Mafulufhedziso Ane Na Nga A Fulufhela

MUPOROFITA wa Mudzimu Mixa o vha a tshi zwi ḓivha uri mafulufhedziso a nga kha ḓi sa fulufhelea misi yoṱhe. Misini yawe, na khonani dza tsini-tsini dzo vha dzi si nga si fulufhelwe misi yoṱhe u ita zwe dza zwi amba. Ngauralo Mixa o sevha a ri: “Ni songo tenda wa haṋu; ni songo fulufhedza khonani; U londote mulomo wau u na uyo ane wa lala wo mu kuvhatedza.”—Mixa 7:5.

Naa Mixa o tendela honoho vhuimo vhu ṱungufhadzaho vhu tshi ita uri a timatime mafulufhedziso oṱhe? Hai! O sumbedza fulufhelo ḽo khwaṱhaho kha mafulufhedziso o ambiwaho nga Mudzimu wawe, Yehova. Mixa o ṅwala a ri: “Avha nṋe ndi lavhelesa Yehova; ndi lindela Mudzimu wa u ntshidza.”—Mixa 7:7.

Ndi ngani Mixa o vha e na fulufhelo ḽo khwaṱhaho nga u ralo? Ngauri o vha a tshi zwi ḓivha uri Yehova u a ḓadzisa mafulufhedziso  awe misi yoṱhe. Zwoṱhe zwe Mudzimu a zwi anela vhomakhulukuku wa Mixa zwo ḓadzea zwoṱhe. (Mixa 7:20) U fulufhedzea ha Yehova tshifhingani tsho fhiraho zwo ṋea Mixa tshiitisi tsho khwaṱhaho tsha u tenda uri U ḓo ita zwe a Amba tshifhingani tshi ḓaho.

“A Huna Ḽe Ḽa Ṱahela”

Sa tsumbo, Mixa o vha a tshi zwi ḓivha uri Yehova o phulusa Vhaisiraele vhupulini ngei Egipita. (Mixa 7:15) Yoshua we a vhona honoho u phuluswa, o ṱuṱuwedza Vhaisiraele ngae uri vha vhe na lutendo kha mafulufhedziso oṱhe a Mudzimu. Nga zwiitisi zwifhio? Yoshua o vha humbudza a ri: “Inwi-ha ni elekanye nga mbilu yoṱhe na nga muya woṱhe zwe Yehova Mudzimu waṋu a ita a tshi vuledza oṱhe mafhungo avhuḓi e a ni amba ngao, ha ngo sia na ḽithihi, oṱhe o vulea; a huna ḽe ḽa ṱahela.”—Yoshua 23:14.

Vhaisiraele vho vha vha tshi zwi ḓivha zwavhuḓi uri Yehova o vha itela zwithu zwavhuḓi. O ḓadzisa mafulufhedziso awe e a fulufhedzisa makhulukuku wavho Abrahamu we a vha a tshi ofha Mudzimu uri vhana vhawe vha ḓo anda vhunga ṋaledzi na uri vha ḓo dzhia shango ḽa Kanana. Yehova o dovha a vhudza Abrahamu uri vhaḓuhulu vhawe vha ḓo ṱhuphiwa miṅwaha ya 400, fhedzi vha ḓo humela kha ḽa Kanana “murafhoni wa vhuṋa”. Zwenezwo zwoṱhe zwo bvelela nga u tou ralo.—Genesi 15:5-16; Ekisodo 3:6-8.

Vhaisiraele vho ṱanganedzwa zwavhuḓi kha ḽa Egipita misini ya Yosefa murwa wa Yakobo. Nga murahu Vhaegipita vha vha ita dziphuli, fhedzi u tendelana na mafulufhedziso a Mudzimu tshifhingani tsha murafho wa vhuṋa u bva tshee vha ya Egipita, vhenevha vhaḓuhulu vha Abrahamu vho vhofhololwa vhupulini ha Egipita. *

Nga murahu ha miṅwaha ya 40 ye ya tevhela, Vhaisiraele vho dovha vha vhona iṅwe khwaṱhisedzo i sumbedzaho uri Yehova u a ita zwe a zwi amba. Musi Vhaameleke vha tshi ṱoḓa u govhela Vhaisiraele, Mudzimu o lwela vhathu vhawe nahone a vha tsireledza. O fusha ṱhoḓea dzavho dzoṱhe miṅwahani ya 40 musi vhe sogani nahone a vha isa Shangoni ḽo Fulufhedziswaho. Musi Yoshua a tshi vusulusa ḓivhazwakale malugana na nḓila ye Yehova a shumisana ngayo na vhenevha vhaḓuhulu vha Abrahamu o vha a tshi nga amba o khwaṱha u ri: “A ho ngo sala na ḽithihi ḽa mafhungo oṱhe avhuḓi e Yehova a amba na vha lushaka lwa Isiraele, ḽe ḽi si vulee; oṱhe o bvelela a vha hone.”—Yoshua 21:45.

Ivhani Na Fulufhelo Kha Mafulufhedziso A Mudzimu

Ni nga vha hani na lutendo kha mafulufhedziso a Yehova u fana na Mixa na Yoshua? Hone-ha ni nga kona hani u fulufhela vhaṅwe? Ni lwela u vha ḓivha nga hune na nga kona ngaho. Sa tsumbo, ni nga guda uri vha fulufhedzea lungafhani nga u sedza uri naa vha a lwela u ḓadzisa mafulufhedziso avho naa. Musi nḓivho yaṋu nga ha vhenevho vhathu i tshi khou aluwa, ni thoma u vha fulufhela nga zwiṱuku nga zwiṱuku. Ni nga ita zwi fanaho musi zwi tshi ḓa kha u fhaṱa lutendo kha mafulufhedziso a Mudzimu.

Iṅwe nḓila ya u ita zwenezwi ndi nga u elekanya nga ha tsiko na milayo ine ya i langa. Vhorasaintsi vha vhea fulufhelo ḽavho kha yeneyi milayo, u fana na ine ya langa nḓila ine tsiki nthihi ya muthu ya fhandekana ngayo nahone  ya vha tsiki dza zwigidi zwa dzimilioni dzine dza vhumba muthu. Zwi re zwone ndi uri milayo ine ya langa maitele a zwithu na maanḓa a fhethu hoṱhe i nga vha yo itwa nga Muiti wa Milayo a fulufhedzeaho. Vhukuma ni nga fulufhela mafulufhedziso awe, samusi ni na fulufhelo kha milayo ine ya langa tsiko yawe.—Psalme ya 139:14-16; Yesaya 40:26; Vha-Heberu 3:4.

A tshi shumisa muporofita Yesaya, we a tshila misini ya Mixa, Yehova o shumisa khalaṅwaha dzine dza shanduka misi yoṱhe na mutengelele wa maḓi u itela u sumbedza u fulufhedzea ha ipfi ḽawe. Ṅwaha muṅwe na muṅwe mvula i a na. Ya ṋukadza mavu nahone zwenezwo zwa ita uri vhathu vha kone u zwala mbeu dzavho vha kone u kaṋa. Malugana na zwenezwi, Yehova o ri: “Vhunga mvula na ṅwando zwi tshi bva ṱaḓulu zwi si tsha humela hone, tshazwo ha vha u ṋukadza shango, u ḽi aṋwisa na u medza zwaḽo, ha ṋekedzwa mbeu muzwali, muḽi a wana vhuswa, na ipfi ḽanga ḽi bvaho mulomoni wanga ḽi ḓo nga zwenezwo; a ḽi nga vhuyi fhedzi ngeno hanga; tshaḽo, ḽi ḓo shuma zwi ntakadzaho, ḽi ḓo vuledza zwe nda ḽi rumela zwone.”—Yesaya 55:10, 11.

Mafulufhedziso O Khwaṱhaho A Paradiso

U Ṱolisisa tsiko zwi nga ita uri ri vhe na fulufhelo kha Musiki, fhedzi huna zwiṅwe zwo engedzeaho arali ri tshi ṱoḓa u guda nga ha mafulufhedziso ane a vha tshipiḓa tsha “ipfi ḽi bvaho mulomoni [wawe].” U itela u guda nga ha enea mafulufhedziso uri ni a fulufhele, ni fanela u ṱolisisa Maṅwalo o hevhedzwaho nga Mudzimu ane a amba nga ha ndivho dza Mudzimu nga ha ḽifhasi na nḓila ine a shumisana ngayo na vhathu.—2 Timotheo 3:14-17.

Muporofita Mixa o vha e na fulufhelo kha mafulufhedziso a Yehova. Ni na mafhungo o hevhedzwaho nga Mudzimu a fhiraho e Mixa a vha e nao. Musi ni tshi vhala Bivhili na u elekanya nga hayo, na inwi ni nga vha na lutendo kha u ḓadzea ha mafulufhedziso a Mudzimu. Enea mafulufhedziso ha kateli vhaḓuhulu vha Abrahamu vha ṋama fhedzi, fhedzi a dovha a katela na vhathu vhoṱhe. Yehova o fulufhedzisa onoyu musimulalushaka a ofhaho Mudzimu a ri: “Dzitshakha dzoṱhe ndi ḓo dzi fhaṱutshedza nga vhana vhau; zwi ḓo ralo nga u’ wa pfa ipfi ḽanga.” (Genesi 22:18) Tshipiḓa tsha ndeme tsha yeneyo “mbeu,” kana ṅwana wa Abrahamu ndi Messia, Yesu Kristo.—Vha-Galata 3:16.

A tshi shumisa Yesu Kristo, Yehova u ḓo ita vhungoho ha uri a fhaṱutshedze vhathu vha thetshelesaho. Nahone ndi mini zwe Mudzimu a fulufhedzisa uri u ḓo zwi ita misini yashu? Mixa 4:1, 2 i a fhindula kha haya maipfi a vhuporofita: “Nga maḓuvha a u ḓo ḓa thavha ya nnḓu ya Yehova i ḓo ima ya fhira dzithavha, ya vha ṱaḓulu ha mivhundu, dzitshakha dza ḓo dubekana dzi tshi ya hone. Dzitshakha nzhi dzi ḓo ya dzi tshi ri: Nḓarieni, ri gonye, ri ye thavhani ya Yehova, ri ye nḓuni ya Mudzimu wa Yakobo, a ri funze nḓila dzawe, ri fare gondo ḽawe.”

Vhane vha guda nga ha nḓila dza Yehova “mafumo avho vha ḓo a fululula vha ita malembe, dzinthi vha ita khwea.” Nḓowelo naho dzi dzifhio dzine dza tshimbidzana na nndwa dzi ḓo vha dzi si tsheeho. Hu si kale shango ḽi ḓo vha ḽo ḓala vhathu vho lugaho, nahone a huna ane a ḓo vha shushedza. (Mixa 4:3, 4) Ee, Ipfi ḽa Mudzimu ḽi fulufhedzisa uri nga fhasi ha vhuvhusi ha Muvhuso wa Yesu Kristo, Yehova u ḓo fhelisa shango ḽa vha tsikeledzi.—Yesaya 11:6-9; Daniele 2:44; Ndzumbululo 11:18.

Na vhe vha shengela na u vhulahwa nga ṅwambo wa u vutshela ha vhathu Mudzimu vha ḓo vuswa vhe na tshilavhelelwa tsha u tshila nga hu sa fheli kha ḽifhasi. (Yohane 5:28, 29) Sathane na madimoni awe, vhathomi vha vhuvhi, vha ḓo vha vha si tsheeho, nahone mvelelo dza tshivhi tsha Adamu dzi ḓo vha dzo fheliswa nga tshiṱhavhelo tshi rengululaho tsha Yesu. (Mateo  20:28; Vha-Roma 3:23, 24; 5:12; 6:23; Ndzumbululo 20:1-3) Nahone vhathu vha thetshelesaho vha ḓo vha vhe kha vhuimo-ḓe? Vhukuma vha ḓo fhaṱutshedzwa nga vhutshilo vhu sa fheli paradisoni yo fhelelaho kha ḽifhasi!—Psalme ya 37:10, 11; Luka 23:43; Ndzumbululo 21:3-5.

Ndi mafulufhedziso a takadzaho lungafhani! Fhedzi naa ni nga tenda khao? Vhukuma ni nga tenda khao. Haya a si mafulufhedziso a vhathu vhane vha nga vha vhe na zwiitisi zwo khwaṱhaho, fhedzi vha kundelwa u a ḓadzisa. Ndi mafulufhedziso a Mudzimu Ramaanḓaoṱhe, ane a sa zwifhe na a sa “ongolosi u ita tshe a amba.” (2 Petro 3:9; Vha-Heberu 6:13-18) Ni nga vha na fulufhelo ḽo khwaṱhaho kha mafulufhedziso oṱhe ane a wanala Bivhilini, ngauri Tshisima tshao ndi “Yehova Mudzimu wa mafhungo-ngoho.”—Psalme ya 31:5.

[Ṱhaluso i re magumoni a siaṱari]

[Maipfi o ṱumbulwaho kha siaṱari 6]

“Zwe Yehova Mudzimu waṋu a ita a tshi vuledza oṱhe Mafhungo avhuḓi e a ni amba ngao’; ha ngo sia na ḽithihi.”—YOSHUA 23:14

[Zwifanyiso kha siaṱari 4, 5]

Yehova o ita zwe a fulufhedzisa Vhaisiraele Lwanzheni Lutswuku na sogani

[Zwifanyiso kha siaṱari 7]

Yehova o ita zwe a fulufhedzisa Abrahamu. Mbeu Yawe, Yesu Kristo, i ḓo ḓisa phaṱutshedzo kha vhathu