1. Ndi lini hune zwa nga konḓa u shumela Yehova?

NI VHONA u nga ndi lini hune zwa nga konḓa u shumela Yehova? Naa ndi musi no sedzana na thavha kana musi ḽi ḽa maladze? Zwi a leluwa u ḓitika nga Yehova musi ro sedzana na thavha. Fhedzi ri ita mini musi ḽi ḽa maladze? Naa ri mbo ḓi hangwa Mudzimu? Yehova o tsivhudza Vhaisiraele uri zwenezwi zwi nga itea.​—Dot. 6:10-12.

2. Khosi Asa o ri vhetshela tsumbo ifhio?

² Khosi Asa ndi tsumbo yavhuḓi ine ra nga i tevhedza ngauri o ḓitika nga Yehova tshifhinga tshoṱhe. O shumela Yehova musi zwi sa khou tshimbila zwavhuḓi na musi ḽo lala. “Asa o shumela Yehova nga mbilu yawe yoṱhe” u bva a kha ḓi vha muṱuku. (1 Dzikh. 15:14) Asa o sumbedza uri u shumela Yehova nga mbilu yawe yoṱhe nga u fhelisa vhurabeli ha mazwifhi ngei Yuda. Bivhili i ri: “O thutha aḽeṱare dzi sili na fhethu ha vhurabeli, a kwasha phuphu khethwa, a rema thanda khethwa.” (2 Koron. 14:3, 5) O ita na u dzhiela makhulu wawe Maaka vhuimo ha nṱha. Ndi ngani? Ndi ngauri Maaka o vha a tshi ṱuṱuwedza vhathu uri vha gwadamele tshifanyiso.​—1 Dzikh. 15:11-13.

3. Ri ḓo amba nga ha mini kha ino thero?

³ Asa o ita zwi fhiraho u sokou fhelisa vhurabeli ha mazwifhi. O dovha a thusa vhathu vha Yuda uri vha dovhe vha gwadamele Yehova. Yehova o fhaṱutshedza Asa na Vhaisiraele  nga u ita uri hu vhe na mulalo. * “Shango ḽo vha ḽo lala” lwa miṅwaha ya fumi musi Asa a tshi khou vhusa. (2 Koron. 14:1, 4, 6) Kha ino thero ri ḓo amba uri Asa o shumisa hani tshenetsho tshifhinga tsha mulalo. Nga murahu, ri ḓo amba nga ha Vhakriste vha u thoma vhe vha shumisa zwavhuḓi tshifhinga tsha mulalo, u fana na Asa. Ri ḓo fhedza nga u fhindula heyi mbudziso: Arali ni tshi dzula shangoni ḽi ni tendelaho u rabela Yehova no vhofholowa, ni nga shumisa hani tshenetsho tshifhinga tsha mulalo nga vhuṱali?

4. U ya nga 2 Koronika 14:2, 6, 7, Asa o shumisa hani tshifhinga tsha mulalo?

⁴ Vhalani 2 Koronika 14:2, 6, 7. Asa o vhudza vhathu uri ndi Yehova we a vha “ladzela shango thungo dzoṱhe.” Asa ho ngo humbula uri tshenetsho tshifhinga tsha mulalo ndi tsha u ḓigeḓa. O thoma u fhaṱa miḓi, mbondo, mitsheṱo, na dzikhoro. O amba na vhathu vha Yuda a ri: “Shango ḽi kha ḓi vha ḽashu.” Asa o vha a tshi khou amba mini? O vha a tshi khou amba uri a hu na maswina e a vha a tshi ḓo vha thivhela u tshimbila na u fhaṱa. O ṱuṱuwedza vhathu uri vha shumise zwavhuḓi tshenetshi tshifhinga tsha mulalo.

5. Ndi ngani Asa o khwaṱhisa mmbi yawe?

⁵ Asa o dovha a shumisa tshenetsho tshifhinga tsha mulalo u khwaṱhisa mmbi yawe. (2 Koron. 14:8) Naa zwi amba uri o vha a sa fhulufheli Yehova? Hai. Asa o vha a tshi zwi ḓivha uri mushumo wawe sa khosi ndi u ita uri vhathu vha dzule vho ita ngoma madzula wo vhambwa. O vha a tshi zwi ḓivha uri tshenetsho tshifhinga tsha mulalo a tshi nga dzuli tshi hone. Zwa itea nga u ralo.

6. Vhakriste vha u thoma vho shumisa hani tshifhinga tsha mulalo?

⁶ Naho Vhakriste vha u thoma vho vha vha tshi anzela u tovholwa, ho vha na zwifhinga zwe vha vha na mulalo. Vho ita mini nga zwenezwo zwifhinga? Vhenevho vhanna na vhafumakadzi vha fhulufhedzeaho vho huwelela mafhungo maḓifha vha sa litshi. Mafhungo a re kha bugu ya Mishumo a ri vho vha vha tshi “ofha Yehova.” Vho bvela phanḓa vha tshi huwelela mafhungo maḓifha nahone zwenezwo zwa ita uri vha dzule vha “tshi engedzea.” Zwi tou vha khagala uri Yehova o fhaṱutshedza u huwelela havho nga u fhisea nga tshenetsho tshifhinga tsha mulalo.​—Mish. 9:26-31.

7-8. Paulo na vhaṅwe vho ita mini musi vha tshi wana tshibuli? Ṱalutshedzani.

⁷ Vhakriste vha u thoma vho shumisa tshibuli tshiṅwe na tshiṅwe tshe vha tshi wana u itela u huwelela mafhungo maḓifha. Sa tsumbo, musi Paulo a tshi vhona uri a nga huwelela kha vhathu vhanzhi Efesa, o dzula kha wonoyo muḓi a huwelela.​—1 Vhakor. 16:8, 9.

⁸ Musi vhaapostola na vhahulwane vha tshi dzudzanya mafhungo a u fumba nga 49 C.E., Paulo na vhaṅwe Vhakriste vho wana tshibuli tsha u huwelela kha vhathu vhanzhi. (Mish. 15:23-29) Musi Paulo na vhaṅwe vho no vhudza zwivhidzo uri phetho ye ya dzhiiwa ndi ifhio, vho shuma vhukuma kha u huwelela “mafhungo maḓifha a ipfi ḽa Yehova.” (Mish. 15:30-35) Ho vha na mvelelo dzifhio? Bivhili i ri: “Zwivhidzo zwa ḓi bvela phanḓa zwi tshi khwaṱhiswa lutendoni na u engedzea ḓuvha ḽiṅwe na ḽiṅwe.”​—Mish. 16:4, 5.

9. Hu khou itea mini kha mashango manzhi ṋamusi nahone ri nga ḓivhudzisa mini?

⁹ Mashangoni manzhi ṋamusi ri a kona u huwelela hu si na tshi ri thithisaho. Naa ni dzula kha shango ḽine na kona u gwadamela Yehova no vhofholowa? Arali zwo ralo, ḓivhudziseni uri: ‘Ndi khou shumisa hani yeneyo mbofholowo?’ Maḓuvha a vhufhelo ndi a takadzaho kha vhathu vha Yehova ngauri vho farekanea kha mushumo wa u huwelela na u funza une a u athu u vhuya wa vha hone. (Marko 13:10) Hu na zwinzhi zwine ra nga zwi ita kha wonoyu mushumo.

10. Luṅwalo lwa 2 Timotheo 4:2 lu ri ṱuṱuwedza uri ri ite mini?

¹⁰ Ni nga shumisa hani zwavhuḓi tshifhinga tsha mulalo? (Vhalani 2 Timotheo 4:2.) Naa inwi kana muṅwe muṱani waṋu a nga ita tshanduko u itela u fhedza tshifhinga tshinzhi vhuḓinḓani, khamusi nga u vha muvulanḓila? A ro ngo tea u ḓikuvhanganyela lupfumo zwino, ngauri a ri nga ḓo ponyoka maṱungu mahulu na zwine ra vha nazwo.​—Mir. 11:4; Mat. 6:31-33; 1 Yoh. 2:15-17.

11. Vhaṅwe vho ita mini u itela u thusa vhathu vhanzhi u pfa mafhungo maḓifha?

¹¹ Vhahuweleli vhanzhi vho guda luṅwe luambo u itela u lu shumisa kha u huwelela na u funza. Ndangulo ya Yehova i vha ṋea khandiso nnzhi dzine dza vha thusa u huwelela nga nyambo nnzhi. Sa tsumbo, nga 2010 ro vha ri na khandiso nga nyambo dzi ṱoḓaho u vha 500. Zwa zwino ri na khandiso nga nyambo dzi fhiraho 1 000.

12. Vhathu vha vhuyelwa hani musi vha tshi pfa mafhungo maḓifha nga luambo lwavho? Ṋeani tsumbo.

¹² Vhathu vha ḓipfa hani musi vha tshi pfa nga ha Yehova nga luambo lwavho? Kha ri ambe nga ha wahashu we a vhuyelwa nga buthano  ḽa dzingu ḽe ḽa vha ḽi Memphis, Tennessee, ngei Amerika. Ḽeneḽo buthano ḽo itwa nga luambo lwa Tshikinyarwanda, lune lwa ambiwa ngei Rwanda, Congo (Kinshasa) na Uganda. Nga murahu ha buthano, onoyo wahashu ane a amba Tshikinyarwanda o ri: “Ndi lwa u tou thoma ndi tshi pfesesa buthano u bva tshee nda pfulutshela Amerika miṅwahani ya 17 yo fhiraho.” Zwi tou vha khagala uri o kwamea vhukuma nge a pfa ḽeneḽo buthano nga luambo lwawe lwa ḓamuni. Arali zwiimo zwi tshi ni tendela, naa ni nga guda luṅwe luambo uri ni thuse vhaṅwe vha re tsimuni yaṋu? Naa tsimuni ya vhoiwe hu na vhane vha nga takalela u pfa mafhungo maḓifha nga luambo lwavho? U ḓidina haṋu hu ḓo ni ḓisela dakalo.

13. Vhahashu vha ngei Russia vho shumisa hani tshifhinga tsha mulalo?

¹³ A si vhahashu vhoṱhe vhane vha kona u huwelela vho vhofholowa. Kha maṅwe mashango, vhahashu a vha koni u huwelela vho vhofholowa ngauri mivhuso yo thivhela mushumo washu. Sa tsumbo, kha ri ambe nga ha vhahashu vha ngei Russia. Vho fhedza miṅwaha minzhi vha tshi khou tovholwa, fhedzi nga March 1991, muvhuso wo mbo ḓi tenda vha tshi gwadamela Yehova vho vhofholowa. Nga tshenetsho tshifhinga ho vha hu na Ṱhanzi dzine dza nga lingana 16 000 ngei Russia. Nga murahu ha miṅwaha ya 20, ho vha hu na vhahuweleli vha fhiraho 160 000. Zwi tou vha khagala uri vhahashu vho shumisa tshifhinga tshavho tsha mulalo nga vhuṱali. Tshenetsho tshifhinga tshavho tsha mulalo tsho mbo ḓi fhela. Vha kha ḓi shumela Yehova nga u fhisea naho zwithu zwo shanduka kha ḽeneḽo shango. Vha ita zwoṱhe zwine vha nga kona uri vha mu shumele.

14-15. Yehova o shumisa hani maanḓa awe u thusa Asa?

¹⁴ Tshifhingani tsha Asa, tshifhinga tsha mulalo tsho mbo ḓi fhela. Vho mbo ḓi ḓelwa nga mmbi khulu ya maswole a fhiraho 1 miḽioni a bvaho Etopia. Zera we a vha e mulangammbi wayo o vha e na vhungoho ha uri u ḓo kunda shango ḽa Yuda. Fhedzi Asa a fhulufhela Yehova. O rabela a ri: “Ri thuse Iwe Yehova Mudzimu washu, ngauri ro fhulufhela iwe, ro ḓa u lwa na heḽi gogo nga dzina ḽau.”​—2 Koron. 14:11.

¹⁵ Mmbi ya Etopia yo vha i tshi fhira ya Asa kavhili, fhedzi Asa o vha a tshi zwi ḓivha uri Yehova u na maanḓa na uri u ḓo tsireledza vhathu vhawe. Yehova o thusa vhathu vhawe. Mmbi ya Etopia ya kundwa.​—2 Koron. 14:8-13.

16. Ri zwi ḓivha hani uri tshifhinga tsha mulalo tshi ḓo fhela?

¹⁶ Naho ri sa ḓivhi nga vhuḓalo uri vhumatshelo ho ri farela mini, ri a zwi ḓivha uri tshifhinga tsha mulalo tshine vhathu vha Mudzimu vha vha natsho tshi ḓo fhela hu si kale. Humbulani uri Yesu o amba uri maḓuvhani a vhufhelo vhafunziwa vhawe vha ḓo “vhengiwa nga tshaka dzoṱhe.” (Mat. 24:9) Na muapostola Paulo o amba uri “vhoṱhe vha re na vhuthihi na Kristo Yesu, vho ḓikumedzelaho kha Mudzimu na vhone vha ḓo tovholwa.” (2 Tim. 3:12) Saṱhane u na “mbiti khulu” nahone arali ri tshi humbula uri ri nga ponyoka mbiti dzawe, ri ḓo vha ri tshi khou ḓifhura nga murunzi wa ningo.​—Nzumb. 12:12.

17. Lutendo lwashu lu nga lingwa hani?

¹⁷ Roṱhe ri ḓo lingwa lutendo hu si kale. Zwenezwino “hu ḓo vha na maṱungu mahulu a sa athu u vhuya a vha hone u bva tshee shango ḽa sikwa u swika zwino.” (Mat. 24:21) Nga tshenetsho tshifhinga, miṱa yashu i nga lwa na riṋe na mushumo washu u nga thivhelwa. (Mat. 10:35, 36) Naa ni ḓo fana na Asa na fhulufhela uri Yehova u ḓo ni thusa na u ni tsireledza?

18. U ya nga Vhahevheru 10:38, 39, ri nga thuswa nga mini u ḓilugiselela tshifhinga tsha musi mulalo u tshi fhela?

¹⁸ Yehova u khou ri lugiselela zwino uri ri dzule ri na lutendo lwo khwaṱhaho. U khou  shumisa “mulanda a fhulufhedzeaho na wa vhuṱali” u ri ṋea ‘zwiḽiwa nga tshifhinga tsho teaho’ zwine zwa ḓo ri thusa uri ri dzule ro khwaṱha. (Mat. 24:45) Fhedzi ri tea u ita zwoṱhe zwine ra nga kona uri ri vhe na lutendo lwo khwaṱhaho.​—Vhalani Vhahevheru 10:38, 39.

19-20. Ri tea u ḓivhudzisa mbudziso dzifhio nga murahu ha u vhala 1 Koronika 28:9 nahone ndi ngani ri tshi tea u ḓivhudzisa dzone?

¹⁹ Ri tea u ‘ṱoḓa Yehova’ u fana na Khosi Asa. (2 Koron. 14:4; 15:1, 2) Ri thoma u ṱoḓa Yehova nga u guda nga hae na u lovhedzwa. Ri ita zwoṱhe zwine ra nga kona u itela u funa Yehova nga ho engedzeaho. U itela u vhona uri ri funa Yehova u guma gai, ri nga ḓivhudzisa uri: ‘Naa ndi a ya miṱanganoni tshifhinga tshoṱhe?’ Musi ri tshi ya miṱanganoni yo lugiselelwaho nga ndangulo ya Yehova, ri wana maanḓa a u bvela phanḓa ri tshi shumela Yehova na u ṱuṱuwedzwa nga vhahashu. (Mat. 11:28) Ri nga dovha ra ḓivhudzisa uri: ‘Naa ndi a guda Bivhili tshifhinga tshoṱhe?’ Arali ni tshi dzula na muṱa waṋu, naa ni a vha na vhurabeli ha muṱa vhege iṅwe na iṅwe? Arali ni tshi dzula ni noṱhe, naa ni a ḓivhetshela tshifhinga tsha u guda? Naa ni a ita zwoṱhe zwine na nga kona u itela u ḓivhadza vhaṅwe mafhungo maḓifha na u vha funza?

²⁰ Ndi ngani ri tshi tea u ḓivhudzisa dzenedzo mbudziso? Bivhili i ri vhudza uri Yehova u ṱolisisa mbilu dzashu na zwiṱuṱuwedzi zwashu. Na riṋe ri fanela u ita zwenezwo. (Vhalani 1 Koronika 28:9.) Arali ra vhona uri ri tea u ita tshanduko kha zwipikwa zwashu, mavhonele ashu kana mahumbulele ashu, ri tea u humbela Yehova uri a ri thuse. Zwino ndi tshifhinga tsha u ḓilugisela milingo i ḓaho. Ni songo tenda hu tshi vha na tshithu tshi ni thivhelaho u shumisa tshifhinga tsha mulalo nga vhuṱali.