fhedzi vhane vha vha na vhuḓifhinduleli ho engedzeaho u fana na vhahulwane, vhokhotsi na vhomme vha na tshiṅwe tshiitisi tsha u tevhela vhulivhisi ha Mudzimu. Vha na vhuḓifhunduleli ha u thusa vhaṅwe. Kha ri haseledze dziṅwe tsumbo dzi re Bivhilini dzine dza nga ri gudisa nḓila ine ra nga hwala ngayo vhuḓifhinduleli nga nḓila ine ya takadza Yehova.
VHAHULWANE VHA NGA GUDA MINI KHA NEHEMIA?
Vhahulwane vha shela mulenzhe kha u ṱhogomela Holo, u fana na musi Nehemia a tshi shumisana na vhathu u fhaṱulula mbondo dza Yerusalema (Sedzani dziphara 9-11) *
9. Nehemia o sedzana na thaidzo dzifhio?
9 Yehova o ṋea vhahulwane vhuḓifhinduleli ha ndeme ha u lisa vhathu vhawe. (1 Pet. 5:2) Vhahulwane vha nga guda kha nḓila ye Nehemia a fara ngayo vhathu vha Yehova. Sa muvhusi wa Yuda, Nehemia o vha e na maanḓa vhukuma. (Neh. 1:11; 2:7, 8; 5:14) Humbulani nga ha dziṅwe thaidzo dze Nehemia a sedzana nadzo. O wana uri vhathu vha khou tshikafhadza thembele nahone a vha khou tevhedza Mulayo wa u tikedza Vhalevi nga zwa dzitshelede. Vhayuda vho vha vha sa khou tevhedza mulayo wa Sabatha nahone vhaṅwe vhanna vho vha vha tshi khou vhinga vhafumakadzi vhane vha bva kha tshaka dzi sa gwadameli Yehova. Muvhusi Nehemia o vha a tshi tea u lugisa honoho vhuimo vhu konḓaho.—Neh. 13:4-30.
10. Nehemia o ita mini musi a tshi sedzana na thaidzo?
10 Nehemia ho ngo kombetshedza vhathu vha Mudzimu uri vha ite zwine ene a ṱoḓa. Nṱhani hazwo, o humbela thuso kha Yehova nga thabelo nahone a gudisa vhathu Mulayo wa Yehova. (Neh. 1:4-10; 13:1-3) O sumbedza u ḓiṱukufhadza nga u shuma na vhaṅwe, a ita na u vha thusa u fhaṱulula mbondo dza Yerusalema.—Neh. 4:15.
11. U ya nga 1 Vhathesalonika 2:7, 8, vhahulwane vha tea u fara hani tshivhidzo?
11 Vhahulwane vha nga edzisa Nehemia nga nḓila nnzhi naho vha sa ḓo ṱangana na thaidzo dzi fanaho na dzawe. Sa tsumbo, vha shuma nga hune vha nga kona ngaho u itela u thusa vhahashu. Nahone a vha ḓipfi vhe vha ndeme u fhira vhaṅwe nga nṱhani ha vhuḓifhinduleli vhune vha vha naho. Nṱhani hazwo, vha sumbedza tshivhidzo lufuno. (Vhalani 1 Vhathesalonika 2:7, 8.) Vha na lufuno nahone vha a ḓiṱukufhadza, zwenezwo zwi ita uri vha ambe na vhaṅwe nga vhulenda. Andrew ane ndi kale a muhulwane, o ri: “Ndo ṱhogomela uri vhahashu vha a kwamea vhukuma musi muhulwane a na vhuthu. Zwenezwi zwi a vha ṱuṱuwedza uri vha shumisane na vhahulwane.” Na Tony ane ndi kale a muhulwane, o ri: “Ndi lingedza u shumisa nyeletshedzo i re kha Vhafilipi 2:3 na u dzhia vhaṅwe vhe vhahulwane kha nṋe. Zwenezwi zwi nthusa uri ndi si lingedze u ita uri vhathu vha pfe nga nṋe.”
12. Ndi ngani zwi zwa ndeme uri vhahulwane vha ḓiṱukufhadze?
12 Vhahulwane vha tea u ḓiṱukufhadza u fana na Yehova. Naho Yehova e Muvhusahoṱhe, u ‘lavhelesa fhasi’ u itela u “vusa muheḓana buseni.” (Ps. 18:35; 113:6, 7) Bivhili i ri vhudza uri Yehova u vhenga vhane vha ḓihudza.—Mir. 16:5.
13. Ndi ngani muhulwane a tshi tea “u langa lulimi lwawe”?
13 Muhulwane ane a ita zwine Yehova a ṱoḓa, u tea “u langa lulimi lwawe.” Arali a sa ita zwenezwo, a nga amba nga nḓila i si yavhuḓi musi muṅwe a tshi mu nyadza. (Yak. 1:26; Vhagal. 5:14, 15) Andrew we ra amba nga hae u ri: “Nga zwiṅwe zwifhinga, musi muṅwe a tshi nnyadza ndo vha ndi tshi ṱoḓa u mu fhindula nga nḓila i si yavhuḓi. Fhedzi ndo humbula nga ha tsumbo dzi re Bivhilini dza vhathu vha fhulufhedzeaho nahone zwenezwo zwo nthusa u vhona uri u ḓiṱukufhadza ndi zwa ndeme.” Vhahulwane vha sumbedza u ita zwine Yehova a ṱoḓa nga u sumbedza lufuno na vhuthu musi vha tshi amba na vhaṅwe tshivhidzoni, u katela na vhahulwane ngavho.—Vhakol. 4:6.
VHOKHOTSI VHA NGA GUDA MINI KHA KHOSI DAVIDA?
14. Yehova o ṋea vhokhotsi vhuḓifhinduleli vhufhio nahone u lavhelela mini khavho?
14 Yehova o ṋea khotsi vhuḓifhinduleli ha u vha ṱhoho ya muṱa nahone u lavhelela uri a gudise na u kaidza vhana vhawe. (1 Vhakor. 11:3; Vhaef. 6:4) Fhedzi vhokhotsi a vho ngo tea u shumisa vhuḓifhinduleli havho nga nḓila ine vha funa. Yehova ndi ene Muthomi wa miṱa nahone vhokhotsi vha ḓo ḓifhindulela khae nga nḓila ine vha fara ngayo miṱa yavho. (Vhaef. 3:14, 15) Vhokhotsi vha sumbedza uri vha ita zwine Yehova a ṱoḓa nga u shumisa vhuḓifhinduleli havho nga nḓila ine ya mu takadza. Vha nga guda zwinzhi kha Khosi Davida.
Nḓila ine khotsi a rabela ngayo i tea u sumbedza uri u a ḓiṱukufhadza (Sedzani dziphara 15-16) *
15. Ndi ngani Khosi Davida e tsumbo yavhuḓi kha vhokhotsi?
15 Yehova o ṋea Davida vhuḓifhinduleli ha u vha ṱhoho ya muṱa na ya lushaka lwoṱhe lwa Isiraele. Sa khosi, Davida o vha e na maanḓa vhukuma. Nga zwiṅwe zwifhinga, o shumisa eneo maanḓa nga nḓila i si yavhuḓi nahone a ita vhukhakhi vhuhulwane. (2 Sam. 11:) Fhedzi o sumbedza u ita zwine Yehova a ṱoḓa nga u tenda u kaidzwa. O rabela kha Yehova zwi tshi bva mbiluni. Nahone o lingedza nga nungo dzoṱhe u thetshelesa musi Yehova a tshi mu kaidza. ( 14, 15Ps. 51:1-4) Zwiṅwe hafhu, o vha a tshi ḓiṱukufhadza nahone a tshi thetshelesa nyeletshedzo dzi bvaho kha vhanna na vhafumakadzi. (1 Sam. 19:11, 12; 25:32, 33) Davida o guda kha vhukhakhi hawe nahone a ita uri u shumela Yehova zwi ḓe u thoma vhutshiloni hawe.
16. Vhokhotsi vha nga guda mini kha tsumbo ya Davida?
16 Vhokhotsi vha nga guda mini kha tsumbo ya Khosi Davida? Ni songo shumisa vhuḓifhinduleli he Yehova a ni ṋea hone nga nḓila i si yavhuḓi. Tendani vhukhakhi haṋu nahone ni tende musi vhaṅwe vha tshi ni kaidza vha tshi shumisa Bivhili. Arali na ita nga u ralo, muṱa waṋu u ḓo ni ṱhonifha ngauri ni a ḓiṱukufhadza. Musi ni tshi rabela na muṱa waṋu, ambani nḓila ine na ḓipfa ngayo nahone muṱa waṋu u ḓo vhona uri ni ḓitika nga Yehova. Nahone tsha ndeme vhukuma, itani uri u shumela Yehova zwi ḓe u thoma vhutshiloni haṋu. (Doit. 6:6-9) Tsumbo yaṋu yavhuḓi ndi ya ndeme vhukuma kha muṱa waṋu.
VHOMME VHA NGA GUDA MINI KHA MARIA?
17. Yehova o ṋea vhomme vhuḓifhinduleli vhufhio?
17 Na vhomme vho ṋewa vhuḓifhinduleli nga Yehova, nahone u ṱoḓa vha tshi laya vhana vhavho. (Mir. 6:20) Zwine mme a zwi ita na u zwi vhudza vhana vhawe zwi nga vha kwama vhutshilo havho hoṱhe. (Mir. 22:6) Ṱhogomelani zwine vhomme vha nga zwi guda kha Maria mme a Yesu.
18-19. Vhomme vha nga guda mini kha tsumbo ya Maria?
18 Maria o vha a tshi ḓivha Maṅwalo zwavhuḓi. O vha a tshi ṱhonifha Yehova nahone e na vhushaka havhuḓi nae. O vha o ḓiimisela u ita zwine Yehova a ṱoḓa naho zwi tshi amba uri vhutshilo hawe vhu ḓo shanduka.—Luka 1:35-38, 46-55.
19 Vhomme, ni nga edzisa Maria nga nḓila nnzhi. Ni nga zwi ita hani? Nḓila ya u thoma, ni tea u khwaṱhisa vhushaka haṋu na Yehova nga u vhala Bivhili na u rabela tshifhinga tshoṱhe. Ya vhuvhili, ni tea u ḓiimisela u ita tshanduko vhutshiloni haṋu u itela u takadza Yehova. Sa tsumbo, ni nga vha no aluswa nga vhabebi vha re na mbilu ṱhukhu na vhane vha sa ambe na vhana vhavho nga nḓila yavhuḓi. Nga zwenezwo, ni nga humbula uri yeneyi ndi yone nḓila yavhuḓi ya u alusa vhana vhaṋu. Naho no no guda nḓila ine Yehova a ṱoḓa ni tshi alusa ngayo vhana vhaṋu, zwi nga ni konḓela u dzika na u sa fhela mbilu musi vhana vhaṋu vha sa ni thetshelesi, zwihuluhulu musi no neta. (Vhaef. 4:31) Musi ni tshi ḓipfa nga yeneyo nḓila ndi zwa ndeme uri ni humbele Yehova uri a ni thuse. Muṅwe mme ane a pfi Lydia u ri: “Nga zwiṅwe zwifhinga, musi ṅwana wanga a sa nthetshelesi, ndo tea u rabela zwi tshi bva mbiluni uri ndi si ambe nae ndo sinyuwa. Ndo vhuya nda tea na u fhumula ndi sa athu fhedza u amba, uri ndi kone u rabela uri Yehova a nthuse. U rabela zwi ita uri ndi dzike.”—Ps. 37:5.
Naho mme o neta, a nga tea u ita vhuḓidini ha u sumbedza uri u funa muṱa wawe (Sedzani phara 19) *
20. Vhaṅwe vhomme vha sedzana na thaidzo ifhio nahone vha nga i kunda hani?
20 Vhaṅwe vhomme vha a konḓelwa u sumbedza vhana vhavho uri vha a vha funa. (Tito 2:3, 4) Vhaṅwe vhomme vho aluswa miḓini ine vhabebi vha sa vhe na vhushaka havhuḓi na vhana vhavho. Arali no aluswa nga yeneyo nḓila, a no ngo tea u ita honoho vhukhakhi ho itwaho nga vhabebi vhaṋu. Mme ane a ita zwine Yehova a ṱoḓa, u tea u guda u sumbedza vhana vhawe uri u a vha funa. Zwi nga mu konḓela u shandula nḓila ine a humbula ngayo, a ḓipfa ngayo na ine a ita ngayo zwithu. Fhedzi zwi a konadzea nahone dzenedzi tshanduko dzi ḓo ita uri ene na muṱa wawe vha takale.
DZULANI NI TSHI ITA ZWINE YEHOVA A ṰOḒA
21-22. U ya nga Yesaya 65:13, 14, ri vhuyelwa nga mini musi ri tshi ita zwine Yehova a ṱoḓa?
21 Khosi Davida o vha a tshi ḓivha mbuyelo dza u ita zwine Yehova a ṱoḓa. O ri: “Maamba-Yehova o lulama, a takadza mbilu. Mafhungo awe ndi tshedza, a vhonetshela maṱo. Na hone mulanda wau u ri: Ndi laiwa ngadzo’; mu-tevhedza-dzone u wana lupfumo luhulu.” (Ps. 19:8, 11) Ṋamusi ri vhona phambano kha vhane vha ita zwine Yehova a ṱoḓa na vhane vha si tende u kaidzwa ngae. Vhane vha ita zwine Yehova a ṱoḓa vha “fhululedza vha tshi ḓi-phiṋa.”—Vhalani Yesaya 65:13, 14.
22 Musi vhahulwane, vhokhotsi na vhomme vha tshi ita zwine Yehova a ṱoḓa, zwi khwinisa vhutshilo havho, miṱa yavho i a takala nahone tshivhidzo tshi bvela phanḓa tshi na vhuthihi. Tsha ndeme vhukuma ndi uri Yehova u a takala. (Mir. 27:11) Nahone zwenezwo zwi ḓo ita uri ri takale vhukuma!
LUIMBO 123 U Ḓiṱukufhadzela Nzudzanyo Ya Ṱaḓulu
^ phar. 5 Ino thero i ḓo haseledza uri ndi ngani ri tshi tea u ita zwine Yehova a ṱoḓa. I ḓo dovha ya haseledza nḓila ine vhahulwane, vhokhotsi na vhomme vha tea u shumisa ngayo vhuḓifhinduleli he vha ṋewa nga Yehova na zwine vha nga zwi guda kha tsumbo ya Muvhusi Nehemia, Khosi Davida na Maria, mme a Yesu.
^ phar. 1 ṰHALUTSHEDZELO YA MAIPFI: Vhathu vhane vha tou kombetshedzwa u thetshelesa a vha takaleli u ita zwine muṅwe a ṱoḓa. Fhedzi vhathu vha Yehova vha khetha u mu shumela nga u ḓifunela nahone a vha dzhii u ita zwine a ṱoḓa zwi muhwalo.
^ phar. 7 Maṅwe madzina kha ino thero o shandulwa.
^ phar. 62 ṰHALUSO YA TSHIFANYISO: Muhulwane u khou lugisa Holo e na ṅwana wawe, u fana na musi Nehemia a tshi thusa u fhaṱulula mbondo dza Yerusalema.
^ phar. 64 ṰHALUSO YA TSHIFANYISO: Khotsi u khou rabela zwi tshi bva mbiluni e na muṱa wawe.
^ phar. 66 ṰHALUSO YA TSHIFANYISO: Mutukana o fhedza tshifhinga tshinzhi a tshi khou tamba video game a sa athu ita mishumo ya hayani kana ya tshikolo. Naho mme awe vha tshi khou bva mushumoni vho neta, vha mu kaidza nga nḓila yavhuḓi vha sa fheli mbilu.