1-2. (a) U ya nga Mirero 16:31, ri fanela u dzhia hani vhalala vha fhulufhedzeaho? (b) Ri ḓo fhindula mbudziso dzifhio kha ino thero?

NGEI Arkansas kha ḽa Amerika, hu na iṅwe phakha ine ha wanala dzidaimane fhasi. Fhedzi dzenedzo daimane dzi vha dzi sa athu u kunakiswa kana u penyiswa. Ngauralo, vhunzhi ha vhathu vha sokou dzi pfuka vha sa zwi ṱhogomeli uri ndi daimane.

² Vhalala vhashu vha fhulufhedzeaho vha fana na dzenedzo daimane nahone ndi vha ndeme. Ipfi ḽa Mudzimu ḽi vhambedza mmvi dzavho na khare. (Vhalani Mirero 16:31; 20:29) Fhedzi zwi nga leluwa u sa ṱhogomela uri vhalala ndi vha ndeme. Vhaswa vhane vha ṱhogomela uri vhalala ndi vha ndeme vha nga wana zwithu zwa ndeme zwi fhiraho lupfumo. Kha ino thero ri ḓo fhindula mbudziso tharu: Ndi ngani Yehova a tshi dzhia vhalala vha fhulufhedzeaho vhe vha ndeme? Ndi ngani vhahashu vha re vhalala vhe vha ndeme ndanguloni ya Yehova? Ri nga ita mini uri ri vhuyelwe nga tsumbo dzavho?

3. U tendelana Phisalema 92:12-15, ndi ngani vhalala vha fhulufhedzeaho vhe vha ndeme kha Yehova?

³ Vhalala vha fhulufhedzeaho ndi vha ndeme kha Yehova. U ḓivha zwine vha vha zwone nahone u zwi dzhiela nṱha. U a takala musi vhalala vha tshi vhudza vhaswa zwithu zwa vhuṱali zwe vha zwi wana musi vha tshi shumela Yehova lwa miṅwaha minzhi. (Yobo 12:12; Mir. 1:1-4) Yehova u dovha a dzhiela nṱha nḓila ye vha konḓelela ngayo. (Maḽ. 3:16) Vho sedzana na dzithaidzo vhutshiloni havho, fhedzi vha ḓi dzula vhe na lutendo  lwo khwaṱhaho kha Yehova. Fhulufhelo ḽavho ḽa vhumatshelo ḽo khwaṱha u fhira musi vha tshi thoma u guda ngoho. Yehova u a vha funa ngauri vha bvela phanḓa vha tshi ḓivhadza dzina ḽawe “naho vho no vha vhaaluwa.”—Vhalani Phisalema 92:12-15.

4. Ndi zwifhio zwine zwa nga ṱuṱuwedza vhahashu vha vhalala?

⁴ Arali no no vha mulala, ivhani na vhungoho ha uri Yehova u humbula mishumo yoṱhe ye na mu itela tshifhingani tsho fhiraho. (Vhahev. 6:10) No tikedza mushumo wa u huwelela nga u fhisea nahone zwenezwo zwi takadza Khotsi ashu wa ṱaḓulu. No konḓelela dzithaidzo, u katela na dze dza ni ṱungufhadza vhukuma. No tevhedza na u tikedza matshilele a tikedzwaho nga Bivhili, na ita mishumo ya ndeme ndanguloni ya Yehova nga u fhulufhedzea na u gudisa vhaṅwe. No ita zwoṱhe zwine na nga kona uri ni tshimbidzane na tshanduko nnzhi dzo itwaho nga ndangulo ya Yehova. No tikedza na u ṱuṱuwedza vhaṅwe vha re tshumeloni ya tshifhinga tshoṱhe. Yehova u a ni funa nga maanḓa ngauri ni a fhulufhedzea. U fhulufhedzisa uri “ha nga ṱutsheli vhathu vhawe vha fhulufhedzeaho”! (Ps. 37:28) U ni fhulufhedzisa hezwi: “Ni ḓo vhuya na bva mmvi ndi tshi kha ḓi ni tikedza.” (Yes. 46:4) Nga zwenezwo, ni songo vhona u nga a ni tsha vha wa ndeme ndanguloni ya Yehova ngauri no no vha wa maḓuvha. Ni wa ndeme nga maanḓa!

5. Vhalala vha fanela u humbula mini?

⁵ Vhalala vha nga shumiswa nga nḓila nnzhi ndanguloni ya Yehova. Naho vha tshi nga vha vha si tsheena nungo dze vha vha vhe nadzo, vho tshenzhela zwithu zwinzhi miṅwahani ye vha i tshila. Tsumbo dzi tevhelaho dza tshifhingani tsho fhiraho na dza musalauno, dzi sumbedza uri Yehova a nga bvela phanḓa a tshi vha shumisa nga nḓila dzo fhambanaho.

6-7. Ṋeani tsumbo dzi bvaho Bivhilini dzi sumbedzaho nḓila ye Yehova a lambedza ngayo vhalala vhe vha mu shumela nga u fhulufhedzea.

⁶ Ri nga wana tsumbo dzavhuḓi Bivhilini dza vhathu vha fhulufhedzeaho vhe vha bvela phanḓa vha tshi shumela Yehova naho vhe vhalala. Sa tsumbo, Mushe o vha e na miṅwaha i ṱoḓaho u vha 80 musi a tshi thoma u  shuma sa muporofita wa Yehova na murangaphanḓa wa lushaka lwa Isiraele. Yehova o vha a tshi kha ḓi shumisa Daniele sa muporofita naho Daniele o vha e na miṅwaha i fhiraho 90. Zwi vhonala u nga muapostola Yohane na ene o vha e kha miṅwaha ya vhu 90 musi a tshi hevhedzwa uri a ṅwale bugu ya Nzumbululo.

⁷ Hu na vhaṅwe vhanzhi vha fhulufhedzeaho vhe vha vha vha si na bvumo nahone khamusi vhathu vha sa vha dzhieli nṱha. Naho zwo ralo, Yehova o vha dzhiela nṱha nahone o vha lambedza nge vha fhulufhedzea. Sa tsumbo, Bivhilini a ho ngo ambeswa zwinzhi nga ha Simeoni we a vha “o luga a tshi ofha Mudzimu,” fhedzi Yehova o vha a tshi mu ḓivha nahone a mu ṋea ndugelo ya u vhona Yesu a tshi kha ḓi vha lutshetshe na ya u porofita nga ha Yesu na mme awe. (Luka 2:22, 25-35) Dovhani ni humbule nga ha Ana we a vha e tshilikadzi nahone e muporofita. O vha e na miṅwaha ya 84, fhedzi “o vha a tshi dzula e hone thembeleni.” Yehova o mu fhaṱutshedza ngauri o vha a tshi dzulela u ya thembeleni nahone a ita uri a vhone Yesu a tshi kha ḓi vha lutshetshe. Simeoni na Ana vho vha vhe vha ndeme kha Yehova.—Luka 2:36-38.

8-9. Ndi mini zwe muṅwe wahashu wa tshifumakadzini wa tshilikadzi a zwi ita ndanguloni ya Yehova?

⁸ Musalauno hu na vhalala vhanzhi vha fhulufhedzeaho vhane vha vha tsumbo dzavhuḓi kha vhaswa. Kha ri ambe nga ha tsumbo ya wahashu wa tshifumakadzini Vho Lois Didur. Vho thoma u vha muvulanḓila o khetheaho ngei Canada vha tshi kha ḓi tou vha na miṅwaha ya 21. Nga murahu ha zwenezwo, vhone na mukalaha wavho Vho John vho fhedza miṅwaha minzhi vha tshi khou ita mushumo wa u dalela zwivhidzo. Nga murahu, vho shuma Bethele ya Canada miṅwaha i fhiraho 20. Musi Vho Lois vhe na miṅwaha ya 58, vhone na Vho John vho humbelwa uri vha ye u ita muṅwe mushumo ngei Ukraine. Vho vha vha tshi ḓo ita mini? Naa vho vha vha tshi ḓo humbula uri vho no aluwa lune vha sa ḓo kona u pfulutshela kha ḽiṅwe shango? Vho tenda u pfulutshela henefho nahone Vho John vha vhewa sa muraḓo wa Komiti ya Davhi ya henefho. Vho John vho mbo ḓi lovha nga murahu ha miṅwaha ya sumbe, fhedzi Vho Lois vha bvela phanḓa vha tshi khou shuma henefho. Zwino Vho Lois vha na miṅwaha ya 81. Vha kha ḓi shumela Yehova nga u fhulufhedzea henefho Bethele ya Ukraine nahone muṱa woṱhe wa yeneyo Bethele u vha funa nga maanḓa.

⁹ Zwi nga itea uri tshilikadzi dzi fanaho na Vho Lois dzi si dzhielwe nṱha u fana na musi vhakalaha vhavho vha tshi kha ḓi tshila. Naho zwo ralo, vha kha ḓi vha vha ndeme. Yehova u dzhiela nṱha vhahashu vha tshifumakadzini vhe vha tikedza vhanna vhavho lwa miṅwaha minzhi vhane vha kha ḓi bvela phanḓa vha tshi mu shumela nga u fhulufhedzea. (1 Tim. 5:3) Vhenevha vhahashu vha dovha vha ṱuṱuwedza na vhaswa.

10. Ndi tsumbo ifhio yavhuḓi ye Vho Tony vha ri vhetshela yone?

 ¹⁰ Vhalala vhanzhi vha fhulufhedzeaho vhane vha dzula fhethu hune ha ṱhogomelwa vhaaluwa na vhone ndi vha ndeme. Sa tsumbo, hu na wahashu Vho Tony vhane vha dzula fhethu ho raloho. Vho lovhedzwa vhe na miṅwaha ya 20 ngei Pennsylvania, Amerika nga August 1942. Nga murahu ha musi vho no lovhedzwa, vho kombetshedzwa uri vha ye vhuswoleni. Fhedzi vho hana u ya, zwa ita uri vha valelwe dzhele lwa miṅwaha mivhili na hafu. Vhone na mufumakadzi wavho Vho Hilda vho alusela vhana vhavho vhavhili ngohoni. Vho Tony vho fhedza miṅwaha minzhi vha tshi khou shuma zwivhidzoni zwiraru sa mudzudzanyi wa tshigwada tsha vhahulwane na mulavhelesi wa guvhangano ḽa ḽiisela. Vho vha vha tshi dalela dzhele, vha tshi fara miṱangano ya tshivhidzo na pfunzo dza Bivhili henefho. Naho zwino Vho Tony vhe na miṅwaha ya 98, vha kha ḓi bvela phanḓa vha tshi shumela Yehova. Vha dzula vha tshi ita zwoṱhe zwine vha nga kona uri vha shumele Yehova vhe na vhahavho tshivhidzoni!

11. Ri nga sumbedza hani uri ri dzhiela nṱha vhane vha dzula fhethu hune ha ṱhogomelwa vhaaluwa?

¹¹ Ri nga hulisa hani vhalala vhane vha dzula hune ha ṱhogomelwa vhaaluwa? Musi zwi tshi konadzea, vhahulwane vha nga vha thusa u huwelela, u ya miṱanganoni kana u i thetshelesa. Ri nga sumbedza uri ri na ndavha navho nga u vha dalela kana nga u amba navho nga vidio. Ri tea u ṱhogomela vhukuma vhalala vha re fhethu hune ha ṱhogomelwa vhaaluwa hu re kule na tshivhidzo tsha havho. Ri tea u ita vhungoho ha uri ri si vha hangwe. Vhaṅwe vha nga vhona zwi tshi vha konḓela kana zwi songo tea u amba nga ha vhone vhaṋe. Fhedzi ri ḓo ṱuṱuwedzea arali ra vha vhudzisa dzimbudziso na u thetshelesa musi vha tshi ri vhudza zwithu zwavhuḓi zwe vha zwi tshenzhela ndanguloni ya Yehova.

12. Ri nga wana mini zwivhidzoni zwashu?

¹² Zwi nga ri mangadza uri tshivhidzoni tshashu hu na vhalala vha re tsumbo dzavhuḓi. Wahashu wa tshifumakadzini Vho Harriette vho shumela Yehova lwa miṅwaha minzhi tshivhidzoni tshavho ngei New Jersey, Amerika. Vho mbo ḓi pfuluwa vha ya vha dzula na ṅwana wavho wa musidzana. Vhahashu vha tshivhidzoni tshavho tshiswa vho ḓiṋea tshifhinga tsha u vha ḓivha khwine nahone vha zwi ṱhogomela uri hu na zwinzhi zwe vha zwi tshenzhela. Vho vha anetshela mafhungo a ṱuṱuwedzaho a musi vhe tsimuni musi vha tshi kha ḓi tou bva u guda ngoho nga vho 1920. Nga tshenetsho tshifhinga vho vha vha tshi dzula vho fara bulatsho ya u ṱamba maṋo musi vha tshi ya tsimuni ngauri vho vha vha tshi nga farwa. Zwavhuḓivhuḓi, nga 1933 vho farwa luvhili vha fhedza vhege vhe dzhele. Munna wavho o vha e si Ṱhanzi, fhedzi o vha a tshi vha tikedza. O ṱhogomela vhana vhavho vhararu vhe vha vha vha tshi kha ḓi vha vhaṱuku musi Vho Harriette vhe dzhele. Ndi ngoho uri vhalala vha fhulufhedzeaho vha ngaho Vho Harriette vha tea u dzhiiwa vhe vha ndeme!

13. Ro guda mini nga ha nḓila ine vhalala vha vha vha ndeme ngayo ndanguloni ya Yehova?

¹³ Vhahashu vha vhalala ndi vha ndeme kha Yehova na kha ndangulo yawe. Vho vhona nḓila nnzhi dzo fhambanaho dze Yehova a sumbedza ngadzo uri u a vha takalela na u takalela ndangulo yawe. Vho guda zwithu zwa ndeme kha vhukhakhi he vha vhu ita. Ni vha dzhie sa “tshisima tsha vhuṱali” nahone ni gude khavho. (Mir. 18:4) Arali na ḓiṋea tshifhinga tsha u vha ḓivha khwine, zwi ḓo khwaṱhisa lutendo lwaṋu nahone ni ḓo guda zwinzhi khavho!

14. Dotoronomio 32:7 i ṱuṱuwedza vhaswa uri vha ite mini?

¹⁴ Itani vhuḓidini ha uri ni ambe na vhalala. (Vhalani Dotoronomio 32:7.) Vha nga vha vha si tsha vhona zwavhuḓi, vha tshi tshimbila nga u ongolowa nahone na ipfi ḽo no sekena. Fhedzi vha kha ḓi ṱoḓa u ita zwinzhi nahone vho ḓiitela “dzina ḽavhuḓi” na Yehova. (Muh. 7:1) Ni songo hangwa uri ndi ngani Yehova a tshi vha dzhia vhe vha ndeme. Bvelani phanḓa ni tshi vha hulisa. Lwelani u edzisa Elisha. O kombetshedza u tshimbila na Elia nga ḓuvha ḽavho ḽa u fhedzisela. Elisha o amba luraru a ri: “Ndi nga si u ṱutshele.”—2 Dzikh. 2:2, 4, 6.

15. Ndi mbudziso dzifhio dzine ra nga dzi vhudzisa vhalala?

¹⁵ Sumbedzani uri ni na ndavha na vhalala nga u vha vhudzisa dzimbudziso. (Mir. 1:5; 20:5; 1 Tim. 5:1, 2) Ni nga vha vhudzisa hezwi: “Musi vha tshee muṱuku, ndi mini zwo itaho uri vha tende uri vho wana ngoho?” “Zwe vha zwi tshenzhela zwo vha sendedza hani tsini na Yehova?” “Vho thuswa nga mini uri vha dzule vho takala musi vha tshi shumela Yehova?” (1 Tim. 6:6-8) Ni thetshelese musi vha tshi ni anetshela tshenzhelo dzavho.

16. Musi mulala na muswa vha tshi ambedzana vha vhuyelwa hani?

¹⁶ Musi mulala na muswa vha tshi ambedzana, vha a vhuyelwa. (Vharoma 1:12) Inwi muswa ni ḓo vha na vhungoho ha uri Yehova u a ṱhogomela vhathu vhawe nahone mulala u ḓo pfa o huliswa. U ḓo ḓiphiṋa nga u ni anetshela nḓila ye Yehova a mu lambedza ngayo.

17. Ndi ngani ri tshi nga amba uri vhalala vha fhulufhedzeaho vha ḓi naka vha tshi ya?

¹⁷ Lunako lu a fhela musi muthu a tshi vha mulala, fhedzi vhane vha fhulufhedzea kha Yehova vha naka nga ho engedzeaho musi vha tshi khou ḓi aluwa. (1 Vhathes. 1:2, 3) Ndi ngani zwo tou ralo? Ndi ngauri musi vha tshi khou ḓi aluwa, vho tendela muya wa Mudzimu u tshi vha gudisa na u vha khwinisa. Musi ri tshi ya ri tshi ḓivha vhahashu vha vhalala nga ho engedzeaho, ri tshi vha hulisa na u guda khavho, ndi hone ri tshi ḓo vha dzhia vhe vha ndeme nga ho engedzeaho!

18. Ri ḓo amba nga ha mini kha thero i tevhelaho?

¹⁸ Tshivhidzo tshi a khwaṱha musi vhaswa vha tshi dzhiela nṱha vhalala na vhalala vha tshi dzhiela nṱha vhaswa. Kha thero i tevhelaho, ri ḓo amba nga ha nḓila ine vhalala vha nga sumbedza ngayo uri vha dzhiela nṱha vhaswa vha re tshivhidzoni.