Ṋeani Mudzimu Vhugala Hu Si Vhathu

MIṄWEDZINI ya zwenezwino, vhafuni vha zwivhuya shangoni ḽoṱhe vho guda nḓila ine vha nga ṋea ngayo Mudzimu vhugala musi vho kuvhangana Mabuthanoni a Tshiṱiriki a “Ṋeani Mudzimu Vhugala” a Ṱhanzi dza Yehova. Kha ri vusuluse mbekanyamushumo ya pfunzo yo ṋekedzwaho henefho.

Mbekanyamushumo yo thewaho Bivhilini yo fhedza maḓuvha mararu a tshi khou tou tevhekana kha vhathu vhanzhi vhe vha vha vhe mabuthanoni na maḓuvha maṋa kha havho vho konaho u ya mabuthanoni o khetheaho a tshakha dzoṱhe. Kha oṱhe, vhe vha vha vhe hone vho pfa zwipiḓa zwi bvaho Maṅwaloni zwi fhiraho 30, u katela na nyambo dze dza ita uri vha livhuhe zwithu zwa muya, zwe zwa ṱanganwa nazwo zwe zwa khwaṱhisa lutendo lwavho, misumbedzo ye ya ombedzela u shumiswa ha maitele a Bivhili, na ḽitambwa ḽe ḽa sumbedza vhuleme he Vhakriste vha ḓana ḽa u thoma vha ṱangana naho. Arali no ya kha ḽiṅwe ḽa mabuthano, ndi ngani ni sa vusulusi notsi dzaṋu musi ni tshi khou vhala yeneyi thero? Ri na vhungoho ha uri zwi ḓo ni humbudza nga zwiḽiwa zwinzhi zwa muya.

Tshiṱoho Tsha Ḓuvha ḽa U Thoma: ‘Yehova Wo Fanelwa Nga U Ṋewa Vhugala’

Nga murahu ha luimbo lwa u vula na thabelo, tshiambi tsha u thoma tsho ṱanganedza nga lufuno vhoṱhe vhe vha vha vhe hone nga nyambo ye ya livhisa ṱhogomelo kha tshiitisi tshihulwane tsha buthano: “Ro Kuvhangana U Itela U Ṋea Mudzimu Vhugala.” Tshi tshi redza Ndzumbululo 4:11, tshiambi tsho ombedzela tshiṱoho tsha buthano nga u angaredza. Tsho ṱavhanya tsha ṱalutshedza zwine u ṋea Mudzimu vhugala zwa amba zwone. Tshi tshi shumisa bugu ya Dzipsalme, tsho ombedzela uri u ṋea Mudzimu vhugala zwi katela u ‘gwadamela,’ “u livhuha,” na “u renda.”—Psalme ya 95:6; 100:4, 5; 111:1, 2.

Nyambo ya vhuvhili yo vha i na tshiṱoho tshine tsha ri “Mashudu Vhane Vha Ṋea Mudzimu Vhugala.” Tshiambi tsho dovha tsha ṱhogomela zwiṅwe zwithu zwi takadzaho. Samusi hu na Ṱhanzi dza Yehova dzi fhiraho milioni dza rathi mashangoni a 234, hu nga ambiwa uri hu na vhane vha ṋea Yehova vhugala vhusiku na masiari. (Ndzumbululo 7:15) U vhudziswa ha vhahashu vha tshinnani na vha tshisadzini vha Vhakriste vha re kha dziṅwe tshumelo dza tshifhinga tshoṱhe ḽo vha sia ḽe ḽa livhuhiwa ḽa tshenetshi tshipiḓa tshe tsha ṱuṱuwedza vhathetshelesi.

Nyambo ye ya tevhela yo vha i na tshiṱoho tshine tsha ri “Tsiko I Ḓivhadza Vhugala Ha Mudzimu.” Naho a sa ambi, maṱaḓulu a renda vhuhulwane ha Mudzimu na u ri thusa u khwaṱhisa u livhuha u ṱhogomela hawe nga lufuno. Zwenezwi zwo ṱalutshedzwa zwavhuḓi nga vhuḓalo.—Yesaya 40:26.

U tovholwa, u pikiswa, ṱhuṱhuwedzo dza  shango, na nḓowelo mmbi zwi linga u fulufhedzea ha Vhakriste vha ngoho. Nga zwenezwo, nyambo ine ya ri “Tshimbilani Nḓilani Ya U Fulufhedzea” yo kokodza ṱhogomelo ya vhathetshelesi. Tshiambi tsho haseledza ndimana nga ndimana dza Psalme ya vhu-26 na u vhudzisa Ṱhanzi ine ya dzhena tshikolo ye ya tikedza yo khwaṱha vhuḓifari havhuḓi na vhaṅwe vhe vha fhedza tshifhinga tshilapfu vhukuma vhe kha u ḓimvumvusa hu timatimisaho fhedzi vha dzhia vhukando u itela u kunda honoho vhuleme.

Nyambo yo khetheaho ine ya ri, “Mabono A Vhugala A Vhuporofita A A Ri Ṱuṱuwedza!” yo vha yone ya u fhedza kha mbekanyamushumo ya nga matsheloni. Tshiambi tsho redza tsumbo dza muporofita Daniele na dza vhaapostola Yohane na Petro vhe lutendo lwavho lwa vusuluswa nga mabono a vhugala a vhuporofita a tshimbidzanaho na u tikwa na u shuma ha Muvhuso wa Mudzimu wa Vhumessia. Tshi tshi amba nga vhathu vhane vha nga vha vho hangwa vhuṱanzi vhu pfalaho ha uri ri tshifhingani tsha vhufhelo, tshiambi tsho ri: “Ri fulufhela nga mbilu yoṱhe uri vhenevho vhathu vha ḓo dovha vha livhisa ṱhogomelo kha mafhungo a uri ngangoho Kristo u hone vhugalani ha Muvhuso nahone vha thuswa uri vha khwaṱhe muyani.”

Mbekanyamushumo ya nga masiari yo thoma nga nyambo ye ya vha i na tshiṱoho tshine tsha ri “Yehova U Dzumbulula Vhugala Hawe Kha Vha Ḓiṱukufhadzaho.” Tshiambi tsho sumbedza nḓila ye Yehova a ri vhetshela ngayo tsumbo kha u ḓiṱukufhadza, naho e Muthu muhulwanesa fhethu hoṱhe. (Psalme ya 18:35) Yehova u takalela vhane vha ḓiṱukufhadza zwa vhukuma, fhedzi u lwa na vhane vha vhonala vha tshi ḓiṱukufhadza musi vha tshi khou shumisana na thangana dzavho kana vha re vhahulwane khavho, fhedzi vha tshi shumisana luvhi na vhane vha vha nga fhasi havho.—Psalme ya 138:6.

Ha tevhela vhuporofita ha Bivhili ho haseledzwaho kha nyambo ya mutevheṱhaḓu ye ya amba nga masia o fhambanaho a tshiṱoho tsha ndeme tshine tsha ri: “Vhuporofita Ha Amosi—Mulaedza Waho Misini Yashu.” Tshi tshi amba nga tsumbo ya Amosi, tshiambi tsha u thoma tsho livhisa ṱhogomelo kha vhuḓifhinduleli vhune ra vha naho ha u sevha vhathu nga ha khaṱulo ya Yehova ine ya khou ḓa. Tshiṱoho tsha nyambo yawe tsho vha tshi tshi ri “Ḓivhadzani Ipfi Ḽa Mudzimu Nga Tshivhindi.” Tshiambi tsha vhuvhili tsho vhudzisa mbudziso ine ya ri: “Naa Yehova u ḓo vhuya a fhelisa vhuvhi na tshengelo kha ḽino ḽifhasi?” Kha tshiṱoho tshawe tsho no ri, “Khaṱulo Ya Mudzimu Kha Vhavhi,”o sumbedza uri khaṱulo ya Mudzimu i vha yo tea misi yoṱhe, a huna ane a nga i ponyoka, a i ḓeli muṅwe na muṅwe. Tshiambi tsha u fhedza kha nyambo ya mutevheṱhaḓu tsho livhisa ṱhogomelo kha tshiṱoho tshine tsha ri “Yehova U Ṱolisisa Mbilu.” Vhoṱhe vhane vha ṱulutshelwa u takadza Yehova vha ḓo thetshelesa maipfi a Amosi 5:15 ane a ri: “Vhéngani vhuvhi, ni fune zwivhuya.”

Zwikambi, zwi ngaho veine ine ya takadza mbilu, zwi nga shumiswa luvhi. Kha nyambo yatsho ine ya ri, “Iledzani Tshikwekwe Tsha U Nwesa Halwa,” tshiambi tsho amba nga khombo dzine dza nga vha hone muvhilini na kha vhumuya nga ṅwambo wa u shumisa zwikambi nga u sa linganyisela, naho muthu a songo kambiwa. Tsho ṋea maitele a livhisaho: Samusi halwa vhu tshi fara vhathu nga nḓila dzo fhamba-fhambanaho, ni ḓo vha no nwesa arali musi ni tshi fhedza u nwa na vho kundwa “u ṱalukanya na u elekanya.”—Mirero 3:21, 22.

Samusi ri tshi khou tshila zwifhingani zwi konḓaho, nyambo ye ya tevhela yo vha i tshi ri, “Yehova, ‘Dzhavhelo Ḽashu Musi Wa khombo,’” yo khuthadza vhathetshelesi. Thabelo, muyamukhethwa, na Vhakriste zwi nga ri thusa uri ri sedzane nazwo.

Nyambo ya u fhedza kha ḽeneḽo ḓuvha yo vha i tshi ri, “‘Shango Ḽavhuḓi’—Musumbedzo Wa Zwine Paradiso Ya Ḓo Vha I Zwone,” yo phetha nga tshithu tshi mangadzaho kha vhoṱhe—khandiso ntswa ine ya vha na mapa minzhi ya Bivhilini! I na tshiṱoho tshine tsha ri See the Good Land.

Tshiṱoho Tsha Ḓuvha ḽa Vhuvhili: ‘Ḓivhadzani Vhugala Hawe Kha Dzitshaka’

Nga murahu ha u ṱolisisa ndimana ya ḓuvha ḽiṅwe na ḽiṅwe, ho mbo ḓi vha na nyambo ya mutevheṱhaḓu wa vhuvhili wa buthano, we wa vha u na tshiṱoho tshine tsha ri ‘Vhonetshelani Vhugala Ha Yehova Sa Zwivhoni.’ Nyambo ya u thoma yo amba nga “U Phaḓaladza Mafhungo Maḓifha Huṅwe Na Huṅwe” nahone yo katela misumbedzo ya zwe zwa ṱanganwa nazwo zwa vhukuma tshumeloni ya tsimu. Nyambo ya vhuvhili yo katela musumbedzo wa lwendo lwa u vhuyelela musi tshiambi tshi tshi khou ṋekedza tshiṱoho tshine tsha ri “Fukulani Lupila  Kha Vho Swingiswaho.” Nyambo ya u fhedza kha mutevheṱhaḓu, yo vha i na tshiṱoho tshine tsha ri “Nga U Zwi Ita Nga Vhuḓalo Vhuḓinḓa Hashu,” yo khwaṱhiswa nga mbudziso dzi nyanyulaho dzi katelaho zwe zwa ṱanganwa nazwo tsimuni.

Tshiṅwe tshipiḓa tshi tevhelaho tsha mbekanyamushumo tsho vha tshi na tshiṱoho tshine tsha ri “U Vhengwa Hu Si Na Tshiitisi.” Yo vha i tshi katela khaseledzo i ṱuṱuwedzaho na vhathu vha fulufhedzeaho vhe vha dzula vha tshi fulufhedzea nga ṅwambo wa maanḓa a Mudzimu nga fhasi ha u tovholwa.

Tshiitea tshihulwane tshe tsha vha tsho lavhelelwa ndi nyambo ya ndovhedzo ye ya tevhelwa nga u lovhedzwa nga u mbwandamedza tshoṱhe ha vhoṱhe vhane vha fanelea. Ndovhedzo ya maḓini i sumbedza u ḓiṋekedza tshoṱhe ha muthu kha Yehova. Nga zwenezwo, tshiṱoho tsho vha tsho tea vhukuma: “U Tshila U Tendelana Na U Ḓiṋekedza Hashu Zwi Ṋea Mudzimu Vhugala.”

 Mbekanyamushumo ya nga masiari yo thoma nga nyambo ye ya ṱuṱuwedza u ḓiṱolisisa, “U Ṱahulela Mavhonele A Ngaho A Kristo Malugana Na Vhuimo Ha Nṱha.” Tshiambi tsho amba heyi mbuno i takadzaho: Vhuimo ha nṱha vhu bveledzwa nga u edzisa mavhonele a Kristo a u ḓiṱukufhadza. Nga zwenezwo, Mukriste ho ngo fanela u ṱoḓa vhuḓifhinduleli u itela u fusha vhuhovheleli hawe. U fanela u ḓivhudzisa, ‘Naa ndo ḓiimisela u ita mishumo i vhuyedzaho ine ya sa ḓo ṱhogomelwa nga hu leluwaho?’

Naa no no vhuya na ḓipfa no neta? Vhukuma, muṅwe na muṅwe u a neta. Nyambo ine ya ri “Ri Songo Kulea Nungo Naho Ro Neta” yo takalelwa nga vhoṱhe. Khaseledzo na Ṱhanzi dzo no fhedzaho tshifhinga tshilapfu yo sumbedza uri Yehova a nga ri ‘khwaṱhisa nga muya wawe.’—Vha-Efesa 3:16.

U vha na mafunda ndi pfaneleo ine ra bebwa ri si nayo, fhedzi yeneyo pfaneleo i fanela u gudwa. Yeneyi mbuno ya ndeme yo ombedzelwa kha nyambo ine ya ri ‘Kha Ri Vhe Vhakovhi, Vha U Ita Vhushaka Na Vhaṅwe.’ Nahone yeneyi mbudziso ine ya ṱoḓa uri hu humbulwe yo vhudziswa: “Naa ro ḓiimisela u shumisa miṅwe mimunithi ine ra vha nayo nga ḓuvha na vhahashu vha tshinnani na vha tshisadzini vho no vhaho vhalala, vhane vha khou lwala, vho tsikeledzeaho maḓipfele, kana vhane vha vha na vhumvumvu?”

Nyambo ine ya ri “Ṱhogomelani ‘Ipfi ḽa Mutsinda’” yo kokodza ṱhogomelo ya vhathetshelesi. Yeneyi nyambo yo vhambedza vhafunziwa vha Yesu na nngu dzine dza thetshelesa ipfi ḽawe samusi e “mulisa wa ndele” na vhane vha si thetshelese “ipfi ḽa mutsinda” ḽine ḽa ambiwa nga zwisima zwa vhathu zwi ṱuṱuwedzwaho nga Diabolo.—Yohane 10:5, 14, 27.

Khwairi i tea u imba nga vhuthihi u itela uri vhathetshelesi vha kone u pfesesa maipfi. U itela u ṋea Mudzimu vhugala, vhagwadameli vha ngoho shangoni ḽoṱhe vha fanela u vha na vhuthihi. Nga zwenezwo, nyambo ine ya ri “Ṋeani Mudzimu Vhugala ‘Nga Mulomo Muthihi’” yo ṋea nyeletshedzo i vhuyedzaho nga ha nḓila ine roṱhe ra nga amba ngayo “luambo lwo kunaho” luthihi na u shumela Yehova nga ‘vhuthihi.’—Tsefanya 3:9.

Vhabebi, zwihuluhulu havho vha re na vhana vhaṱuku, vho takadzwa vhukuma nga nyambo ya u fhedza ya ḽeneḽo ḓuvha ine ya ri, “Vhana Vhashu—Ifa Ḽa Ndeme.” Khandiso ntswa i re na masiaṱari a 256 yo bviswa, nahone zwa takadza vhathetshelesi. Bugu ine ya pfi Gudani Kha Mufunzi Muhulu i ḓo shumiswa nga vhabebi u fhedza tshifhinga tshi vhuyedzaho na vhana vhavho, vhane vha vha tshifhiwa tsha Mudzimu khavho.

Tshiṱoho Tsha Ḓuvha Ḽa Vhuraru: ‘Zwoṱhe Ni Zwi Ite Lune Mudzimu A Ḓo Ṋewa Vhugala’

Ho thomiwa nga khumbudzo dza ndimana ya ḓuvha ḽiṅwe na ḽiṅwe kha ḓuvha ḽa u fhedza ḽa buthano nga ha mafhungo a muya. Tshipiḓa tsha u thoma tsha yeneyi mbekanyamushumo tsho livhisa ṱhogomelo yo engedzeaho kha ndugiselelo dza miṱa. Nyambo ya u thoma ine ya ri, “Vhabebi, Fhaṱani Miṱa Ya Vhoiwe,” yo ita uri vhathetshelesi vha ḓilugiselele. Nga murahu tsho no vusulusa vhuḓifhinduleli  ha vhabebi ha u ṱhogomela ṱhoḓea dza zwithu zwi vhonalaho dza muṱa wavho, tshiambi tsho zwi sumbedza uri vhuḓifhinduleli vhuhulwane ha vhabebi ndi u ṱhogomela ṱhoḓea dza muya dza vhana vhavho.

Tshiambi tshi tevhelaho tsho amba na vhana na u ṱolisisa tshiṱoho tshine tsha ri “Nḓila Ine Vhaswa Vha Khou Renda Ngayo Yehova.” Tsho amba uri vhaswa vha fana na “ṅwando” ngauri ndi vhanzhi na uri u fhisea havho hu a homolosa. Vhaaluwa vha takalela u shuma navho tshumeloni ya Yehova. (Psalme ya 110:3) Yeneyi nyambo yo katela khaseledzo i takadzaho na vhaswa vha re tsumbo dzavhuḓi.

Matambwa a Bivhili ndi zwiitea zwi takadzaho mabuthanoni a tshiṱiriki, nahone ḽo vha ḽi hone kha ḽeneḽi buthano. Ḽitambwa ḽine ḽa ri “U Huwelela Nga Tshivhindi Hu Sa Londwi U Tovholwa” ḽo ṱalutshedza nga vhatevheli vha Yesu vha ḓana ḽa u thoma. Ḽo vha ḽi si khou mvumvusa fhedzi, fhedzi zwa ndeme vhukuma ḽo vha ḽi tshi khou funza. Nyambo ye ya tevhela ḽitambwa yo vha i tshi ri, “Ḓivhadzani Mafhungo Maḓifha ‘Ni Sa Neti’” yo ombedzela mbuno dza ndeme dza ḽitambwa.

Vhoṱhe vhe vha vha vhe hone vho vha vho lavhelela manweledzo a mbekanyamushumo ya Swondaha, a nyambo ya khagala ine ya ri, “Ndi Vhafhio Vhane Vha Khou Ṋea Mudzimu Vhugala Ṋamusi?” Tshiambi tsho ṋea vhuṱanzi vhunzhi nga ha nḓila ine masia a saintsi na a vhurereli nga u angaredza a si ṋee Mudzimu vhugala. Ndi vhathu vha dzina ḽawe fhedzi, vhane vha huwelela na u funza mafhungo-ngoho nga ha Yehova, vhane vha khou ṋea dzina ḽawe vhugala ṋamusi.

Nyambo ya khagala yo tevhelwa nga manweledzo a pfunzo ya magazini wa Tshiingamo tsha yeneyo vhege. Nga murahu ha tevhela nyambo ya u fhedza ine ya ri, “ ‘Dzulani Ni Tshi Aṋwa Mitshelo Minzhi’ U Itela U Ṋea Yehova Vhugala.” Tshiambi tsho ṋekedza mbuno dza fumi dza fhungo ḽikumedzwa kha vhoṱhe vhe vha vha vhe hone uri vha ḽi ṱanganedze. Ḽo amba nga nḓila dzo fhambanaho dzine vhugala ha nga ṋekedzwa ngayo Yehova, Musiki. U tenda nga “Ee” ho pfala mabuthanoni oṱhe shangoni ḽoṱhe.

Nga zwenezwo buthano ḽo phetha nga tshiṱoho tshine tsha ri “Ṋeani Mudzimu Vhugala” tshe muṅwe na muṅwe we a vha e hone a livhisa ṱhogomelo khatsho. Nahone nga thuso ya muya wa Yehova na tshipiḓa tsha ndangulo yawe i vhonalaho, u nga ri misi yoṱhe ri nga ṱoḓa u ṋea Mudzimu vhugala hu si vhathu.

[Bogisi/Zwifanyiso kha siaṱari 23]

Mabuthano A Tshakha Dzoṱhe

Mabuthano a tshaka dzoṱhe a maḓuvha maṋa o vha hone Asia, Australia, Yuropa, na Devhula na Tshipembe Amerika. Ṱhanzi dzi bvaho shangoni ḽoṱhe dzo rambiwa uri dzi vhe vhaimeleli kha enea maguvhangano. Nga yeneyi nḓila ho vha hu na u “ṱuṱuwedzana” vhukati ha vhaeni na vhe vha vha ṱanganedza. (Vha-Roma 1:12) Vhukonani ha kale ho vusuluswa, nahone ha dovha ha itwa na vhuṅwe. Tshiitea tsho khetheaho tsha mabuthano a tshaka dzoṱhe ho vha hu tshipiḓa tsha mbekanyamushumo tshe tsha vha tshi na tshipiḓa tshine tsha ri “Mivhigo I Bvaho Kha Maṅwe Mashango.”

[Bogisi/Zwifanyiso kha siaṱari 25]

Khandiso Ntswa Dzine Dza Ṋea Mudzimu Vhugala

Ho bviswa khandiso ntswa mbili kha Mabuthano a Tshiṱiriki a “Ṋeani Mudzimu Vhugala.” Atilasi ya Bivhili ine ya pfi See the Good Land i na gwati ḽo khwaṱhaho nahone masiaṱari a 36 a na mimapa na zwifanyiso zwa fhethu ha Bivhilini. Siaṱari ḽiṅwe na ḽiṅwe ḽi na mivhala nahone hu na mimapa ya mivhuso ya Siria, Babele, Meda na Peresia, Gerika, na Roma. Hu na mimapa i re thungo ine ya katela vhuḓinḓa ha Yesu na nyengedzeo ya Vhukriste.

Bugu ine ya pfi Gudani Kha Mufunzi Muhulu i na masiaṱari a 256 na zwifanyiso zwi ṱoḓaho u vha 230. Hu nga fhedzwa tshifhinga tshinzhi tshi takadzaho ho dzulwa na vhana hu tshi khou sokou sedzwa zwifanyiso na u fhindula mbudziso dzine dza ṱoḓa uri hu humbulwe dzine dza wanala kha yeneyo bugu. Yeneyi bugu yo itelwa u lwisana na u vutshela ha Sathane kha vhaswa, hune ha vha na tshipikwa tsha u tshinya vhuḓifari havho.

[Tshifanyiso kha siaṱari 23]

Vharumiwa vho anetshela zwe zwa ṱanganwa nazwo zwi khwaṱhisaho lutendo

[Zwifanyiso kha siaṱari 24]

Ndovhedzo yo vha i tshiitea tsha ndeme tsha mabuthano a “Ṋeani Mudzimu Vhugala”

[Zwifanyiso kha siaṱari 24]

Matambwa a bvaho Bivhilini o takadza vhaṱuku na vhahulwane