1-2. Muhuweleli 11:6 i tshimbidzana hani na u huwelela mafhungo maḓifha?

KHA maṅwe mashango, vhathu vha a takala musi vha tshi pfa mafhungo maḓifha. Vha vha vho a lavhelela nga maṱo matswuku! Fhedzi kha maṅwe mashango vhunzhi ha vhathu a vha takaleli u pfa nga ha Mudzimu kana Bivhili nga u tou ralo. Vhathu vha hune na dzula hone vha anzela u aravha hani? Hu sa londwi uri vhathu vha aravha hani, Yehova u ṱoḓa ri tshi dzula ri tshi huwelela u swikela a tshi ri mushumo wo fhela.

² Mushumo wa u huwelela u ḓo swika hune wa ḓo guma nga tshifhinga tsho vhewaho nga Yehova, nga murahu ndi hone “vhufhelo vhu tshi ḓo ḓa.” (Mat. 24:14, 36) Musi tshenetsho tshifhinga tshi sa athu u swika, ri nga tevhedza hani maipfi ane a ri “tshanḓa tshau tshi songo awela”? *​—Vhalani Muhuweleli 11:6.

3. Ri ḓo amba nga ha mini kha ino thero?

³ Thero yo fhiraho yo amba nga ha zwithu zwiṋa zwine ra tea u zwi ita uri ri vhe na vhukoni ha u vha “vharei vha vhathu.” (Mat. 4:19) Ino thero i ḓo amba nga ha nḓila tharu dzine dza nga ri thusa u ḓiimisela u dzula ri tshi huwelela, hu sa londwi zwiimo zwine ra nga sedzana nazwo. Ri ḓo pfa uri ndi ngani zwi zwa ndeme (1) u dzula ro livhisa ṱhogomelo kha u huwelela, (2) u sa fhela mbilu na (3) u dzula ri na lutendo lwo khwaṱhaho.

4. Ndi ngani ri tshi tea u dzula ro livhisa ṱhogomelo kha u ita mushumo we Yehova a ri ṋea wone?

⁴ Yesu o dzula o amba nga ha zwiitea na zwiimo zwine zwa sumbedza uri ri khou tshila maḓuvhani a vhufhelo. O vha a tshi zwi  ḓivha uri zwenezwi zwithu zwi nga thithisa vhatevheli vhawe u livhisa ṱhogomelo kha mushumo wa u huwelela. O vhudza vhafunziwa vhawe uri vha ‘dzule vho fhaṱuwa.’ (Mat. 24:42) Tshifhingani tsha Noaxe ho vha na zwithu zwinzhi zwe zwa ita uri vhathu vha sa thetshelese mulaedza wawe. Zwenezwo zwithu zwi nga ri thithisa na ṋamusi. (Mat. 24:37-39; 2 Pet. 2:5) Ndi ngazwo ri tshi ṱoḓa u dzula ro livhisa ṱhogomelo kha u ita mushumo we Yehova a ri ṋea wone.

5. U ya nga Mishumo 1:6-8, ṱalutshedzani uri mafhungo maḓifha a ḓo huwelelwa u guma ngafhi.

⁵ Ri tea u livhisa ṱhogomelo kha u huwelela mafhungo maḓifha a Muvhuso ṋamusi. Yesu o dzula o amba uri vhatevheli vhawe vha ḓo bvela phanḓa vha tshi huwelela musi o no fa na u ita mushumo wa u huwelela u fhira we a u ita musi a tshi kha ḓi tshila. (Yoh. 14:12) Musi Yesu o no fa, vhaṅwe vha vhafunziwa vhawe vho vhuyelela kha mushumo wa u fasha khovhe. Musi Yesu o no vuswa vhafuni, o ita vhuṱolo he ha thusa vhaṅwe vha vhafunziwa vhawe u fasha khovhe nnzhi. O shumisa tshenetsho tshiitea u vha khwaṱhisedza uri mushumo wavho wa u vha vharei vha vhathu ndi wa ndeme u fhira mishumo yoṱhe. (Yoh. 21:15-17) Musi Yesu e tsini na u gonya ṱaḓulu, o vhudza vhafunziwa vhawe uri mushumo wa u huwelela we a u thoma wo vha u sa ḓo itwa kha shango ḽa Isiraele fhedzi. (Vhalani Mishumo 1:6-8.) Nga murahu ha miṅwaha, Yesu o sumbedza muapostola Yohane bono u itela u mu sumbedza zwe zwa vha zwi tshi ḓo itea “nga ḓuvha ḽa Murena.” * Tshiṅwe tsha zwithu zwe Yohane a zwi vhona ndi bono ḽi akhamadzaho ḽa muruṅwa “a tshi khou ḓivhadza mafhungo maḓifha a lini na lini” kha “tshaka dzoṱhe, ndimi dzoṱhe na vhathu vhoṱhe.” (Nzumb. 1:10; 14:6) Zwi tou pfala uri zwine Yehova a zwi ṱoḓa ndi uri riṋe ṋamusi ri shele mulenzhe kha wonoyu mushumo muhulwane wa u huwelela u swikela u tshi fhela.

6. Ri nga dzula hani ro livhisa ṱhogomelo kha u huwelela?

⁶ Arali ra humbula nga ha zwine Yehova a  khou zwi ita u itela u ri thusa, zwi ḓo ita uri ri livhise ṱhogomelo kha u huwelela. Sa tsumbo, Yehova u ri fha khandiso dzo gandiswaho na dzi re kha inthanethe, dzo rekhodiwaho, dzividio na JW Broadcasting® zwine zwa ri thusa u vha na vhushaka havhuḓi nae. Edzani u humbula, website yashu i na mafhungo nga nyambo dzi fhiraho 1 000. (Mat. 24:45-47) Vhathu shangoni ḽoṱhe vha ṱalula vhaṅwe nga nṱhani ha zwa politiki, uri vho pfuma kana vha a shaya na nga vhurereli vhune vha vha khaho. Fhedzi vhashumeli vha Yehova vha fhiraho 8 miḽioni shangoni ḽoṱhe, vha na vhuthihi. Sa tsumbo, nga Ḽavhuṱanu nga dzi 19 April 2019, vhashumeli vhoṱhe vha Yehova u mona na shango ḽoṱhe vho vhona vidio ya musi hu tshi khou haseledzwa ndimana ya ḽeneḽo ḓuvha. Nga eneo madekwana, vhathu vha 20 919 041 vho kuvhangana fhethu ho fhambanaho uri vha ite Tshihumbudzo tsha lufu lwa Yesu. Musi ri tshi humbula nga ha ndugelo ine ra vha nayo ya u vhona zwenezwi zwithu na u vha na tshipiḓa khazwo, zwi ri ṱuṱuwedza u dzula ro livhisa ṱhogomelo kha u huwelela.

7. Tsumbo ya Yesu i ri thusa hani uri ri dzule ro livhisa ṱhogomelo kha u huwelela?

⁷ Iṅwe nḓila ine ra nga dzula ro livhisa ṱhogomelo ngayo kha mushumo wa u huwelela ndi nga u edzisa Yesu. Ho ngo tendela tshithu na tshithihi tshi tshi mu thithisa u huwelela. (Yoh. 18:37) Ho ngo lingea musi Saṱhane a tshi ṱoḓa u mu ṋea “mivhuso yoṱhe ya shango na vhugala hayo,” nahone a si lingee musi vhathu vha tshi ṱoda u mu ita khosi. (Mat. 4:8, 9; Yoh. 6:15) Ho ngo tama lupfumo nahone ho ngo litsha u huwelela musi a tshi shushedzwa. (Luka 9:58; Yoh. 8:59) Musi ri tshi lingwa lutendo, ri nga dzula ro livhisa ṱhogomelo kha u huwelela arali ra humbula nyeletshedzo ya muapostola Paulo. O eletshedza Vhakriste uri vha edzise tsumbo ya Yesu uri vha si ‘nete na u kulea nungo.’​—Vhahev. 12:3.

8. U sa fhela mbilu ndi mini nahone ndi ngani zwi tshi ṱoḓea zwino?

⁸ U sa fhela mbilu ndi u kona u lindela wo dzika u swika vhuimo vhu tshi shanduka. A ro ngo tea u fhela mbilu musi ro lindela uri vhuimo vhu si havhuḓi vhu fhele kana musi ro lindela uri zwithu zwavhuḓi zwine ndi kale ro zwi lindela zwi itee. Muporofita Habakuku o vha a tshi tama uri zwithu zwi si zwavhuḓi zwe zwa vha zwi tshi khou itea Yuda zwi fhele. (Hab. 1:2) Vhafunziwa vha Yesu vho vha vho fhulufhela uri Muvhuso u ḓo vha hone “nga tshenetsho tshifhinga” wa vha lamulela kha muvhuso wa Vharoma. (Luka 19:11) Riṋe ro lindela nga maṱo matswuku uri Muvhuso wa Mudzimu u fhelise vhuvhi na u ḓisa shango ḽiswa ḽi re na vhathu vho lugaho. (2 Pet. 3:13) Naho zwo ralo, a ro ngo tea u fhela mbilu musi ro lindela tshifhinga tshine Yehova a ṱoḓa u zwi ita ngatsho. Kha ri vhone nḓila dzine Yehova a ri funza ngadzo u sa fhela mbilu.

9. Ndi tsumbo dzifhio dzi sumbedzaho uri Yehova ha fheli mbilu?

⁹ Yehova u tou vha tsumbo yavhuḓi ya u sa fhela mbilu. O fha Noaxe tshifhinga tsho eḓanaho tsha u fhaṱa gungwa na tsha u “huwelela nga ha u luga.” (2 Pet. 2:5; 1 Pet. 3:20) Yehova o thetshelesa Abrahamu musi a tshi mu vhudzisa lunzhi-lunzhi nga ha phetho yawe ya u fhelisa vhathu vhavhi vha Sodoma na Gomora. (Gen. 18:20-33) Yehova o fhedza tshifhinga tshilapfu a sa fheleli mbilu lushaka lwa Isiraele lu sa fhulufhedzei. (Neh. 9:30, 31) Ṋamusi ri vhona vhuṱanzi ha uri Yehova ha fheli mbilu ngauri u fha vhoṱhe vhane vha ṱoḓa u sendela khae tshifhinga tsha u “rembuluwa.” (2 Pet. 3:9; Yoh. 6:44; 1 Tim. 2:3, 4) Tsumbo ye Yehova a ri vhetshela yone i ri ṋea tshiitisi tshavhuḓi tsha u sa fhela mbilu musi ri tshi khou huwelela na u funza. U dovha a shumisa Ipfi ḽawe u ri gudisa uri ri sa fhele mbilu.

10. Tsumbo ya mulimi i re kha Yakobo 5:7, 8 i ri gudisa mini?

 ¹⁰ Vhalani Yakobo 5:7, 8. Tsumbo ya mulimi i ri gudisa u sa fhela mbilu. Ndi ngoho uri zwiṅwe zwimela zwi aluwa nga u ṱavhanya. Fhedzi vhunzhi ha zwimela, nga maanḓa zwine zwa aṋwa mitshelo, zwi a lenga u thoma u aṋwa. Ngei Isiraele, zwimela zwo vha zwi tshi dzhia miṅwedzi i ṱoḓaho u vha ya rathi u aluwa. Mulimi wa Muisiraele o vha a tshi zwala mbeu yawe musi mvula ya October yo no fhira nahone a kaṋa musi mvula ya April yo no fhira. (Marko 4:28) U nga ri ri nga edzisa nḓila ine mulimi a si fhele ngayo mbilu. Fhedzi a zwo ngo leluwa u ita nga u ralo.

11. U sa fhela mbilu zwi ḓo ri thusa hani tsimuni?

¹¹ Samusi vhathu vha na tshivhi, vha ṱoḓa u vhona mvelelo dza mishumo yavho nga u ṱavhanya. Arali ri tshi khou ṱoḓa uri zwimela zwi aluwe na u aṋwa, ri tea u dzula ri tshi zwi ṱhogomela. Ri tea u zwala mbeu, ra ṱahulela na u i sheledza. Ri tea u ita vhuḓidini vhu fanaho musi ri tshi ita vhafunziwa. Zwi a dzhia tshifhinga u thusa vhane ra guda navho uri vha si vhe na tshiṱalula na uri vha fune vhaṅwe. U sa fhela mbilu zwi ḓo ri thusa uri ri bvele phanḓa ri tshi huwelela naho vhathu vha sa ri thetshelesi. Ri tea u dovha ra si fhelele mbilu vhathu vhane vha ṱoḓa u thetshelesa na u guda. Ri nga si kone u kombetshedza muthu ane ra khou guda nae uri a vhe na lutendo. Na vhafunziwa vha Yesu nga tshiṅwe tshifhinga vho vha vha tshi lenga u pfesesa zwe Yesu a vha funza. (Yoh. 14:9) Ri tea u dovha ra humbula uri ri nga ṱavha na u sheledza, fhedzi Mudzimu ndi ene ane a ita uri zwi hule.​—1 Vhakor. 3:6.

12. Ri nga zwi kona hani u sa fhela mbilu musi ri tshi huwelela kha mashaka ashu?

¹² Zwi nga ri konḓela u sa fhela mbilu musi ri tshi khou huwelela kha mashaka ashu ane a si vhe Dziṱhanzi. Muhuweleli 3: 7 i nga ri thusa. I ri: “Hu na tshifhinga tsha u fhumula na tshifhinga tsha u amba.” Nḓila yavhuḓi ine ra ḓifara ngayo i nga thusa mashaka ashu uri vha  thetshelese mulaedza washu. Fhedzi ri tea u dzula ro ḓilugiselela u huwelela khavho. (1 Pet. 3:1, 2) Ri tea u huwelela nga u fhisea, fhedzi a ro ngo tea u fhelela vhathu mbilu, u katela na mashaka ashu.

13-14. Ndi tsumbo dza vhathu vhafhio vhe vha si fhele mbilu dzine ra nga dzi edzisa?

¹³ Tsumbo dza vhathu vha fhulufhedzeaho dzi re Bivhilini na dza vha musalauno dzi nga ri thusa u sa fhela mbilu. Habakuku o vha a tshi ṱoḓa uri hu fheliswe vhuvhi, fhedzi o sumbedza u sa fhela mbilu musi a tshi ri: “Ndi ḓo ḓi dzula ndo ima fhethu he nda vhewa uri ndi linde ndi hone.” (Hab. 2:1) Muapostola Paulo o amba uri o vha a tshi khou ṱoḓa u ‘fhedza’ mushumo wawe wa u huwelela. Fhedzi o “ḓivhadza nga vhuḓalo mafhungo maḓifha” a sa fheli mbilu.​—Mish. 20:24.

¹⁴ Kha ri ambe nga ha vhavhingani vhe vha ṱhaphudza tshikolo tsha Gilead. Vhenevho vhavhingani vho rumelwa kha shango ḽi si na Ṱhanzi nnzhi na hune vhathu vhanzhi vha si vhe kha vhurereli ha Vhukriste. Vhunzhi ha vhathu vho vha vha sa ṱoḓi u guda Bivhili. Fhedzi vhathu vhe vha dzhena na vhenevho vhavhingani tshikolo tsha Gilead vho vha vha tshi khou vha vhudza uri kha mashango ane vha vha khao, vhathu vhane vha guda navho vha khou vha Ṱhanzi dza Yehova. Vhenevho vhavhingani a vho ngo fhela mbilu nahone vho bvela phanḓa vha tshi huwelela naho vhathu vhanzhi vha sa vha thetshelesi. Nga murahu ha u fhedza miṅwaha ya 8 vha tshi khou huwelela kha yeneyo tsimu, muṅwe ane vha guda nae Bivhili o mbo ḓi lovhedzwa. Dzenedzi tsumbo dza musalauno na dza tshifhingani tsha kale dzi ri gudisa mini? Vhenevho vhavhingani a vho ngo kulea nungo kana u tenda tshanḓa tshavho tshi tshi awela. Yehova o vha lambedza nge vha si fhele mbilu. U nga ri ri nga “[edzisa] vhe vha wana zwe vha fhulufhedziswa nge vha vha na lutendo, vha si fhele mbilu.”​—Vhahev. 6:10-12.

15. Ndi ifhio iṅwe nḓila ine lutendo lwa ri thusa ngayo u ḓiimisela u huwelela?

¹⁵ U vha na lutendo kha mulaedza une ra u huwelela zwi ita uri ri ṱoḓe u u vhudza vhathu vhanzhi nga hune zwa nga konadzea ngaho. Ri fhulufhela uri zwe Mudzimu a ri fhulufhedzisa zwi ḓo itea. (Ps. 119:42; Yes. 40:8) Ro no vhona hu tshi khou itea vhuporofita vhu re Bivhilini. Ro no vhona nḓila ine vhathu vha shandula ngayo vhutshilo havho musi vha tshi guda Bivhili. Zwenezwi zwi ita uri ri vhe na vhungoho ha uri mafhungo maḓifha a Muvhuso a tea u pfiwa nga vhoṱhe.

16. U ya nga Phisalema 46:1-3, u vha na lutendo kha Yehova na Yesu zwi ḓo ita hani uri ri ḓiimisele u huwelela?

¹⁶ Ri dovha ra vha na lutendo kha Yehova ane mulaedza une ra u huwelela wa bva khae. Ri dovha ra vha na lutendo kha Yesu we Yehova a mu vhea uri a vhe Khosi kha Muvhuso wawe. (Yoh. 14:1) Yehova u ḓo dzula e vhukhudo hashu na nungo dzashu, hu sa londwi zwine zwa itea kha riṋe. (Vhalani Phisalema 46:1-3.) Zwiṅwe hafhu, ri na vhungoho ha uri Yesu u khou shumisa maanḓa e Yehova a mu ṋea one u itela u livhisa mushumo wa u huwelela e ṱaḓulu.​—Mat. 28:18-20.

17. Ṋeani tsumbo i sumbedzaho uri ri tea u bvela phanḓa ri tshi huwelela.

¹⁷ U vha na lutendo zwi ita uri ri vhe na vhungoho ha uri Yehova u ḓo fhaṱutshedza vhuḓidini vhune ra khou vhu ita. Nga zwiṅwe zwifhinga a nga ri fhaṱutshedza nga nḓila ye ra vha ri songo i lavhelela. (Muh. 11:6) Sa tsumbo, ḓuvha na ḓuvha hu vha na vhathu vha zwigidi vhane vha vhona khandiso dzashu kha maṱafula na kha zwigariki. Naa yeneyi nḓila ya u huwelela i a kunga vhathu? Ee! Vhuḓinḓa Hashu ha Muvhuso ha November 2014 ho amba nga ha mugudiswa wa yunivesithi we a vha a tshi khou ṱoḓa u ṅwala maanea a ambaho nga ha Ṱhanzi dza Yehova. Ho ngo kona u wana Holo, fhedzi o wana tshigariki  yunivesithi ye a vha a tshi dzhena khayo nahone a wana mafhungo ane a nga a ṅwala kha maanea awe. Nga murahu ha tshifhinga, o mbo ḓi lovhedzwa nahone zwino ndi muvulanḓila wa tshifhinga tshoṱhe. Tshenzhelo dzi fanaho na dzenedzi dzi ri sumbedza uri hu kha ḓi vha na vhathu vhane vha ṱoḓa u pfa mulaedza wa Muvhuso nahone zwi ri ṱuṱuwedza u bvela phanḓa ri tshi huwelela.

18. Ndi ngani ri na vhungoho ha uri hu ḓo swika tshifhinga tshine Yehova a ḓo ri mushumo wa u huwelela wo fhela?

¹⁸ Ri nga vha na vhungoho ha uri mushumo wa u huwelela u ḓo fhela nga tshifhinga tsho teaho. Kha ri ambe nga ha zwe zwa itea tshifhingani tsha Noaxe. Yehova o sumbedza uri u dzulela u ita zwithu nga tshifhinga tsho teaho. Yehova o dzula o ita phetho ya uri u ḓo ḓisa Maḓi Mahulu nahone o i ita hu tshi kha ḓi vha ho sala miṅwaha ya 120 uri eneo Maḓi Mahulu a vhe hone. Nga murahu ha miṅwaha, Yehova o vhudza Noaxe uri a fhaṱe gungwa. Khamusi Noaxe o shuma lwa miṅwaha ya 40 kana 50 musi Maḓi Mahulu a sa athu vha hone. Noaxe o bvela phanḓa na u huwelela naho vhathu vha sa khou mu thetshelesa. O huwelela u swikela Yehova a tshi amba uri kha dzhenise zwipuka gungwani. Nga murahu ha zwenezwo, “Yehova a vala muṋango” nga tshifhinga tsho teaho.​—Gen. 6:3; 7:1, 2, 16.

19. Ri ḓo ḓiphiṋa nga mini arali ra sa tendela tshanḓa tshashu tshi tshi awela?

¹⁹ Hu si kale Yehova u ḓo amba uri mushumo wa u huwelela wo fhela nahone u ḓo fhelisa shango ḽa Saṱhane, a ḓisa shango ḽiswa ḽine ḽa ḓo vha ḽi na vhathu vhane vha mu thetshelesa. Musi tshenetsho tshifhinga tshi sa athu u swika, kha ri edzise tsumbo ya Noaxe, Habakuku na vhaṅwe vhe vha si tende tshanḓa tshavho tshi tshi awela. U nga ri ri nga dzula ro livhisa ṱhogomelo kha u huwelela, ri si fhele mbilu nahone ri vhe na lutendo kha Yehova na zwe a zwi fhulufhedzisa.