A hu na tshiitisi tsha u humbula uri, ngauri vhafunziwa vha 70 vho vha vha siho musi Yesu a tshi ita Tshilalelo tsha Murena, zwi amba uri vho vha vho mu ṱutshela kana uri o vha a songo vha ṱanganedza. Zwi vhonala uri Yesu o vha a tshi khou ṱoḓa u vha na vhaapostola vhawe fhedzi kha tshenetsho tshiitea.

Vha 12 na vha 70 vho vha vhe vhafunziwa vha Yesu vhoṱhe. Yesu o khetha vhanna vha 12 kha vhafunziwa vhawe nahone a vha vhidza uri ndi vhaapostola. (Luka 6:12-16) O vha e Galilea musi a tshi “kuvhanganya vhafunziwa vhawe vha 12” nahone a “vha ruma uri vha ye u huwelela nga ha Muvhuso wa Mudzimu na u fhodza.” (Luka 9:1-6) Nga murahu musi Yesu e ngei Yudea, o “nanga vhaṅwe vha 70, a vha ruma nga vhavhili nga vhavhili.” (Luka 9:51; 10:1) Nga zwenezwo, Yesu o vha e na vhafunziwa fhethu ho fhamba-fhambanaho vhe vha vha vha tshi huwelela nga hae.

Vhayuda vhe vha vha vhafunziwa vha Yesu vha nga vha vho vha vha tshi pembelela Paseka ṅwaha muṅwe na muṅwe vhe na miṱa yavho. (Ek. 12:6-11, 17-20) Musi Yesu a sa athu u fa, o ṱuwa na vhaapostola vhawe Yerusalema. Fhedzi ho ngo amba na vhafunziwa vhawe vhoṱhe vha bvaho Yudea, Galilea na Perea uri vha ḓe u pembelela Paseka nae. Zwi vhonala uri Yesu o vha a tshi khou ṱoḓa u vha na vhaapostola vhawe fhedzi kha tshenetshi tshiitea. O vha vhudza uri: “Ndi kale ndo lindela uri Paseka i swike, uri ndi i ḽe na inwi ndi sa athu u tambudzwa.”​—Luka 22:15.

Hu na tshiitisi tshi pfalaho tsha uri Yesu a ṱoḓe u vha na vhaapostola vhawe vha 12 fhedzi. O vha a tshi ḓo fa hu si kale sa “Ngwana ya Mudzimu ine ya fhelisa zwivhi zwa shango.” (Yoh. 1:29) O vha a tshi tea uri a fele Yerusalema ngauri ndi hone he vhathu vha vha vha tshi ṋekedza hone zwiṱhavhelo u bva kale. Ngwana ya Paseka yo vha i tshi vha humbudza uri Yehova o vha tshidza Egipita. Fhedzi tshiṱhavhelo tsha Yesu tsho vha tshi tshi ḓo ita zwi fhiraho zwenezwo. Tsho vha tshi tshi ḓo tshidza vhathu vhoṱhe kha tshivhi na lufu. (1 Vhakor. 5:7, 8) Nga nṱhani ha tshiṱhavhelo tsha Yesu, vhaapostola vha Yesu vha 12, vho vha mutheo wa tshivhidzo tsha Vhakriste. (Vhaef. 2:20-22) Muḓi mukhethwa wa Yerusalema u na “matombo a 12” a mutheo nahone “kha eneo matombo hu na madzina a vhaapostola vha Ngwana vha 12.” (Nzumb. 21:10-14) Nga zwenezwo, vhaapostola vha fhulufhedzeaho vho vha vha tshi ḓo shela mulenzhe kha uri hu itee zwine Mudzimu a zwi ṱoḓa. Zwi a pfesesea uri ndi ngani Yesu o ṱoḓa u ita Paseka ya u fhedzisela ye nga murahu ya vha Tshilalelo tsha Murena e na vhafunziwa vhawe vha 12 fhedzi.

Vhafunziwa vha Yesu vha 70 na vhaṅwe vhafunziwa vho vha vhe siho musi a tshi ita Tshilalelo. Naho zwo ralo, vhafunziwa vhawe vhoṱhe vha fhulufhedzeaho vho vha vha tshi ḓo vhuyelwa nga Tshilalelo tsha Murena. Vhafunziwa vha Yesu vhoṱhe vhe vha vha Vhakriste vho ḓodzwaho vho vha vha tshi ḓo vha tshipiḓa tsha mulanga wa muvhuso we Yesu a u amba na vhaapostola vhawe nga honoho vhusiku.​—Luka 22:29, 30.