Ndi Mafulufhedziso A Nnyi Ane Na Nga A Fulufhela?

BUGU ine ya pfi King Henry ya Vhumalo yo ṅwalwaho nga William Shakespeare yo ri: “Mafulufhedziso awe o vha a tshi vhonala e a vhukuma samusi o vha e na maanḓa, fhedzi o kundelwa u a ḓadzisa sa vhunga na zwino a si tsheeho.”

Mafulufhedziso a maanḓa e Shakespeare a vha a tshi khou amba nga hao o vha e a mukhadinala wa Muisimane ane a pfi Thomas Wolsey, we a vha e na maanḓa mahulu siani ḽa zwa politiki ngei England ḓanani ḽa Vhu-16 ḽa miṅwaha. Vhaṅwe vha nga kha ḓi amba uri zwe Shakespeare a zwi amba malugana na mafulufhedziso zwi a fana musi zwi tshi ḓa kha mafulufhedziso ane vha a pfa ṋamusi. Tshifhinga tshinzhi, vhathu vha a fulufhedziswa zwithu zwinzhi, fhedzi vhunzhi hazwo zwi sa ḓadzee. Nga zwenezwo, zwi a leluwa u pfesesa uri ndi ngani vha tshi timatima mafulufhedziso naho e afhio.

U Sa Ḓadzea Ha Mafulufhedziso Zwo Ḓowelea

Sa tsumbo, tshifhingani tsha khakhathi dzi shavhisaho ngei mashangoni a Balkan nga vho-1990, dzangano ḽa United Nation Security Council ḽo ḓivhadza uri ḓorobo dza Bosnia ngei Srebrenica dzi ḓo vha “fhethu ho tsireledzeaho.” Zwenezwo zwo vhonala zwi khwaṱhisedzo i fulufhedzeaho i bvaho kha miraḓo ya United Nation. Tshavhi dza Vhamuslim dza zwigidi dza ngei Srebrenica na dzone dzo humbula nga u ralo. Naho zwo ralo, mafheleloni mafulufhedziso a u tsireledzea ho ngo tsha amba tshithu. (Psalme ya 146:3) Nga July 1995, mmbi dzi vutshelaho dzo kunda mmbi dza Yuno nahone dza tshoṱela yeneyo ḓorobo. Vhamuslim vha fhiraho 6000 vha ngalangala, nahone vhadzulapo vha Vhamuslim vha ṱoḓaho u vha 1200 vha vhulahwa.

Kha masia oṱhe, vhutshilo ho ḓala mafulufhedziso a sa ḓadziswi. Vhathu vha pfa vho fhurwa nga “khunguwedzo dza vhufhura na dza mazwifhi” dzine dza vha tsikeledza vhukuma ṋamusi. Vha nyabiswa nga “mafulo a vhorapolitiki vhanzhi o ḓalaho mafulufhedziso a sa ḓadziswi.” (The New Encyclopædia Britannica, Volumu 15, siaṱari 37) Vharangaphanḓa vha vhurereli vha fulufhelwaho vhukuma vhane vha fulufhedzisa u ṱhogomela masambi avho vha a fara luvhi nga nḓila i nengisaho vhukuma. Na kha masia a zwa pfunzo na ngalafho—ane khao ha vha hu tshi fanela u vha na u pfela vhuṱungu na u humbulela vhaṅwe—vhaṅwe vho ita uri vha sa tsha fulufhelwa, nahone vha ita na u vhulaha vhe vha vha vha tshi fanela u vha ṱhogomela. Ndi ngazwo  Bivhili i tshi ri sevha uri ri sa tende zwoṱhe zwine zwa ambiwa nga vhathu!—Mirero 14:15.

Mafulufhedziso Ane A Ḓadziswa

Vhukuma, vhathu vhanzhi vha a ḓadzisa mafulufhedziso avho, tshiṅwe tshifhinga nga murahu ha u ita vhuḓidini vhuhulwane vhukuma u itela u a ḓadzisa. (Psalme ya 15:4) Zwine vha zwi amba ndi khwaṱhisedzo yo khwaṱhaho vhukuma, nahone vha a zwi ita. Vhaṅwe vha ṱoḓa u ita zwe vha zwi fulufhedzisa vhe na zwiitisi zwavhuḓi vhukuma. Vhaṅwe vha a ṱoḓa nga u ḓifunela u ita zwe vha zwi fulufhedzisa, fhedzi vha kundelwa u ita zwe vha amba. Zwiimo zwi nga kha ḓi khakhisa nzudzanyo dza-vho dzo lugiselelwaho zwavhuḓi.—Muhuweleli 9:11.

Hu sa londwi tshiitisi, zwi re zwone ndi zwa uri vhathu vhanzhi vha a konḓelwa u fulufhela mafulufhedziso a naho e nnyi. Ngauralo mbudziso yo salaho ndi ya uri: Na huna maṅwe mafulufhedziso ane ra nga a fulufhela? Ee. Ri nga fulufhela mafulufhedziso ane a wanala Ipfini ḽa Mudzimu, Bivhili. Ndi ngani ni sa ṱolisisi thero i tevhelaho malugana na enea mafhungo? Ni nga phetha nga uri ri nga fulufhela mafulufhedziso a Mudzimu samusi vha dzimilioni vho no ita nga u ralo.

[Ṱhaluso ya Vhubvo ha Tshifanyiso kha siaṱari 3]

AP Photo/Amel Emric