1. Ndi mini zwine Yesu a ḓo zwi ita hu si kale?

 RI KHOU tshila kha tshifhinga tshine ha ḓo itea tshanduko nnzhi. Hu si kale Yesu u ḓo haṱula vhathu vhoṱhe vhane vha khou tshila kha ḽifhasi. Yesu o ri vhudza zwine zwa ḓo itea musi a sa athu u haṱula. O ṋea vhafunziwa vhawe “tshiga” tshine tsha ḓo sumbedza u vha hone hawe na tsha “vhufhelo ha shango.” (Mat. 24:3) Zwe a zwi amba zwo ṅwaliwa kha Mateo ndima 24 na 25 na kha Marko ndima 13 na kha Luka 21.

2. Ri ḓo haseledza nga ha mini kha ino thero nahone zwenezwi zwi ḓo ri thusa hani?

² Yesu o shumisa zwifanyiso zwiraru u itela u ri thusa uri ri ḓilugiselele tshifhinga tsha vhufhelo. Zwenezwo zwifanyiso zwi ri thusa u vhona uri ndi mini zwine ra tea u zwi iledza. Yesu o shumisa tshifanyiso tsha nngu na mbudzi, tshifanyiso tsha vhasidzana vho ṱalifhaho na vha matsilu na tshifanyiso tsha talente. Tshifanyiso tshiṅwe na tshiṅwe tshi ri thusa u pfesesa uri Yesu u ḓo sedza zwine vhathu vha ita musi a tshi haṱula. Kha ino thero ri ḓo haseledza nga ha zwenezwi zwifanyiso nahone ra vhona uri ri nga guda mini khazwo. Ri ḓo thoma nga u haseledza nga ha tshifanyiso tsha nngu na mbudzi.

TSHIFANYISO TSHA NNGU NA MBUDZI

3. Yesu u ḓo haṱula lini vhathu?

³ Kha tshifanyiso tsha nngu na mbudzi, Yesu o amba uri musi a tshi haṱula vhathu, u ḓo sedza zwe vha zwi ita musi vha tshi pfa mafhungo maḓifha na u sedza arali vho tikedza vharathu vhawe vho ḓodzwaho. (Mat. 25:31-46) U ḓo haṱula nga tshifhinga tsha “maṱungu mahulu” musi nndwa ya Haramagedo i sa athu u thoma. (Mat. 24:21) Yesu u ḓo khethekanya vhane vha tikedza vhaḓodzwa na vhane vha si vha tikedze u fana na musi mulisa a tshi khethekanya nngu na mbudzi.

4. U ya nga Yesaya 11:3, 4, ndi ngani ri tshi nga vha na vhungoho ha uri Yesu u ḓo haṱula vhathu nga nḓila yo teaho? (Sedzani tshifanyiso.)

 ⁴ Bivhili i amba uri Yehova o vhea Yesu uri a vhe ene ane a haṱula nahone Yesu u ḓo haṱula nga nḓila yo teaho. (Vhalani Yesaya 11:3, 4.) Musi Yesu a tshi haṱula, u sedza nḓila ine vhathu vha ḓifara ngayo, zwine vha zwi humbula na zwine vha zwi amba. U sedza na uri vha fara hani vhaḓodzwa. (Mat. 12:36, 37; 25:40) Yesu u ḓo vha a tshi zwi ḓivha uri ndi vhafhio vhe vha tikedza vharathu vhawe vho ḓodzwaho na vhe vha tikedza mushumo we vha u ṋewa. a Iṅwe nḓila khulwane ine muthu a nga tikedza ngayo vharathu vha Kristo ndi nga u vha thusa kha mushumo wa u huwelela. Vhane vha tikedza vhaḓodzwa vha ḓo dzhiiwa sa “vho lugaho” nahone vha nga lavhelela u wana “vhutshilo vhu sa fheli” fhano kha ḽifhasi. (Mat. 25:46; Nzumb. 7:16, 17) Eneo ndi malamba avhuḓi! Arali vha dzula vha tshi fhulufhedzea tshifhingani tsha maṱungu mahulu na musi o no fhira, madzina avho a ḓo dzula e “buguni ya vhutshilo.”​—Nzumb. 20:15.

5. Ri guda mini kha tshifanyiso tsha nngu na mbudzi nahone ndi vhafhio vhane vha vhuyelwa ngatsho?

⁵ Sumbedzani uri ni a fhulufhedzea. Tshifanyiso tsha Yesu tsha nngu na mbudzi tshi shumesa kha vha re na fhulufhelo ḽa u tshila tshoṱhe kha ḽifhasi. Vha re na fhulufhelo ḽa u tshila tshoṱhe kha ḽifhasi vha sumbedza u vha na lutendo nga u thusa vharathu vha Yesu kha mushumo wa u huwelela na nga u tevhedza vhulivhisi hoṱhe vhune Yesu a ri ṋea a tshi shumisa mulanda a fhulufhedzeaho na wa vhuṱali. (Mat. 24:45) Na vha re na fhulufhelo ḽa u tshila tshoṱhe ṱaḓulu vha nga guda zwiṅwe zwithu kha tshenetshi tshifanyiso tsha nngu na mbudzi. Ndi ngani ri tshi ralo? Ndi ngauri Yesu u a sedza nḓila ine vha ḓifara ngayo, zwine vha zwi humbula na zwine vha zwi amba. Na vhone vha tea u sumbedza uri vha a fhulufhedzea. Zwavhuḓivhuḓi, Yesu o amba zwiṅwe zwifanyiso zwivhili zwine zwa sumbedza zwine vho ḓodzwaho vha tea u zwi ita. Zwenezwo zwifanyiso zwi wanala kha Mateo ndima ya 25. Zwino kha ri haseledze nga ha tshifanyiso tsha vhasidzana vho ṱalifhaho na vha matsilu.

TSHIFANYISO TSHA VHASIDZANA VHO ṰALIFHAHO NA VHA MATSILU

6. Vhasidzana vhaṱanu vho sumbedza hani uri vho ṱalifha? (Mateo 25:6-10)

⁶ Kha tshifanyiso tsha vhasidzana, Yesu o amba nga ha vhasidzana vha fumi vhe vha bva vha ya u ṱanganedza mukwasha. (Mat. 25:1-4) Vhoṱhe vho vha vha tshi ṱoḓa u fhelekedza mukwasha munyanyani wa mbingano. Yesu o amba uri vhaṱanu kha vhenevho vhasidzana vho vha vho “ṱalifha,” ngeno vhaṱanu vhe “matsilu.” Vhasidzana vho ṱalifhaho vho vha vho ḓilugiselela zwavhuḓi. Vho vha vho lugela u lindela mukwasha u vhuya u swika a tshi swika, naho a tshi nga swika vhukati ha vhusiku. Nga zwenezwo, vho vha vho ḓa na mbone dzavho uri vha dzi funge musi hu tshi vha na swiswi. Vho ita na u fara maṅwe mapfura u itela uri arali mukwasha a lenga, vha kone u a shela kha mbone dzavho. Nga nṱhani ha uri vho vha vho ḓilugiselela, mbone dzavho dzo vha dzi tshi ḓo bvela phanḓa dzi tshi khou duga. (Vhalani Mateo 25:6-10.) Musi mukwasha a tshi swika, o wana o lindelwa nga vhasidzana vhaṱanu vho ṱalifhaho nahone a dzhena navho munyanyani. Nga nḓila i fanaho, Vhakriste vho ḓodzwaho vhane vha dzula vho lugela na vhane vha dzula vha tshi fhulufhedzea vha ḓo lambedzwa nga Yesu ane a vha mukwasha.  U ḓo dzhena navho Muvhusoni wawe wa ṱaḓulu. b (Nzumb. 7:1-3) Hu ḓo itea mini kha vhasidzana vhaṱanu vha matsilu?

7. Ho itea mini kha vhasidzana vhaṱanu vha matsilu nahone ndi ngani?

⁷ Musi mukwasha a tshi swika, o wana vhasidzana vhaṱanu vha matsilu vha songo ḓilugisela. Mbone dzavho dzo vha dzi tsini na u dzima nahone vho vha vha songo ḓa na maṅwe mapfura ane vha nga a shumisa. Musi vha tshi pfa uri mukwasha u tsini na u swika, vho tou tea u ya u renga maṅwe mapfura. Mukwasha a mbo ḓi swika vha sa athu u vhuya. Musi mukwasha a tshi swika “vhasidzana vho ḓilugisaho vha dzhena nae munyanyani wa mbingano, vothi ḽa valiwa.” (Mat. 25:10) Nga murahu, musi vhasidzana vha matsilu vha tshi vhuya vha tshi ṱoḓa u dzhena, mukwasha a vha vhudza a ri: “A thi ni ḓivhi.” (Mat. 25:11, 12) Vhenevho vhasidzana vha matsilu vho vha vha songo ḓilugisela u lindela mukwasha naho a nga tou lenga lungafhani. Vhakriste vho ḓodzwaho vha guda mini kha tshenetsho tshifanyiso?

8-9. Vhaḓodzwa vha nga guda mini kha tshifanyiso tsha vhasidzana? (Sedzani tshifanyiso.)

⁸ Ni dzule no ḓilugiselela. Yesu o vha a sa khou amba uri hu ḓo vha na zwigwada zwivhili zwa vhaḓodzwa, tshiṅwe tshine tsha ḓo vha tsho ḓilugiselela na tshiṅwe tshine tsha ḓo vha tshi songo ḓilugiselela musi Yesu a tshi ḓa nga tshifhinga tsha maṱungu mahulu. Nṱhani hazwo, o vha a tshi khou ṱalutshedza zwine zwa nga itea kha vhaḓodzwa arali vha sa ḓilugiselela u konḓelela nga u fhulufhedzea u swika vhufheloni. Arali vha sa ḓilugiselela, a vha nga wani malamba. (Yoh. 14:3, 4) Enea ndi mafhungo ane ra tea u a dzhiela nṱha! Hu sa londwi uri ri na fhulufhelo ḽa u tshila tshoṱhe ṱaḓulu kana kha ḽifhasi, roṱhe ri tea u shumisa zwine ra zwi guda kha tshifanyiso tsha vhasidzana. Muṅwe na muṅwe washu u tea u dzula o fhaṱuwa nahone o ḓilugiselela u konḓelela u vhuya u swika vhufheloni.​—Mat. 24:13.

 ⁹ Musi Yesu o no amba nga ha tshifanyiso tsha vhasidzana hu u itela u sumbedza uri ri tea u dzula ro lugela, o dovha a amba nga ha tshifanyiso tsha talente. Tshenetsho tshifanyiso tshi sumbedza uri ri tea u vha vhashumi vha biko.

TSHIFANYISO TSHA DZITALENTE

10. Vhalanda vhavhili vho sumbedza hani uri vha a fhulufhedzea? (Mateo 25:19-23)

¹⁰ Kha tshifanyiso tsha dzitalente, Yesu o amba nga ha vhalanda vhavhili vhe vha fhulufhedzea kha muṋe wavho na muthihi we a si fhulufhedzee. (Mat. 25:14-18) Vhalanda vhavhili vho sumbedza uri vha a fhulufhedzea nga u shuma nga maanḓa uri vha engedze tshelede ya muṋe wavho. Musi muṋe wavho a sa athu u fara lwendo, o sia o vha ṋea talente dzine dza vha tshelede nnzhi. Vhalanda vhavhili vha fhulufhedzeaho vho shuma nga maanḓa, vha shumisa yeneyo tshelede nga vhuṱali. Ha itea mini? Musi muṋe wavho a tshi vhuya, o wana vho bindulisa tshelede ye a vha o vha ṋea yone. Muṋe wavho o vha khoḓa a ri ‘vha ḓe vha takale nae.’ (Vhalani Mateo 25:19-23.) Ho itea mini kha mulanda wa vhuraru? Ene o ita zwifhio nga tshelede ye muṋe wawe a sia o mu fha?

11. Ho itea mini kha mulanda a re “mubva” nahone ndi ngani?

¹¹ Mulanda wa vhuraru o vha o ṋewa talente nthihi, fhedzi o vha e “mubva.” Muṋe wawe o vha o lavhelela uri a shumise yeneyo talente nga vhuṱali. Nṱhani hazwo, ene a i gwela fhasi. Musi muṋe wawe a tshi vhuya, o wana onoyo mulanda a songo bindulisa talente yawe. Zwiṅwe hafhu, onoyo mulanda o vha a si na mavhonele avhuḓi. Nṱhani ha u humbela pfarelo kha muṋe wawe uri ho ngo bindulisa talente yawe, onoyo mulanda o amba uri muṋe wawe ndi “munna wa tshiṱuhu.” Zwenezwo a zwo ngo takadza muṋe wawe. Muṋe wawe o mbo ḓi mu dzhiela yeneyo talente a mu pandela.​—Mat. 25:24, 26-30.

12. Vhalanda vhavhili vha fhulufhedzeaho vha imela vhafhio ṋamusi?

¹² Vhalanda vhavhili vha fhulufhedzeaho vha imela Vhakriste vho ḓodzwaho vha fhulufhedzeaho. Muṋe wavho Yesu u vha ramba uri ‘vha ḓe vha takale nae.’ Vha ḓo wana  malamba avho a u tshila tshoṱhe ṱaḓulu musi hu tshi vha na mvuwo ya u thoma. (Mat. 25:21, 23; Nzumb. 20:5b) Fhedzi hu na zwiṅwe zwine vhaḓodzwa vha nga zwi guda kha mulanda a re mubva. Ndi zwifhio?

13-14. Vhaḓodzwa vha guda mini kha tshifanyiso tsha dzitalente? (Sedzani tshifanyiso.)

¹³ Ḓiimiseleni u vha mushumi wa biko. Na kha tshifanyiso tsha dzitalente, Yesu o vha a sa khou amba uri hu na vhaḓodzwa vhane vha ḓo vha vhabva. Nṱhani hazwo, o vha a tshi khou ṱalutshedza uri hu nga itea mini arali vhaḓodzwa vha litsha u fhisea. Vho vha vha tshi ḓo kundelwa u ita zwe vha “vhidzelwa na u nangelwa zwone” nahone vho vha vha sa ḓo tendelwa u dzhena Muvhusoni wa ṱaḓulu.​—2 Pet. 1:10.

¹⁴ Tshifanyiso tsha vhasidzana na tsha dzitalente zwi bvisela khagala uri Vhakriste vho ḓodzwaho vha tea u dzula vho ḓilugiselela na uri vha tea u vha vhashumi vha biko. Fhedzi, naa hu na zwiṅwe zwe Yesu a zwi amba zwine zwa nga tsivhudza vhaḓodzwa? Ee. Ri nga wana nḓila ye a vha tsivhudza ngayo kha Mateo 24:40, 41.

NDI VHAFHIO VHANE VHA ḒO “DZHIIWA”?

15-16. Mateo 24:40, 41 i thusa hani vhaḓodzwa u vhona uri vha tea u dzula vho fhaṱuwa?

¹⁵ Musi Yesu a sa athu u amba zwenezwo zwifanyiso zwiraru, o thoma nga u amba nga ha nḓila ine a ḓo haṱula ngayo vhaḓodzwa na uri zwi ḓo sumbedza hani uri ndi vhafhio vhane vha takalelwa. O amba nga ha vhanna vhavhili vhane vha khou shuma tsimuni na vhafumakadzi vhavhili vhane vha khou kuya. Vhenevho vhanna vha vhonala vha tshi khou ita mushumo u fanaho, na vhafumakadzi vha vhonala vha tshi khou ita mushumo u fanaho, fhedzi Yesu o ri “muṅwe u ḓo dzhiiwa, muṅwe a siiwa.” (Vhalani Mateo 24:40, 41.) Nga murahu a vhudza vhatevheli vhawe a ri: “Dzulani no fhaṱuwa, ngauri a ni ḓivhi ḓuvha ḽine Murena waṋu a ḓo ḓa ngaḽo.” (Mat. 24:42) Yesu o amba maipfi a fanaho na enea musi o no fhedza u amba nga ha tshifanyiso tsha vhasidzana. (Mat. 25:13) Naa zwe a zwi amba nga murahu ha zwenezwi zwifanyiso zwi a tshimbidzana? Zwi vhonala zwi tshi tshimbidzana. Vhaḓodzwa vha fhulufhedzeaho na vho ḓodzwaho zwa vhukuma ndi vhone fhedzi vhane vha ḓo “dzhiiwa” nga Yesu uri vha ye u dzhena Muvhusoni wa ṱaḓulu.​—Yoh. 14:3.

¹⁶ Dzulani no fhaṱuwa. Vhaḓodzwa vhoṱhe vhane vha si dzule vho fhaṱuwa a vha nga ḓo kuvhanganywa na vhaṅwe “vhanangiwa.” (Mat. 24:31) Na vha re na fhulufhelo ḽa u tshila tshoṱhe kha ḽifhasi vha tea u dzula vha tshi fhulufhedzea na u dzula vho fhaṱuwa.

17. Ndi ngani zwi sa tei u ri mangadza musi Yehova a tshi ḓodza vhaṅwe tshifhingani tshashu?

¹⁷ Ngauri Yehova ri a mu ḓivha zwavhuḓi, ri fhulufhela uri u ḓo haṱula nga nḓila yo teaho. Arali a khetha u ḓodza vhaṅwe tshifhingani tsha zwino, zwenezwo a zwo ngo tea u ri mangadza. c Ri nga humbula zwe Yesu a zwi amba nga ha vhashumi vhe vha ḓa u shuma nga awara ya vhu-11, kha tshifanyiso tsha tsimu ya minḓirivhe. (Mat. 20:1-16) Vhe vha ḓa u shuma tsimuni ḽi tshi vho kovhela, vho wana muholo u fanaho na wa vhe vha thoma u shuma nga matsheloni-tsheloni. Nga hu fanaho, hu sa londwi uri muthu o ḓodzwa lini, u ḓo wana malamba awe a u ya ṱaḓulu arali a dzula a tshi fhulufhedzea.

DZULANI NO LUGELA

18-19. Ro guda mini kha zwifanyiso zwa Yesu?

¹⁸ Ndi zwifhio zwe ra zwi haseledza? Vha re  na fhulufhelo ḽa u tshila tshoṱhe kha ḽifhasi vho guda kha tshifanyiso tsha nngu na mbudzi uri ndi zwa ndeme uri vha dzule vha tshi fhulufhedzea kha Yehova zwino, na tshifhingani tshi ḓaho nga maṱungu mahulu. Tshifhingani tshi ḓaho, Yesu u ḓo tendela vhane vha fhulufhedzea vha tshi wana “vhutshilo vhu sa fheli.”​—Mat. 25:46.

¹⁹ Ro dovha ra haseledza nga ha zwifanyiso zwivhili zwine zwa tsivhudza vhaḓodzwa. Kha tshifanyiso tsha Yesu tsha vhasidzana vho ṱalifhaho na vha matsilu, vhaṱanu vho sumbedza uri vho ṱalifha. Vho vha vho ḓilugiselela u lindela mukwasha hu sa londwi uri u lenga lungafhani. Fhedzi, vhasidzana vha matsilu vho vha vha songo ḓilugisela. Nga zwenezwo, mukwasha a hana vha tshi dzhena munyanyani. Na riṋe ri tea u dzula ro ḓilugisela u lindela Yesu a tshi fhelisa ḽino shango ḽivhi, hu sa londwi uri ri ḓo lindela tshifhinga tshingafhani. Tshiṅwe hafhu, kha tshifanyiso tsha Yesu tsha dzitalente, ro amba nga ha vhalanda vhavhili vha fhulufhedzeaho vhe vha vha vhe vhashumi vha biko. Vho shuma nga maanḓa vha tshi itela muṋe wavho nahone zwa ita uri a vha takalele. Fhedzi, mulanda a re mubva o pandelwa. Ri guda mini? Ri tea u dzula ro farakanea tshumeloni ya Yehova u vhuya u swika vhufheloni. Ro fhedzisela nga u haseledza nga ha uri vhaḓodzwa vha tea u dzula vho fhaṱuwa u itela uri vha kone u “dzhiiwa” nga Yesu uri vha wane malamba avho ṱaḓulu. Vho lavhelela nga maṱo matswuku u “kuvhanganywa” uri vha vhe na Yesu ṱaḓulu. Musi nndwa ya Haramagedo yo no fhela, vha ḓo vha muselwa wa Yesu kha munyanya wa Ngwana.​—2 Vhathes. 2:1; Nzumb. 19:9.

20. Ndi mini zwine Yehova a ḓo itela vhane vha thetshelesa musi a tshi vha tsivhudza?

²⁰ Tshifhinga tsha u haṱulwa tsho no vha tsini-tsini, fhedzi a ro ngo tea u ofha. Arali ra dzula ri tshi fhulufhedzea, Khotsi ashu wa ṱaḓulu u ḓo ri ṋea “maanḓa a songo ḓoweleaho” uri ri “kone u ima phanḓa ha Murwa muthu.” (2 Vhakor. 4:7; Luka 21:36) Hu sa londwi uri ri na fhulufhelo ḽa u tshila ṱaḓulu kana kha ḽifhasi, ri nga takadza Khotsi ashu arali ra dzula ro lugela samusi Yesu o ri tsivhudza kha zwifanyiso zwawe. Ngauri Yehova u na vhuthu vhuhulu, madzina ashu a ḓo dzula ‘o ṅwaliwa kha bugu ya vhutshilo.’​—Dan. 12:1; Nzumb. 3:5.