Mbudziso Dzi Bvaho Ha Vhavhali

Ndi zwifhio zwiimo zwe zwa ita uri Yuda a ṱangane nga dzimbeu na musadzi we a vha a tshi khou humbula uri ndi phombwe, samusi zwo sumbedzwa kha Genesi 38:15, 16?

Naho Yuda o ṱangana nga dzimbeu na musadzi we a vha a tshi khou humbula uri ndi phombwe, zwi re zwone ndi uri o vha e si phombwe. U ya nga Genesi ndima ya 38, hezwi ndi zwe zwa itea.

Musi murwa wa Yuda wa tanzhe a sa athu vha na vhana na musadzi wawe, Thamara, o mbo ḓi vhulahwa ngauri o vha “e muthu muvhi” phanḓa ha Yehova. (Genesi 38:7) Nga tshenetsho tshifhinga, mukhuvha wa uri murathu a vhinge musadzi wa mukomana wawe o faho wo vha u tshi kha ḓi tevhedzwa. Hezwi zwo vha zwi tshi amba uri musi munna a tshi fa a si na muḽaifa, murathu wawe o vha a tshi tea u bebela yeneyo tshilikadzi muḽaifa. Fhedzi murwa wa Yuda wa vhuvhili, Onana, a hana u ḓadzisa honoho vhuḓifhinduleli. Ngauralo a fa nge a haṱulwa nga Mudzimu. Nga zwenezwo Yuda a rumela mazwale wawe Thamara hayani ha khotsi-awe u swikela Sela murwa wa Yuda wa vhuraru a tshi aluwa u itela uri a kone u mu vhinga. Naho zwo ralo, musi miṅwaha i tshi kho ḓi ṱanḓulukana, Yuda a kundelwa u ṋea Sela uri a vhingane na Thamara. Ngauralo musi musadzi wa Yuda a tshi fa, Thamara a humbula u vhamba maano uri a wane muḽaifa nga Yuda, Mu-Isiraele we a vha e mazwale wawe. Zwenezwo o zwi ita nga u ḓiita phombwe nahone a dzula nḓilani he a vha a tshi ḓivha uri Yuda u ḓo fhira henefho.

A sa zwi ḓivhi uri ndi Thamara, Yuda a ṱangana nae nga dzimbeu. U itela u wana malamba awe, a humbela uri a fhiwe tshiṅwe tshithu u itela u ḓitsireledza ngatsho khae, nahone tshenetsho tshithu a fheleledza o tshi shumisa u itela u sumbedza uri ndi ene o itaho uri a vhifhe muvhilini. Musi mafhungo a tshi dzumbululwa, Yuda ho ngo mu vhona mulandu fhedzi o amba nga u ḓiṱukufhadza a ri: “O mphira nga zwivhuya; ngauri o itiswa nga u’ ndi si mu ṋee murwa wanga Sela.” Nahone zwo tea, “ho ngo tsha dovha a mu ḓivha.”—Genesi 38:26.

Yuda o vha o khakha ngauri ho ngo ṋea Thamara murwa wawe Sela samusi o fulufhedzisa. O dovha a ṱangana nga dzimbeu na muthu we a vha a tshi khou humbula uri ndi phombwe. Zwenezwi zwo vha zwo fhambana na ndivho ya Mudzimu, ya uri munna u fanela u ṱangana nga dzimbeu na muthu we a vhingana nae. (Genesi 2:24) Ngoho ndi ya uri Yuda ho ngo ṱangana nga dzimbeu na phombwe. Nṱhani hazwo, o dzhia vhuḓifhinduleli ha murwa wawe Sela ha u vhinga musadzi wa mukomana nahone a mu bebela ṅwana nga lwa mulayo.

Hone-ha, Thamara ho ngo ita vhupombwe. Mafhaṱa awe ho ngo dzhiiwa sa vhana vha phombwe. Musi Boasi wa Betlehema a tshi vhinga Ruthe wa Mu-Moaba u ya nga mukhuvha wa uri musi mukomana o fa murathu u a vhinga musadzi wawe, vhahulwane vha Betlehema vho amba zwavhuḓi nga ha Peretse murwa wa Thamara, vha tshi amba na Boasi vha ri: “Nnḓu yau i nge ya Peretse, we Thamara a mu bebela Yuda, nga vhana vhane Yehova a ḓo U ṋea nga hoyu musadzi.” (Ruthe 4:12) Peretse o dovha a vhaliwa kha mutevhe wa vhomakhulukuku vha Yesu Kristo.—Mateo 1:1-3; Luka 3:23-33.