1. Musi muapostola Petro e tsini na u fa o hevhedzwa uri a ite mini?

 MUAPOSTOLA Petro o shumela Yehova nga u fhulufhedzea lwa miṅwaha minzhi. O tshimbila na Yesu musi a tshi khou huwelela, o thoma mushumo wa u huwelela kha vhathu vha si Vhayuda nahone nga murahu a vha muraḓo wa tshigwada tshi langaho. Musi Petro e tsini na u fa nahone na ene a tshi zwi ḓivha uri vhutshilo hawe vhu tsini na u swika magumoni, Yehova o mu ṋea mushumo wo engedzeaho we a vha a tshi tea u u ita. Nga vho 62-64 C.E., o hevhedzwa uri a ṅwale maṅwalo mavhili ane a vha bugu ya u thoma na ya vhuvhili dza Petro. Petro o fhulufhela uri enea maṅwalo a ḓo thusa Vhakriste musi o no fa.—2 Pet. 1:12-15.

2. Ndi ngani maṅwalo e Petro a a ṅwala o vha a tshi ṱoḓea nga tshenetsho tshifhinga?

² Petro o ṅwala marifhi awe nga tshifhinga tshee vhatendi ngae vha vha vho “tsikeledzwa nga milingo yo fhambananaho.” (1 Pet. 1:6) Ho vha hu na vhanna vhavhi vhe vha vha vha tshi khou lingedza u funza mazwifhi na u ita uri vhathu tshivhidzoni vha ḓifare nga nḓila i songo kunaho. (2 Pet. 2:1, 2, 14) Vhakriste vhe vha vha vha tshi khou dzula Yerusalema vho vha vha tshi ḓo sedzana na “vhufhelo ha zwoṱhe” vhune ha vha u fheliswa ha wonoyo muḓi na thembele yawo nga mmbi ya Vharoma. (1 Pet. 4:7) Zwi tou pfala uri marifhi a Petro o thusa Vhakriste uri vha vhone zwe vha vha vha tshi nga zwi ita uri vha kone u konḓelela yeneyo milingo na u ḓilugiselela milingo ye ya vha i tshi ḓo ḓa tshifhingani tshi ḓaho. b

3. Ndi ngani ri tshi tea u ṱolisisa maṅwalo a Petro?

³ Naho Petro o vha a tshi khou ṅwalela Vhakriste vhe vha vha vha tshi khou tshila nga tshenetsho tshifhinga, Yehova o ita uri  enea maṅwalo a katelwe Bivhilini. Nga zwenezwo, ri nga vhuyelwa nga maṅwalo e Petro a a ṅwala. (Vharoma 15:4) U fana na vhenevhaḽa Vhakriste, ri khou tshila shangoni ḽo ḓalaho vhuḓifari vhu songo kunaho nahone zwenezwi zwi nga ita uri ri konḓelwe u shumela Yehova. Zwiṅwe hafhu, hu si kale hu ḓo vha na maṱungu mahulu a fhiraho e a vha hone musi hu tshi fheliswa Yerusalema na thembele yawo. Ri wana khumbudzo dza ndeme kha marifhi mavhili e Petro a a ṅwala. Dzenedzi khumbudzo dzi ḓo ri thusa uri ri dzule ro lavhelela ḓuvha ḽa Yehova, ri litshe u ofha vhathu na uri ri funane nga maanḓa. Khumbudzo dzi ngaho dzenedzi dzi ḓo dovha dza thusa vhahulwane uri vha vhone nḓila ine vha nga ṱhogomela ngayo nngu zwavhuḓi.

4. Samusi zwo sumbedzwa kha 2 Petro 3:3, 4, ndi mini zwine zwa nga ita uri ri thome u timatima zwine ra zwi tenda?

⁴ Ri tshila na vhathu vhane vha si tende zwine Bivhili ya zwi amba nga ha vhumatshelo. Vhapikisi vha nga ri kolela ngauri ndi kale ri tshi amba uri vhufhelo vhu khou ḓa. Vhaṅwe vhathu vha amba uri vhufhelo vhu nga si vhuye ha vha hone. (Vhalani 2 Petro 3:3, 4.) Arali ra pfa zwenezwi zwithu zwi tshi khou ambiwa nga muthu ane ra khou huwelela khae, ane ra shuma nae kana muraḓo wa muṱa washu, zwi nga ita uri ri timatime zwine ra zwi tenda. Petro o ṱalutshedza uri ndi mini zwine zwa nga ri thusa.

5. Ndi mini zwine zwa ḓo ri thusa uri ri dzule ri na mavhonele o teaho nga ha vhufhelo ha ḽino shango? (2 Petro 3:8, 9)

⁵ Zwi nga vhonala u nga Yehova u khou lenga u fhelisa ḽino shango ḽivhi. Maipfi a Petro a nga ri thusa uri ri dzule ri na mavhonele o teaho ngauri a ri humbudza uri nḓila ine Yehova a dzhia ngayo tshifhinga a i fani na nḓila ine riṋe vhathu ra tshi dzhia ngayo. (Vhalani 2 Petro 3:8, 9.) Kha Yehova, miṅwaha ya tshigidi i nga ndi ḓuvha ḽithihi. Yehova ha fheli mbilu nahone ha ṱoḓi muthu na muthihi a tshi fheliswa. Fhedzi, musi ḓuvha ḽawe ḽi tshi swika, u ḓo fhelisa ḽino shango. Ri na ndugelo ya u shumisa tshenetshi tshifhinga tsho salaho u itela u huwelela kha vhathu ḽifhasini ḽoṱhe.

6. Ri nga ‘dzula hani ri tshi humbula’ ḓuvha ḽa Yehova? (2 Petro 3:11, 12)

⁶ Petro o ri ṱuṱuwedza uri ri ‘dzule ri tshi humbula’ nga ha ḓuvha ḽa Yehova. (Vhalani 2 Petro 3:11, 12.) Ri nga zwi ita hani? Ḓuvha ḽiṅwe na ḽiṅwe ri nga lingedza u humbula nga ha nḓila ine vhutshilo ha ḓo vha vhu tshi khou ḓifha ngayo shangoni ḽiswa. Ḓivhoneni ni tshi khou fema muya wo kunaho, ni tshi khou ḽa zwiḽiwa zwi re na pfushi, ni tshi khou ṱanganedza mashaka na khonani dzaṋu musi vha tshi vuswa na u funza vhathu vho lovhaho kale-kale nga ha nḓila ye vhuporofita vhu re Bivhilini ha itea ngayo. U elekanya nga ha zwenezwi zwithu zwi ḓo ri thusa uri ri dzule ri tshi khou zwi lavhelela nahone zwi ḓo ita uri ri vhe na vhungoho ha uri vhufhelo vhu ḓo swika hu si kale. “Yeneyi nḓivho” nga ha vhumatshelo hashu i ḓo ita uri ri si “xedzwe” nga vhafunzi vha mazwifhi.—2 Pet. 3:17.

7. U ofha vhathu zwi nga ri kwama hani?

⁷ Ngauri ri a zwi ḓivha uri ḓuvha ḽa Yehova ḽi ḓo swika hu si kale, ri ṱoḓa u ita zwoṱhe zwine ra nga kona uri ri huwelele mafhungo maḓifha. Fhedzi nga zwiṅwe zwifhinga ri nga pfa ri tshi ofha u amba. Ndi ngani? Ndi ngauri ri nga ofha uri vhathu vha ḓo humbula mini nga ha riṋe kana zwine vha nga ri ita zwone. Zwenezwo ndi zwe zwa itea kha Petro. Nga vhusiku he Yesu a farwa ngaho, Petro o ofha u amba uri u muṅwe wa vhafunziwa vha Yesu nahone o mu landula  lunzhi. (Mat. 26:69-75) Fhedzi Petro o kunda nyofho dzawe nahone nga murahu a ṅwala maipfi a tevhelaho nga tshivhindi. O ri: “Ni songo vhilaela kana u ofha zwine vha ofha.” (1 Pet. 3:14) Maipfi a Petro a ri khwaṱhisedza uri ri nga kona u sa ofha vhathu.

8. Ndi mini zwine zwa nga ri thusa uri ri si tsha ofha vhathu? (1 Petro 3:15)

⁸ Ndi mini zwine zwa nga ri thusa uri ri si tsha ofha vhathu? Petro u ri: “Itani uri Kristo a vhe mukhethwa mbiluni dzaṋu samusi e Murena.” (Vhalani 1 Petro 3:15.) Zwenezwi zwi katela u elekanya nga ha uri Yesu Kristo ndi Khosi yashu na uri u na maanḓa mahulu. Musi ni tshi wana tshibuli tsha u huwelela kha muṅwe muthu, arali na pfa no tshuwa kana ni tshi khou ofha, ni humbule nga ha Khosi yashu. Mu vhoneni nga iṱo ḽa muhumbulo a tshi khou vhusa ngei ṱaḓulu nahone o tingwa nga vharuṅwa vhanzhi-vhanzhi. Ni humbule na uri o “ṋewa maanḓa oṱhe ngei ṱaḓulu na kha ḽifhasi” na uri u ḓo vha “na inwi misi yoṱhe u swika vhufheloni ha shango.” (Mat. 28:18-20) Petro o ri ṱuṱuwedza uri ri ‘dzule ro ḓiimisela’ u imelela lutendo lwashu. Naa ni nga takalela u huwelela kha muṅwe muthu mushumoni, tshikoloni kana huṅwe fhethu-vho? Humbulani hu tshe nga phanḓa uri ni nga huwelela lini nahone ni lugiselele zwine na ḓo zwi amba. Rabelani uri ni vhe na tshivhindi nahone ni fhulufhele uri Yehova u ḓo ni thusa uri ni si tsha ofha vhathu.—Mish. 4:29.

9. Kha tshiṅwe tshiitea, Petro o kundelwa hani u sumbedza lufuno? (Sedzani tshifanyiso.)

⁹ Petro o guda u sumbedza lufuno. O vha e hone musi Yesu a tshi ri: “Ndi khou ni ṋea mulayo muswa, wa uri ni funane; samusi na nṋe ndo ni funa.” (Yoh. 13:34) Naho zwo ralo, nga murahu Petro o hana u ḽa na vhahawe vhe vha vha vhe si Vhayuda ngauri o vha a tshi khou ofha Vhakriste vha Vhayuda. Muapostola Paulo o amba uri zwe Petro a zwi ita ndi “muhoyo.” (Vhagal. 2:11-14) Petro o tenda u kaidziwa nga Paulo nahone a guda kha vhukhakhi hawe. Kha marifhi mavhili a Petro, o ṅwala uri a ro ngo tea u sokou ḓipfa ri tshi khou funa vhahashu, fhedzi ri tea u sumbedza uri ri a vha funa.

10. Ndi mini zwine zwa ri thusa u sumbedza “lufuno lwa vhukuma lwa murathu na mukomana”? (1 Petro 1:22)

¹⁰ Petro o amba uri ri tea u vha na “lufuno lwa vhukuma lwa murathu na mukomana” kha vhahashu tshivhidzoni. (Vhalani 1 Petro 1:22.) Ri ḓo funana nga u ralo musi ri tshi “thetshelesa ngoho.” Yeneyi ngoho i katela pfunzo ya uri “Mudzimu ha ṱaluli.” (Mish. 10:34, 35) Ri nga si kone u ita zwe Yesu a ri laya nga ha lufuno arali ri tshi funa vhaṅwe tshivhidzoni ngeno vhaṅwe ri sa vha funi. Ndi ngoho uri u fana na Yesu, ri nga si vhe na vhushaka ha tsini-tsini na muṅwe na muṅwe. (Yoh. 13:23; 20:2) Fhedzi Petro u ri humbudza uri ri tea u lwela u vha na ‘lufuno lwa murathu na mukomana’ kha vhahashu ngauri vha tshipiḓa tsha muṱa washu.—1 Pet. 2:17.

11. Zwi amba mini u ‘funana zwi tshi bva mbiluni’?

¹¹ Petro o ri ṱuṱuwedza uri ri ‘funane zwi tshi bva mbiluni.’ Kha yeneyi ndimana, u funana “zwi tshi bva mbiluni” zwi katela u funa muthu naho zwi tshi konḓa u sumbedza onoyo muthu lufuno. Sa tsumbo, hu pfi mini arali wahashu a ri khakhela kana u ri vhaisa nga iṅwe nḓila? Ri nga thoma ri tshi ṱoḓa u ḓilifhedzela nṱhani ha u mu sumbedza lufuno. Fhedzi Petro o guda kha Yesu uri u ḓilifhedzela a zwi takadzi Mudzimu. (Yoh. 18:10, 11) O ri: “Ni songo lifhedza vhuvhi nga vhuvhi kana samba nga samba. Nṱhani hazwo, fhaṱutshedzani.” (1 Pet. 3:9) Musi ni tshi funa vhaṅwe zwi tshi bva mbiluni, ni ḓo vha na vhuthu nahone na humbulela vhaṅwe, u katela na vhe vha ni khakhela.

12. (a) Ndi zwifhio zwiṅwe zwine lufuno lwa ḓo ri ṱuṱuwedza uri ri zwi ite? (b) Ni ṱoḓa u lwela u ita mini samusi zwo sumbedzwa kha vidio Itani Uri Hu Dzule Hu Na Vhuthihi?

¹² Kha vhurifhi hawe ha u thoma, Petro o shumisa maipfi ane a ri “ni funane nga maanḓa.” Lwonolo lufuno lu fukedza “zwivhi zwinzhi.” (1 Pet. 4:8) Khamusi Petro o vha a tshi khou humbula ngudo ya u hangwela ye Yesu a mu gudisa yone miṅwahani yo fhiraho. Nga tshenetsho tshifhinga, Petro o humbula uri arali a hangwela wahawe “lwa sumbe” u vha a tshi khou mu sumbedza mafunda. Fhedzi Yesu o gudisa Petro na riṋe uri ri hangwele wahashu “lwa 77,” zwine zwa amba uri a ro ngo tea u vhea mukano kha uri ri mu hangwela lungana. (Mat. 18:21, 22) Arali zwi tshi ni konḓela u shumisa yeneyi nyeletshedzo, ni songo kulea nungo. Nga zwiṅwe zwifhinga zwi a konḓela vhashumeli vha Yehova vha re na tshivhi u hangwela vhaṅwe. Tshithu tsha ndeme ndi uri ni ite zwoṱhe zwine na nga kona zwino uri ni hangwele wahaṋu na u vha na mulalo nae. c

13. Ndi mini zwine zwa nga ita uri vhahulwane vha konḓelwe u wana tshifhinga tsha u ṱuṱuwedza vhahavho?

¹³ Zwi tou pfala uri Petro ho ngo hangwa maipfi e Yesu a mu vhudza one musi o no vuswa a u ri: “Lisa ngwana dzanga.” (Yoh. 21:16) Arali ni muhulwane, ni a zwi ḓivha uri enea maipfi a shuma na kha inwi. Fhedzi muhulwane a nga  wana zwi tshi mu konḓela u wana tshifhinga tsha u ita wonoyo mushumo wa ndeme. Vhahulwane vha tea u thoma vha vha na vhungoho ha uri vha muṱani wavho vha na zwoṱhe zwine vha zwi shaya, uri muṅwe na muṅwe muṱani wavho u pfa a tshi funiwa na u thusa vha muṱani wavho uri vha vhe na vhushaka ha tsini na Yehova. Vha dovha vha vha tsumbo yavhuḓi kha mushumo wa u huwelela na kha u lugiselela na u ita zwipiḓa zwavho miṱanganoni, maguvhanganoni na mabuthanoni. Vhaṅwe vha dovha vha ita mushumo wa Komiti ya Vhulamukanyi na Vhuongelo (HLC) kana wa Muhasho wa Local Design/Construction (LDC). Zwi khagala uri vhahulwane vha na mushumo munzhi.

14. Ndi mini zwine zwa nga ṱuṱuwedza vhahulwane uri vha lise sambi? (1 Petro 5:1-4)

¹⁴ Petro o vhudza vhahulwane ngae uri: “Lisani sambi ḽa Mudzimu.” (Vhalani 1 Petro 5:1-4.) Arali ni muhulwane, ri a zwi ḓivha uri ni a funa vhahaṋu na uri ni khou ṱoḓa u vha ṱhogomela. Naho zwo ralo, nga zwiṅwe zwifhinga ni nga vha no farakanea kana no neta lune na pfa ni tshi khou balelwa u ita wonoyo mushumo. Ndi mini zwine na nga zwi ita? Vhudzani Yehova zwoṱhe zwine zwa khou ni vhilaedzisa. Petro o ṅwala uri: “Ane a thusa vhaṅwe, a ḓitike nga maanḓa a Mudzimu.” (1 Pet. 4:11) Vhahaṋu vha nga vha vha tshi khou sedzana na thaidzo dzine dzi nga si kone u tandululea zwino. Fhedzi ni humbule uri Yesu Kristo ane a vha “mulisa muhulwane” a nga vha thusa u fhira nḓila ine inwi na nga vha thusa ngayo. A nga vha thusa zwino na tshifhingani tshi ḓaho shangoni ḽiswa. Zwine Yehova a ṱoḓa vhahulwane vha tshi zwi ita ndi u funa vhahavho, u vha ṱhogomela na u vha “tsumbo kha sambi.”

15. Muṅwe muhulwane u ita hani mushumo wa u lisa sambi? (Sedzani tshifanyiso.)

¹⁵ Vho William vhane vho no fhedza miṅwaha minzhi vhe muhulwane vha a pfesesa uri mushumo wa u vha mulisa ndi wa ndeme. Musi dziedzi ḽa COVID-19 ḽi tshi thoma, vhone na vhaṅwe vhahulwane vho ita uri zwi vhe tshipikwa tshavho uri vha kwame vhathu vhoṱhe vha re kha tshigwada tshavho vhege iṅwe na iṅwe. Vha ri: “Vhunzhi ha vhahashu vha mahayani vhe vhoṱhe nahone zwenezwi zwi nga ita uri vha humbule nga ha zwithu zwi kulaho nungo.” Musi wahashu a tshi khou sedzana na thaidzo, Vho William vha a mu thetshelesa nga  vhuronwane uri vha kone u vhona uri u khou vhilaedziswa nga mini na uri vha nga mu thusa hani. Nga murahu vha wana khandiso kana vidio kha website yashu dzine vha nga dzi shumisa u itela u ṱuṱuwedza onoyo wahashu. Vha ri: “Mushumo wa vhulisa ndi wa ndeme zwino u fhira naho hu lini. Ri ita zwoṱhe zwine ra nga kona u itela u thusa vhathu vha si Dziṱhanzi uri vha gude nga ha Yehova, nga hu fanaho, ri tea u ita zwoṱhe zwine ra nga kona uri ri lise sambi ḽa Mudzimu na u thusa nngu dzawe uri dzi dzule dzi ngohoni.”

16. Ri nga shumisa hani ngudo dze ra dzi guda kha maṅwalo a Petro?

¹⁶ Ro haseledza nga ha ngudo dzi si gathi dzi re kha maṅwalo mavhili a Petro. Khamusi ni nga vha no ṱhogomela huṅwe hune na tea u khwinisa hone. Sa tsumbo, naa ni nga takalela u fhedza tshifhinga tsho engedzeaho ni tshi khou elekanya nga ha phaṱhutshedzo dzine ra ḓo dzi wana shangoni ḽiswa? Naa no ḓivhetshela tshipikwa tsha u huwelela lu songo dzudzanywaho mushumoni, tshikoloni kana huṅwe fhethu-vho? Naa ni a vhona nḓila dzine na nga sumbedza vhahaṋu lufuno nga ho engedzeaho? Vhahulwane, naa no ḓiimisela u ita zwoṱhe zwine na nga kona kha u lisa nngu dza Yehova? U ḓiṱolisisa nga vhuronwane zwi nga ni thusa u vhona vhushayanungo vhune na vha naho, fhedzi ni songo zwi tendela zwi tshi ni kula nungo. “Murena u na vhuthu” nahone a nga ni thusa uri ni khwinise. (1 Pet. 2:3) Petro u ri khwaṱhisedza uri: “Mudzimu . . . u ḓo ni gudisa nga ho fhelelaho, u ḓo ni khwaṱhisa, a ita uri ni dzule ni tshi fhulufhedzea, a ita uri ni ime no khwaṱha.”—1 Pet. 5:10.

17. Arali ra konḓelela ra tendela Yehova a tshi ri gudisa, hu ḓo vha na mvelelo dzifhio?

¹⁷ Mathomoni Petro o vha a tshi ḓipfa a sa fanelei u vha tsini na Murwa wa Mudzimu. (Luka 5:8) Fhedzi Yehova na Yesu vho mu tikedza nga lufuno nahone nga murahu Petro a tevhela Yesu nga u fhulufhedzea. Nga nṱhani ha zwenezwo, Yehova o tendela Petro a tshi “dzhena Muvhusoni wa lini na lini wa Murena na Mutshidzi washu Yesu Kristo.” (2 Pet. 1:11) Ndi malamba avhuḓi lungafhani eneo? Na inwi arali na konḓelela u fana na Petro, na tendela Yehova a tshi ni gudisa, ni ḓo lambedzwa nga vhutshilo vhu sa fheli. Ni ḓo “tshidzwa nga nṱhani ha lutendo lwaṋu.”—1 Pet. 1:9.