1-2. Timotheo o vha a tshi tea u ita mini u ya nga 1 Timotheo 6:20?

RI ANZELA u ṋea vhaṅwe vhathu zwithu zwashu zwa ndeme uri vha ri vhetshele zwone. Sa tsumbo, ri nga vhea tshelede yashu banngani. Musi ri tshi ita zwenezwo, ri vha ro lavhelela uri tshelede yashu i tsireledzee na uri i si xele kana u tswiwa. Ngauralo ri a zwi pfesesa uri zwi amba mini u ṋea muṅwe muthu tshithu tshashu tsha ndeme uri a ri vhetshele tshone.

² Vhalani 1 Timotheo 6:20. Muapostola Paulo o humbudza Timotheo uri o fhiwa tshithu tsha ndeme vhukuma, tshine tsha vha nḓivho yo teaho ya tshipikwa tsha Mudzimu nga ha vhathu. Yehova o dovha a ṋea Timotheo ndugelo ya u ‘huwelela ipfi ḽawe’ na u “ita mushumo wa muevangeli.” (2 Tim. 4:2, 5) Paulo o ṱuṱuwedza Timotheo uri a tsireledze zwe a fhiwa zwone. Na riṋe ro fhiwa zwithu zwa ndeme u fana na Timotheo. Ndi zwifhio? Ndi ngani ri tshi tea u tsireledza zwithu zwa ndeme zwe Yehova a ri ṋea zwone?

3-4. Ndi ngani ngoho i re Bivhilini i ya ndeme?

³ Yehova o ri tonda nga u ri fha nḓivho yo teaho ya ngoho ya ndeme i wanalaho Ipfini ḽawe, Bivhili. Ngoho i re Bivhilini ndi ya ndeme ngauri i ri thusa uri ri vhe na vhushaka havhuḓi na Yehova na u ri vhudza zwine zwa ri fha dakalo ḽa vhukuma vhutshiloni. Musi ri tshi vha na lutendo kha yeneyo ngoho ra tshila ngayo, a ri fhuriwi nga pfunzo dza mazwifhi nahone ri tshila nga nḓila yo kunaho.​—1 Vhakor. 6:9-11.

⁴ Tshiṅwe tshiitisi tsha uri ndi ngani ngoho i re Ipfini ḽa Mudzimu i ya ndeme ndi ngauri o i dzumbululela vhathu vhane vha ḓiṱukufhadza na vho “ḓiimiselaho.” (Mish. 13:48) Vhathu  vha ḓiṱukufhadzaho vha a tenda uri ndi mulanda a fhulufhedzeaho na wa vhuṱali ane a ri funza Bivhili tshino tshifhinga. (Mat. 11:25; 24:45) A zwi konadzei uri ri pfesese Bivhili nga riṋe vhaṋe nahone a hu na tshithu tsha ndeme tshi fhiraho u i pfesesa.​—Mir. 3:13, 15.

5. Yehova o dovha a ri ṋea mini?

⁵ Yehova o dovha a ri ṋea ndugelo ya u funza vhaṅwe ngoho nga hae na nga ha zwipikwa zwawe. (Mat. 24:14) Mulaedza une ra u vhudza vhathu ndi wa ndeme ngauri u vha thusa uri vha vhe tshipiḓa tsha muṱa wa Yehova, zwa ita uri vha wane vhutshilo vhu sa fheli. (1 Tim. 4:16) Musi ri tshi huwelela ri vha ri tshi khou thusa kha wonoyu mushumo wa ndeme vhukuma une wa khou itwa zwino, naho ri tshi nga vha ri tshi khou ita zwinzhi kana zwiṱuku. (1 Tim. 2:3, 4) Ro huliswa vhukuma nga u vha vhashumisani na Mudzimu.​—1 Vhakor. 3:9.

6. Ho itea mini kha vhaṅwe nge vha kundwa u dzula vho tsireledza zwe vha ṋewa?

⁶ Vhaṅwe Vhakriste vha tshifhingani tsha Timotheo a vho ngo dzhiela nṱha ndugelo yavho ya u vha vhashumisani na Mudzimu. Dema o litsha ndugelo yawe ya u shuma na Paulo nge a funa zwithu zwa ḽino shango. (2 Tim. 4:10) Zwi vhonala u nga Figelo na Herimogene vho litsha u huwelela ngauri vho vha vha tshi ofha u tovholwa u fana na Paulo. (2 Tim. 1:15) Himeneo, Alekzanda na Fileto vho vha vhagunei vha litsha ngoho. (1 Tim. 1:19, 20; 2 Tim. 2:16-18) Vhenevha vhathu vhoṱhe vho vha vha tshi funa Yehova, fhedzi a vho ngo tsha dzhiela nṱha zwithu zwa ndeme zwe a vha ṋea zwone.

7. Saṱhane u shumisa vhukwila vhufhio uri ri ime nae?

⁷ Saṱhane u lingedza hani u ri litshisa zwithu zwa ndeme zwe Yehova a ri ṋea zwone? Kha ri ambe nga ha vhuṅwe ha vhukwila ha Saṱhane. U shumisa u ḓimvumvusa na zwirathisi zwa mafhungo u itela uri ri humbule na u tshila nga nḓila ine ya ḓo ita uri ri si tsha funa Yehova kana u sa tsha thetshelesa milayo yawe nga zwiṱuku nga zwiṱuku. U lingedza u ri shushedza nga mutsiko wa vhane ra tshila navho kana nga u tovholwa uri ri litshe u huwelela. U lingedza u ri ungeledza uri ri thetshelese nḓivho ya vhagunei ‘i lwisanaho na ngoho’ hu u itela uri ri litshe ngoho ya Yehova.​—1 Tim. 6:20, 21.

8. Ni guda mini kha tshenzhelo ya wahashu Daniel?

⁸ Arali ra sa ṱhogomela, ri nga litsha ngoho nga zwiṱuku nga zwiṱuku. Kha ri ambe nga tshenzhelo ya Daniel * we a vha a tshi funa mitambo ya vidio (video games). U ri: “Ndo  thoma u tamba mitambo ya vidio ndi na miṅwaha ya 10. Mathomoni ndo vha ndi tshi tamba mitambo ya vidio i si na khombo. Fhedzi nga zwiṱuku nga zwiṱuku nda thoma u tamba ine ya vha na dzinndwa na vhudimoni.” O fhedzisela a tshi vho fhedza awara dza 15 ḓuvha ḽiṅwe na ḽiṅwe a tshi khou tamba mitambo ya vidio. Daniel u ri: “U tou amba ngoho, ndo vha ndi tshi zwi ḓivha uri mitambo ine nda i tamba na tshifhinga tshine nda tshi fhedza ndi tshi khou i tamba zwi khou ita uri ndi si tsha vha na vhushaka havhuḓi na Yehova. Fhedzi mbilu yanga yo vha yo no rindila lwe nda ḓivhudza uri zwine Bivhili ya amba a zwi shumi kha nṋe.” Arali ra sa thanya, u ḓimvumvusa zwi nga ita uri ri litshe ngoho nga zwiṱuku nga zwiṱuku. Arali ra ita zwenezwo, ri nga fhedza ri tshi vho xelelwa nga zwithu zwa ndeme zwe Yehova a ri ṋea zwone.

9. U ya nga 1 Timotheo 1:18, 19, Paulo o fanyisa Timotheo na mini?

⁹ Vhalani 1 Timotheo 1:18, 19. Paulo o fanyisa Timotheo na swole nahone a mu ṱuṱuwedza uri a ‘bvele phanḓa a tshi lwa nndwa yo teaho.’ Paulo o vha a sa khou amba nga ha u lwa na maṅwe maswole. Vhakriste vha fana hani na maswole a re nndwani? Sa maswole a Kristo, ri tea u vha vhathu-ḓe? Kha ri ambe nga ha zwithu zwiṱanu zwine ra nga zwi guda kha tshifanyiso tsha Paulo. Zwenezwi zwithu zwi nga ri thusa u dzula ro farelela ngoho.

10. Zwi amba mini u ḓikumedzela kha Mudzimu nahone ndi ngani ri tshi tea u zwi ita?

¹⁰ Ḓikumedzeleni kha Mudzimu. Swole ḽi tea u fhulufhedzea. Ḽi ḓo lwa nga maanḓa u itela u tsireledza muthu ane ḽa mu funa kana tshithu tshine tsha vha tsha ndeme khaḽo. Paulo o ṱuṱuwedza Timotheo uri a ḓikumedzele kha Mudzimu, zwine zwa amba u fhulufhedzea khae. (1 Tim. 4:7) Arali ra funa Mudzimu nga ho engedzeaho ri ḓo farelela ngoho ra tou khwaṱhisa.​—1 Tim. 4:8-10; 6:6.

11. Ndi ngani ri tshi tea u ḓigudisa u ita zwo teaho?

¹¹ Ḓigudiseni u ita zwo teaho. Swole ḽi tea u ḓigudisa u ita zwo teaho u itela uri ḽi dzule ḽo lugela u ya nndwani. Timotheo o kona u lwa na ṱhuṱhuwedzo ya Saṱhane. Zwenezwo o zwi kona ngauri o tevhela nyeletshedzo ya Paulo ya uri a shavhe nyemulo mmbi, a vhe na matshilele avhuḓi na u fhedza tshifhinga na vhahawe. (2 Tim. 2:22) Zwenezwo zwo vha zwi tshi ṱoḓa uri a ḓifare. Ri tea u ḓigudisa u ita zwithu zwo teaho u itela uri ri kone u kunda nyemulo dzashu. (Vharoma 7:21-25) Zwiṅwe hafhu, ri tea u ḓigudisa u ita zwo teaho uri ri kone bvula vhumuthu ha kale nahone ri ambare vhumuthu vhuswa. (Vhaef. 4:22, 24) Arali ro neta nge ra vha ri na mishumo minzhi, ri nga tea u ḓikombetshedza u ya miṱanganoni nga ḽeneḽo ḓuvha.​—Vhahev. 10:24, 25.

12. Ri nga khwinisa hani nḓila ine ra shumisa ngayo Bivhili?

¹² Swole ḽi tea u ḓiḓowedza u shumisa zwiṱhavhane zwaḽo. Uri ḽi kone u zwi shumisa zwavhuḓi, ḽi tea u dzula ḽi tshi ḓiḓowedza. Na riṋe ri tea u kona u shumisa Ipfi ḽa Mudzimu. (2 Tim. 2:15) Ri nga guda nḓila ya u ḽi shumisa musi ri miṱanganoni. Fhedzi ri tea u dzula ri tshi guda Bivhili uri ri kone u thusa vhaṅwe uri vha tende zwine ya amba. Ri tea u shumisa Ipfi ḽa Mudzimu u itela u khwaṱhisa lutendo lwashu. Zwi amba uri a ro ngo tea u sokou vhala Bivhili fhedzi. Ri tea u elekanya nga ha zwine ra vhala na u ita ṱhoḓisiso kha khandiso dzashu uri ri kone u pfesesa na u shumisa Maṅwalo nga nḓila yo teaho. (1 Tim. 4:13-15) Musi ro no ita zwenezwo ri ḓo kona u gudisa vhaṅwe Ipfi ḽa Mudzimu. Na musi ri tshi vha  gudisa, a ro ngo tea u sokou vha vhalela Bivhili fhedzi. Ri tea u vha thusa u pfesesa zwe ra vhala na u vha sumbedza uri vha nga zwi shumisa hani. Nga zwenezwo, arali ra dzula ri tshi guda Bivhili, ri ḓo khwinisa vhutsila hashu ha u gudisa vhaṅwe.​—2 Tim. 3:16, 17.

13. U ya nga Vhahevheru 5:14, ndi ngani ri tshi tea u vha na ṱhalukanyo?

¹³ Ivhani na ṱhalukanyo. Swole ḽi tea u kona u vhona khombo musi i sa athu u itea nahone ḽa i iledza. Na riṋe ri tea u kona u vhona vhuimo vhune ha nga tshinya vhushaka hashu na Yehova nahone ri vhu iledze. (Mir. 22:3; vhalani Vhahevheru 5:14.) Sa tsumbo, ri tea u ṱhogomela zwine ra ḓimvumvusa ngazwo. Kanzhi zwiṱori zwa TV na mimuvi zwi sumbedza vhuḓifari vhu songo kunaho. Honoho vhuḓifari vhu sinyusa Mudzimu nahone vhu ḓo tshinya vhushaka hashu nae. Ri tea u iledza u ḓimvumvusa nga zwithu zwine zwa nga ita uri ri si tsha vha na vhushaka havhuḓi na Yehova nga zwiṱuku nga zwiṱuku.​—Vhaef. 5:5, 6.

14. Ṱhalukanyo yo thusa hani Daniel?

¹⁴ Daniel we ra amba nga hae o thoma u zwi vhona uri u tamba mitambo ya vidio ine ya vha na dzinndwa na vhudimoni zwi na khombo. O ita ṱhoḓisiso kha Watchtower Library uri a wane zwithu zwine zwa nga mu thusa. Ho vha na mvelelo dzifhio? O litsha u tamba mitambo ya vidio i songo teaho. O litsha u tamba na vhaṅwe vhatambi vha kha inthanethe. Daniel u ri: “Nṱhani ha u tamba mitambo ya vidio, ndo thoma u fhedza tshifhinga na vhahashu.” Zwino Daniel ndi muvulanḓila nahone ndi muhulwane tshivhidzoni.

15. Ndi ngani zwi na khombo u thetshelesa vhagunei?

¹⁵ Ri tea u fana na Timotheo nga u sa thetshelesa zwithu zwine zwa ambiwa nga vhagunei. (1 Tim. 4:1, 7; 2 Tim. 2:16) Sa tsumbo, vha nga lingedza u phaḓaladza mazwifhi nga ha vhahashu kana u ita uri ri si tsha fhulufhela ndangulo ya Yehova. Eneo mazwifhi a nga ita uri ri si tsha vha na lutendo lwo khwaṱhaho. Ri tea u iledza u fhuriwa nga enea mazwifhi. Ndi ngani? Ngauri enea mazwifhi a phaḓaladzwa nga “vhathu vho tshinyalaho muhumbulo na vho ṱutshelaho ngoho.” Tshipikwa tshavho ndi “u hanedza na u ṱaṱa khani.” (1 Tim. 6:4, 5) Vha ṱoḓa uri ri tende mazwifhi avho na uri ri si tsha fhulufhela vhahashu.

16. Ri tea u iledza u thithiswa nga mini?

 ¹⁶ Dzulani no livhisa ṱhogomelo kha u huwelela. Samusi Timotheo o vha e “swole ḽavhuḓi ḽa Kristo Yesu” o vha a tshi tea u dzula o livhisa ṱhogomelo kha u huwelela nṱhani ha u i livhisa kha u wana lupfumo kana zwiṅwe. (2 Tim. 2:3, 4) Na riṋe a ro ngo tea u tendela lutamo lwa lupfumo lu tshi ri thithisa. Ri nga ‘fhuriwa nga lupfumo’ zwa ita uri ri si tsha funa Yehova, ri si tsha dzhiela nṱha Ipfi ḽawe nahone ri si tsha ṱoḓa u huwelela. (Mat. 13:22) Ri nga ḓidzima zwiṅwe zwithu nahone ra shumisa tshifhinga tshashu na nungo dzashu u itela u ‘dzula ri tshi ṱoḓa Muvhuso wa Mudzimu u thoma.’​—Mat. 6:22-25, 33.

17-18. Ri tea u ita mini u tsireledza vhushaka hashu na Yehova?

¹⁷ Dzulani no lugela u dzhia vhukando. Swole ḽi tea u dzudzanya hu tshee nga phanḓa uri ḽi ḓo ḓitsireledza hani. Uri ri kone u tsireledza zwithu zwe Yehova a ri ṋea zwone, ri tea u ṱavhanya ra dzhia vhukando musi hu na khombo. Ndi mini zwine zwa nga ri thusa u dzhia vhukando nga u ṱavhanya? Ri tea u dzudzanya hu tshee nga phanḓa uri ri ḓo ita mini musi hu tshi vha na khombo.

¹⁸ Sa tsumbo, arali no ya kha tshiitea tshine tsha vha na vhathu vhanzhi, musi tshi sa athu u thoma, vha a ni humbela uri ni sedze miṋango ine na nga bva ngayo arali ha vha na khombo. Ndi ngani? Uri ni kone u bva nga u ṱavhanya arali ha vha na tshiimo tsha shishi. Nga nḓila i fanaho, ri nga dzula ro dzudzanya uri ri ḓo ita mini arali ha nga bvelela zwifanyiso zwi songo kunaho, zwithu zwa dzinndwa kana mafhungo a vhagunei musi ri tshi khou shumisa inthanethe, ri tshi khou vhona muvi kana TV. Arali ra ita ngoma madzula wo vhambwa, ri nga dzhia vhukando nga u ṱavhanya, ra tsireledza vhushaka hashu na Yehova na u dzula ro kuna phanḓa hawe.​—Ps. 101:3; 1 Tim. 4:12.

19. Ri ḓo fhaṱutshedzwa nga mini arali ra tsireledza zwe ra ṋewa zwone?

¹⁹ Ri tea u tsireledza zwithu zwa ndeme zwe Yehova a ri ṋea zwone zwine zwa vha ngoho i re Bivhilini na ndugelo ya u i vhudza vhaṅwe. Musi ri tshi ita nga u ralo, ri ḓo vha na luvalo lwo kunaho, ra ḓivha uri ri khou tshilela mini nahone ra takala ngauri ri khou thusa vhaṅwe u ḓivha Yehova. Yehova u ḓo ri thusa u tsireledza zwe a ri ṋea zwone.​—1 Tim. 6:12, 19.