1-2. Ndi mini zwine zwa ita uri vhashumeli vha Mudzimu vha takale? (Yakobo 1:22-25)

 YEHOVA na Murwa wawe vha ṱoḓa ri tshi takala. Muṅwali wa Phisalema 119:2 o ri: “Hu takala vhane vha tevhedza khumbudzo dzawe, vhane vha mu ṱoḓa nga mbilu dzavho dzoṱhe.” Na Yesu o amba uri: “Hu takala vhane vha pfa Ipfi ḽa Mudzimu, vha tevhedza zwine ḽa amba!”—Luka 11:28.

² Vhashumeli vha Yehova vho takala. Ndi ngani? Ri na zwiitisi zwinzhi, fhedzi tsha ndeme vhukuma ndi uri ri vhala Bivhili ḓuvha ḽiṅwe na ḽiṅwe, ra ita zwoṱhe zwine ra nga kona uri ri shumise zwine ra zwi guda.​—Vhalani Yakobo 1:22-25.

3. Ri vhuyelwa hani musi ri tshi ita zwine Ipfi ḽa Mudzimu ḽa amba zwone?

³ Hu na nḓila nnzhi dzine ra vhuyelwa ngadzo musi ri tshi ‘ita zwine Ipfi ḽa Mudzimu ḽa amba zwone.’ Sa tsumbo, musi ri tshi ita zwine ra zwi guda Ipfini ḽa Mudzimu, zwi ita uri Yehova a takale. Zwenezwo zwa ita uri na riṋe ri takale. (Muh. 12:13) Zwiṅwe hafhu, musi ri tshi tevhedza zwine zwa vha Ipfini ḽa Mudzimu, zwi ri thusa u khwinisa nḓila ine ra tshilisana ngayo na vhaṅwe muṱani na tshivhidzoni. Khamusi zwenezwo na inwi no no zwi ṱhogomela. U ita zwine ra zwi guda Bivhilini zwi dovha zwa ri thusa uri ri si ṱangane na thaidzo dzine vhathu vhane vha si thetshelese Yehova vha ṱangana nadzo. Zwi tou sumbedza uri zwe Khosi Davida a zwi amba ndi ngoho. Kha luimbo lwe a lu ṅwala, o amba nga ha milayo ya Yehova na nḓila ine a haṱula ngayo, a fhedzisela nga u amba uri: ‘Ane a zwi tevhedza u a lambedzwa zwihulu.’​—Ps. 19:7-11.

4. Ndi ngani zwi songo leluwa u vhala na u shumisa zwine ra zwi guda Ipfini ḽa Mudzimu?

⁴ Ndi ngoho uri a zwo ngo leluwa u vhala Ipfi ḽa Mudzimu na u shumisa zwine ra zwi guda tshifhinga tshoṱhe. Naho ri tshi dzula ro farakanea, ri tea u ḓiṋea tshifhinga tsha u vhala na u  guda Bivhili u itela u pfesesa zwine Mudzimu a zwi lavhelela kha riṋe. Kha ri ambe nga ha zwithu zwine zwa nga ri thusa uri ri dzule ri tshi vhala Ipfi ḽa Mudzimu ḓuvha ḽiṅwe na ḽiṅwe. Ri ḓo dovha ra amba nga ha zwine zwa ḓo ri thusa uri ri humbule nga ha zwine ra zwi vhala na u vhona uri ri nga zwi shumisa hani vhutshiloni hashu.

ḒIVHETSHELENI TSHIFHINGA TSHA U VHALA IPFI ḼA MUDZIMU

5. Ndi zwithu zwifhio zwine zwa ita uri ri dzule ro farakanea?

⁵ Vhunzhi ha vhathu vha Yehova vha dzula vho farakanea. Ri fhedza tshifhinga tshinzhi ri tshi khou ita zwine Bivhili ya amba uri ndi zwa ndeme. Sa tsumbo, vhunzhi hashu ri a shuma u itela u ḓiṱhogomela na u ṱhogomela miṱa yashu. (1 Tim. 5:8) Vhunzhi ha Vhakriste vha na vhuḓifhinduleli ha u ṱhogomela mashaka avho vhane vha lwala kana vha vhaaluwa. Ri tea u dovha ra ṱhogomela na mutakalo washu. Zwenezwo zwi ṱoḓa tshifhinga. Ri dovha ra vha na miṅwe mishumo ya ndeme ine ra tea u i ita tshivhidzoni. Muṅwe mushumo wa ndeme une ra tea u u ita ndi wa u huwelela mafhungo maḓifha. Hu sa londwi mishumo yoṱhe ine na tea u i ita, ni nga wana hani tshifhinga tsha u vhala Bivhili ḓuvha ḽiṅwe na ḽiṅwe, u elekanya nga ha zwine na zwi guda khathihi na u zwi shumisa?

6. Ni nga ita mini uri ni dzule ni tshi vhala Bivhili tshifhinga tshoṱhe? (Sedzani tshifanyiso.)

⁶ U vhala Bivhili ndi tshiṅwe tsha zwithu zwa “ndeme vhukuma” zwine riṋe sa Vhakriste ra tea u zwi ita, ndi ngazwo ri tshi tea u ita vhungoho ha uri ri i vhale tshifhinga tshoṱhe. (Vhafil. 1:10) Musi Phisalema ndima ya u thoma i tshi amba nga ha muthu o takalaho, i ri: “U takalela mulayo wa Yehova, mulayo wawe a u vhalela fhasi masiari na vhusiku.” (Ps. 1:1, 2) Zwenezwi zwi amba uri ri tea u ḓivhetshela tshifhinga tsha u vhala Bivhili. Ndi tshifhio tshifhinga tshavhuḓi tsha u vhala Bivhili? Zwi tou bva kha muthu uri ene u takalela u vhala Bivhili nga tshifhinga tshifhio. Ndi zwa ndeme uri ni khethe tshifhinga tshine na ḓo kona u dzula ni tshi vhala Bivhili ngatsho ḓuvha ḽiṅwe na ḽiṅwe. Muṅwe wahashu ane a pfi Victor u ri: “Ndi takalela u vhala Bivhili nga  matsheloni. Naho ndi muthu ane a si takalele u vuwa nga matsheloni-tsheloni, nga tshenetsho tshifhinga hu vha hu si na zwithithisi zwinzhi. Ndi vha ndo tou fombe kha zwine nda khou vhala.” Khamusi na inwi zwi nga ni shumela u vhala Bivhili nga matsheloni. Ni nga ḓivhudzisa uri: ‘Ndi tshifhinga tshifhio tshavhuḓi kha nṋe tshine nda nga tshi shumisa u vhala Bivhili?’

ELEKANYANI NGA HA ZWINE NA KHOU ZWI VHALA

7-8. Ndi mini zwine zwa nga ita uri ri si vhuyelwe nga zwine ra khou zwi vhala? Fanyisani.

⁷ Arali no no ḓivhetshela tshifhinga tsha u vhala Bivhili, hu na tshiṅwe tshithu tshine na tea u tshi ṱhogomela. Naa no no vhuya na vhala tshiṅwe tshithu, nga murahu ni sa tsha humbula zwe na vha ni tshi khou vhala nga hazwo? Zwi nga itea kha riṋe roṱhe. Zwi nga itea na musi ri tshi khou vhala Bivhili. Khamusi ri nga ḓivhetshela tshipikwa tsha u vhala ndima dzi si gathi ḓuvha ḽiṅwe na ḽiṅwe. Zwenezwo ndi zwavhuḓi. Ri tea u ḓivhetshela zwipikwa nahone nga murahu ri ite zwoṱhe zwine ra nga kona uri ri zwi swikelele. (1 Vhakor. 9:26) Arali ri tshi ṱoḓa u vhuyelwa nga u vhala Bivhili, ri tea u ita zwi fhiraho u sokou i vhala.

⁸ Zwimela zwi ṱoḓa mvula uri zwi aluwe. Fhedzi arali mvula ya nesa i khulu, mavu a vha na maḓi manzhi. Arali mvula ya ḓi bvela phanḓa na u na nga u ralo, zwi ita uri maḓi a si tsha nwelela mavuni, zwa ita uri zwimela zwi si vhuyelwe. Zwi vha zwavhuḓi arali mvula ya vha i tshi khou na zwavhuḓi, ngauri zwi ita uri maḓi a kone u nwelela mavuni na u thusa zwimela u aluwa. Nga hu fanaho, ri tea u iledza u vhala Bivhili ro dzhaya lune ra si vhe na tshifhinga tsha u humbulisisa nga zwine ra khou zwi vhala na u vhona uri ri nga zwi shumisa hani.​—Yak. 1:24.

9. Ri tea u ita mini arali ra ṱhogomela uri ri vhala Bivhili ro dzhaya?

⁹ Naa nga tshiṅwe tshifhinga ni vhala Bivhili no dzhaya? Arali zwo ralo, ni nga ita mini? Lingedzani u i vhala ni songo dzhaya, ni tshi khou humbulisisa nga ha zwine na khou zwi vhala. Kana ni ḓiṋee tshifhinga tsha u humbulisisa nga ha zwe na zwi vhala musi no no fhedza u vhala. Ni nga ita phetho ya uri ni fhedze tshifhinga tsho engedzeaho ni tshi khou  vhala, uri ni kone u elekanya nga ha zwine na khou zwi vhala. Kana ni nga khetha u vhala vese dzi si gathi nahone na shumisa tshifhinga tsho salaho u humbulisisa nga ha zwe na zwi vhala. Victor we ra amba nga hae u ri: “A thi vhali zwithu zwinzhi-zwinzhi musi ndi tshi vhala Bivhili. Ndi nga vhala ndima nthihi fhedzi. Nga nṱhani ha uri ndi vhala Bivhili nga matsheloni, ndi a kona u humbulisisa nga ha zwe nda zwi vhala ḓuvha ḽoṱhe.” Ni nga ḓikhethela inwi muṋe uri ni ṱoḓa u vhala tshipiḓa tshingafhani tsha Bivhili. Fhedzi ndi zwa ndeme nga maanḓa uri ni i vhale nga nḓila ine na ḓo kona u humbulisisa nga ha zwine na khou zwi vhala.​—Ps. 119:97; sedzani bogisi “ Mbudziso Dzine Na Nga Ḓivhudzisa Dzone.”

10. Ṋeani tsumbo ya nḓila ine na nga shumisa ngayo zwine na zwi guda Bivhilini. (1 Vhathesalonika 5:17, 18)

¹⁰ Hu sa londwi uri ni vhala Bivhili lini na uri ni fhedza tshifhinga tshingafhani ni tshi khou i vhala, ni tea u humbula nga ha uri ni nga shumisa hani zwine na khou zwi vhala. Musi ni tshi khou vhala Bivhili, ni nga ḓivhudzisa uri: ‘Ndi nga shumisa hani zwine nga khou zwi vhala zwino kana tshifhingani tshi ḓaho?’ Ri nga zwi fanyisa nga heyi nḓila. Kha ri ri ni khou vhala 1 Vhathesalonika 5:17, 18. (Vhalani.) Musi no no vhala dzenedzi vese mbili, ni nga humbula nga ha uri ni rabela lungana. Ni nga dovha na ḓivhudzisa arali ni tshi rabela zwi tshi bva mbiluni. Zwiṅwe hafhu, ni nga humbula na zwithu zwine na zwi livhuwa vhukuma. Khamusi na khetha zwiraru zwine na nga livhuwa Yehova ngazwo. Naho ni tshi nga fhedza tshifhinga tshiṱukuṱuku ni tshi khou humbula nga zwithu zwine na khou zwi guda Bivhilini, zwi ḓo ni thusa uri ni pfesese Ipfi ḽa Mudzimu na u ita zwine ḽa amba. Ni ḓo vhuyelwa vhukuma arali na dzula ni tshi ita zwenezwi ḓuvha ḽiṅwe na ḽiṅwe musi ni tshi khou vhala Bivhili. Zwi ḓo ita uri ni dzule ni tshi ita zwine Ipfi ḽa Mudzimu ḽa amba. Fhedzi hu pfi mini arali na ṱhogomela uri hu na zwithu zwinzhi zwine na tea u khwinisa khazwo?

ḒIVHETSHELENI ZWIPIKWA ZWINE NA NGA KONA U ZWI SWIKELELA

11. Ndi ngani nga zwiṅwe zwifhinga ni tshi nga pfa no kulea nungo? Ṋeani tsumbo.

¹¹ Musi ni tshi vhala Bivhili, ni nga ṱhogomela uri hu na zwithu zwinzhi zwine na tea u shumela khazwo nahone zwenezwo zwi nga ni kula nungo. Sa tsumbo, kha ri ri nga Musumbuluwo musi ni tshi khou vhala Bivhili, ni guda nga ha uri a no ngo tea u vha na tshiṱalula. (Yak. 2:1-8) Zwenezwi zwa ita uri ni vhone uri hu na hune na khou tea u khwinisa hone musi zwi tshi ḓa kha nḓila ine na fara ngayo vhaṅwe vhathu nahone na ita dzenedzi tshanduko. Ni vha no shuma. Nga Ḽavhuvhili na vhala tshiṅwe tshipiḓa Bivhilini tshine tsha amba uri ndi zwa ndeme u langa zwine ra zwi amba. (Yak. 3:1-12) Na ṱhogomela uri musi ni tshi amba na vhaṅwe  nga zwiṅwe tshifhinga, ni amba nga ha zwithu zwi si zwavhuḓi kana zwi sa ṱuṱuwedzi. Nga zwenezwo, na ita phetho ya uri ni khou ṱoḓa u ṱuṱuwedza vhaṅwe musi ni tshi amba. Nga Ḽavhuraru musi ni tshi khou vhala Bivhili, na pfa hu tshi khou ambiwa uri ni tea u ṱhogomela zwine na ḓimvumvusa ngazwo na khonani dzine na vha nadzo. (Yak. 4:4-12) Zwenezwo zwa ita uri ni vhone uri ni tea u khetha nga vhuronwane zwine na zwi vhala, zwine na zwi ṱalela na zwine na zwi thetshelesa. Musi ḽi tshi swika Ḽavhuṋa, ni nga pfa u nga zwi ḓo ni konḓela u ita dzenedzo tshanduko dzoṱhe.

12. Ndi ngani ni songo tea u kulea nungo musi ni tshi wana uri hu na tshanduko dzine na tea u dzi ita? (Sedzani ṱhaluso i re magumoni a siaṱari.)

¹² Arali zwi tshi ṱoḓea uri ni ite tshanduko dzo vhalaho, ni songo kulea nungo. Arali na ṱhogomela uri ni tea u khwinisa, zwenezwo zwi sumbedza uri ni a ḓiṱukufhadza nahone ni khou ita zwo teaho. Musi ri tshi ḓiṱukufhadza, ri ḓo vhala Bivhili nahone ra vhona uri ndi ngafhi hune ra tea u khwinisa hone. a Ni humbule uri ri tea u dzula ri tshi khou ambara “vhumuthu vhuswa.” (Vhakol. 3:10; vhambedzani study note “is being made new” tsha yeneyi ndimana.) Ndi mini zwine zwa ḓo ni thusa uri ni dzule ni tshi ita zwine Ipfi ḽa Mudzimu ḽa amba zwone?

13. Ndi mini zwine zwa nga ni thusa uri ni kone u shumisa zwe na zwi guda? (Sedzani tshifanyiso.)

¹³ Nṱhani ha u lingedza u ita zwithu zwoṱhe zwe na zwi guda nga khathihi, ḓivhetsheleni tshipikwa tsha u ita tshithu tshithihi kana zwivhili. (Mir. 11:2) Lingedzani hezwi: Ṅwalani mutevhe wa zwithu zwine na khou ṱoḓa u shumela khazwo nahone ni khethe tshithihi kana zwivhili zwine na ḓo thoma u zwi ita, nga murahu  ni kone u lingedza zwo salaho. Ni nga thoma ngafhi?

14. Ndi zwipikwa zwifhio zwine na nga thoma ngazwo?

¹⁴ Ni nga thoma nga u lingedza u swikelela tshipikwa tshine tsha ḓo ni lelutshela. Kana ni nga khetha u shumela kha u khwinisa zwine na vhona uri ndi zwone zwa ndemesa. Musi no no khetha fhethu hune na vhona uri ndi hone ha ndeme hune na tea u thoma u shumela khaho, ni nga ita ṱhoḓisiso kha khandiso dzashu, khamusi kha Watch Tower Publications Index kana kha Research Guide for Jehovah’s Witnesses. Ni rabele kha Yehova ni mu humbele uri a ni thuse uri ‘ni tame u ita zwine a zwi funa na u vha na maanḓa a u zwi ita.’ (Vhafil. 2:13) Nga murahu, ni lingedze u shumisa zwe na zwi guda. Arali na kona u swikelela tshipikwa tsha u thoma tshe na ḓivhetshela tshone, zwi nga ni ṱuṱuwedza u lingedza na u swikelela zwiṅwe. Musi ni tshi vhona uri no kona u ita tshanduko vhutshiloni haṋu sa Mukriste, zwi nga ni lelutshela uri ni kone u bvela phanḓa ni tshi ita dziṅwe tshanduko.

TENDELANI IPFI ḼA MUDZIMU ḼI TSHI NI “THUSA”

15. Vhathu vha Yehova vho fhambana hani na vhathu vhanzhi vhane vha vhala Bivhili? (1 Vhathesalonika 2:13)

¹⁵ Vhaṅwe vhathu vha amba uri vho no vhala Bivhili lunzhi-lunzhi. Fhedzi, naa vha a tenda zwine Bivhili ya zwi funza? Naa vho lingedza u shandula vhutshilo havho, vha tshila nga nḓila ine Bivhili ya ri funza uri ri tshile ngayo? Hai. Vhunzhi ha vhathu a vha tevhedzi zwine Bivhili ya amba. Fhedzi vhathu vha Yehova vha a tevhedza zwine Bivhili ya zwi amba. U fana na Vhakriste vha u thoma, ri ṱanganedza Bivhili sa “Ipfi ḽa Mudzimu.” Zwiṅwe hafhu, ri ita zwoṱhe zwine ra nga kona uri ri shumise zwine Bivhili ya zwi amba vhutshiloni hashu.​—Vhalani 1 Vhathesalonika 2:13.

16. Ndi mini zwine zwa nga ri thusa u ita zwine Ipfi ḽa Mudzimu ḽa amba zwone?

¹⁶ A zwo ngo leluwa u dzula ri tshi vhala Ipfi ḽa Mudzimu na u tevhedza zwine ḽa amba. Ri nga konḓelwa u wana tshifhinga tsha u vhala kana ra ḓiwana ri tshi khou vhala ro dzhaya nahone ri sa khou vhuyelwa nga zwine ra khou zwi vhala. Kana ri nga kulea nungo musi ri tshi vhona zwithu zwinzhi-zwinzhi zwine ra tea u khwinisa khazwo. Hu sa londwi uri ndi thaidzo ifhio ine na khou sedzana nayo, ni nga kona u dzula ni tshi vhala Ipfi ḽa Mudzimu. Yehova a nga ni thusa uri ni kone u i kunda. Kha ri ḓiimisele u ṱanganedza thuso ya Yehova, ri vhe vhane vha pfa na u tevhedza zwine Ipfi ḽa Mudzimu ḽa amba zwone. Ri ḓo takala arali ra vhala Ipfi ḽa Mudzimu na u ḽi shumisa vhutshiloni hashu.​—Yak. 1:25.