THERO I GUDWAHO 39
Naa Dzina Ḽaṋu Ḽi Kha “Bugu Ya Vhutshilo”?
‘Ho ṅwaliwa buguni madzina a vhane vha ofha Yehova.’—MAḼ. 3:16.
LUIMBO 61 Bvelani Phanḓa, Inwi Dziṱhanzi!
MANWELEDZO *
Ndi kale Yehova a tshi khou ṅwala madzina kha “bugu ya vhutshilo,” u bva tshifhingani tsha Abele (Sedzani dziphara 1-2)
1. U ya nga Maḽeaxi 3:16, ndi bugu ifhio ine Yehova a khou ṅwala khayo nahone i na mini khayo?
NDI kale Yehova a tshi khou ṅwala madzina kha bugu yo khetheaho. Muthu wa u thoma u ṅwaliwa kha yeneyo bugu ndi munna a fhulufhedzeaho Abele. * (Luka 11:50, 51) U bva tsheetsho, Yehova o vha a tshi khou engedza madzina kha yeneyo bugu nahone zwino i na madzina manzhi. Bivhili i amba uri yeneyo bugu ndi “bugu ya vhutshilo,” “mupombo wa vhutshilo” na bugu i re na madzina a vhane vha ḓo humbulwa nga Yehova. Kha heyi thero, yeneyo bugu ri ḓo i vhidza “bugu ya vhutshilo.”—Vhalani Maḽeaxi 3:16; Nzumb. 3:5; 17:8.
2. Ndi vhafhio vho ṅwalwaho kha bugu ya vhutshilo nahone ri nga ita mini uri na riṋe ri ṅwalwe khayo?
2 Yeneyi bugu yo khetheaho i na madzina a vhane vha shumela Yehova kana vhane vha mu ṱhonifha na vhane vha funa dzina ḽawe. Vha na tshibuli tsha u wana vhutshilo vhu sa fheli. Na madzina ashu a nga ṅwalwa kha yeneyo bugu arali ri khonani dza Yehova, zwine zwa konadzea nga nṱhani ha tshiṱhavhelo tsha Murwa wawe Yesu Kristo. (Yoh. 3:16, 36) Roṱhe ri ṱoḓa uri madzina ashu a ṅwalwe kha yeneyo bugu, hu sa londwi uri ri na fhulufhelo ḽa u tshila ṱaḓulu kana kha ḽifhasi.
3-4. (a) Arali madzina ashu o ṅwalwa kha bugu ya vhutshilo, naa zwi amba uri ri ḓo wana vhutshilo vhu sa fheli? Ṱalutshedzani. (b) Ri ḓo amba nga ha mini kha ino thero na kha thero i tevhelaho?
3 Naa zwenezwi zwi amba uri vhathu vhe madzina avho a ṅwalwa kha bugu ya vhutshilo vha ḓo sokou wana vhutshilo vhu sa fheli? Phindulo ya yeneyi mbudziso ri i wana kha zwe Yehova a zwi vhudza Mushe kha Ekisoda 32:33. Yehova o ri: “Muṅwe na muṅwe we a nkhakhela, ndi ḓo mu thutha kha bugu yanga.” Zwenezwi zwi amba uri madzina a vhe vha ṅwalwa kha yeneyo bugu a nga kha ḓi thuthiwa, zwa tou nga Yehova o ṅwala eneo madzina nga penisela. (Nzumb. 3:5, ṱms.) Ri tea u ita vhungoho ha uri madzina ashu a dzula o ṅwalwa kha yeneyo bugu u swikela a tshi ṅwalwa lwa tshoṱhe, u fana na musi hu tshi ṅwalwa tshithu nga inki.
4 Zwenezwi zwi nga ita uri ri ḓivhudzise mbudziso nnzhi. Sa tsumbo, ri nga ḓivhudzisa uri: “Bivhili i ri mini nga ha vhathu vhe madzina avho a ṅwalwa kha bugu ya vhutshilo na nga ha vhathu vhe madzina avho a si ṅwalwe khayo? Vhathu vhe madzina avho a ṅwalwa kha yeneyo bugu vha ḓo wana lini vhutshilo vhu sa fheli? Hu ḓo itea mini kha vhe vha lovha vha songo wana tshibuli tsha u ḓivha Yehova? Naa zwi a konadzea uri madzina avho a ṅwalwe kha yeneyo bugu?” Ri ḓo fhindula dzenedzi mbudziso kha yeneyi thero na kha thero i tevhelaho.
NDI VHAFHIO VHE MADZINA AVHO A ṄWALWA KHA BUGU?
5-6. (a) Samusi zwo ambiwa kha Vhafilipi 4:3, ndi vhafhio vhe vha ṅwalwa kha bugu ya vhutshilo? (b) Madzina avho a ḓo ṅwalwa lini lwa tshoṱhe kha bugu ya vhutshilo?
5 Ndi vhafhio vhe madzina avho a ṅwalwa kha bugu ya vhutshilo? U itela u fhindula yeneyo mbudziso, ri ḓo amba nga ha zwigwada zwiṱanu zwa vhathu. Kha zwenezwo zwigwada, hu na vhaṅwe vhe madzina avho a ṅwalwa kha bugu ya vhutshilo, ngeno a vhaṅwe a songo ṅwalwa kha yeneyo bugu.
6 Tshigwada tsha u thoma ndi vhe vha nangwa uri vha vhuse na Yesu ngei ṱaḓulu. Naa madzina avho o ṅwalwa kha bugu ya vhutshilo? Ee. U ya nga zwe muapostola Paulo a zwi vhudza “vhashumisani” nae vha ngei Filipi, o amba uri madzina a Vhakriste vho ḓodzwaho vhane vha ḓo vhusa na Yesu o ṅwalwa kha bugu ya vhutshilo. (Vhalani Vhafilipi 4:3.) Fhedzi vha tea u dzula vha tshi fhulufhedzea uri madzina avho a dzule a kha yeneyo bugu. Musi vha tshi swaiwa lwa u fhedzisela, ndi hone madzina avho a tshi ḓo vha kha bugu ya vhutshilo lwa tshoṱhe. Zwenezwi zwi itea musi vha tshi fa kana musi maṱungu mahulu a tsini na u thoma.—Nzumb. 7:3.
7. U ya nga Nzumbululo 7:16, 17, madzina a gogo ḽihulu ḽa vha dziṅwe nngu a ḓo ṅwalwa lini lwa tshoṱhe kha bugu ya vhutshilo?
7 Tshigwada tsha vhuvhili ndi gogo ḽihulu ḽa vha dziṅwe nngu. Naa madzina avho o ṅwalwa kha bugu ya vhutshilo? Ee. Naa madzina avho a ḓo vha a kha bugu ya vhutshilo musi vha tshi ponyoka Haramagedo? Ee. (Nzumb. 7:14) Yesu o amba uri vha gogo ḽihulu vhane vha nga nngu vha ḓo “wana vhutshilo vhu sa fheli.” (Mat. 25:46) Fhedzi naho vho ponyoka Haramagedo a vha nga ḓo wana vhutshilo vhu sa fheli nga u ṱavhanya. Ngauri zwi ḓo tou nga madzina avho o ṅwalwa nga penisela kha bugu ya vhutshilo. Nga Miṅwaha ya Tshigidi ine ha ḓo vha hu tshi khou vhusa Yesu, u ‘ḓo vha lisa a vha isa zwisimani zwa maḓi a vhutshilo.’ Madzina a vhane vha ḓo tevhela vhulivhisi vhune vha vhu ṋewa nga Kristo na u dzula vha tshi fhulufhedzea kha Yehova a ḓo ṅwalwa kha bugu ya vhutshilo lwa tshoṱhe.—Vhalani Nzumbululo 7:16, 17.
8. Ndi vhafhio vhe madzina avho a si ṅwalwe kha bugu ya vhutshilo nahone hu ḓo itea mini khavho?
8 Tshigwada tsha vhuraru ndi vhane vha fanyiswa na mbudzi, vhane vha ḓo fheliswa nga Haramagedo. Madzina avho ho ngo ṅwalwa kha bugu ya vhutshilo. Yesu o amba uri vha ḓo “fheliswa tshoṱhe.” (Mat. 25:46) Musi Paulo a tshi khou livhiswa nga muya mukhethwa, o amba uri vhenevho vhathu vha ḓo ‘haṱulwa, vha fheliswa tshoṱhe.’ (2 Vhathes. 1:9; 2 Pet. 2:9) Na vhathu vhoṱhe vhe vha khakhela muya mukhethwa nga khole u bva kale a vha nga tshili tshoṱhe, vha ḓo fheliswa tshoṱhe. Zwi tou vha khagala uri a vha nga ḓo vuswa. (Mat. 12:32; Marko 3:28, 29; Vhahev. 6:4-6) Zwino kha ri ambe nga ha zwigwada zwivhili zwa vhathu vhane vha ḓo vuswa uri vha tshile kha ḽifhasi.
VHANE VHA ḒO VUSWA
9. Samusi zwo ambiwa kha Mishumo 24:15, ndi zwigwada zwifhio zwine zwa ḓo vuselwa kha ḽifhasi nahone ndi phambano ifhio i re hone vhukati hazwo?
9 Bivhili i amba nga ha zwigwada zwivhili zwa vhathu vhane vha ḓo vuswa vhe na tshilavhelelwa tsha u wana vhutshilo vhu sa fheli. Vhenevho ndi “vho lugaho na vha songo lugaho.” (Vhalani Mishumo 24:15.) “Vho lugaho” ndi vhe vha shumela Yehova nga u fhulufhedzea musi vha tshi kha ḓi tshila. “Vha songo lugaho” ndi vhe vha si shumele Yehova. Vhunzhi havho vho vha vha sa tshili nga nḓila yavhuḓi. Samusi zwenezwi zwigwada zwivhili zwi tshi ḓo vuswa, naa zwi amba uri madzina avho o ṅwalwa kha bugu ya vhutshilo? U itela u fhindula yeneyi mbudziso, kha ri ambe nga ha tshigwada tshiṅwe na tshiṅwe.
10. Ndi ngani “vho lugaho” vha tshi ḓo vuswa nahone vhaṅwe vhavho vha ḓo vha na ndugelo ifhio? (Vhalani na thero “Mbudziso Dzi Bvaho Kha Vhavhali” i re kha tshenetshi Tshiingamo i ambaho nga ha vhane vha ḓo vuselwa kha ḽifhasi.)
10 Tshigwada tsha vhuṋa ndi “vho lugaho.” Musi vha sa athu u fa, madzina avho o vha o ṅwalwa kha bugu ya vhutshilo. Naa madzina avho o bviswa kha bugu ya vhutshilo musi vha tshi fa? Hai, ngauri muhumbuloni wa Yehova vha kha ḓi “tshila.” Yehova “ndi Mudzimu wa vha tshilaho, hu si vho faho.” (Luka 20:38) Zwenezwi zwi amba uri musi vho lugaho vha tshi vuswa, madzina avho a ḓo vha a tshi kha ḓi vha hone kha bugu ya vhutshilo, fhedzi zwi ḓo nga o ṅwalwa nga “penisela.” (Luka 14:14) A zwi timatimisi uri vhaṅwe vha vhenevha vhathu vho lugaho vhane vha ḓo vuswa vha ḓo vha na ndugelo ya u shuma sa “vhakololo ḽifhasini ḽoṱhe.”—Ps. 45:16.
11. “Vha songo lugaho” vha ḓo tea u guda mini uri madzina avho a ṅwalwe kha bugu ya vhutshilo?
11 Tshigwada tsha vhuṱanu ndi “vha songo lugaho.” Musi vha tshi kha ḓi tshila, khamusi vho vha vha tshi ita zwithu zwi songo lugaho ngauri vho vha vha sa ḓivhi milayo ya Yehova. Nga zwenezwo, madzina avho a ḓo vha a songo ṅwalwa kha bugu ya vhutshilo. Fhedzi musi Yehova a tshi vha vusa, u ḓo vha a tshi khou vha ṋea tshibuli tsha u ita uri madzina avho a ṅwalwe kha bugu ya vhutshilo. “Vha songo lugaho” vha ḓo ṱoḓa thuso vhukuma. Musi vha sa athu u fa, vhaṅwe vhavho vho vha vha tshi ita zwithu zwi ofhisaho. Vha ḓo tea u funzwa nḓila ine Yehova a ṱoḓa vha tshi tshila ngayo. U itela uri vha kone u funzwa zwenezwo, Muvhuso wa Mudzimu u ḓo vha u tshi khou livhisa mushumo muhulwane vhukuma u fhira yoṱhe ye ya vhuya ya itwa kha ḽifhasi wa u funza.
12. (a) Ndi vhonnyi vhane vha ḓo funza vha songo lugaho? (b) Hu ḓo itea mini kha vhane vha si tevhedze zwine vha khou zwi guda?
12 Ndi vhonnyi vhane vha ḓo funza vha songo lugaho? Ndi vha gogo ḽihulu na vhathu vho lugaho vho vuswaho. U itela uri vha songo lugaho vha ṅwalwe kha bugu ya vhutshilo, vha ḓo tea uri vha vhe na vhushaka ha tsini na Yehova na u ḓiṋekedza khae. Yesu Kristo na vho ḓodzwaho vhane a ḓo vha a tshi khou vhusa navho vha ḓo sedza arali vha songo lugaho vha tshi khou tevhedza zwine vha khou zwi guda. (Nzumb. 20:4) Muthu muṅwe na muṅwe ane a si tevhedze zwine a khou zwi guda u ḓo fheliswa, naho a tshi tou vha na miṅwaha ya 100. (Yes. 65:20) Yehova na Yesu vha a kona u vhona zwi re mbiluni nahone vha ḓo ita vhungoho ha uri a hu na muthu ane a ḓo tshinya shango ḽiswa.—Yes. 11:9; 60:18; 65:25; Yoh. 2:25.
VHANE VHA ḒO VUSELWA U TSHILA NA VHANE VHA ḒO VUSELWA U HAṰULWA
13-14. (a) Tshifhingani tsho fhiraho, ro vha ri tshi pfesesa hani zwe Yesu a zwi amba kha Yohane 5:29? (b) Ri tea u ṱhogomela mini kha zwe a zwi amba?
13 Yesu o amba na nga ha vhane vha ḓo vuswa kha ḽifhasi. Sa tsumbo, o ri: “Hu ḓa tshifhinga tshine vhoṱhe vha re mavhiḓani vha ḓo pfa ipfi ḽawe vha bva, vhe vha ita zwivhuya vha ḓo vuswa uri vha tshile, vhe vha ita zwivhi vha ḓo vuswa uri vha haṱulwe.” (Yoh. 5:28, 29) Yesu o vha a tshi khou amba mini?
14 Tshifhingani tsho fhiraho, ro vha ri tshi pfesesa uri maipfi a Yesu o vha a tshi khou ambela kha zwithu zwine vhathu vho vuswaho vha ḓo zwi ita musi vho no vuswa; uri vhaṅwe vha ḓo vuswa vha ita zwithu zwo lugaho, ngeno vhaṅwe vha tshi ḓo vuswa vha ita zwithu zwivhi. Fhedzi ṱhogomelani uri Yesu ho ngo ri vhathu vhane vha ḓo vuswa mavhiḓani vha ḓo ita zwivhuya kana uri vha ḓo ita zwivhi. O vha a tshi khou ambela kha zwithu zwo iteaho tshifhingani tsho fhiraho. Yesu u amba nga ha “vhe vha ita zwivhuya” na “vhe vha ita zwivhi.” Zwenezwi zwi amba uri u khou ambela kha zwithu zwe vha zwi ita musi vha sa athu u fa. Zwenezwo zwi a pfala ngauri a hu na ane a ḓo tendelwa u ita zwithu zwivhi shangoni ḽiswa. Vhathu vha songo lugaho vha tea u vha vho ita zwithu zwivhi musi vha sa athu u fa. Nga zwenezwo, maipfi a Yesu a ambaho nga ha vhane vha ḓo “vuswa uri vha tshile” na vhane vha ḓo “vuswa uri vha haṱulwe” a amba mini?
15. Ndi vhonnyi vhane vha ḓo “vuswa uri vha tshile” nahone ndi ngani?
15 Vhathu vho lugaho vhe vha ita zwithu zwo lugaho musi vha sa athu u lovha vha ḓo “vuswa uri vha tshile” ngauri madzina avho a ḓo vha o ṅwalwa kha bugu ya vhutshilo. Zwenezwi zwi amba uri “vhe vha ita zwivhuya” vhane vha ḓo vuswa vhe ha ambiwa nga havho kha Yohane 5:29 ndi vhathihi na “vho lugaho” vhane vha ḓo vuswa vho ambiwaho kha Mishumo 24:15. Zwenezwi zwi tshimbidzana na maipfi a re kha Vharoma 6:7, ane a ri: “O faho o vhofhololwa kha zwivhi zwawe.” Nga zwenezwo, musi vho lugaho vha tshi lovha, Yehova o vha hangwela zwivhi zwavho, fhedzi u ḓo humbula zwithu zwavhuḓi zwe vha zwi ita musi vha tshi kha ḓi tshila. (Vhahev. 6:10) Naho zwo ralo, vho lugaho vhane vha ḓo vuswa vha ḓo tea uri vha dzule vha tshi fhulufhedzea uri madzina avho a kone u dzula e kha bugu ya vhutshilo.
16. Musi hu tshi pfi vhaṅwe “vha ḓo vuswa uri vha haṱulwe” zwi vha zwi tshi khou amba mini?
16 Hu pfi mini nga vhe vha ita zwithu zwivhi musi vha sa athu u lovha? Naho zwivhi zwavho zwi tshi phumulwa musi vha tshi lovha, vhenevho vhathu a vho ngo shumela Yehova musi vha tshi kha ḓi tshila. Ndi ngazwo madzina avho a songo ṅwalwa kha bugu ya vhutshilo. Nga zwenezwo, “vhe vha ita zwivhi” vhane vha ḓo vuswa ndi vhathihi na “vha songo lugaho” vhane vha ḓo vuswa vho ambiwaho kha Mishumo 24:15. Vhone “vha ḓo vuswa uri vha haṱulwe.” * Zwenezwi zwi amba uri Yesu u ḓo ṱolisisa zwithu zwine vha songo lugaho vha ḓo vha vha tshi khou zwi ita. (Luka 22:30) Nga murahu ha tshifhinga, ndi hone Yesu a tshi ḓo kona u vhona arali madzina avho a tshi tea u ṅwalwa kha bugu ya vhutshilo. Arali vha songo lugaho vha shanduka, vha litsha nḓila i si yavhuḓi ye vha vha vha tshi tshila ngayo tshifhingani tsho fhiraho nahone vha ḓiṋekedza kha Yehova, madzina avho a ḓo ṅwalwa kha bugu ya vhutshilo.
17-18. Vhathu vho vuselwaho kha ḽifhasi vha ḓo tea u ita mini nahone ndi “mishumo” ifhio ine ya khou ambiwa kha Nzumbululo 20:12, 13?
17 Hu sa londwi uri vhathu vho vuswaho vho vha vha tshi ita zwithu zwo lugaho kana zwi songo lugaho musi vha sa athu u lovha, vha ḓo tea uri vha tevhele milayo ya Mudzimu ine ya ḓo wanala kha mipombo miswa, ine ya ḓo vulwa nga miṅwaha ya 1 000 musi hu tshi khou vhusa Yesu. Musi muapostola Yohane a tshi ṱalutshedza zwe a zwi vhona kha bono, o ri: “Nda vhona vhafu, vhahulwane na vhaṱuku, vho ima phanḓa ha khuluṋoni, mipombo ya vulwa. Fhedzi ha vulwa muṅwe mupombo; ndi mupombo wa vhutshilo. Vhafu vha haṱulwa nga zwo ṅwaliwaho kha mipombo u ya nga mishumo yavho.”—Nzumb. 20:12, 13.
18 Vho vuswaho vha ḓo haṱulwa u ya nga “mishumo” ifhio? Naa ndi mishumo ye vha i ita musi vha sa athu u lovha? Hai, ngauri zwivhi zwavho zwi a phumulwa musi vha tshi lovha. Nga zwenezwo, a hu khou ambiwa nga ha “mishumo yavho” ye vha i ita musi vha sa athu u lovha. Fhedzi hu vha hu tshi khou ambelwa kha mishumo ine vha ḓo i ita musi vha tshi funzwa shangoni ḽiswa. Na vhanna vha fhulufhedzeaho vha ngaho Noaxe, Samuele, Davida na Daniele vha ḓo tea uri vha gude nga ha Yesu Kristo na u vha na lutendo kha tshiṱhavhelo tshawe. Arali hu na zwinzhi zwine vhenevho vhanna vha tea u zwi guda, zwi tou vha khagala uri hu na zwinzhi vhukuma zwine vha songo lugaho vha tea u zwi guda u fhira vhenevho vhanna.
19. Hu ḓo itea mini kha vhane vha ḓo hana u tshila u tendelana na zwine vha khou funzwa?
19 Hu ḓo itea mini kha vhe vha hana u tshila u tendelana na zwine vha khou zwi funzwa? Nzumbululo 20:15 i ri: “Vhoṱhe vha songo ṅwaliwaho buguni ya vhutshilo vha poswa dzivhani ḽa mulilo.” Zwenezwi zwi amba uri vha ḓo fheliswa lwa tshoṱhe. Ndi zwa ndeme vhukuma u ita vhungoho ha uri madzina ashu o ṅwalwa kha bugu ya vhutshilo na uri a dzule e henefho.
Wahashu a tshi khou shela mulenzhe kha mushumo muhulwane wa u gudiswa une wa ḓo itwa nga Miṅwaha ya Tshigidi (Sedzani phara 20)
20. Ndi mushumo ufhio u takadzaho une wa ḓo itwa nga Miṅwaha ya Tshigidi ya u vhusa ha Yesu? (Sedzani tshifanyiso tshi re kha gwati.)
20 Ri ḓo ḓiphiṋa nga Miṅwaha ya Tshigidi ya musi hu tshi khou vhusa Yesu. Hu ḓo vha hu na mushumo muhulu wa u funza une wa ḓo vha u tshi khou itwa. Wonoyo mushumo a u athu u vhuya wa itwa ḽifhasini ḽoṱhe. Tshi ḓo dovha tsha vha tshifhinga tshine Yesu a ḓo vha a tshi khou ṱolisisa nḓila ine vho lugaho na vha songo lugaho vha ḓo vha vha tshi khou tshila ngayo. (Yes. 26:9; Mish. 17:31) Wonoyu mushumo muhulwane wa u funza u ḓo itwa hani? Thero i tevhelaho i ḓo fhindula yeneyo mbudziso na u ri thusa u dzhiela nṱha wonoyu mushumo.
LUIMBO 147 Ro Fulufhedziswa Vhutshilo Vhu Sa Fheli
^ Heyi thero i ḓo amba nga ha nḓila ntswa ine ra pfesesa ngayo maipfi a Yesu a re kha Yohane 5:28, 29, ane a amba nga ha vhane “vha ḓo vuswa uri vha tshile” na vhane “vha ḓo vuswa uri vha haṱulwe.” Ri ḓo guda uri zwi amba mini uri vhaṅwe vha ḓo vuswa uri vha tshile na uri vhaṅwe vha ḓo vuswa uri vha haṱulwe na uri ndi vhafhio vhane vha ḓo wela kha zwenezwo zwigwada.
^ Yeneyo bugu yo thoma u ṅwaliwa “u bva tshee shango ḽa sikwa,” zwine zwa amba u bva kha vhathu vhane vha vhuyelwa nga tshiṱhavhelo tsha Yesu. (Mat. 25:34; Nzumb. 17:8) Nga zwenezwo, zwi vhonala uri Abele ndi ene muthu wa u thoma u ṅwaliwa kha yeneyi bugu ya vhutshilo.
^ Kale kha haya mafhungo, ro vha ri tshi ri ipfi ‘haṱulwa’ ḽi vha ḽi tshi khou ambela kha u haṱula muthu nge a ita zwithu zwivhi. Zwavhuḓivhuḓi ipfi ‘haṱulwa’ ḽi nga ambela kha zwenezwi. Fhedzi kha haya mafhungo, zwi vhonala uri musi Yesu a tshi amba nga ha ‘u haṱulwa,’ o vha a tshi khou ambela kha u sedza zwine muthu a vha a tshi khou zwi ita kana “u ṱolisisa nḓila ine muthu a khou ḓifara ngayo,” samusi zwo ambiwa kha iṅwe ṱhalusamaipfi ya Bivhili ya Tshigerika.
