Naa Mudzimu U A Ri Ṱhogomela?

NAA ni a ḓiwana ni tshi khou lwisana na u tsikeledzea ha maḓipfele nga ṅwambo wa vhuleme ha muṱa waṋu, ha mutakalo, ha mushumo kana vhuṅwe vhuḓifhinduleli vhuhulwane? Vhathu vhanzhi vha ḓipfa nga u ralo. Nahone ndi nnyi ane ṋamusi a si khou kwamea nga tshikhetho, vhutshinyi, na vhuvemu? Vhukuma, samusi Bivhili i tshi ri: “Zwivhumbwa zwoṱhe na zwino zwi tsha ḓi gomela-vho, zwi tsha ḓi songwa-songwa-vho.” (Vha-Roma 8:22) Zwo ḓowelea uri vhathu vhanzhi vha vhudzise uri: ‘Naa Mudzimu u a ṱhogomela? Naa u ḓo ri thusa?’

Khosi Salomo wa vhuṱali o rabela Mudzimu a ri: “Ane a ḓivha dzimbilu dza vhana vha vhathu ndi Iwe, a huna muṅwe.” Salomo o vha a tshi fulufhela Mudzimu uri ha ri ḓivhi fhedzi, fhedzi u dovha a ri ṱhogomela nga muthihi nga muthihi. O kona u humbela Mudzimu uri a ‘pfe e ṱaḓulu’ na uri a fhindule thabelo dza muthu muṅwe na muṅwe ane a ofha Mudzimu ane a Mu vhudza “dwadze ḽawe na vhuṱungu hawe.”—2 Koronika 6:29, 30.

Ṋamusi, Yehova Mudzimu u kha ḓi ri ṱhogomela na u ri ramba uri ri mu humbele nga thabelo. (Psalme ya 50:15) U fulufhedzisa u fhindula thabelo dzi bvaho mbiluni dzine dza tendelana na zwine a zwi funa. (Psalme ya 55:16, 22; Luka 11:5-13; 2 Vha-Korinta 4:7) Ee, Yehova u thetshelesa “thabelo na khumbelo dzoṱhe dzine dza ḓo ḓiswa hu tshi rabelelwa muthihi kana vhoṱhe vhathu [vhawe].” Zwiṅwe hafhu, arali ra fulufhela Mudzimu, u rabelela thuso yawe, na u sendela tsini nae, u ḓo ri ṱhogomela nga lufuno na u ri livhisa. (Mirero 3:5, 6) Yakobo muṅwali wa Bivhili u ri khwaṱhisedza uri: “Sendelani tsini ha Mudzimu, na ene a sendele tsini haṋu.”—Yakobo 4:8.