1-2. (a) Vhutshilo ho vha vhu hani musi Paulo a tshi ṅwalela Vhahevheru vhurifhi? (b) Ndi ngani ri tshi nga ri honovho vhurifhi ho vha ho ḓa nga tshifhinga?

 NGA murahu ha tshifhinganyana musi Yesu o no fa nga 33 C.E., Vhakriste vhe vha vha vha tshi dzula Yerusalema na Yudea vho ṱangana na vhuimo vhu konḓaho. Nga tshenetsho tshifhinga, ho vha hu tshi kha ḓi tou bva u thomiwa tshivhidzo tsha Vhukriste nahone Vhakriste vho vha vha tshi khou tovholwa nga nḓila i vhavhaho. (Mish. 8:1) Nga murahu ha miṅwaha i ṱoḓaho u vha 20, ho vha na nḓala, zwa ita uri Vhakriste vha tambule. (Mish. 11:27-30) Nga vho 61 C.E., nḓila ye vha vha vha tshi khou tovholwa ngayo ya fhungudzea, fhedzi zwihulu zwo vha zwi tshee phanḓa. Nga tshenetsho tshifhinga, Yehova o hevhedza muapostola Paulo uri a vha rumele vhurifhi. Honovhu vhurifhi ho vha vhu tshi ḓo vha thusa uri vha ḓilugiselele nḓila ye vha vha vha tshi ḓo tovholwa ngayo.

² Vhurifhi he Vhahevheru vha ṅwalelwa hone ho swika nga tshifhinga tsho teaho ngauri mulalo we vha vha vhe nawo wo vha u tshi ḓo fhela hu si kale. Paulo o vha ṋea nyeletshedzo ye ya vha i tshi ḓo vha thusa uri vha kone u konḓelela zwe vha vha vha tshi ḓo ṱangana nazwo. Yerusalema wo vha u tshi ḓo fheliswa hu si kale samusi Yesu o vha o dzula o zwi amba. (Luka 21:20) Ndi ngoho uri Paulo na Vhakriste vhane vha dzula Yudea vho vha vha sa ḓivhi uri Yerusalema u ḓo fheliswa lini. Fhedzi vho vha vha tshi nga shumisa tshenetsho tshifhinga tsho salaho uri vha khwaṱhise lutendo lwavho na u ḓilugisela u konḓelela zwe vha vha vha tshi ḓo ṱangana nazwo.​—Vhahev. 10:25; 12:1, 2.

3. Ndi ngani zwo ṅwalwaho kha bugu ya Vhahevheru zwi tshi kwama ṋamusi?

³ Riṋe ri ḓo ṱangana na maṱungu mahulu a fhiraho e Vhakriste vha Vhahevheru vha ṱangana nao. (Mat. 24:21; Nzumb. 16:14, 16) Zwa zwino kha ri ambe nga ha nyeletshedzo ye Yehova a i ṋea Vhakriste  vha tshenetsho tshifhinga, ri vhone uri riṋe i nga ri thusa hani.

‘BVELANI PHANḒA NI TSHI VHA VHO VHIBVAHO’

4. Ndi thaidzo dzifhio dze Vhakriste vha Vhayuda vha ṱangana nadzo? (Sedzani tshifanyiso.)

⁴ Vhayuda vhe vha vha Vhakriste vho vha vha tshi tea u ita tshanduko khulwane nahone zwenezwo zwo vha zwi songo leluwa. Ho vhuya ha vha na tshifhinga tshe Vhayuda vha vha vhe lushaka lwo khethwaho nga Mudzimu. Lwa miṅwaha minzhi, Yerusalema ho vha hu fhethu ho khetheaho. Khosi ye ya vha i tshi vhusa henefho yo vha i tshi imela Yehova nahone vhathu vhe vha vha vha tshi gwadamela Yehova, vho vha vha tshi mu gwadamela thembeleni ye ya vha i henefho Yerusalema. Vhayuda vhoṱhe vho vha vha tshi tevhela Mulayo wa Mushe na milayo ye vha vha vho ṋewa nga vharangaphanḓa vhavho vha vhurereli. Yeneyo milayo yo vha i tshi katela zwine vha tea u iledza u zwi ḽa, u fumbiswa na nḓila ye vha vha vha tshi fanela u fara ngayo vhathu vhe vha vha vhe si Vhayuda. Fhedzi musi Yesu o no fa, zwo vha zwi si tsha ṱoḓea uri vhathu vha ṋekedze zwiṱhavhelo thembeleni ngauri Mulayo wa Mushe wo vha wo fheliswa. Zwenezwo zwo vha zwi songo leluwa kha Vhayuda vhe vha vha Vhakriste vhe vha vha vha tshi tea u ita tshanduko ngauri vho vha vho no ḓowela u ita zwithu nga yeneyo nḓila. (Vhahev. 10:1, 4, 10) Na Vhakriste vhe vha vha vhe na lutendo lwo khwaṱhaho, vha ngaho muapostola Petro, zwo vha konḓela u ita dzenedzo tshanduko. (Mish. 10:9-14; Vhagal. 2:11-14) Vhenevha vhahashu vho vha vha tshi khou tovholwa nga vharangaphanḓa vha vhurereli ha Tshiyuda nga nṱhani ha zwithu zwiswa zwe vha vha vha tshi zwi tenda.

5. Vhakriste vho vha vha tshi khou tovholwa nga vhonnyi?

⁵ Vhakriste vha Vhahevheru vho vha vha tshi khou tovholwa nga vharangaphanḓa vha vhurereli ha Tshiyuda na nga vhaṅwe Vhakriste. Vharangaphanḓa vha vhurereli ha Tshiyuda vho vha tovhola, vha vha fara sa vhagunei ngauri vho ṱutshela vhurereli ha Tshiyuda. Vhaṅwe Vhakriste vho vha vha tshi khou vha tovhola nga u amba uri vhatevheli vha Kristo vha tea u bvela phanḓa vha tshi tevhedza Mulayo wa Mushe. Khamusi vho amba zwenezwo uri vha si tovholwe. (Vhagal. 6:12) Vhakriste vha Vhahevheru vho vha vha tshi  ḓo thuswa nga mini uri vha dzule vha tshi fhulufhedzea kha Yehova?

6. Paulo o ṱuṱuwedza vhatendi ngae uri vha ite mini? (Vhahevheru 5:14–6:1)

⁶ Kha vhurifhi he Paulo a vhu ṅwalela Vhakriste vha Vhahevheru, o vha ṱuṱuwedza uri vha gude na u elekanya nga ha zwine vha zwi guda kha Ipfi ḽa Mudzimu. (Vhalani Vhahevheru 5:14–6:1.) Musi a tshi vha ṅwalela honoho vhurifhi, o redza zwi re kha Maṅwalo a Tshihevheru. O vha ṱalutshedza uri ndi ngani nḓila ine Vhakriste vha gwadamela ngayo Yehova i khwine u fhira nḓila ine Vhayuda vha mu gwadamela ngayo. a Paulo o ṱuṱuwedza Vhakriste uri vha ḓivhe na u pfesesa ngoho i re Maṅwaloni uri vha kone u vhona musi vha tshi funzwa zwithu zwine zwa si vhe ngoho na uri vha zwi iledze.

7. Ndi thaidzo dzifhio dzine ra ṱangana nadzo ṋamusi?

⁷ Ṋamusi hu na vhathu vhanzhi vhane vha phaḓaladza mafhungo a sa tshimbidzani na zwine Yehova a zwi funa na zwine a ri zwo luga. Vhaṅwe vhathu vha nga amba uri Ṱhanzi dza Yehova vha khou khakha nga u tevhedza zwine Bivhili ya zwi amba nga ha zwa vhudzekani. Nḓila ine vhathu vha humbula ngayo yo no tou fhambana tshoṱhe na nḓila ine Yehova a humbula ngayo. (Mir. 17:15) Nga zwenezwo, ndi zwa ndeme uri ri ḓivhe mahumbulele o khakheaho na u a iledza. A ro ngo tea u tenda vhathu vha tshi ri nyamisa na u ri litshisa u shumela Yehova.​—Vhahev. 13:9.

8. Ndi mini zwine zwa nga ri thusa uri ri vhe Vhakriste vho vhibvaho?

⁸ Paulo o vhudza Vhakriste vha Vhahevheru uri vha bvele phanḓa vha tshi vha Vhakriste vho vhibvaho. Zwenezwo zwi amba uri ri tea u guda Bivhili nga vhuronwane uri ri ḓivhe Yehova na u ḓivha khwine nḓila ine a humbula ngayo. Na musi ro no lovhedzwa, ri tea u bvela phanḓa ri tshi vha Vhakriste vho vhibvaho. Roṱhe ri tea u vhala na u guda Ipfi ḽa Mudzimu tshifhinga tshoṱhe, hu sa londwi uri ri na tshifhinga tshingafhani ri ngohoni. (Ps. 1:2) Paulo o vhudza Vhakriste vha Vhahevheru uri vha tea u vha na lutendo. U guda Bivhili tshifhinga tshoṱhe ndi zwone zwine zwa ḓo ri thusa uri ri vhe na lutendo lwo khwaṱhaho.​—Vhahev. 11:1, 6.

“RI NA LUTENDO, LUNE LWA ḒO ITA URI RI TSHILE”

9. Ndi ngani zwo vha zwi zwa ndeme uri Vhakriste vha Vhahevheru vha vhe na lutendo lwo khwaṱhaho?

⁹ Vhakriste vha Vhahevheru vho vha vha tshi tea u vha na lutendo lwo khwaṱhaho ngauri lwo vha lu tshi ḓo vha tshidza musi Yerusalema u tshi fheliswa. (Vhahev. 10:37-39) Yesu o tsivhudza vhatevheli vhawe uri vha tea u shavhela thavhani musi muḓi wa Yerusalema u tshi tangwa nga maswole. Vhakriste vhoṱhe vho vha vha tshi tea u tevhedza yeneyi nyeletshedzo, hu sa londwi uri vha dzula Yerusalema kana uri vha dzula kha miḓana i re nga tsini. (Luka 21:20-24) Musi maswole a tshi ṱhasela muḓi, kanzhi zwo vha zwo ḓowelea uri vhathu vhane vha dzula kha miḓana i re tsini na wonoyo muḓi vha shavhele ngomu ha muḓi, nga nṱhani ha uri wo vha u na mbondo dzine dza nga vha tsireledza. U shavhela dzithavhani zwi nga vha zwo vhonala zwi sa pfali nahone zwi nga vha zwo ṱoḓa uri vhenevho vhathu vha vhe na lutendo lwo khwaṱhaho.

10. U vha na lutendo lwo khwaṱhaho zwo vha zwi tshi ḓo thusa Vhakriste uri vha ite mini? (Vhahevheru 13:17)

¹⁰ Vhakriste vha Vhahevheru vho vha vha tshi tea u fhulufhela vhathu vhe Yesu a vha vhea uri vha range phanḓa tshivhidzoni. Zwi tou vha khagala uri vhane vha khou ranga phanḓa tshivhidzoni vha nga vha vho ṋea vhenevho Vhakriste vhulivhisi ha uri vha shavhe na uri vha nga shavhisa hani. (Vhalani Vhahevheru 13:17.) Ipfi ḽa Tshigerika ḽo shumiswaho kha Vhahevheru 13:17 ḽine ḽa amba ‘u thetshelesa,’ ḽi na muhumbulo wa uri muthu u vha a tshi khou thetshelesa ngauri u a fhulufhela muthu ane a khou mu ṋea vhulivhisi. Ri vha ri sa khou thetshelesa vhahulwane ngauri  ri khou tou tea uri ri vha thetshelese, fhedzi ri vha thetshelesa ngauri ri a vha fhulufhela. Nga zwenezwo, Vhakriste vha Vhahevheru vho vha vha tshi tea u guda u fhulufhela vhahulwane na u tevhela vhulivhisi havho musi muḓi wa Yerusalema u sa athu u fheliswa. Zwo vha zwi tshi ḓo lelutshela vhenevho Vhakriste uri vha thetshelese vhahulwane nga zwifhinga zwi konḓaho arali vho vha thetshelesa nga tshifhinga tsha musi hu na mulalo.

11. Ndi ngani ri tshi tea u vha na lutendo lwo khwaṱhaho ṋamusi?

¹¹ Na riṋe ri tea u vha na lutendo u fana na Vhakriste vha Vhahevheru. Ri khou tshila kha tshifhinga tshine vhunzhi ha vhathu vha si tende uri ḽino shango ḽi ḓo fheliswa. Musi ri tshi amba uri ḽi ḓo fheliswa, vha a ri goḓa. (2 Pet. 3:3, 4) Zwiṅwe hafhu, naho Bivhili i tshi amba uri hu ḓo itea mini nga maṱungu mahulu, hu na zwiṅwe zwine ya si zwi ambe. Ri tea u vha na lutendo lwo khwaṱhaho lwa uri Yehova u a ḓivha uri vhufhelo vhu ḓo ḓa lini na u fhulufhela uri u ḓo ri tsireledza nga tshenetsho tshifhinga.​—Hab. 2:3.

12. Ndi mini zwine zwa ḓo ri thusa uri ri ponyoke maṱungu mahulu?

¹² Ri tea u dovha ra vha na lutendo lwa uri Yehova u shumisa “mulanda a fhulufhedzeaho na wa vhuṱali” u itela u ri livhisa ṋamusi. (Mat. 24:45) Musi maṱungu mahulu a tshi thoma, ri nga kha ḓi wana vhulivhisi vhune ha ḓo ri tshidza samusi na Vhakriste vha Vhahevheru vho wana vhulivhisi musi Yerusalema u tshi tangwa nga mmbi ya Vharoma. Nga zwenezwo, ndi zwa ndeme uri zwa zwino ri fhulufhele vhulivhisi vhune ra vhu wana kha vhe Yehova a vha vhea uri vha range phanḓa ndanguloni yawe. Ri nga si lavhelele uri ri ḓo tevhela vhulivhisi vhune vha ḓo ri ṋea nga tshifhinga tsha maṱungu mahulu arali ri tshi khou kundelwa u vhu tevhedza zwino.

13. Ndi ngani nyeletshedzo i re kha Vhahevheru 13:5 yo vha yo tea?

¹³ Musi Vhakriste vha Vhahevheru vho lindela u vhona zwe Yesu a zwi amba zwi tshi itea, vho vha vha tshi tea u iledza u “funa tshelede” nahone vha livhise ṱhogomelo kha u shumela Yehova. (Vhalani Vhahevheru 13:5.) Vhunzhi havho vho vha vho no tshenzhela vhuimo vhu konḓaho musi hu tshi vha na nḓala Yerusalema. (Vhahev. 10:32-34) Naho vho vha vho ḓiimisela u konḓelela, khamusi vhaṅwe vhavho vho vha vha tshi vho thoma u livhisa ṱhogomelo kha uri vha wane tshelede yo engedzeaho u itela uri vha si tambule. Fhedzi tshelede yo vha i sa ḓo vha tsireledza musi Yerusalema u tshi fheliswa. (Yak. 5:3) Zwavhuḓivhuḓi, zwo vha zwi tshi ḓo konḓela vhathu vhane vha funa tshelede na thundu uri vha shavhe vha sie zwine vha vha nazwo.

14. U vha na lutendo lwo khwaṱhaho zwi nga ita hani uri ri dzhie phetho dzavhuḓi musi zwi tshi ḓa kha thundu kana tshelede?

¹⁴ Arali ri tshi tenda uri hu si kale Yehova u ḓo fhelisa ḽino shango ḽivhi, zwi ḓo ri thusa uri ri si humbule uri u vha na tshelede nnzhi kana thundu ndi zwone zwa ndemesa. Zwavhuḓivhuḓi, tshelede i ḓo vha i si na mushumo nga maṱungu mahulu. Bivhili i amba uri vhathu vha ḓo “laṱa siḽiva yavho nḓilani” ngauri vha ḓo vha vho zwi vhona uri “siḽiva yavho kana musuku wavho a zwi nga ḓo vha tshidza nga ḓuvha ḽa u sinyuwa ha Yehova.” (Hesek. 7:19) Nṱhani ha uri ri livhise ṱhogomelo kha u wana tshelede nnzhi, ri tea u fushea nga zwine ra vha nazwo uri ri kone u shumela Yehova. Nga zwenezwo, zwi ḓo vha zwi si vhuṱali u ḓidzhenisa kha zwikolodo zwi sa ṱoḓei kana u fhedza tshifhinga tshinzhi-tshinzhi ri tshi khou ṱhogomela thundu ine ra vha nayo. Ri tea u ita vhungoho ha uri thundu kana zwithu zwine ra vha nazwo zwi si vhe zwone zwa ndemesa vhutshiloni hashu. (Mat. 6:19, 24) Samusi ḽino shango ḽivhi ḽi tsini-tsini na u fheliswa, ri tea u khetha arali ri tshi ḓo fhulufhela Yehova kana ri tshi ḓo fhulufhela thundu dzine ra vha nadzo.

“NI TEA U KONḒELELA”

15. Ndi ngani zwo vha zwi tshi ṱoḓea uri Vhakriste vha Vhahevheru vha konḓelele?

¹⁵ Vhakriste vha Vhahevheru vho vha vha tshi tea u konḓelela ngauri zwihulu zwo vha zwi  tshee phanḓa. (Vhahev. 10:36) Naho vhaṅwe vho vha vho no tovholwa tshifhingani tsho fhiraho, vhunzhi havho vho vha vha sa athu u vhuya vha tovholwa. Nga zwenezwo, Paulo o vha humbudza uri vha tea u ḓilugiselela u tovholwa na u ḓilugiselela u fhulufhedzea u swika vha tshi fa, u fana na Yesu. (Vhahev. 12:4) Vhayuda vhanzhi vho vha vho sinyuwa zwihulu nahone vha tshi khou vusa dzikhakhathi ngauri vhunzhi ha Vhayuda vho vha vha tshi khou vha Vhakriste. Miṅwahani i si gathi yo fhiraho, Paulo o vha o ṱhaselwa nga tshigwada tsha vhathu musi a tshi khou huwelela Yerusalema. Vhayuda vha fhiraho 40 vho “ana vha ri: A ri nga ḽi kana u nwa u swikela ri tshi vhulaya Paulo, ra sa ita nga u ralo ri ḓo vha ro semiwa.” (Mish. 22:22; 23:12-14) Naho Vhakriste vho vha vha tshi ḓo vha vha tshi khou vhengiwa na u tovholwa, vho vha vha tshi khou tea u bvela phanḓa vha tshi ya miṱanganoni, vha tshi huwelela mafhungo maḓifha na u dzula vhe na lutendo lwo khwaṱhaho.

16. Vhurifhi he ha ṅwalelwa Vhahevheru vhu nga ri thusa hani uri ri vhe na mavhonele avhuḓi musi ri tshi tovholwa? (Vhahevheru 12:7)

¹⁶ Ndi mini zwe zwa vha zwi tshi ḓo thusa Vhakriste vha Vhahevheru uri vha konḓelele musi vha tshi tovholwa? Paulo o vha a tshi khou ṱoḓa u vha thusa u vhona uri musi vha tshi konḓelela milingo, zwi ita uri vha vhuyelwe. O vha ṱalutshedza uri musi Vhakriste vha tshi ṱangana na mulingo, Mudzimu a nga shumisa wonoyo mulingo u vha gudisa zwiṅwe zwithu. (Vhalani Vhahevheru 12:7.) Zwine vha zwi guda musi vha tshi ṱangana na mulingo, zwi nga vha thusa u vhona uri vha nga khwinisa hani musi zwi tshi ḓa kha nḓila ine vha edzisa ngayo zwine Yehova a vha zwone. Zwo vha zwi tshi ḓo lelutshela Vhakriste vha Vhahevheru uri vha konḓelele musi vha tshi ṱangana na mulingo arali vha livhisa ṱhogomelo kha nḓila ine vha vhuyelwa ngayo musi vha tshi konḓelela.​—Vhahev. 12:11.

17. Paulo o guda mini nga ha u konḓelela musi a tshi tovholwa?

¹⁷ Paulo o ṱuṱuwedza Vhakriste vha Vhahevheru uri vha vhe na tshivhindi na uri vha konḓelele milingo vha sa neti. Zwi nga vha zwo lelutshela Paulo u vha ṋea yeneyo nyeletshedzo ya uri vha nga konḓelela hani. Samusi o vha a tshi tovhola Vhakriste  tshifhingani tsho fhiraho, o vha a tshi ḓivha nḓila ya tshiṱuhu ine vha farwa ngayo nga vhane vha vha tovhola. O vha a tshi ḓivha na uri vha nga konḓelela hani musi vha tshi tovholwa. Na ene o tovholwa musi a tshi vha Mukriste. (2 Vhakor. 11:23-25) Nga zwenezwo, Paulo o vha a tshi tou zwi ḓivha a zwi fhedza uri vha nga thuswa nga mini uri vha konḓelele. O vha humbudza uri vha tea u ḓitika nga Yehova uri vha konḓelele, hu si u ḓitika nga vhone vhaṋe. Zwenezwo ndi zwone zwe zwa ita uri Paulo a vhe na tshivhindi tsha u amba uri: “Yehova ndi muthusi wanga; a thi nga ofhi.”​—Vhahev. 13:6.

18. Ndi mini zwine zwa ḓo itea kha riṋe hu si kale nahone ri tea u ita mini zwino?

¹⁸ Vhaṅwe vhahashu vha khou tovholwa ṋamusi nahone vha khou konḓelela. Ri nga vha tikedza nga u vha rabelisa, nahone nga zwiṅwe zwifhinga ri nga vha thusa nga u vha ṋea zwine vha zwi shaya. (Vhahev. 10:33) Bivhili i amba uri: “Vhoṱhe vha re na vhuthihi na Kristo Yesu, vho ḓikumedzelaho kha Mudzimu na vhone vha ḓo tovholwa.” (2 Tim. 3:12) Zwenezwo zwi amba uri roṱhe ri tea u dzula ro ḓilugiselela zwine zwa ḓo itea hu si kale. Nga zwenezwo, kha ri bvele phanḓa ri tshi fhulufhela Yehova nga ho fhelelaho zwino ri na vhungoho ha uri u ḓo ri thusa uri ri kone u konḓelela mulingo muṅwe na muṅwe une ra nga ṱangana nawo. Hu si kale, u ḓo thusa vhashumeli vhawe vhoṱhe vhane vha fhulufhedzea khae.​—2 Vhathes. 1:7, 8.

19. Ri nga ita mini uri ri ḓilugiselele maṱungu mahulu? (Sedzani tshifanyiso.)

¹⁹ A zwi timatimisi uri vhurifhi he Paulo a vhu ṅwalela Vhakriste vha Vhahevheru ho vha thusa uri vha ḓilugiselele zwe zwa vha zwi tshi ḓo itea. Paulo o vha ṱuṱuwedza uri vha gude Ipfi ḽa Mudzimu nga vhuronwane na u pfesesa zwine vha khou zwi guda. U ita nga u ralo zwo vha zwi tshi ḓo vha thusa uri vha iledze zwithu zwine zwa si tshimbidzane na zwine zwa funzwa nga Bivhili zwine zwa nga ita uri vha si tsha vha na lutendo lwo khwaṱhaho. O vha thusa uri vha vhe na lutendo lwo khwaṱhaho u itela uri vha kone u ṱavhanya u tevhedza vhulivhisi ha Yesu na ha vhe Yehova a vha vhea uri vha range phanḓa tshivhidzoni. O dovha a vha thusa uri vha ḓigudise u konḓelela milingo na uri vha i dzhie sa tshibuli tsha u gudiswa nga Yehova. Na riṋe ri tea u tevhedza yeneyi nyeletshedzo i bvaho Bivhilini. Zwi ḓo ri thusa uri ri kone u konḓelela nga u fhulufhedzea u swika vhufheloni.​—Vhahev. 3:14.