Musi ni sa athu guda, ni nga kha ḓi ḓivhudzisa uri: ‘Ndi mini zwine nda khou lavhelela u zwi guda henefha?’ Ni songo hangwa uri naho riṋe vhaṋe ri tshi khou humbula uri ri ḓo guda tshithu tshikene, Yehova a nga kha ḓi vha a tshi khou ṱoḓa ri tshi guda zwiṅwe zwithu zwiswa. Ni nga vhona hani zwine Yehova a khou ṱoḓa ni tshi zwi guda?

Rabelani kha Yehova uri a ni ṋee vhuṱali. Humbelani Yehova uri a ni thuse u pfesesa zwithu zwine ene a khou ṱoḓa ni tshi zwi guda. (Yak. 1:5) Ni songo sokou fushea fhedzi nga zwithu zwine na zwi ḓivha.​—Mir. 3:5, 6.

Tendelani Bivhili i tshi ni thusa u ita tshanduko vhutshiloni haṋu. “Ipfi ḽa Mudzimu ḽi a tshila.” (Vhahev. 4:12) Tshifhinga tshoṱhe musi ri tshi guda Bivhili, hu na zwithu zwiswa zwine ra nga zwi guda nahone i nga ri thusa u ita tshanduko vhutshiloni hashu. Fhedzi uri ri kone u vhuyelwa ngayo, ri tea u vha ro ḓiimisela u tenda uri Mudzimu a ri gudise.

Dzhielani nṱha nḓila dzo fhambanaho dzine Yehova a ri gudisa ngadzo. Khandiso, dzividio na zwiṅwe zwithu zwine Yehova a ri gudisa ngazwo, zwi vha zwi tshi tou nga “tshimima tsha zwiḽiwa” tshine ra ḓiphiṋa ngatsho. (Yes. 25:6) Ni songo iledza u guda nga ha zwithu zwine na vhona u nga zwi nga si ni takadze. Musi ni tshi guda, Mudzimu u ḓo ni thusa uri ni vhe muthu wa khwine nahone zwi ḓo ita uri ni takalele u guda.