1-2. Ndi ngani zwi zwavhuḓi uri ri gude nga ha mafhungo a Simisoni?

 NDI mini zwine na zwi humbula musi ni tshi pfa dzina Simisoni? Khamusi ni humbula nga ha munna we a vha e na maanḓa a mangadzaho. Zwenezwo ndi ngoho. Fhedzi Simisoni o dzhia phetho i si yavhuḓi ye ya ita uri a pfe vhuṱungu vhuhulu. Hu sa londwi zwenezwo, Yehova o livhisa ṱhogomela kha zwoṱhe zwe Simisoni a zwi ita u itela u mu shumela nahone a mu katela kha tsumbo dza vhathu vhe vha fhulufhedzea dzo ṅwalwaho Bivhilini u itela u ri vhuyedza.

² Yehova o shumisa Simisoni u swikelela zwithu zwinzhi zwi mangadzaho u itela u thusa Vhaisiraele, vhathu vhawe vhe a vha ṋanga. Miṅwaha minzhi nga murahu ha musi Simisoni o no lovha, Yehova o ita uri muapostola Paulo a katele dzina ḽa Simisoni musi a tshi ṅwala mutevhe wa vhathu vhe vha vha vhe na lutendo. (Vhahev. 11:32-34) Tsumbo ya Simisoni i nga ri ṱuṱuwedza. O ḓitika nga Yehova na nga zwifhingani zwi konḓaho. Kha ino thero, ri ḓo haseledza nga ha zwine ra nga zwi guda kha Simisoni na uri tsumbo yawe i nga ri ṱuṱuwedza hani.

3. Simisoni o ṋewa mushumo ufhio?

³ Musi Simisoni a tshi bebiwa, Vhafilisita vho vha vha tshi khou vhusa vhathu vha Isiraele nahone vha tshi vha tsikeledza. (Vhahaṱ. 13:1) Vhaisiraele vho shengela vhukuma ngauri Vhafilisita vho vha vha tshi vhusa nga nḓila ya tshiṱuhu. Yehova o nanga Simisoni uri a vhe “ene ane a ḓo ranga phanḓa kha u tshidza Vhaisiraele zwanḓani zwa Vhafilisita.” (Vhahaṱ. 13:5) Wo vha u mushumo u konḓaho. U itela uri Simisoni a kone u ita wonoyo mushumo u konḓaho, o vha a tshi fanela u ḓitika nga Yehova.

4. Yehova o thusa hani Simisoni uri a ḓivhofholole musi o fariwa nga Vhafilisita? (Vhahaṱuli 15:14-16)

 ⁴ Ṱhogomelani tsumbo ine ya sumbedza uri Simisoni o vha a tshi fhulufhela Yehova na uri o vha a tshi ḓitika ngae. Kha tshiṅwe tshiitea, mmbi ya Vhafilisita yo vha i tshi khou ṱoḓa u fara Simisoni ngei Lehi, hune ha nga vha ho vha hu Yuda. Vhanna vha Yuda vho vha vho tshuwa, nga zwenezwo, vha dzhia phetho ya u ṋekedza Simisoni kha maswina avho. Vhathu vhahawe vho mu vhofha nga thambo mbili ntswa nahone vha mu isa kha Vhafilisita. (Vhahaṱ. 15:9-13) Naho zwo ralo, “muya wa Yehova wa mu ṋea maanḓa,” Simisoni a ḓivhofholola kha dzenedzo thambo. “A vhona rambo ḽa luṱaha lwa donngi ine ya kha ḓi bva u fa,” a ḽi doba a vhulaya vhanna vha 1 000 vha Vhafilisita ngaḽo!—Vhalani Vhahaṱuli 15:14-16.

5. Simisoni o sumbedza hani uri u ḓitika nga Yehova?

⁵ Ndi ngani Simisoni o shumisa rambo ḽa luṱaha lwa donngi? Ḽenelo rambo ḽo vha ḽi tshihali tshi songo ḓoweleaho. Zwi tou vha khagala uri Simisoni o vha a tshi zwi ḓivha uri Yehova u ḓo mu thusa u kunda Vhafilisita hu sa londwi uri u khou lwa a tshi shumisa tshihali tshifhio. Ndi ngoho, onoyo munna ane a fhulufhedzea o shumisa zwe zwa vha zwi hone u itela u khunyeledza zwine Yehova a zwi funa. Simisoni o kona u kunda vhenevho vhanna vhoṱhe nge a ḓitika nga Yehova.

6. Ndi ngudo ifhio ine ra nga i guda kha mafhungo a Simisoni?

⁶ Yehova u ḓo ri ṋea nungo dzine ra dzi ṱoḓa u itela u ita tshiṅwe na tshiṅwe tshine a ri humbela uri ri tshi ite naho wonoyo mushumo u tshi nga vhonala u sa konadzei. Mudzimu a nga ita zwenezwo nga nḓila ine ya nga ri mangadza. Ni vhe na fhulufhelo ḽa uri Yehova we a thusa Simisoni u ḓo ni thusa u ita zwine a zwi funa arali na ḓitika ngae.—Mir. 16:3.

7. Ndi tsumbo ifhio ine ya sumbedza uri ndi zwa ndeme u ṱoḓa vhulivhisi ha Yehova?

⁷ Vhunzhi ha vhahashu vhane vha thusa u fhaṱa zwifhaṱo zwine ra gwadamela khazwo, vho sumbedza uri vha fhulufhela Yehova. Tshifhingani tsho fhiraho, vhahashu vho  vha vha tshi ola na u fhaṱa Holo ntswa na zwiṅwe zwifhaṱo. Fhedzi nga u ya ha tshifhinga, ngauri vhathu vha Yehova vho vha vha tshi khou ḓi engedzea vha tshi ya, ndangulo yo tea u ita tshanduko. Vhahashu vhane vha khou ranga phanḓa vho rabela uri Yehova a vha livhise nahone vha lingedza nḓila ntswa dzingaho sa u renga zwifhaṱo na u zwi vusulusa. Robert ane o no fhedza miṅwaha a tshi khou shuma kha zwenezwo zwifhaṱo u mona na shango u ri: “U thomani vhaṅwe zwo vha zwi songo vha lelutshela u ita zwithu nga yeneyi nḓila ntswa.” U dovha a ri: “Zwo vha zwo fhambana na nḓila ye ra vha ri tshi khou ita zwithu ngayo lwa miṅwaha minzhi. Fhedzi vhahashu vho vha vho ḓiimisela u tshimbidzana na tshanduko nahone zwi vho vhonala uri Yehova u khou fhaṱutshedza dzenedzi tshanduko.” Heyi ndi tsumbo ine ya sumbedza uri Yehova u khou livhisa vhathu vhawe uri vha ite zwine a zwi funa. Musi tshifhinga tshi tshi khou ḓi ya, roṱhe ri tea u ḓivhudzisa uri: ‘Naa ndi a ṱoḓa vhulivhisi ha Yehova nahone ndo ḓiimisela u ita tshanduko uri ndi kone u mu shumela nga nḓila ya khwinesa?’

8. Kha tshiṅwe tshiitea musi Simisoni e na ḓora ḽihulu, o ita mini?

⁸ Khamusi ni nga humbula zwiṅwe zwithu zwi mangadzaho zwe Simisoni a zwi ita. O vhulaya ndau nahone nga murahu a vhulaya vhanna vha 30 ngei Asikaloni e eṱhe. (Vhahaṱ. 14:5, 6, 19) Simisoni o vha a tshi zwi ḓivha uri o vha a sa ḓo kona u ita zwenezwi zwithu arali a sa khou thuswa nga Yehova. Zwenezwi zwo vhonala kha tshiṅwe tshiitea musi a tshi vha na ḓora ḽihulu nga murahu ha u vhulaya Vhafilisita vha 1 000. O ita mini? Nṱhani ha u ḓitika nga ene muṋe uri a ye u ṱoḓa maḓi a u nwa, o vhidzelela Yehova a humbela thuso khae.—Vhahaṱ. 15:18.

9. Yehova o ita mini musi Simisoni a tshi rabela a humbela thuso? (Vhahaṱuli 15:19)

⁹ Yehova o fhindula thabelo ya Simisoni nga u mu itela tshisima tsha maḓi nga lwa vhuṱolo. Musi Simisoni a tshi nwa maḓi a tshenetsho tshisima “nungo dzawe dza vhuya.” (Vhalani Vhahaṱuli 15:19.) Zwi vhonala u nga tshenetshi tshisima tsho vha tshi tshi kha ḓi vha hone nga murahu ha miṅwaha musi muporofita Samuele a tshi hevhedzwa uri a ṅwale bugu ya Vhahaṱuli. Musi Vhaisiraele vha tshi vhona maḓi a tshi khou elela a tshi bva kha tshenetsho tshisima, vha nga vha vho humbula uri arali vhashumeli vha Yehova vha fhulufhedzeaho vha ḓitika ngae, u ḓo vha thusa musi vha tshi ṱoḓa thuso.

10. Ri tea u ita mini uri ri wane thuso ya Yehova? (Sedzani tshifanyiso.)

¹⁰ Ri tea u ḓitika nga Yehova uri a ri thuse, hu sa londwi vhukoni vhune ra vha naho kana zwe ra zwi khunyeledza tshumeloni yawe. Ri tea u ḓiṱukufhadza nahone ri tende uri ndi Yehova fhedzi ane a nga ri thusa uri ri kone u ita zwe a ri humbela uri ri zwi ite. Samusi Simisoni o wana nungo musi a tshi nwa maḓi e Yehova a mu ṋea, na riṋe u fana na Simisoni, ri ḓo wana nungo musi ri tshi shumisa zwoṱhe zwe Yehova a ri ṋea uri ri dzule ri tshi fhulufhedzea khae.—Mat. 11:28.

11. Ri nga ḓitika hani nga thuso ya Yehova? Fanyisani.

¹¹ Ṱhogomelani tsumbo ya Wahashu Aleksey wa ngei Russia ane a khou konḓelela u tovholwa zwihulu. Ndi mini zwo mu thusaho uri a kone u konḓelela honoho vhuimo vhu konḓaho? Ndi kale ene na mufumakadzi wawe vha tshi guda Bivhili vhoṱhe na u gwadamela Yehova vhoṱhe. U ri: “Ndi lingedza u dzula ndi tshi ita ngudo yanga ya muthu nga eṱhe na u vhala Bivhili ḓuvha ḽiṅwe na ḽiṅwe. Matsheloni  maṅwe na maṅwe nṋe na mufumakadzi wanga ri haseledza ndimana ya ḓuvha na u rabela roṱhe.” Zwenezwi zwi ri gudisa mini? Nṱhani ha u ḓitika nga riṋe vhaṋe, ri tea u ḓitika nga Yehova. Ri nga zwi ita hani? Nga u dzula ri tshi ita zwithu zwine zwa khwaṱhisa lutendo lwashu zwi ngaho sa u guda Bivhili, u rabela, u ya miṱanganoni na u huwelela. Musi ri tshi ita zwenezwi zwithu, Yehova u ḓo fhaṱutshedza vhuḓidini vhune ra vhu ita ha u mu shumela. Yehova o ṋea Simisoni nungo, na riṋe a nga ri ṋea nungo.

12. Ndi phetho ifhio i si yavhuḓi ye Simisoni a i ita nahone ndi mini tsho itaho uri vhushaka hawe na Delila vhu sa fane na he a vha e naho tshifhingani tsho fhiraho?

¹² Simisoni o vha e na tshivhi u fana na riṋe, nga zwenezwo, nga zwiṅwe zwifhinga o vha a tshi ita phetho dzi si dzavhuḓi. Iṅwe ya dzenedzo phetho yo vha na masiandoitwa a si avhuḓi. Musi Simisoni o no fhedza tshifhinga tshilapfu e muhaṱuli, o “funana na muṅwe musidzana ngei Govhani ḽa Soreka we a vha a tshi pfi Delila.” (Vhahaṱ. 16:4) Tshifhingani tsho fhiraho, Simisoni o vha o fhulufhedzisa u vhinga muṅwe mufumakadzi wa Mufilisita, fhedzi zwenezwi zwo vha “zwi khou bva kha Yehova,” ngauri “o vha a tshi khou ṱoḓa tshibuli tsha u lwa na Vhafilisita.” Nga murahu, Simisoni o dzula muḓini wa muthu ane a rengisa muvhili, muḓini wa Vhafilisita wa Gaza. Nga tshenetsho tshifhinga, Mudzimu o ṋea Simisoni maanḓa a u hwala miṋango ya khoro ya muḓi, zwenezwo zwa ita uri wonoyo muḓi u si tsha vha na maanḓa. (Vhahaṱ. 14:1-4; 16:1-3) Fhedzi zwi vhonala u nga Delila o vha e Muisiraele, nga zwenezwo, vhushaka hawe na Simisoni ho vha vhu si tshibuli tsha u lwa na Vhafilisita.

13. Ndi mini zwe Delila a zwi ita kha Simisoni?

 ¹³ Delila o ṋewa tshelede nnzhi nga Vhafilisita uri a fheṱe Simisoni. Khamusi Simisoni o vha a tshi mu funa nga maanḓa lwe a si kone u vhona zwe Delila a vha a tshi khou lingedza u zwi ita. Delila o bvela phanḓa a tshi humbela Simisoni uri a mu vhudze uri ndi mini tshine tsha ita uri a vhe na maanḓa mahulu, Simisoni a fhedzisela o mu vhudza. Zwi ṱungufhadzaho ndi uri vhukhakhi ha Simisoni ho ita uri a xelelwe nga maanḓa awe na u ita uri Yehova a si tsha mu takalela lwa tshifhinganyana.—Vhahaṱ. 16:16-20.

14. Simisoni o sedzana na masiandoitwa afhio nge a fhulufhela Delila?

¹⁴ Simisoni o sedzana na masiandoitwa a si avhuḓi nge a fhulufhela Delila nṱhani ha u fhulufhela Yehova. Vhafilisita vho mu fara vha mu rumbula maṱo. Vho mu posa dzhele ngei Gaza he tshifhingani tsho fhiraho a kwasha mavothi a wonoyo muḓi. Vha mu ita mukuyi wa thoro. Musi Vhafilisita vho kuvhangana vha tshi khou pembela, vho ri hu ḓiswe Simisoni. Vha ṋekedza tshiṱhavhelo kha Dagoni, mudzimu wavho wa mazwifhi ngauri vho vha vha tshi tenda uri ndi ene we a vha thusa uri vha fare Simisoni. Simisoni o ḓiswa henefho he vha kuvhangana hone a tshi bva dzhele uri “a ḓe a vha mvumvuse” na uri vha mu see.—Vhahaṱ. 16:21-25.

15. Simisoni o sumbedza hani uri o vha a tshi khou dovha a ḓitika nga Yehova? (Vhahaṱuli 16:28-30) (Sedzani tshifanyiso tshi re kha gwati.)

¹⁵ Simisoni o vha o ita vhukhakhi vhuhulu, fhedzi o bvela phanḓa a tshi shumela Yehova. O ṱoḓa tshibuli tsha u fhedzisa mushumo we a u ṋewa nga Yehova wa u lwa na Vhafilisita. (Vhalani Vhahaṱuli 16:28-30.) Simisoni o humbela Yehova a ri: “Nnditshe ndi lifhedze Vhafilisita.” Mudzimu o fhindula thabelo ya Simisoni nahone a ita uri a dovhe a vhe na maanḓa o khetheaho. Simisoni a vhulaya Vhafilisita vhanzhi kha tshenetsho tshiitea u fhira vhe a vha o no vha vhulaya tshifhingani tsho fhiraho.

16. Ri nga guda mini kha vhukhakhi ha Simisoni?

¹⁶ Naho Simisoni o sedzana na masiandoitwa a vhavhaho a vhukhakhi hawe, ho ngo litsha u ita zwine Yehova a zwi funa. Na riṋe ri songo litsha u shumela Yehova naho ro ita vhukhakhi vhune ha ita uri ri kaidzwe kana ri xelelwe nga iṅwe ndugelo. Ri songo hangwa uri Yehova u dzula o lindela u ri hangwela. (Ps. 103:8-10) Naho ro ita vhukhakhi, Yehova  a nga ri ṋea maanḓa a u ita zwine a zwi funa, samusi o ṋea Simisoni maanḓa.

17-18. Ndi mini zwine na wana zwi tshi ṱuṱuwedza kha tsumbo ya Michael? (Sedzani tshifanyiso.)

¹⁷ Ṱhogomelani tsumbo ya muṅwe wahashu ane a kha ḓi vha muswa ane a pfi Michael. O vha o farakanea vhukuma tshumeloni ya Yehova, e mushumeli tshivhidzoni nahone e muvulanḓila wa tshifhinga tshoṱhe. Zwi ṱungufhadzaho ndi uri o ita vhukhakhi he ha ita uri a xelelwe nga ndugelo dzawe. U ri: “U swika zwino, zwithu zwo vha zwi tshi khou tshimbila zwavhuḓi kha tshumelo yanga. Fhedzi nga u bonya ha iṱo, nda pfa u nga ndo rwa luvhondo. Ndo vha ndi sa humbuli uri Yehova a nga nndaṱa, fhedzi ndo vha ndi tshi ḓivhudzisa arali vhushaka hanga nae vhu tshi ḓo dovha ha fana na u thomani kana arali ndi tshi ḓo dovha nda kona u mu shumela nga ho fhelelaho u fana na zwe nda vha ndi tshi khou ita u thomani.”

¹⁸ Zwi takadzaho ndi uri Michael ho ngo litsha u shumela Yehova. U ri: “Ndo livhisa ṱhogomelo kha u lugisa vhushaka hanga na Yehova nga u dzula ndi tshi mu somolela zwa haṋwani nga thabelo, u vhala na u elekanya.” Nga u ya ha tshifhinga, Michael o dovha a wana ndugelo tshivhidzoni. Zwino ndi muhulwane wa tshivhidzo nahone ndi muvulanḓila wa tshifhinga tshoṱhe. U ri: “Thikhedzo na ṱhuṱhuwedzo ye nda i wana, zwihuluhulu kha vhahulwane, yo nthusa uri ndi vhone uri Yehova u kha ḓi mpfuna. Zwino ndi khou dovha hafhu nda shuma tshivhidzoni ndi na luvalo lwo kunaho. Heyi tshenzhelo yo ngudisa uri Yehova u hangwela muṅwe na muṅwe ane a rembuluwa zwa vhukuma.” Ri nga vha na vhungoho ha uri na riṋe Yehova u ḓo ri shumisa na u ri fhaṱutshedza naho ro ita vhukhakhi, tenda ra ita zwoṱhe zwine ra nga kona u lugisa honoho vhukhakhi na u bvela phanḓa ri tshi ḓitika ngae.—Ps. 86:5; Mir. 28:13.

19. Tsumbo ya Simisoni yo ni khwaṱhisa hani?

¹⁹ Kha ino thero, ro vusulusa zwithu zwi si gathi zwi takadzaho zwe zwa itea vhutshiloni ha Simisoni. O vha e na tshivhi, fhedzi ho ngo litsha u lingedza u shumela Yehova, na nga murahu ha u ita vhukhakhi na Delila. Nahone Yehova o bvela phanḓa a tshi shumisa Simisoni. Mudzimu o dovha a shumisa Simisoni nga nḓila khulwane. Yehova o mu dzhia e munna wa lutendo luhulu, a ita uri a katelwe kha mutevhe wa vhathu vha fhulufhedzeaho u re kha Vhahevheru ndima 11. Zwi a ṱuṱuwedza u ḓivha uri ri khou shumela Khotsi ashu wa ṱaḓulu a re na lufuno, ane a ṱoḓa u ri khwaṱhisa, zwihuluhulu musi ri si na nungo. U fana na Simisoni, kha ri humbele Yehova uri: “Ndi khou humbela uri u nṋee maanḓa.”—Vhahaṱ. 16:28.