Yeneyi ndimana i ri “Arali tshiṱirikini tsha hau wa vhona hu tshi tsikeledzwa mushai, hu si na khaṱhulo yo teaho na zwo lugaho, u songo mangala. Ngauri onoyo muḓinḓa muhulwane o lavheleswa nga a re muhulwane khae, hu na vhaṅwe vhahulwane vhane vha vha fhira.”​—Muh. 5:8.

Vhathu vha nga vhona u nga heyi ndimana i amba nga ha vhavhusi fhedzi. Fhedzi arali ra humbulisisa nga hayo nga ho engedzeaho, ri ḓo zwi vhona uri i bvisela khagala iṅwe ngoho nga ha Yehova ine ya ri khuthadza na u ri khwaṱhisa.

Muhuweleli 5:8 i amba nga ha muvhusi ane a kandeledza vhashai a sa vha haṱule nga nḓila yo teaho. Onoyo muvhusi u tea u humbula uri hu na muṅwe muthu kha wonoyo muvhuso a re na vhuimo ha nṱha kha hawe, ane a khou mu vhona. Zwavhuḓi vhuḓi, hu nga kha ḓi vha hu na vhaṅwe vha re na vhuimo vhu re nṱha ha honoho. Zwi ṱungufhadzaho ndi uri vhenevha vhavhusi vha nga vhusa nga nḓila i songo teaho nahone vhathu vha nga tambula nga nṱhani ha zwenezwo.

Naho zwithu zwi tshi nga vhonala zwo vhifha hani, ri nga khuthadzwa nga u ḓivha uri Yehova o ‘lavhelesa vhaḓinḓa vhahulwane’ vha re kha mivhuso ya vhathu. Ri nga humbela Mudzimu uri a ri thuse, ra mu kumedzela mihwalo yashu. (Ps. 55:22; Vhafil. 4:6, 7) Ri a zwi ḓivha uri “maṱo a Yehova o lavhelesa hoṱhe-hoṱhe ḽifhasini ḽoṱhe uri a sumbedze nungo dzawe a tshi itela vhe mbilu dzavho dza ḓikumedzela tshoṱhe khae.”​—2 Koron. 16:9.

Nga zwenezwo, Muhuweleli 5:8 i ri humbudza tshiimo tshine ra khou tshila khatsho na uri hu ḓo dzula hu na muthu a re na maanḓa mahulwane u fhira a muṅwe. Zwa ndeme vhukuma ndi uri yeneyo ndimana i ri humbudza uri Yehova ndi ene Ramaanḓaoṱhe. U khou vhusa zwino a tshi shumisa Yesu Kristo Murwa wawe a re Khosi ya Muvhuso wawe. Ramaanḓaoṱhe o lavhelesa zwithu zwoṱhe na vhathu vhoṱhe, u haṱula nga nḓila yo teaho. Na Murwa wawe o tou ralo.