1. Muthu a nga ḓipfa hani musi muṅwe muṱani a tshi bviswa tshivhidzoni?

NAA hu na muṅwe ane na mu funa o bviswaho tshivhidzoni? Zwi nga vha zwi tshi ni pfisa vhuṱungu vhukuma! Muṅwe wahashu wa tshifumakadzini ane a pfi Hilda u ri: “Musi munna wanga a fhulufhedzeaho we ra fhedza miṅwaha ya 41 ro vhingana a tshi lovha, ndo pfa zwi zwithu zwi vhavhesaho zwe nda vhuya nda ṱangana nazwo. * Fhedzi musi ṅwananga a tshi ṱutshela Yehova, mufumakadzi na vhana vhawe, zwo mmbavha na u fhirisisa.”

2-3. U ya nga Phisalema 78:40, 41, Yehova u ḓipfa hani musi vhashumeli vhawe vha tshi mu ṱutshela?

² Humbulani uri Yehova o vhaisala hani musi vhaṅwe vharuṅwa vhe vha vha vhe miraḓo ya muṱa wawe vha tshi mu ṱutshela. (Yuda 6) Ni dovhe ni humbule uri o ṱungufhala hani musi a tshi vhona Vhaisiraele vhe a vha a tshi vha funa vha tshi mu shandukela lunzhi-lunzhi. (Vhalani Phisalema 78:40, 41.) Ni nga vha na vhungoho ha uri Khotsi ashu wa ṱaḓulu a re na lufuno u a vhaisala musi ane na mu funa a tshi mu ṱutshela. U a pfesesa vhuṱungu vhune na vhu pfa. U ḓo ni khuthadza na u ni tikedza.

³ Kha ino thero, ri ḓo amba nga ha zwine ra nga zwi ita uri Yehova a ri thuse musi muraḓo wa muṱa wo litsha u mu shumela. Ri ḓo dovha ra ṱolisisa uri ri nga thusa hani vhaṅwe musi vhe na shaka ḽo bviswaho tshivhidzoni. Fhedzi kha ri thome nga u amba nga ha mahumbulele a si avhuḓi ane ra tea u a iledza.

4. Vhabebi vhanzhi vha ḓipfa hani musi ṅwana wavho a tshi ṱutshela Yehova?

⁴ Musi ṅwana a tshi ṱutshela Yehova, vhabebi vha anzela u humbula uri vho vha vho tea vho ita zwiṅwe u thusa ṅwana wavho  uri a dzule a tshi shumela Yehova. Muṅwe wahashu ane a pfi Luke o amba zwi tevhelaho musi murwa wawe a tshi bviswa tshivhidzoni, o ri: “Ndo vha ndi tshi ḓivhona mulandu. Ndo vha ndi tshi vha na miḽoro mivhi nga hazwo. Ndo vha ndi tshi ita ndi tshi lila na mbilu yanga i tshi vhavha.” Elizabeth we na ene murwa wawe a bviswa tshivhidzoni o vha a tshi dzulela u humbula uri: “Kani a tho ngo vha mme wavhuḓi? Ndo vhona u nga hu na zwe nda ṱahedza musi ndi tshi gudisa ṅwananga u funa Yehova.”

5. Ndi mulandu wa nnyi musi muthu a tshi ṱutshela Yehova?

⁵ Ri songo hangwa uri Yehova o ṋea roṱhe tshifhiwa tsha u ḓikhethela. Zwi amba uri ri nga khetha u mu shumela kana u sa mu shumela. Vhaṅwe vhana a vho ngo vha na vhabebi vha re tsumbo dzavhuḓi, fhedzi vha khou shumela Yehova nahone vha a fhulufhedzea khae. Vhaṅwe vho vha na vhabebi vhe vha vha funza vhukuma uri vha fune Yehova, fhedzi musi vho no aluwa vha mu ṱutshela. Nga zwenezwo, muṅwe na muṅwe u tou ḓikhethela u shumela Yehova kana u sa mu shumela. (Yosh. 24:15) Ngauralo, vhoiwe vhabebi no ṱungufhalaho nge ṅwana waṋu a litsha u shumela Yehova, ni songo ḓivhona mulandu!

6. Muswa a nga ḓipfa hani musi mubebi a tshi litsha u shumela Yehova?

⁶ Nga tshiṅwe tshifhinga, mubebi u a ṱutshela ngoho a ṱutshela na muṱa. (Ps. 27:10) Zwenezwo zwi nga ṱungufhadza vhana vhane vha ṱhonifha onoyo mubebi na u mu dzhia e tsumbo khavho. Esther we khotsi awe vha bviswa tshivhidzoni u ri: “Ndo vha ndi tshi dzula ndi tshi lila ngauri ndo zwi vhona uri a vha khou kheluwa vha sa zwi limuwi. Fhedzi vho vha vho tou ita phetho ya uri a vha tsha funa u shumela Yehova. Khotsi anga ndi a vha funa. Ngauralo, musi vho bviswa tshivhidzoni, ndo vha ndi tshi dzula ndi tshi vhilaelela mutakalo wavho. Zwo vha zwi tshi ita uri ndi dzule ndo vha tshuwela.”

7. Yehova u ḓipfa hani nga muswa we mubebi wawe a bviswa tshivhidzoni?

⁷ Vhoiwe vhaswa, na riṋe mbilu dzashu dzi a vhavha vhukuma arali ni na mubebi o bviswaho tshivhidzoni. Ivhani na vhungoho ha uri Yehova u a zwi ḓivha uri zwi khou ni vhaisa. U a ni funa nahone u a takala uri ni khou bvela phanḓa ni tshi mu shumela nga u fhulufhedzea. Na riṋe vhahaṋu tshivhidzoni ri ḓipfa u fana na Yehova. Ni songo hangwa uri a si vhoiwe vhane na ḓo hwala vhuḓifhinduleli ha phetho dza vhabebi vhaṋu. Samusi ro no ḓi zwi amba, Yehova o fha muṅwe na muṅwe mbofholowo ya u ḓikhethela u mu shumela kana u sa mu shumela. Nahone muṅwe na muṅwe o ḓiṋekedzaho na u lovhedzwa u tea u “hwala vhuḓifhinduleli hawe.”—Vhagal. 6:5.

8. Miṅwe miraḓo ya muṱa i fhulufhedzeaho i nga ita mini musi yo lindela o bviswaho a tshi vhuyelela kha Yehova? (Sedzani na bogisi “ Vhuyelelani Kha Yehova.”)

⁸ Musi ane na mu funa o ṱutshela Yehova, zwi tou pfala uri ni fhulufhela uri ḽiṅwe ḓuvha u ḓo vhuyelela khae. Ni nga ita mini musi no mu lindela? Itani zwine na nga kona uri ni khwaṱhise lutendo lwaṋu. Na ita nga u ralo, ni ḓo vhetshela vhaṅwe muṱani tsumbo yavhuḓi, u katela na o bviswaho tshivhidzoni. Ni ḓo wana nungo dza u konḓelela honoho vhuṱungu. Kha ri ambe nga ha zwine na tea u zwi ita uri ni khwaṱhise lutendo lwaṋu.

9. Ni nga ita mini uri ni khwaṱhise lutendo lwaṋu? (Sedzani na bogisi “ Maṅwalo Ane A Nga Ni Khuthadza Arali Ane Na Mu Funa O Ṱutshela Yehova.”)

⁹ Dzulani ni tshi khwaṱhisa lutendo lwaṋu. Ndi zwa ndeme uri ni dzule ni tshi ḓikhwaṱhisa na u khwaṱhisa miṅwe miraḓo ya muṱa. Ni nga zwi ita hani? Wanani nungo nga u dzula ni tshi vhala Ipfi ḽa Mudzimu na u elekanya nga ha zwine na zwi vhala khathihi na u ya miṱanganoni ya Vhukriste. Joanna we khotsi awe na mukomana wawe vha litsha ngoho, u ri: “Musi ndi tshi vhala Bivhilini nga ha Abigaili, Esitere, Yobo, Yosefa na Yesu, a thi tsha vhilaela. Tsumbo dzavho dzi a nṱuṱuwedza na u nthusa uri ndi vhe na mavhonele avhuḓi. Ndi dovha nda khuthadzwa nga nyimbo dza Khasho ya JW.”

10. Phisalema 32:6-8 i ri thusa hani u konḓelela musi ro tsikeledzea?

¹⁰ Vhudzani Yehova zwoṱhe zwine zwa ni vhilaedzisa. Musi ni tshi pfa no tsikeledzea, ni songo litsha u rabela. Dzulani ni tshi humbela Mudzimu washu wa lufuno uri a ni thuse uri ni dzhie zwithu nga nḓila ine ene a zwi dzhia ngayo, na u ni ‘ṋea ṱhalukanyo na u ni funza nḓila ine na tea u i fara.’ (Vhalani Phisalema 32:6-8.) Zwi tou pfala uri ni nga pfa zwi tshi vhavha u vhudza Yehova nḓila ine na ḓipfa ngayo. Fhedzi Yehova u pfesesa nga vhuḓalo vhuṱungu vhune na khou vhu pfa. U a ni funa nga maanḓa nahone u ni ṱuṱuwedza uri ni mu vhudze zwi re mbiluni yaṋu.—Ek. 34:6; Ps. 62:7, 8.

11. U ya nga Vhahevheru 12:11, ndi ngani ri tshi nga fhulufhela nḓila ine Yehova a kaidza ngayo nga lufuno? (Sedzani na bogisi “ U Bvisa Muthu Tshivhidzoni Zwi Sumbedza Uri Yehova U A Ri Funa.”)

¹¹ Tikedzani phetho ya vhahulwane. U bvisa tshivhidzoni ndi ndugiselelo ya Yehova. Nḓila ine a khakhulula ngayo nga lufuno, i vhuyedza vhathu vhoṱhe, u katela na o litshaho u shumela Yehova. (Vhalani Vhahevheru 12:11.) Vhaṅwe tshivhidzoni vha nga amba uri phetho ya  vhahulwane ya u bvisa onoyo muthu tshivhidzoni yo khakhea. Fhedzi ni songo hangwa uri vhenevho vhathu a vha ambi zwithu zwivhi zwe onoyo muthu o khakhaho a zwi ita. A ri na zwidodombedzwa zwo fhelelaho nga ha eneo mafhungo. Ngauralo, fhulufhelani uri vhahulwane vha re kha komiti ya khaṱhulo vho ita zwine vha nga kona uri vha shumise zwine Bivhili ya amba na uri vha haṱulele “Yehova.”—2 Koron. 19:6.

12. Vhaṅwe vho vhuyelwa hani nge vha tikedza nḓila ine Yehova a kaidza ngayo?

¹² Ni nga thusa ane na mu funa uri a vhuyelele kha Yehova nga u tikedza phetho ya vhahulwane ya u mu bvisa tshivhidzoni. Elizabeth we ra amba nga hae u ri: “Zwo vha zwi tshi konḓa vhukuma u sa amba na murwa washu we a vha o no aluwa. Fhedzi musi o no vhuyelela kha Yehova, o amba uri zwo vha zwo tea uri a bviswe tshivhidzoni. Nga murahu o amba uri hu na zwithu zwinzhi zwe a zwi guda.” Elizabeth u dovha a ri: “Ndo guda uri nḓila ine Yehova a ri kaidza ngayo, yo luga zwifhinga zwoṱhe.” Munna wawe Mark o engedza nga uri: “Musi ho no fhela tshifhinga tshilapfu, murwa washu o mmbudza uri zwiṅwe zwe zwa ita uri a ṱoḓe u vhuya ndi uri riṋe vhabebi a ro ngo vha na vhukwamani nae. Ndo takala nga maanḓa nge Yehova a ri thusa u mu thetshelesa.”

13. Ndi mini zwine zwa nga ni thusa u konḓelela vhuṱungu vhune na khou vhu pfa?

¹³ Ambani na khonani dzine dza pfesesa nḓila ine na ḓipfa ngayo. Lingedzani u ṱwa na vhahaṋu vha re na tshenzhelo vhane vha nga ni thusa uri ni si laṱe fhulufhelo. (Mir. 12:25; 17:17) Joanna we ra amba nga hae u ri: “Ndo pfa ndi si na mutikedzi. Fhedzi zwe zwa nthusa ndi u amba na khonani dzi fhulufhedzeaho.” Ni nga ita mini arali vhaṅwe tshivhidzoni vha tshi ni vhudza maipfi ane a tou ni khanikha?

14. Ndi ngani ri tshi tea u ‘bvela phanḓa ri tshi konḓelelana na u hangwelana zwi tshi bva mbiluni’?

¹⁴ Ni songo fhelela vhahaṋu mbilu. Ri tshi tou amba ngoho, ri nga si lavhelele uri muṅwe na muṅwe a dzule a tshi amba zwithu zwo teaho. (Yak. 3:2) Roṱhe ri na tshivhi, ngauralo, ni songo mangala musi vhaṅwe vha tshi sokou ḓiambela kana vha tshi ni vhaisa nga maipfi ngeno vha sa khou zwi ita nga khole. Ni humbule heyi nyeletshedzo ya muapostola Paulo. O ri: “Bvelani phanḓa ni tshi konḓelelana na u hangwelana zwi tshi bva mbiluni naho muṅwe o ni khakhela.” (Vhakol. 3:13) Muṅwe wahashu wa tshifumakadzini we shaka ḽawe ḽa bviswa tshivhidzoni u ri: “Yehova o nthusa uri ndi hangwele vhahashu vhe vha mmbaisa ngeno vha tshi khou lingedza u nkhuthadza.” Tshivhidzo tshi nga ita mini u thusa miraḓo ya muṱa i fhulufhedzeaho?

15. Ri nga ita mini u thusa vhe muṅwe muṱani wavho a bviswa tshivhidzoni?

¹⁵ Sumbedzani vhuthu na vhukonani kha miraḓo ya muṱa i fhulufhedzeaho. Muṅwe wahashu ane a pfi Miriam u ri o vha a tshi ofha u ya miṱanganoni musi khaladzi awe a tshi bviswa tshivhidzoni. U ri: “Ndo vha ndi tshi ofha uri vhathu vha ḓo ri mini. Fhedzi ho vha na  vhahashu vhanzhi vhe na vhone vha ṱungufhadzwa nga zwe zwa itea nahone a vho ngo amba khaladzi anga luvhi. Ndi a vha livhuwa ngauri vho ita uri ndi si ṱungufhale ndi ndoṱhe.” Muṅwe wahashu wa tshifumakadzini u ri: “Musi murwa washu a tshi bviswa tshivhidzoni, khonani dzashu dza tsini vho ḓa vha ri khuthadza. Vhaṅwe vho ri vhudza uri a vha ḓivhi zwine vha nga zwi amba. Vhaṅwe vho lila na nṋe, vhaṅwe vha nthumela marifhi a khuthadzaho. Zwe vha ita zwo nthusa nga nḓila i mangadzaho!”

16. Tshivhidzo tshi nga bvela hani phanḓa tshi tshi khuthadza na u thusa vhe shaka ḽavho ḽa bviswa tshivhidzoni?

¹⁶ Bvelani phanḓa ni tshi tikedza miraḓo ya muṱa i fhulufhedzeaho. Vha ṱoḓa u funiwa na u ṱuṱuwedziwa zwihuluhulu nga tshifhinga tsho raliho. (Vhahev. 10:24, 25) Nga zwiṅwe zwifhinga, mashaka a muthu o bviswaho tshivhidzoni vho zwi ṱhogomela uri vhaṅwe tshivhidzoni a vha tsha amba navho, zwa tou nga na vhone vho bviswa tshivhidzoni. A ri ṱoḓi vha tshi ḓipfa nga yeneyo nḓila. Ri tea u khoḓa na u ṱuṱuwedza vhaswa vhe vhabebi vhavho vha litsha u shumela Yehova. Maria we munna wawe a bviswa tshivhidzoni a dovha a ṱutshela na muṱa u ri: “Dziṅwe khonani dzanga vho ḓa muḓini wanga vha bika zwiḽiwa na u nthusa u guda na vhananga. Vho mpfela vhuṱungu, vha lila na nṋe. Vho nnyimelela musi vhathu vha tshi amba zwithu zwi si zwavhuḓi nga ha nṋe. Vho nṱuṱuwedza vhukuma!”—Vharoma 12:13, 15.

17. Vhahulwane vha nga ita mini uri vha khuthadze vho tsikeledzeaho?

¹⁷ Vhoiwe vhahulwane, ni shumise tshibuli tshiṅwe na tshiṅwe tshine na tshi wana uri ni khwaṱhise miraḓo ya muṱa i fhulufhedzeaho. Ni na vhuḓifhinduleli ho khetheaho ha u khuthadza vhe mashaka avho vhe ṱutshela Yehova. (1 Vhathes. 5:14) Vha khuthadzeni nga u amba navho musi miṱangano i sa athu u thoma na musi yo no fhela. Ni vha dalele mahayani avho na u rabela navho. Ni shume navho tsimu kana nga zwiṅwe zwifhinga ni vha rambe uri vha ḓe kha vhurabeli ha muṱa waṋu. Vhahulwane vha tea u ṱhogomela vho tsikeledzeaho nahone vha vha pfele vhuṱungu na u vha funa.—1 Vhathes. 2:7, 8.

18. U ya nga 2 Petro 3:9, Mudzimu u ṱoḓa uri vhaitazwivhi vha ite mini?

¹⁸ Yehova “ha ṱoḓi na muthihi a tshi fheliswa, fhedzi u tama vhoṱhe vha tshi rembuluwa.” (Vhalani 2 Petro 3:9.) Naho muthu a tshi nga ita tshivhi tshihulwane, vhutshilo hawe vhu kha ḓi vha ha ndeme kha Yehova. Humbulani uri Yehova o lifha mutengo muhulu, une wa vha vhutshilo ha Murwa wawe ane a mu funa a tshi itela muṅwe na muṅwe washu. Yehova u lingedza nga lufuno u thusa vhe vha mu ṱutshela uri vha vhuyelele khae. U fhulufhela uri vha ḓo humbula u vhuyelela khae samusi zwo sumbedzwa kha tshifanyiso tsha Yesu tsha ṅwana o xelaho. (Luka 15:11-32) Vhanzhi vhe vha ṱutshela ngoho vho dovha vha vhuyelela kha Khotsi avho wa ṱaḓulu a re na lufuno nahone tshivhidzo tsho vha ṱanganedza nga zwanḓa zwivhili. Elizabeth we ra amba nga hae o takala nga maanḓa musi murwa wawe a tshi vhuyedzedzwa tshivhidzoni. Musi a tshi zwi humbula, u ri: “Ndi a livhuwa vhukuma uri vhanzhi vho nṱuṱuwedza uri ndi si laṱe fhulufhelo.”

19. Ndi ngani ri tshi nga bvela phanḓa ri tshi fhulufhela Yehova?

¹⁹ Ri nga dzula ri tshi fhulufhela Yehova. Zwine a ri eletshedza uri ri zwi ite zwi a ri thusa tshifhinga tshoṱhe. Ndi Khotsi a re na mafunda na ane a pfela vhuṱungu nahone u funa vhoṱhe vhane vha mu funa na u mu gwadamela. Ivhani na vhungoho ha uri Yehova ha nga vhuyi a ni laṱa nga tshifhinga tsha musi ni tshi khou pfa vhuṱungu. (Vhahev. 13:5, 6) Mark we ra amba nga hae u ri: “Yehova ho ngo vhuya a ri laṱa. U ḓo dzula a tshi ri thusa musi ro sedzana na thavha.” Yehova u ḓo bvela phanḓa a tshi ni ṋea “maanḓa a songo ḓoweleaho.” (2 Vhakor. 4:7) Zwi a konadzea uri ni dzule ni tshi fhulufhedzea na u sa laṱa fhulufhelo naho ane na mu funa a ṱutshela Yehova.