Vhuhulwane Ha Yehova A Huna A Vhu Ṱalukanyaho
Vhuhulwane Ha Yehova A Huna A Vhu Ṱalukanyaho
“Muhulu-hulu, Mu-rendwa-hoṱhe ndi Iwe Yehova; vhuhulwane hau a huna a vhu ṱalukanyaho.”—PSALME YA 145:3.
1, 2. Davida o vha e muthu-ḓe, nahone o vha a tshi ḓi dzhia hani phanḓa ha Mudzimu?
MUṄWALI wa Psalme ya 145 ndi muṅwe wa vhanna vha ḓivheaho vhukuma kha ḓivhazwakale. Musi a tshi kha ḓi vha mutukana, o lwa na muswonḓa we a vha o ḓiṱama nahone a mu vhulaha. Nahone musi e khosi ya mudziammbi, onoyo mupsalme o kunda maswina manzhi. Dzina ḽawe o vha a tshi pfi Davida, nahone o vha e khosi ya vhuvhili kha ḽa Isiraele ḽa kale. Bvumo ḽa Davida ḽi kha ḓi vha hone na musi o no fa, ndi ngazwo vhathu vhanzhi vha tshi ḓivha zwiṅwe zwithu nga hae.
2 Hu sa londwi zwe Davida a zwi swikelela, o vha a tshi ḓiṱukufhadza. O imba nga ha Yehova a ri: “Ndi tshi vhona ḽiṱaḓulu ḽau, mishumo ya minwe yau, na dziṋaledzi dze wa dzi vhea, Ndi ri: Muthu u tou vha mini U tshi mu elelwa? Na ṅwana wa muthu u tou vha mini U tshi mu tonda?” (Psalme ya 8:3, 4) Nṱhani ha u humbula uri ene muṋe o vha e muhulwane, Davida o amba uri o tshidzwa nga Yehova kha maswina awe oṱhe nahone o amba na Mudzimu a ri: “U mpfarisa tshiṱangu tshau tshi tshidzaho; U nkhulisa nga vhulenda hau.” (2 Samuele 22:1, 2, 36) Yehova u sumbedza vhulenda nga u khathutshela vhaitazwivhi, nahone Davida o livhuha tshilidzi tsha Mudzimu tshi songo ri fanelaho.
‘Ndi Khoḓa Mudzimu Khosi’
3. (a) Davida o vha e na mavhonele afhio nga vhuvhusi ha Isiraele? (b) Davida o vha e na lutamo lwa u renda Yehova u swika kha vhuimo vhufhio?
3 Naho Davida o vha e khosi yo vhewaho nga Mudzimu, o dzhia Yehova e Khosi ya vhukuma ya Isiraele. Davida o ri: “Yehova, u Muvhusi, U ṱhóho i re ṱaḓulu ha zwithu zwoṱhe.” (1 Koronika 29:11) Nahone Davida o vha a tshi dzhiela nṱha vhukuma Mudzimu samusi e Muvhusi! O imba a ri: “Ndi khoḓa Mudzimu wanga, Iwe U re Khosi; ndi renda dzina ḽau lini na lini lu sa gumi. Misi yoṱhe ndi renda Iwe, Ndi hulisa dzina ḽau lini na lini lu sa gumi.” (Psalme ya 145:1, 2) Lwo vha lu lutamo lwa Davida lwa u renda Yehova Mudzimu ḓuvha ḽoṱhe na nga hu sa fheli.
4. Psalme ya 145 i bvukulula u pomoka hufhio ha mazwifhi?
4 Psalme ya 145 ndi phindulo i re na maanḓa kha u pomoka ha Sathane ha uri Mudzimu ndi muvhusi a re na tseḓa ane a sa ṋee zwivhumbwa zwawe mbofholowo. (Genesi 3:1-5) Yeneyi Psalme yo dovha ya dzumbulula mazwifhi a Sathane a uri vhane vha thetshelesa Mudzimu vha ita nga u ralo nga ṅwambo wa zwine vha nga zwi wana, hu si ngauri vha funa Mudzimu. (Yobo 1:9-11; 2:4, 5) U fana na Davida, Vhakriste vha ngoho ṋamusi vha khou fhindula u pomoka ha Diabolo ha mazwifhi. Vha dzhiela nṱha fulufhelo ḽavho ḽa vhutshilo vhu sa fheli nga fhasi ha vhuvhusi ha Muvhuso nga ṅwambo wa uri vha ṱoḓa u renda Yehova nga hu sa fheli. Vha dzimilioni vho no thoma u ita nga u ralo nga u vha na lutendo kha tshiṱhavhelo tsha Yesu tshi rengululaho na u shumela Yehova nga u ḓiṱukufhadza nga lufuno samusi vhe vhagwadameli vhawe vho ḓiṋekedzaho na vho lovhedzwaho.—Vha-Roma 5:8; 1 Yohane 5:3.
5, 6. Ndi zwibuli zwifhio zwine zwa vha hone zwa u renda Yehova?
5 Humbulani nga zwibuli zwinzhi zwine ra vha nazwo zwa u renda Yehova samusi ri vhashumeli vhawe. Ri nga ita nga u ralo nga thabelo musi ro kwamiwa vhukuma nga zwiṅwe zwithu zwine ra zwi vhala Ipfini ḽawe, Bivhili. Ri nga sumbedza u renda na u livhuha musi ro kwamiwa nga nḓila ine Mudzimu a shumisana ngayo na vhathu vhawe kana musi ro nyanyulwa nga ḽiṅwe sia ḽa tsiko yawe i mangadzaho. Ri dovha ra renda Yehova Mudzimu musi ri tshi haseledza ndivho dzawe na vhatendi nga riṋe miṱanganoni ya Vhukriste kana ri tshi khou amba nga tshashu. Zwi re zwone ndi uri “mishumo mivhuya” yoṱhe ine ya itelwa madzangalelo a Muvhuso wa Mudzimu i ḓisela Yehova thendo.—Mateo 5:16, NW.
6 Tsumbo dza zwenezwino dza yeneyo mishumo mivhuya dzi katela u fhaṱwa ha fhethu hunzhi ha vhurabeli ha vhathu vha Yehova kha mashango o tshinyadzwaho nga vhushai. Vhunzhi ha yeneyo mishumo yo itwa nga thikhedzo ya masheleni ya vhatendi nga riṋe vha kha maṅwe mashango. Vhaṅwe Vhakriste vho thusa nga u ya henefho fhethu nga u ḓifunela u itela u shela mulenzhe kha u fhaṱwa ha Holo dza Muvhuso. Nahone mushumo wa ndeme vhukuma kha yoṱhe ndi u renda Yehova nga u huwelela mafhungo maḓifha a Muvhuso wawe. (Mateo 24:14) Samusi ndimana dza u fhedzisa kha Psalme ya 145 dzi tshi sumbedza, Davida o dzhiela nṱha vhuvhusi ha Mudzimu na u renda vhuhosi Hawe. (Psalme ya 145:11, 12) Naa na inwi ni a dzhiela nṱha nga hu fanaho nḓila ya lufuno ine Mudzimu a vhusa ngayo? Naa ni a amba na vhaṅwe nga ha Muvhuso wawe?
Tsumbo Dza Vhuhulwane Ha Mudzimu
7. Ṋeani tshiitisi tshihulwane tsha u renda Yehova.
7 Psalme ya 145:3 i ṋea tshiitisi tshihulwane tsha u renda Yehova. Davida o imba a ri: “Muhulu-hulu, Mu-rendwa-hoṱhe ndi Iwe Yehova; vhuhulwane hau a huna a vhu ṱalukanyaho.” Vhuhulwane ha Yehova a vhu na mikano. Vhu nga si ṱalukanywe nga vhuḓalo, u pfeseswa, kana u elwa nga vhathu. Fhedzi zwino ri nga vhuyelwa zwa vhukuma nga u ṱhogomela tsumbo dza vhuhulwane ha Yehova vhu sa ṱalukanyei.
8. Fhethu hoṱhe hu dzumbulula mini nga vhuhulwane na maanḓa zwa Yehova?
8 Lingedzani u humbula nga tshifhinga tsha musi ni kule ha mavhone o vhonetshelaho a ḓoroboni nahone no sedza lutomboni hu vhusiku hu si na makole. Naa a no ngo mangadzwa nga ṋaledzi nnzhi dzine dza vhonala hu na swiswi? Naa a no ngo sudzuluselwa u renda Yehova nga ṅwambo wa vhuhulwane hawe ha u sika zwenezwo zwithu zwoṱhe zwa ṱaḓulu? Naho zwo ralo, zwe na zwi vhona zwo vha zwi zwiṱuku musi zwi tshi vhambedzwa na tshivhalo tsha ṋaledzi dzi re kha mulalavhungu hune ḽifhasi ḽa vha tshipiḓa tshawo. Zwiṅwe hafhu, hu anganyelwa uri kha milalavhungu i fhiraho zwigidi zwa ḓana zwa dzimilioni, miraru fhedzi i nga vhoniwa hu sa shumiswi tshivhonakule. I ngoho, ṋaledzi nnzhi na milalavhungu zwine zwa vha tshipiḓa tsha fhethu hoṱhe ndi vhuṱanzi ha tsiko ya maanḓa a Yehova a u sika na vhuhulwane vhu sa ṱalukanyei.—Yesaya 40:26.
9, 10. (a) Ndi masia afhio a vhuhulwane ha Yehova e a sumbedzwa malugana na Yesu Kristo? (b) Mvuwo ya Yesu i fanela u kwama hani lutendo lwashu?
9 Ṱhogomelani maṅwe masia a vhuhulwane ha Yehova—ane a katela Yesu Kristo. Vhuhulwane ha Mudzimu ho sumbedzwa musi a tshi sika Murwa wawe na u mu shumisa tshifhinga tshilapfu vhukuma e “muḓinḓa” Wawe. (Mirero 8:22-31) Vhuhulwane ha lufuno lwa Yehova ho vhonala musi a tshi ṋekedza Murwa wawe mubebwa-eṱhe uri a vhe tshiṱhavhelo tshi rengululaho tsha vhathu. (Mateo 20:28; Yohane 3:16; 1 Yohane 2:1, 2) Nahone zwine muthu a si zwi pfesese ndi muvhili wa muya u mangadzaho na une u sa fe we Yehova a u itela Yesu kha mvuwo yawe.—1 Petro 3:18.
10 Mvuwo ya Yesu i katela masia manzhi a swayeaho a vhuhulwane ha Yehova vhu sa ṱalukanyei. A zwi timatimisi uri Mudzimu o vusulusa muhumbulo wa Yesu malugana na mushumo u katelwaho kha tsiko ya zwithu zwi vhonalaho na zwi sa vhonali. (Vha-Kolosa 1:15, 16) Zwenezwi zwithu zwi katela na zwivhumbwa zwa muya, fhethu hoṱhe, ḽifhasi, na mifuda yoṱhe ya zwithu zwi tshilaho kha ḽifhasi ḽashu. Nga nnḓa ha u vusulusa nḓivho ya Murwa wawe ya ḓivhazwakale yo fhelelaho ya vhutshilo ha ṱaḓulu na kha ḽifhasi ho vhonwaho nga Murwa tshifhingani tsha musi a sa athu vha muthu, Yehova o engedza kha zwe Yesu a ṱangana nazwo musi e muthu o fhelelaho. Ee, vhuhulwane ha Yehova vhu sa ṱalukanyei vhu vhonala kha mvuwo ya Yesu. Zwiṅwe hafhu, wonoyo mushumo muhulwane ndi khwaṱhisedzo ya uri zwi a konadzea uri vhaṅwe vha vuswe. I fanela u khwaṱhisa lutendo lwashu uri Mudzimu a nga vusa vhafu vha dzimilioni vha re muhumbuloni wawe wo fhelelaho.—Yohane 5:28, 29; Mishumo 17:31.
Mishumo I Mangadzaho Na Nyito Khulwane
11. Ndi mushumo ifhio muhulwane wa Yehova wo thomaho nga Pentekoste ya 33 C.E.?
11 U bva tshee Yesu a vuswa, Yehova o ita miṅwe mishumo minzhi mihulwane na i mangadzaho. (Psalme ya 40:5, vhambedzani NW.) Nga Pentekoste ya 33 C.E., Yehova o bveledza luṅwe lushaka luswa, “Isiraele wa Mudzimu,” lwo vhumbwaho nga vhafunziwa vha Kristo vhe vha vha vho ḓodzwa nga muyamukhethwa. (Vha-Galata 6:16) Nga nḓila khulwane, lwonolu lushaka luswa lwa muya lwo engedzea u bva kha shango ḽa tshenetsho tshifhinga. Hu sa londwi vhugunei he ha bveledza ḽa Vhudzhagane nga murahu ha lufu lwa vhaapostola vha Yesu, Yehova o bvela phanḓa a tshi ita mishumo i mangadzaho u itela u ḓadzisa ndivho yawe.
12. Mbuno ya uri Bivhili i vhe hone nga nyambo dzoṱhe khulwane kha ḽifhasi i sumbedza mini?
12 Sa tsumbo, Bivhili yo fhelelaho yo vhulungwa nahone mafheleloni ya ṱalutshedzelwa nga nyambo khulwane dza kha ḽifhasi ṋamusi. Bivhili yo vha i tshi anzela u ṱalutshedzelwa nga fhasi ha zwiimo zwi konḓaho na nga fhasi ha khombo ya u vhulahwa nga vhaimeleli vha Sathane. Vhukuma, u ṱalutshedzelwa ha Bivhili nga nyambo dzi fhiraho 2 000 ho vha hu tshi ḓo vha hu songo khunyeledzwa arali hu vhe hu songo vha zwine Mudzimu muhulwane a zwi funa, Yehova a sa ṱalukanyei!
13. U bva nga 1914, vhuhulwane ha Yehova ho sumbedzwa hani malugana na ndivho dzawe dza Muvhuso?
13 Vhuhulwane ha Yehova ho sumbedzwa malugana na ndivho dzawe dza Muvhuso. Sa tsumbo, nga ṅwaha wa 1914, o vhea Murwa wawe, Yesu Kristo, uri a vhe Khosi ya ṱaḓulu. Nga murahunyana, Yesu a dzhiela vhukando Sathane na madimoni awe. Vho pandelwa ṱaḓulu nahone vha vhetshelwa mikano kha ḽifhasi, hune zwino vho lindela u kudzwa mugodini. (Ndzumbululo 12:9-12; 20:1-3) U bva tsheetsho, vhatevheli vha Yesu vho ḓodzwaho vho ṱangana na u tovholwa huhulwane. Naho zwo ralo, Yehova u a vha tikedza tshifhingani tshenetshi tsha u vha hone ha Kristo hu sa vhonali.—Mateo 24:3; Ndzumbululo 12:17.
14. Ndi mushumo ufhio u mangadzaho we Yehova a u ita nga 1919, nahone zwenezwo zwo khunyeledza mini?
14 Nga ṅwaha wa 1919, Yehova o dovha a ita muṅwe mushumo u mangadzaho u sumbedzaho vhuhulwane hawe. Vhatevheli vha Yesu vho ḓodzwaho, vhe vha vha vho fhola muyani, vho dovha vha ṋewa maanḓa. (Ndzumbululo 11:3-11) Miṅwahani ya u bva nga tshenetsho tshifhinga, vhaḓodzwa vho huwelela nga u fhisea mafhungo maḓifha a Muvhuso wa ṱaḓulu wo tikwaho. Vhaṅwe vhaḓodzwa vho kuvhanganywa u itela u ḓadzisa tshivhalo tsha vha 144 000. (Ndzumbululo 14:1-3) Nahone musi a tshi shumisa vhatevheli vha Kristo vho ḓodzwaho, Yehova o thoma “ḽifhasi ḽiswa,” ḽa vhathu vho lugaho. (Ndzumbululo 21:1) Fhedzi hu ḓo itea mini kha “ḽifhasi ḽiswa” nga murahu ha musi vhaḓodzwa vhoṱhe vha fulufhedzeaho vho no ya ṱaḓulu?
15. Ndi ufhio mushumo we wa vha wo rangwa phanḓa nga Vhakriste vho ḓodzwaho, nahone ha vha na mvelelo dzifhio?
15 Kha khandiso ya ḽa 1 August na ya ḽa 15 August 1935 dza wonoyu magazini, ho vha hu na thero dza ndeme dzi ambaho nga “gogo ḽihulu,” ḽo bulwaho kha Ndzumbululo ndima 7. Vhakriste vho ḓodzwaho vho thoma u ṱoḓa nga u fhisea na u ramba vhenevha vhagwadameli ngavho vha bvaho kha tshaka dzoṱhe, murafho, vhathu, na ndimi dzoṱhe uri vha ṱanganele navho. Ḽeneḽi “gogo ḽihulu” ḽi ḓo ponyoka ‘maṱungu mahulu’ ane a khou ḓa, vhe na tshilavhelelwa tsha vhutshilo vhu sa fheli kha ḽifhasi ḽa Paradiso nahone vha vha miraḓo ya “ḽifhasi ḽiswa.” (Ndzumbululo 7:9-14) Nga ṅwambo wa mushumo wa u huwelela nga ha Muvhuso na u ita vhafunziwa, wo rangwaho phanḓa nga Vhakriste vho ḓodzwaho, zwino vhathu vha fhiraho milioni dza rathi vha na fulufhelo ḽa vhutshilo vhu sa fheli kha ḽifhasi ḽa paradiso. Ndi nnyi ane a fanela u rendwa kha yeneyo nyengedzeo ye ya vha hone hu sa londwi u tovholwa hu bvaho kha Sathane na shango ḽawe ḽo tshinyalaho? (1 Yohane 5:19) Ndi Yehova fhedzi we a khunyeledza zwenezwo zwoṱhe, a tshi shumisa muya wawe mukhethwa.—Yesaya 60:22; Sakaria 4:6.
Madzanga Mahulu A Yehova Na Vhurena
16. Ndi ngani vhathu vha sa koni u vhona ‘madzanga mahulu a vhurena ha Yehova’?
16 Hu sa londwi vhuvha hayo, “mishumo mihulu” na “maḓembe” a Yehova zwi nga si ḓo vhuya zwa hangwiwa. Davida o ṅwala a ri: “Mirafho na mirafho i renda zwe wa ita, vha hanelana mishumo mihulu yau. Madzanga mahulu a vhurena hau, na phungo dza maḓembe e wa ita, ndi zwiné nṋe nda zwi imba. Vha bula maanḓa au na mishumo yau i ofhisaho, nṋe nda vha wa u amba mishumo mihulu yau.” (Psalme ya 145:4-6) Naho zwo ralo, Davida o vha a tshi ḓivha zwingafhani nga ha madzanga mahulu a Yehova, samusi “Mudzimu e muya” nahone a sa vhonwi nga maṱo a vhathu?—Yohane 1:18; 4:24.
17, 18. U dzhiela nṱha ha Davida ‘madzanga mahulu a vhurena ha Yehova’ ho engedzea hani?
17 Naho o vha a sa koni u vhona Mudzimu, ho vha hu na nḓila dza u engedza u dzhiela nṱha ha Davida vhurena ha Yehova. Sa tsumbo, o vha a tshi nga vhala mafhungo a Maṅwalo a mishumo mihulwane ya Mudzimu, i fanaho na u lozwiwa ha shango ḽivhi nga maḓi mahulu a shango ḽoṱhe. Zwi vhonala uri Davida o guda kha nḓila ye midzimu ya mazwifhi ya Egipita ya shoniswa ngayo musi Mudzimu a tshi vhofholola Vhaisiraele vhupulini ha Egipita. Zwenezwo zwiitea zwi khwaṱhisedza vhurena na vhuhulwane ha Yehova.
18 A zwi timatimisi u dzhiela nṱha ha Davida vhurena ha Mudzimu ho engedzea hu si nga u vhala Maṅwalo fhedzi, fhedzi na nga u elekanya ngao. Sa tsumbo, a nga vha o elekanya nga zwe zwa bvelela musi Yehova a tshi ṋea Isiraele Mulayo. Ho vha hu na mibvumo, dzinḓadzi, gole ḽihulu, na ipfi ḽa maanḓa mahulu ḽa lufhala-fhala. Thavha ya Sinai yo dzinginyea na u duba vhutsi. Musi vho kuvhangana nga fhasi ha thavha, Vhaisiraele vho pfa “milayo ya fumi” ye ya vha i tshi khou bva vhukati ha mulilo na gole musi Yehova a tshi khou amba navho a tshi khou shumisa muambeli wawe wa muruṅwa. (Doiteronomio 4:32-36; 5:22-24; 10:4; Ekisodo 19:16-20; Mishumo 7:38, 53) Yeneyo yo vha i misumbedzo ya Yehova mihulwane lungafhani! Vhafuni vha Ipfi ḽa Mudzimu vhane vha elekanya nga enea mafhungo vha fanela u sudzuluswa nga ‘madzanga mahulu a vhurena ha Yehova.’ I ngoho, ṋamusi ri na Bivhili yo fhelelaho, ine ya vha na mabono a vhugala o fhambanaho ane a ri kwama nga vhuhulwane ha Yehova.—Hesekiele 1:26-28; Daniele 7:9, 10; Ndzumbululo, ndima 4.
19. Ndi mini zwine zwa ḓo engedza u dzhiela hashu nṱha vhurena ha Yehova?
19 Iṅwe nḓila ye ya ita uri Davida a kwamee nga vhurena ha Mudzimu yo vha i u guda milayo ye Mudzimu a i ṋea Vhaisiraele. (Doiteronomio 17:18-20; Psalme ya 19:7-11) U thetshelesa milayo ya Yehova zwo hulisa lushaka lwa Vhaisiraele na u khethwa kha vhaṅwe vhathu vhoṱhe. (Doiteronomio 4:6-8) Samusi zwo vha zwo ralo nga Davida, u vhala Maṅwalo tshifhinga tshoṱhe, u elekanya ngao nga ho dzikaho, na u a guda nga vhuronwane zwi ḓo engedza u dzhiela hashu nṱha vhurena ha Yehova.
Pfaneleo Dza Mudzimu Dza Vhuḓifari Dzi Hulisa Vhurena Hawe
20, 21. (a) Psalme ya 145:7-9 i hulisa vhuhulwane ha Yehova malugana na pfaneleo dzifhio? (b) Pfaneleo dza Mudzimu dzo bulwaho hafha dzi kwama hani vhane vha mu funa?
20 Samusi ro zwi ṱhogomela, ndimana dza rathi dza u thoma dza Psalme 145 dzi ri ṋea zwiitisi zwi pfalaho zwa u renda Yehova kha zwithu zwi tshimbidzanaho na vhuhulwane hawe vhu sa ṱalukanyei. Ndimana 7 u ya kha ya 9 dzi hulisa vhuhulwane ha Mudzimu nga u amba nga pfaneleo dzawe. Davida o imba: “Vha pfadza mafhungo a vhulenda hau vhuhulu, vha takalela u lulamisa hau. Yehova ndi wa khathutshelo na tshilidzi, ha fheli mbilu, na vhuthu hawe ndi vhuhulu. Yehova vhoṱhe u vha ita nga vhuthu, a khathutshela zwivhumbwa zwawe zwoṱhe.”
21 Davida hafha o thoma nga u ombedzela vhulenda na u lulamisa ha Yehova—pfaneleo dze dza timatimiwa nga Sathane Diabolo. Dzenedzi pfaneleo dzi kwama hani vhoṱhe vhane vha funa Mudzimu na u ḓiṱukufhadzela vhuvhusi hawe? Vhukuma, vhulenda ha Yehova na nḓila yawe yo lulamaho ya u vhusa i ḓisa dakalo kha vhagwadameli vhawe vhane vha si litshe u takalela vhugala hawe. Zwiṅwe hafhu, vhulenda ha Yehova ndi ha “vhoṱhe.” Ri fulufhela uri zwenezwi zwi ḓo thusa vhathu vhanzhi uri vha rembuluwe nahone vha vhe vhagwadameli vha Mudzimu wa ngoho hu tshee na tshifhinga.—Mishumo 14:15-17.
22. Yehova u fara hani vhashumeli vhawe?
22 Davida o dovha a dzhiela nṱha pfaneleo dze Mudzimu ene muṋe a dzi ombedzela musi A tshi “fhira henefho phanḓa [ha Mushe], a vhidzelela a ri: Yehova, Yehova! Mudzimu wa khathutshelo na wa vhuthu, wa u sa fhela mbilu, wa vhuhwavho vhuhulu na u fulufhedzea.” (Ekisodo 34:6) Nga zwenezwo, Davida o vha a tshi nga amba zwo tea u ri: “Yehova ndi wa khathutshelo na tshilidzi, ha fheli mbilu, na vhuthu hawe ndi vhuhulu.” Naho vhuhulwane ha Yehova vhu sa ṱalukanyei, u hulisa vhashumeli vhawe vha vhathu nga u vha fara nga vhuhwavho. O ḓala tshilidzi, nahone o ḓiimisela u hangwela vhaitazwivhi vha rembuluwaho nga tshiitisi tsha tshiṱhavhelo tsha Yesu tshi rengululaho. Yehova ha fheli mbilu, u ṋea vhashumeli vhawe tshibuli tsha u kunda vhushayanungo vhune ha nga vha thivhela uri vha si dzhene shangoni ḽiswa ḽa u luga.—2 Petro 3:9, 13, 14.
23. Ndi pfaneleo dzifhio dza ndeme dzine dza ḓo ṱhogomelwa kha thero i tevhelaho?
23 Davida o renda vhuthu, kana lufuno lwa vhukuma lwa Mudzimu. Zwi re zwone ndi uri Psalme 145 i sumbedza nḓila ine Yehova a sumbedza ngayo yeneyi pfaneleo na nḓila ine vhashumeli vhawe vha fulufhedzeaho vha dzhia ngayo vhukando kha vhuthu hawe. Enea mafhungo a ḓo haseledzwa kha thero i tevhelaho.
Ni Ḓo Fhindula Hani?
• Ndi zwifhio zwibuli zwa u renda Yehova “misi yoṱhe”?
• Ndi tsumbo dzifhio dzi sumbedzaho uri vhuhulwane ha Yehova a vhu ṱalukanyei?
• Ri nga engedza hani u dzhiela nṱha madzanga a vhurena ha Yehova?
[Mbudziso Dza Pfunzo]
[Tshifanyiso kha siaṱari 10]
Milalavhungu ya fhethu hoṱhe i ṱanziela vhuhulwane ha Yehova
[Ṱhaluso ya Vhubvo ha Tshifanyiso]
Courtesy of Anglo-Australian Observatory, photograph by David Malin
[Tshifanyiso kha siaṱari 12]
Vhuhulwane ha Yehova ho sumbedzwa hani malugana na Yesu Kristo?
[Tshifanyiso kha siaṱari 13]
Musi Vhaisiraele vha tshi wana Milayo Thavhani ya Sinai, vho vhona vhuṱanzi ha madzanga a vhurena ha Yehova